Hokotaki he Tau Tagata Fakapuloa he Kauta
Fakalataha he Kupu Moli he Tohi Tapu e Magafaoa
HE VAHA nei, ke he tau fahi loga he lalolagi, kua teitei e magafaoa fefakalatahaaki ke eke mo mena he vaha kua mole. Ka e pete ni ia, kua fakakite mai he Tohi Tapu e mena fufu kua lata ma e magafaoa fefakalatahaaki. Kia manamanatu la ke he tau kupu a Iesu: “Ka fanogonogo taha ke he haku a tau kupu nai, mo e eke ai e ia, to fakatai e au a ia ke he tagata loto matala ne fakatu e ia hana fale i luga he mena patu.” (Mataio 7:24) Kua loga e tau afe he tau magafaoa ne ha ha he Tau Fakamoli a Iehova kua fefakalatahaaki he fakagahua e tau kupu nai mo e he fakaaoga e Tohi Tapu mo fakaveaga ke ati hake aki e magafaoa ne fetataaki lahi. Kua moua foki he falu e fefakalatahaaki pihia, tuga ka fakakite mai he mena tupu ne mui mai.
He magaaho ne fekafekau a Daniel he matakautau a Falani, ne tala age he faifeau he matakautau ki a Daniel ke fakatau e taha Tohi Tapu, ko e mena ne taute e ia, mo e kamata a ia ke totou ai tumau. Ati hoko ai kua fakafano a ia ki Tahiti. Ko e falu ne kautau fakalataha mo Daniel, ko e tau Aho Fitu mo e tau Mamoga e falu. Ne fa mahani ha lautolu a tau tutala ke fuluhi ke tala fakalotu. He taha aho ne fakafeleveia fakapa he satini ne mua a Daniel ke he hana hoana, ko e taha he Tau Fakamoli a Iehova. Ne fakamole e ia [fifine] e magaaho pale la katoa ke tali e tau huhu loga a Daniel mo e tala age ki a ia e taha he tau fakapotopotoaga he Tau Fakamoli a Iehova he matakavi ia i Tahiti. Kua nakai leva ne kamata a Daniel ke fakaako Tohi Tapu tumau.
Ko e tau Katolika loto fakamoli lahi e tau mamatua a Daniel i Falani. Ko e tagata fakatonutonu he aoga e matua tane hana mo e leveki e tau fakaakoaga fakalotu he aoga Katolika. He manako ke iloa foki he tau mamatua hana e falu he tau koloa uho fakaagaga ne ako a ia ki ai, kua kamata a Daniel ke fakahu e falu manatu faka-Tohi Tapu gahoa i loto he tau tohi hana ki a laua.
Fakamua ne fiafia lahi e matua fifine a Daniel, ka e kua ofomate a ia he kitia e higoa a Iehova i loto he taha he tau tohi he hana tama tane. He tau aho gahoa ne mole, ne logona e ia e fakaholoaga letio ne talahau ko e “matakau hagahaga kelea lahi” e Tau Fakamoli a Iehova. Ne tohi a ia ki a Daniel, kua ole ki a ia ke oti fakaave hana tau matutakiaga oti mo e Tau Fakamoli. Ka e pete ni ia, ne fakatumau na Daniel ke holo ki mua hana fakaako Tohi Tapu mo e nakai leva kua taute e tau fakatokatokaaga ke fakaoti mai he matakautau mo e liu ki Falani.
He magaaho ne hoko a ia ki kaina, ne fakamole e Daniel e tau afiafi takitaha—he falu magaaho kua tuloto e po—he loa e tutala Tohi Tapu mo e hana matua fifine. Ati hoko fakamui ne talia a ia ke o fakalataha mo Daniel ke he Fale he Kautu. He magaaho ne fano fakapa a ia ke he feleveiaaga, kua nava lahi a ia ti kamata a ia ke fai fakaakoaga Tohi Tapu tumau. Ne mafiti lahi hana holo ki mua mo e kua nakai leva kua papatiso.
Ko e tagata loto fakauka e matua tane a Daniel ka e tukulele lahi ke he hana a feua mo e tau gahua lotu. Ka e hoko ni he taha magaaho, kua fakaholo hana hoana mo Daniel ke he fonoaga he fahi motu. Ko e Iulai 14, mo e ha ha he loto hana ke fano ke kitekite ke he fakakitekite he Aho Bastille he loto taone. He fakatalitali a ia ne fifili ai he fia kitia atu, ke onoono ki loto he fale he fonoaga. Ne nava lahi a ia ke he maopoopo mo e mafola ne kitia e ia ke he vahaloto he tau tagata a Iehova, mo e he fano a ia ke he tau fahi gahua kehekehe he fonoaga ne ui tumau he tau tagata a ia ko e “matakainaga.” Ne nimo katoatoa e ia e fakakitekite he Aho Bastille mo e nofo ti oti e fonoaga. Ne ole a ia ke fai fakaakoaga Tohi Tapu mo e mafiti lahi e holo ki mua ke ako e kupu moli. Ka e pete ni ia, he lahi e mena ne ako e ia, kua kamata lahi a ia ke nakai mitaki e logonaaga ke he hana gahua, ti kua tiaki e ia hana gahua he 58 e tau tau he hana moui. He magaaho nei kua tukulele mo e papatiso oti a lautolu tokotolu he magafaoa mo e fefakalatahaaki ke fekafekau auloa ki a Iehova.
Ko e kupu moli he Tohi Tapu ne fakalatahaaki e magafaoa a Daniel. Ti kua maeke foki ke fakalataha e falu magafaoa kaeke kua ako a lautolu mo e fakagahua ai mai he loto katoa.