Ko e Laulau Fe ne Kai ai a Koe?

“Ti nakai maeke ke fai tufaaga he laulau [“a Iehova,” NW] katoa mo e laulau he tau temoni.”​—1 KORINITO 10:21.

1. Ko e heigoa e tau laulau ne kua fakatoka ki mua ia tautolu, mo e ko e heigoa e hatakiaga ne foaki mai he aposetolo ko Paulo kua hagaao ki a laua?

KUA fakakite mai he tau kupu he aposetolo ko Paulo mai he agaga tapu ko e ua e tau laulau fakatai ne kua fakatoka ki mua he tau tagata. Kua takitaha e laulau ke fakamailoga he tau faga mena kai fakatai ne toka ai i luga, mo e kua kai a tautolu oti kana he taha po ke he taha. Ka e taha e mena, kaeke kua manako a tautolu ke fakafiafia e Atua, kua nakai maeke a tautolu ke kai he laulau hana mo e he magaaho taha kua katikati mena he laulau he tau temoni. Ne hataki mai e aposetolo ko Paulo: “Ka ko e tau mena kua keli mo poa he tau motu kehe, kua keli mo poa ai e lautolu ke he tau temoni, ka e nakai ke he Atua; nakai loto foki au ke fakafetui fakalataha a mutolu mo e tau temoni. Mena nakai maeke ia mutolu ke inu ke he kapiniu he Iki katoa mo e kapiniu he tau temoni; ti nakai maeke ke fai tufaaga he laulau [“a Iehova,” NW] katoa mo e laulau he tau temoni.”​—1 Korinito 10:20, 21.

2. (a) Ko e heigoa e laulau a Iehova ne kua ha ha he tau aho a Isaraela i tuai, mo e ko hai ne fakalataha ke he tau poa fakaaue? (e) Ko e heigoa e kakano ka kai mena he laulau a Iehova he vaha nei?

² Kua fakamanatu mai he tau kupu a Paulo ki a tautolu e tau poa fakaaue ne foaki hake he tau Isaraela i tuai he ha ha i lalo he Matafakatufono a Iehova. Ne fakahigoa e fatapoa he Atua ko e laulau, mo e ko e tagata kua tamai e manu huifa ke poa, ne kua pehe hagaao ki ai, kua taute poa fakaaue fakalataha mo Iehova mo e tau ekepoa. Fefe? Fakamua aki, ne fai vala a Iehova i loto he poa kakano ha kua ganagana e toto ki luga he fatapoa hana mo e kua otioti e gako ha ko e puho afi vela i lalo. Ke ua aki, ne fakalataha e ekepoa i ai ha kua kai e ia (mo e hana a magafaoa) e fatafata mo e hui matau tao paku he manu ne poa. Mo e ke tolu aki, ne fakalataha e tagata ne foaki hake, he kai e mena ne toe. (Levitika 7:11-36) He vaha nei, ko e kakano he kai mena he laulau a Iehova ko e tuku atu e tautolu ki a ia e faga tapuakiaga kua manako a ia ki ai, tuga ne fakakite mai he fakafifitakiaga a Iesu mo e hana tau aposetolo. Ke taute e mena nei, kua lata a tautolu ke kai fakaagaga e tau mena ne foaki e Iehova ne kua puhala mai he hana Kupu mo e fakatokatokaaga. Ko e tau Isaraela, ne kua olioli ke he poa fakaaue pauaki mo Iehova ke he hana laulau, kua hataki atu ki ai ke nakai foaki e tau poa ke he tau temoni mai he ha lautolu a laulau. Kua ha ha i ai e tau Isaraela fakaagaga mo e ha lautolu a tau hoa ko e “falu mamoe” i lalo he hatakiaga faka-Atua taha.​—Ioane 10:16.

