Ne ‘Fakafua Mai e Lautolu e Kupu Moli’!

‘KIA fakafua mai ā e kupu moli, aua neke fakafua atu.’ (Tau Fakatai 23:23) Kua tomatoma pihia he tagata pulotu ko Solomona. He kua talahau pihia hagaao ke he kupu moli, kua mahomo atu ai ka hagaao ke he kupu moli ne moua he Kupu he Atua, ko e Tohi Tapu. Maeke he kupu moli pihia ke takitaki atu ke he moui tukulagi! (Ioane 17:3, 17) Ka kia mailoga, ke moua e kupu moli pihia kua nakai hoko noa mai. Kua lata e tagata ke fakamakai ke “fakafua mai” ai, ko e pehe a ia ke poa po ke fakamole taha mena ke moua aki. (Fakatatai Mataio 13:45, 46.) Ke he laulahi, kua nakai mafai e tau tagata ke taute pihia. Ka e he tau motu loga, ko e tau numera he tau tagata loto malolo ne tupu hake agaia hane fa e fakafua mai e kupu moli he Tohi Tapu​—ti fa mahani ai ke lahi e totogi ke he tagata.

Kia onoono, ke fakatai ki ai, ke he Tau Fakamoli a Iehova he motu he Fahi Lalo a Aferika ko Kana. Ia Iuni he 1989, kua molea ai 34,000 he tau tagata he motu ia ne kuputi mai e kupu moli he Tohi Tapu mo e kua fakamatala ai ke he falu. Ati hoko ai e fakakaupa he fakatufono e gahua fakamatala ke he tau tagata. Ka ko lautolu ne loto fakamoli kua fakatumau ke ‘fakafua mai e kupu moli’​—pete ni ko e tau fakaalaia he fakatufono. Kua fakaoti ai e kaupaaga ia Oketopa 31, 1991, mo e he lotouho he 1995, ko e tolu mo e hafa ni e tau tau he mole e uta kehe e tau fakakaupaaga ia, kua tupu tolomaki e tau numera he Tau Fakamoli a Iehova i Kana ke 46,104! Mo e he tau nei kua holo hake e numera ke molea e 52,800.

Ko e heigoa ne futiaki e tau tagata ke he kupu moli he Kupu he Atua? Ko e heigoa e tau poa ne taute he falu ke ‘fakafua mai e kupu moli’? Ke moua e tali, kia onoono atu a tautolu ke he tau fakafitaaga he tau Kerisiano tokotolu i Kana.

Futiaki he Tau Fakaakoaga he Tohi Tapu

Kia onoono fakamua a tautolu ke he fifine ne molea fakatote laia e 20 tau hana. Ko e akoako e matua tane hana, ka e fifili e ia ke toka e lotu he matua hana. Ko e kakano? Hana loto ke he kupu moli.

Ne lagataha e fakamaama mai e ia: “Ne fa o mai e Tau Fakamoli ke he loto kaina ha mautolu ha ko e ha lautolu a gahua ke he taha mo e taha fale. He mole e fai fakatutalaaga mo lautolu, ne mailoga e au ko e tau mena ne fakaako e lautolu kua moua moli i loto he Tohi Tapu. Ne huhu e au e tau huhu ne matapatu ke he Tolu Taha, afi i helo, nakai maeke ke mate e solu, mo e mua atu ke he fakamaloloaga he tua. Nukua lahi e talitonu haku ko e mai he Tohi Tapu e tau taofiaga nei. Ka kua lagomatai he Tau Fakamoli au ke kitia na nakai pihia.”​—Ke kitia e talahauaga he Tohi Tapu ke he tau matapatu tala ia, fakamolemole kikite Mareko 13:32; Roma 6:23; Gahua 10:40; mo e 1 Korinito 13:8-10.

Ne talahau foki he tamafine fuata: “Ka kua lahi agaia e totoko he magafaoa haku, mahomo atu ke he haku matua tane. Manatu a ia kua fakahehe a au. Ka e, iloa e au ko e tau mena ne ako e au mai he Tau Fakamoli a Iehova ko e kupu moli. Ne lali au ke fakamahani e matua tane haku mo e tau mena nei mai he Tohi Tapu, ka e nakai fanogonogo a ia. Ko e mena tupu, ne tupu ki mua e totoko.