3. Kua maeke fefe e taha ke eke ke agahala he kai mena he laulau he tau temoni he vaha ha tautolu?

³ Kua maeke fefe a taha ke agahala he kai mena he laulau he tau temoni he vaha ha tautolu? He fekafekau ke he tau mena oti ne totoko ki a Iehova. Ha kua fakalataha ke he laulau he tau temoni e tau tala fakaohooho oti kana fakatemoni, ne kua talaga ke fakahehe mo e liliu kehe a tautolu mai ia Iehova. Ti ko hai ne manako ke fagai ke he hana loto mo e loto manamanatu e tau mena kona pihia? Kua nakai talia e tau Kerisiano moli ke fakalataha ke he tau poa ne kua foaki hake he tau tagata tokologa he vaha nei ke he tau atua he felakutaki mo e maukoloa.​—Mataio 6:24.

Kalo Kehe he “Laulau he Tau Temoni”

4. Ko e heigoa e huhu ne kua fakafehagai mo tautolu oti kana, mo e nakai lata he ha a tautolu ke loto ka e iloa tonu ko e kai mena he laulau he tau temoni?

⁴ Ko e huhu anai ne kua fehagaoaki a tautolu oti kana ki ai, Ko e laulau fe ne fae kai ai au? Kua nakai maeke a tautolu ke fehola mai he mena moli, kua lata lahi na tautolu ke tahamaka ne laulau ka kai i ai. (Fakatatai Mataio 12:30.) Ti kua nakai lata a tautolu ke manako, ka e iloa tonu, ko e kai mena he laulau he tau temoni. Ke taute e mena ia, ko e totogi ni ka moua to galo mai ia tautolu e fiafia pauaki he Atua moui mo e moli ni hokoia, ko Iehova. Ka e he taha fahi, ko e kai mena kai ni hokoia he laulau a Iehova ka takitaki a tautolu ke he moui tukulagi kua fiafia lahi! (Ioane 17:3) Kua ha ha ai e taha talahauaga ne pehe, kua eke ne tagata ke tuga e tau mena ne kai e ia. Ti kua lata ni mogoia e ha tagata, ne kua manako ke kuku mau e tino malolo mo e manamanatuaga malolo mitaki, ke onoono fakamitaki ke he hana tau mena ne kai. Ke tuga ne tau mena kai nakai fai aoga ne gako lahi, pete ni kua lolo he tauteute aki e tau vai ne lafi ki ai, kua nakai lagomatai ke taofi mau ha tautolu a tau tino malolo, ti kua pihia ni e tau tala fakaohooho he lalolagi ne fakahui aki e tau manamanatu fakatemoni ko e tau mena kai nakai fai aoga fakatai ne kelea ka fakakelea aki ni ha tautolu a tau loto manamanatu.

5. Kua maeke fefe ia tautolu ke kalo kehe mai ke nakai uta ki loto e tau fakaakoaga he tau temoni?

⁵ Ne talahau tuai he aposetolo ko Paulo to ha ha he vaha he tau aho fakamui, e tau tagata kua fakahehe he “tau kupu he tau temoni.” (1 Timoteo 4:1) Kua nakai moua hokoia ni e tau fakaako fakatemoni pihia he tau taofiaga he tau lotu fakavai ka e kua tukuogo lahi foki he tau puhala kehekehe a lautolu. Ke fakatai ki ai, kua lata a tautolu ke kitekite mo e fuafua fakamitaki ko e tau faga tohi mo e tau mekasini fefe ne totou e tautolu mo e ha tautolu a tau fanau, ko e tau fakaholoaga televisoni fefe ne kitekite a tautolu ki ai, mo e ko e tau taute tala mo e tau ata kifaga fefe ne kitekite a tautolu ki ai. (Fakatai 14:15) Kaeke kua totou e tautolu e tala fakatai mo fakafiafia tino, kua tala kia ke he mahani vale goagoa, mahani fakatane mo e fifine holifono, po ke tau gahua mana galo? Kaeke kua totou e tautolu e tau tohi ke he tala moli ke maeke ai ke fakamahani, kua fakaohooho kia e tau fakaakoaga fakataitai po ke puhala he moui kua “nakai lata mo e Keriso”? (Kolose 2:8) Kua fakakite mai kia e tau tala fakahaha gatigati, po ke putoiaaga kia ke he tau omoiaga fakakaufakalatahaaga he lalolagi ne kua tukuogo? Kua fakaohooho kia e manako lahi ke maukoloa fakamafiti? (1 Timoteo 6:9) Koenaia kia ko e tohi kua halahu e tau fakailoaaga ke he tau fakaakoaga vehevehe ne kua nakai tuga ha Keriso? Kaeke ko e e e tali mo e fakatumau a tautolu ke totou po ke kitekite ke he tau mena pihia, kua hagahaga lahi a tautolu ke kai he laulau he tau temoni. He vaha nei, kua ha ha ai e tau teau he tau afe he tau tohi ne kua omoi e tau fakaakoaga fakataitai fakalalolagi ne tuga ko e fakamaamatia mo e kua lata mo e vaha nei. (Fakamatalaaga 12:12) Ka e nakai ko e tau mena fou moli e tau fakaohoohoaga oti nei; po kua gahuahua ai ke aoga mo e fakamitaki atu a taha, ko e mena kua nakai kehe mai he mena mahifi ne talahau e Satani ki a Eva ka gahua ke fakamitaki hake a ia.​—2 Korinito 11:3.

6. Ka uiina e Satani a tautolu ke kamata hana mena kai nakai fai aoga fakatemoni, kua lata ai fefe a tautolu ke tali e mena ia?

⁶ Ha kua pihia, ka uiina e Satani a tautolu ke kamata hana tau mena kai nakai fai aoga fakatemoni, ti kua lata ai ke tali fefe a tautolu? Ke tuga ne taute e Iesu he magaaho ne kamatamata e Satani a ia ke fakafaliu e tau patuo ke he tau fua falaoa. Ne tali a Iesu: “Kua tohi, Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” Mo e he magaaho ne foaki atu he Tiapolo ki a Iesu “e tau kautu oti he lalolagi, mo e lilifu ha lautolu” kaeke ke fakaveli hifo a ia mo e hufeilo ki a Satani, ne tali a Iesu: “Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.”​—Mataio 4:3, 4, 8-10.

7. Ko e ha kua fakavaia ne tautolu a tautolu kaeke kua manamanatu a tautolu kua maeke a tautolu ke kautu lahi ka kai he laulau a Iehova mo e he laulau he tau temoni?

⁷ Kua nakai maeke e laulau a Iehova mo e laulau ne fofola he hana tau fi fakatemoni ke fakafeilo! Oi, e kua fita he lali ke taute pihia. Kia liu la ke manatu e tau Isaraela i tuai he tau aho he perofeta ko Elia. Ne pehe e tau tagata ko e tapuaki ki a Iehova, ka e talitonu a lautolu ko e tau atua, tuga a Paala, kua mavehe mai e muhumena. Ne fakatata atu a Elia ke he tau tagata mo e pehe: “To fakauaua a mutolu mo e loto ua ato a fe? Kaeke ko e Atua a Iehova, kia mumui atu a a mutolu kia ia; ka ko e mena kaeke ko Paala, kia mumui atu a a mutolu kia ia.” Mo e nakai maeke ke fakatikai, kua hopohopo ne tau Isaraela “fakamua ke he taha e hui ti ke he taha.” (1 Tau Patuiki 18:21; The Jerusalem Bible) Ne paleko a Elia ke he tau ekepoa a Paala ke fakakite moli la e tuaga atua he ha lautolu a tau atua. Ko e Atua kua maeke ke tahifo mai e afi he lagi ki luga he poa ka fakakite moli ai ko e Atua moli. Pete kua lali fakalahi, ne kaumahala ne tau ekepoa a Paala. Ti kua liogi ni a Elia: “Iehova na e, kia fanogonogo mai a kia au, kia iloa ai e motu nai ko koe ko Iehova ko e Atua.” Kua eke agataha ai e afi mai ia Iehova ke to hifo he lagi mo e vela oti e manu poa ne palakuheve lahi. He lagatia mai he fakakiteaga mauokafua ke he tuaga Atua a Iehova, ne omaoma e tau tagata ki a Elia mo e tamate e tau perofeta a Paala kua 450. (1 Tau Patuiki 18:24-40) He vaha nei, kua lata a tautolu ke mailoga ko Iehova e Atua moli mo e fuluhi fakatonu atu ke kai ni hokoia he hana laulau kaeke kua nakai la fita he taute pihia e tautolu.