“Ka e nakai lutulutu au. Mailoga e au ko e iloilo moli ni ka takitaki atu ke he moui tukulagi he Parataiso, ati fakamakamaka ai au ke kuku mau ki ai. He mogo ne iloa he Tau Fakamoli he matakavi e tau mena fakalavelave ne fehagai mo au, ne o mai a lautolu mo e finagalo fakaalofa ke lagomatai au, fakamafana mai au mo e ta mai e tau koloa kua lata mo au. Kua lagomatai he mena nei au ke kitia e aoga he tau kupu a Iesu ne moua he Ioane 13:35: ‘Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.’ Ati fakahokulo ai e tali tonu haku kua fakagahuahua he Tau Fakamoli a Iehova e lotu moli. He mogo fakamui, he kitia he tau matua haku kua mitaki mai e moui haku, ne fiafia a laua ke he mena ne kitia e laua, mo e hiki ai e tau manatu ha laua ki a au​—kua mitaki lahi ai ati ole e matua tane haku ke he Tau Fakamoli ke fakaako e Tohi Tapu mo e haku tugaane uluaki!”

Kitia Moli ni e Ia e Kupu Moli

Ke ‘fakafua mai e kupu moli’ kua uka foki ke he falu fuata ikiiki ne kua feaki hake he tau matua Fakamoli. Kua fakahihiga e falu fuata ke uta fakateaga e kupu moli he Tohi Tapu. Kaeke ke mahala a lautolu ke taute ma lautolu ni e kupu moli ia, to lolelole mo e lakelake e tua ha lautolu. (Fakatatai ­Mataio 13:20, 21.) Ko Nathaniel, ko e tagata tane Kana ne tepu 30 tuma e tau hana, kua tutala mai ke he puhala ne ‘fakatau e ia e kupu moli’ he vaha tama tote agaia a ia.

“Ne fakaako he tau matua ki a au e Tohi Tapu he vaha tote au,” he manatu e ia. “He lahi hake au, ne fakatauo au mo laua ke he gahua fakamatala, ka e nakala fifili moli ia au ke eke mo Fakamoli. Fai magaaho, ne mailoga e au kua lata ia au ke taute e kumikumiaga ma haku ni.

“Fakamua, kua lata ai au ke talia moli ko e Tohi Tapu ko e Kupu moli he Atua, nakai ko e ha tohi tapu he lotu. Mai he fakaako fakatagata, ne ako e au ko e tohi tapu haia ne toka ai e loga he tau ­perofetaaga maaliali ne kua tonuhia e tau fakamoliaga. Iloa foki e au kua ha ha he Tohi Tapu e tau fakamoliaga fakasaiene​—tuga e lalolagi ne ‘nakai ha i ai ha mena ke tautau ki ai.’ (Iopu 26:7) Kua afe e tau tau ne tohia ai e tau kupu nei ato lotomatala e tau saienetisi ke he fakatokaaga sola (solar) ha tautolu. Ko e Atua hokoia ka omoi e tau tagata ke tohia e tau mena pihia!a

“Taha mena foki, ne fia loto au ke kitia ko e fakatokatokaaga lotu fe ne fakaako mo e fakagahuahua e kupu moli ne fakaako i loto he Tohi Tapu. Kua fakaako he laulahi he tau lotu e afi a helo, ko e Tolu Taha, mo e solu nakai maeke ke mate ne hao mai he mate. Ka kua nakai fai kakano e tau taofiaga nei ki a au. Ne manamanatu au: Nakai kia ko e matua tane kelea ka tuku e lima he tama hana i loto he ulo puna ke fakahala a ia? Ti, maeke fefe mogoia e Atua fakaalofa ke tolo e fanau hana ki loto he afi i helo mo e toka a lautolu ke matematekelea? Ka kua fakaako he Tau Fakamoli a Iehova hagaao ke he tau kupu he Tohi Tapu tuga ia Roma 6:23, ne pehe mai: ‘Ko e mate ko e palepale ia he hala’​—nakai ko e afi i helo. Kua kakano e mena nei ki a au.

“Mailoga foki e au kua poaki he Tau Fakamoli a Iehova e tau tagata oti i ai ke moui ke he tau poakiaga he Tohi Tapu mo e tuku ki tua e lautolu a lautolu oti ne agahala mo e nakai tokihala. He onoono ke he tau mena oti nei, ne fakaoti e au kua ha ha he Tau Fakamoli a Iehova e kupu moli, mo e taute e au e fifiliaga fakatagata ke eke mo taha ia lautolu. Ne gahua lahi au ke lata ke papatiso mo taha he Tau Fakamoli.”​—1 Korinito 5:11-13.

Ti fakakite he mena tupu ki a Nathaniel kua lata foki he tau fuata ne feaki hake he tau matua Kerisiano ke ‘fakafua mai e kupu moli.’ Kia nakai omaoma noa ni a lautolu ke he tau feleveiaaga he fakapotopotoaga. Ke tuga e tau Perea he vaha i tuai, kia “kumikumi [a lautolu] ke he tau Tohi ke he taha aho mo e taha aho, po ke moli e tau mena ia.” (Gahua 17:11) Kua fai magaaho mo e fai laliaga e mena nei, ka e maeke ke tupu mai e tua mo e talia malolo.​—Fakatatai Efeso 3:17-19.