‘Ko e Fekafekau Fakamoli’ kua Fekafekau he Laulau a Iehova

8. Ko e tupa fe ne talahau tuai e Iesu ka fakaaoga e ia ke fagai fakaagaga hana tau tutaki he vaha he hana ha ha hinei, mo e heigoa e fakamailoga he tupa?

⁸ Ne talahau tuai he Iki ko Iesu Keriso to foaki mai he “fekafekau fakamoli mo e loto matala” he vaha he hana ha ha hinei e mena kai fakaagaga ma e hana tau tutaki: “Uhoaki e fekafekau [“tupa,” NW] ia, ka hau hana iki mo e moua e ia ha ne eke pihia. Ko e moli, ke tala atu e au kia mutolu, to kotofa a ia ke pule ke he hana tau mena oti.” (Mataio 24:45-47) Kua fakakite moli mai e tupa nei, nakai ko e ha tagata tokotahamaka, ka ko e vahega tukulele he tau Kerisiano fakauku. Kua tuku he vahega nei ki luga he laulau a Iehova e tau mena kai fakaagaga kua mitaki lahi ma lautolu ne fakauku ne toe agaia mo e “moto tagata tokologa.” He magaaho nei kua molea e fa miliona he kau malolo katoa he moto tagata tokologa ne taute fakalataha e tuaga mo lautolu ne fakauku ne toe agaia ma e pule katoatoa ke he lagi mo e lalolagi katoatoa he Atua ko Iehova mo e hana Kautu ko e mena ka fakatapu aki e ia hana higoa tapu.​—Fakakiteaga 7:9-17.

9. Ko e heigoa e kanavaakau ne fa e fakaaoga he vahega tupa ke foaki mena kai fakaagaga ke he Tau Fakamoli a Iehova, mo e fakamaama fakaperofeta mai fefe ha lautolu a kaiaga galue fakaagaga?

⁹ Kua fakaaoga he vahega tupa fakamoli nei e Kaufakalatahaaga Tohi Tapu mo e Pepa Lotu he Kolo Toko ke foaki mai e tau mena kai kakano mitaki fakaagaga ke he Tau Fakamoli a Iehova oti kana. He magaaho kua mamate hoge a Kerisitenitome mo lautolu ne toe he fakatokaaga nei he nakai fai mena kai fakaagaga kua foaki mai e moui, kua kai galue lahi e tau tagata a Iehova. (Amosa 8:11) Ko e fakamoliaga a nei he perofetaaga ia Isaia 25:6: “To eke ai e Iehova Sapaota ke he mouga nai e galue ke he tau mena mitaki ma e tau motu oti, ko e galue e uaina ne toka ia e tau kele; ko e tau mena mitaki ue atu; ko e uaiana ne toka ai mo e tau kele kua hakahaka.” Tuga ne fakakite mai he Isa 25 tau kupu 7 mo e 8, to fakatumau tukumalagi ne kaiaga galue nei. Ko e monuina ni ki a lautolu oti kana i loto he fakatokatokaaga a Iehova kua kitia he magaaho nei, mo e ko e fakamonuinaaga ha ka eke ai ke fakatumau atu ke he vaha i mua!

Fakamamao Kehe he Mena Kai Kona he Laulau he Tau Temoni

10. (a) Ko e heigoa e faga mena kai ne tufatufa he vahega tupa kelea, mo e ko e heigoa e omoiaga he tau loto ha lautolu? (e) Ne taute mena fefe he vahega tupa kelea ke he ha lautolu a faoa tupa ne fakalataha fakamua a lautolu ki ai?

¹⁰ Ko e mena kai he laulau he tau temoni kua kona lahi. Kia manamanatu la, ke fakatai ki ai, ke he tau mena kai ne tufatufa he vahega he tupa kelea mo lautolu ne tiaki taofiaga. Kua nakai fagai mitaki po ke ati hake; nakai ni ko e mena mitaki. Nakai maeke ai, ha kua oti e kaiaga mena ha lautolu ne tiaki taofiaga he laulau a Iehova. Ko e fua, ko e tau mahani oti ne ati hake e tagata fou kua galomoki ni. Ko e mena anai ne omomoi a lautolu, nakai ko e agaga tapu, ka ko e loto konakona. Kua tomuatua ne loto ha lautolu ke he foliaga tahamaka ni hokoia​—ke keli ha lautolu a faoa he tupa ne fakalataha a lautolu ki ai fakamua, tuga ne talahau tuai e Iesu.​—Mataio 24:48, 49.