Fakahehe he Lotu Pikopiko

Ko e tagata tane Kana ne higoa ko Godwin kua teitei ke 70 he magaaho ne tiaki e ia e Lotu Peresipateria mo e Masonic Lodge. “Kua fai mena i loto he tapu ne mailoga e au ke nakai hako,” he talahau e Godwin. “Ke fakatai ki ai, kua loga e tau fetoko, mo e kua pihia agaia. Falu mogo fa o mai e tau leoleo ke fakamafola! Manatu au nakai hako e mena nei ma e tau tutaki ha Keriso. Ti tupu e lekua ke he vahaloto he taha tagata Peresipateria mo au. Ne uta ai ke he fale hopo mo e fakahala ai e taha tagata. Ka e pete ni ia, ne kau atu e akoako he tapu mo e tagata nei mo e lali ke fakafili au i mua he fakapotopotoaga katoa! Ne tala age fakamoli e au ki a ia e manatu haku mo e hu ki fafo he fale tapu​—nakai ke liu.

“Fai magaaho ne mole, mo e o mai e Tau Fakamoli ke he loto kaina haku. He mogo fakamua, ne fanogonogo noa au kakano nakai manako au ke fuluhi kehe e tau tagata tala ke he Atua. Ka e kamata au ke mailoga ko e pete ke fiha e leva e Peresipateria au, kua loga e tau mena ne nakai iloa e au hagaao ke he Tohi Tapu. Ke fakatai ki ai, ne nakaila iloa ia e au na ha he Tohi Tapu e amaamanakiaga ke moui tukulagi he Parataiso he lalolagi.b Mo e he magaaho ne kamata au ke fano ke he tau feleveiaaga he Tau Fakamoli a Iehova, ko e tau aga, mo e mua atu ke he tau teuteuaga mo e kitiaaga he tau fuata ia lautolu, kua nava lahi ai e au. Ko e tau tagata tukua anei ne moui moli ke he tau matapatu fakaakoaga he Tohi Tapu!”

Pete ni ia, ke ‘fakafua mai e kupu moli’ kua lata ia ia ke taute e tau hikihikiaga mamahi he hana moui. Ne manatu e Godwin: “Ko e taha he Masonic Lodge au. Mo e pete ke talahaua ko e kaufakalatahaaga fakamatakainaga ne foaki lagomatai ke he tau tagata i ai, ne fa fano au ke he tau tafeauhi ne fakaaoga e tau gati ulu mo e tau polohui aitu mo e hea lagomatai ke he tau agaga. Kua fakapikopiko e tau agaga nei ke lagomatai a lautolu ne fegahuaaki mo lautolu ke tupu fakaagaga.

“Kua lagomatai he tau fakaakoaga haku au ke kitia na vihiatia e Iehova ko e Atua ha putoiaaga ke he tau matutakiaga fakataulatua kakano kua maeke he naia ke fakahokotia atu taha ki lalo he fakaohoohoaga a Satani mo e hana a tau kau agaga kelea.c To fakatumau nakai au ke eke mo taha he Masonic Lodge mo e hana tau mena fakataulatua, po ke to tiaki kia e au mo e fakafiafia a Iehova? Ne fifili e au e mena fakamui. Ne tiaki oti e au e tau koloa he Freemason ne toka ia au, pihia foki e tautetaha ne fakaaoga e au ma e tau feleveiaaga he Lodge. Ne kitia e au e moli he maveheaga a Iesu he mogo ne talahau a ia: ‘Ko e kupu moli foki ke toka noa ai a mutolu’! (Ioane 8:32) Mogonei kua fiafia au ke talahaua atu ke he falu e tau mena ne ako e au. Kua nakai liu tua e manatu haku.”

Tokologa e totou afe tagata kua loto fakamoli ne taute e tau poa mamahaki pihia foki ke ‘fakafua mai e kupu moli.’ Tuga e tau Kerisiano tokotolu ne fakatutala ki ai, kua nakai mafai a lautolu ke liliu tua ha ko e tau hikihikiaga ne taute e lautolu. Kua tuku age he Tohi Tapu ki a lautolu e “fakakavega mitaki mo e tau aho ne tatali, kia toto atu e lautolu ke he moui tukulagi.” (1 Timoteo 6:19) Kua lata foki e “moui tukulagi” mo e tau monuinaaga ne fakalataha ki ai ke eke fakaoti maau ane mai ke ‘fakafua mai e koe e kupu moli.’

[Tau Matahui Tala]

[Fakatino he lau 7]

Nathaniel

[Fakatino he lau 7]

Godwin