11. Ko e heigoa ne tohi e C. T. Russell hagaao ke he fifiliaga mena kai fakaagaga he tagata, mo e fakamaama fefe e ia a lautolu ne tiaki e laulau a Iehova?

¹¹ Ke fakatai ki ai, he vaha i tua matua he tau 1909, ne tohi he pelesiteni he Kaufakalatahaaga he Kolo Toko he magaaho ia, ko C. T. Russell, hagaao ki a lautolu ne kua fuluhi kehe mai he laulau a Iehova mo e kamata mogoia ke ekefakakelea e faoa he tupa ne fakalataha a lautolu ki ai he magaaho fakamua. Ne pehe e The Watch Tower ia Oketopa 1, 1909: “Ko lautolu oti kana ne kua o kehe he Kaufakalatahaaga mo e hana gahua, kua nakai holo ki mua a lautolu ni po ke ati hake e falu ke he tua mo e ke he mahani he fua he agaga tapu, kua tuga ni ia kua taute e mena kehe​—ne lali ke fakapakia e Gahua ne fekafekau fakamua a lautolu ki ai, mo e, kua eke ke go lahi po ke tote, kua tomo fakahaga ti galomoki atu ni, kua moumou ne lautolu ni a lautolu mo e falu ne kua ha ha i ai e agaga taufetoko pihia. . . . Kaeke kua manamanatu e falu kua mitaki po ke mahomo atu foki ne tau mena kai kua maeke a lautolu ke moua he falu laulau, po kua mitaki po ke mua ne tau mena ha lautolu ni ka taute​—kia toka a lautolu nei ke o he ha lautolu a puhala. . . . Ka e he magaaho kua fiafia a tautolu ke o e falu ke he ha mena he tau mena ke moua e mena kai mo e maama ne kua loto a lautolu ki ai, ka e kua fakaofo ni, ha kua kehe muatua e puhala ne uta e lautolu ne totoko ki a tautolu. Kua nakai pehe tuga e puhala mitaki ke he aga fakalalolagi, ‘Kua moua tuai e au e mena ne loto au ki ai; mutolu kia!’ ka e kua eke a lautolu nei ke fakakite e ita, loto kelea lahi, vihiatia, taufetoko, ‘ko e tau gahua he tino mo e he tiapolo’ tuga ne kua nakai iloa e tautolu e tau tagata he lalolagi ke taute. Kua tuga ko e huki aki e heketia, ko e magiho faka-Satani. Kua eke e falu ia lautolu ke fakapakia a mautolu ati talahau mogoia ko mautolu ne fakapakia atu. Kua mautali a lautolu ke talahau mo e tohi e tau mena fakavai fakateteki mo e tolotolo hifo ke taute e tau mena kelea.”

12. (a) Fahifahi fefe e lautolu ne tiaki e taofiaga ha lautolu a faoa tupa? (e) Ko e ha ai ko e mena hagahaga kelea ke kai e tau mena tohia ha lautolu ne tiaki taofiaga he fia iloa mena?

¹² E, ne tohia e lautolu ne tiaki taofiaga e tau tohi kua fakahepe pauaki, talahau fakavalavala nakai katoatoa e tau kupu moli, mo e kua fakavai pauaki ni. Ne tutu leoleo foki a lautolu he tau fonoaga he Tau Fakamoli, he lali ke hele a lautolu ne nakai matakite. Ha ko e mena ia, ko e mena hagahaga kelea ka fakaata ha tautolu a loto fia iloa tala ke omoi a tautolu ke kai mena tohia pihia po ke fanogonogo ke he ha lautolu a vagahau ekefakakelea! Liga kua eke a tautolu ke manamanatu ko e nakai hagahaga kelea a tautolu ni, ka e kua ha ha agaia ni he mena hagahaga kelea. Ko e ha? Ke taha e mena, kua foaki mai he tau tohi ha lautolu ne tiaki taofiaga e tau mena fakavai kakano ha ko e “tau kupu momole” mo e “tau kupu fakatupua ha lautolu.” (Roma 16:17, 18, NW; 2 Peteru 2:3) Ka ko e higoa foki ne kua amaamanaki a koe ke moua mai he laulau he tau temoni? Mo e pete ni kua tuku mai foki e lautolu ne tiaki taofiaga e falu mena moli pauaki, ne kua fa mahani ke lagaki kehe mai he tala pauaki e tau mena nei he foli ke fatiaki e falu mai he laulau a Iehova. Kua loma ni e tau mena tohia oti kana ha lautolu mo e uulu ki lalo! Kua nakai ati hake ha mena.

13, 14. Ko e heigoa e tau fua ha lautolu ne tiaki e taofiaga mo e ha lautolu a tau fakaohoohoaga?

¹³ Ne pehe a Iesu: “To iloa mali e mutolu a lautolu ke he tau fua ha lautolu.” (Mataio 7:16) Ko e heigoa mogoia, e tau fua ha lautolu ne tiaki taofiaga mo e ha lautolu a tau tohi? Kua fa e tau mena ne fakamailoga aki ha lautolu a tau tala fakaohooho. (1) Ko e mahifi. Kua pehe mai a Efeso 4:14 kua eke e lautolu e “tau lagatau kelea kua taute ke fakahehe ai.” (2) Iloilo fakaikaluga. (3) Nakai fai fakaalofa. (4) Kua nakai fakamoli ke he tau puhala kehekehe. Ko e tau valavala kehekehe he tau mena kai anai he laulau he tau temoni, ko e tau mena oti kana ne kua talaga ke fakalolelole e tua he tau tagata a Iehova.

¹⁴ Mo e kua ha ha i ai foki e taha mena. Kua liliu a lautolu ne tiaki taofiaga ke he heigoa? Kua tokologa ia lautolu, kua liliu a lautolu ke huhu atu ke he pouligia a Kerisitenitome mo e hana tau fakaakoaga, tuga e taofiaga ko e o e tau Kerisiano oti kana ki luga he lagi. Ke lafi foki ki ai, kua tokologa mai ia lautolu kua nakai taofi mau e tuaga faka-Tohiaga Tapu hagaao ke he toto, tunoa nakai kau, mo e lata ke fakamoli hagaao ke he Kautu he Atua. Ka kua fita a tautolu mogoia, he fehola kehe mai he pouligia a Papelonia Lahi, mo e nakai manako a tautolu ke liliu ki ai. (Fakakiteaga 18:2, 4) Ha ko e tau fekafekau fakamoli a Iehova, kua loto he ha a tautolu foki ke kiakia atu ke he fakaohoohoaga ne kua foaki mai e lautolu nei ne nakai talia e laulau a Iehova ne kua fahi kupu aki e lautolu he magaaho nei a lautolu ne lagomatai a tautolu ke uta ki loto e “tau kupu tonu”?​—2 Timoteo 1:13.

15. Ko e heigoa e matapatu fakaakoaga he Tohi Tapu kua lagomatai aki a tautolu ke uta e puhala pulotu ka logona e tautolu e tau tukumale ne taute e lautolu ne tiaki e taofiaga?

¹⁵ Kua liga eke falu ke fia matakuene hagaao ke he tau tukumale ne talahau e lautolu ne tiaki taofiaga. Ka kua lata a tautolu ke uta ke he tau loto e tau matapatu fakaakoaga ia Teutaronome 12:30, 31. Hanai kua puhala mai e Iehova ia Mose ke he tau Isaraela e hatakiaga ko e heigoa ke fakamamao ki ai ka oti he uta kehe e lautolu e tau tagata pouliuli he Motu he Maveheaga. “A koe, neke hele ai a koe he hau a mui atu kia lautolu, ka kua mahaikava a lautolu ki mua hau, aua foki neke kumi atu ke he tau atua ha lautolu, kua pehe age, Po ke fekafekau fefe e tau motu ke he ha lautolu a tau atua? ke eke ai pihia ni e au. Aua neke eke pihia a koe kia Iehova hau a Atua.” E, kua iloa he Atua ko Iehova ko e gahua fefe e fia iloa mena he tagata. Kia manatu la a Eva mo e hoana a Lota foki! (Luka 17:32; 1 Timoteo 2:14) Kia nakai fakateliga a tautolu ke he tau mena ne talahau po ke taute e lautolu ne tiaki e taofiaga. Ka e kehe, kia lavelave a tautolu he ati hake e tau tagata mo e kai fakamoli he laulau a Iehova!

Ko e Laulau Ni a Iehova ka Mau Tumau

16. (a) To nakai leva ko e heigoa ka hoko ki a Satani, hana tau temoni, mo e laulau fakatai ne kua kai mena e tau motu he lalolagi i ai? (e) Ko e heigoa ka hoko ke he tau tagata oti kana ne fakatumau ke kai mena he laulau he tau temoni?

¹⁶ To nakai leva, to hoko mai fakalutukia e matematekelea lahi, kua holo mafiti atu ke he tapunu ko e ‘tau he aho lahi he Atua mana.’ (Fakakiteaga 16:14, 16) To hoko ai ke he tapunuaga he fakaoti e Iehova e fakatokaaga nei mo e laulau fakatai ne kua kai e tau motu he lalolagi i ai. To uluulu hifo foki e Iehova e tau fakatokatokaaga katoa a Satani ko e Tiapolo ne nakai kitia fakalataha mo e hana fuifui temoni. Ti ko lautolu ne fakatumau ke kai he laulau fakaagaga a Satani, ko e laulau he tau temoni, ka mataofi ni ke fakalataha ke he kaiaga mena kai moli, nakai ke kai mena kai, ka e eke mo mena kai lahi​—ke he ha lautolu a fakaotiaga!​—Kikite Esekielu 39:4; Fakakiteaga 19:17, 18.

17. Ko e heigoa e tau fakamonuinaaga ka o mai ki a lautolu ne kua kai mena ni hokoia he laulau a Iehova?

¹⁷ Ko e laulau ni hokoia a Iehova ka mau tumau. Ko lautolu kua fakaaue mo e kai mena i ai ka laveaki mai mo e to monuina ke kai i ai he tau magaaho oti kana i mua. To nakai liu foki e kuku he ha faga mena kai ke fakamatakutaku aki a lautolu. (Salamo 67:6; 72:16) Kua toa feka a lautolu fekafekau ke he Atua ko Iehova i Parataiso! Kua hoko ai tuai e tau kupu hokotia ia Fakakiteaga 21:4 ke he fakamoliaga homo ue atu: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” Ha ko e mena he vaha tuai e totokoaga, to tamai ai he pule katoatoa ke he lagi mo e lalolagi katoa he Atua ko Iehova ke he tau matakavi oti, ati hoko ki tukulagi tukumuitea he fakamaligi mai e fiafia pauaki faka-Atua kua nakai oti ki luga he tau tagata ne nonofo he lalolagi Parataiso. Ke moua e palepale nei, kia eke a tautolu oti kana ke lotomao ke kai mena ni hokoia he laulau a Iehova, ne kua puapua mo e tau mena kai fakaagaga kua mahomo atu e mitaki!

To Tali Fefe e Koe?

◻ Maeke fefe ia tautolu ke kalo kehe mai ke nakai fakahehe he tau fakaakoaga fakatemoni?

◻ Ko e ha kua nakai maeke a tautolu ke kautu ka kai mena he laulau a Iehova mo e he laulau he tau temoni?

◻ Ko e faga mena kai fefe ne tufatufa e lautolu ne tiaki e taofiaga?

◻ Kua hagahaga kelea he ha ka fia iloa mena hagaao ke he tau tukumale ha lautolu ne tiaki e taofiaga?

◻ Ko e heigoa e tau fua ha lautolu ne tiaki e taofiaga?

[Fakatino he lau 18]

Kua puapua e laulau a Iehova mo e tau mena kai fakaagaga kua mahomo atu e mitaki