“Fiafia a Lautolu ne Manamanatu ke he Tau Mena Fakaagaga kua Lata ma Lautolu”
KA AALA e tau manu lele he mogo pogipogi, fa mahani a lautolu ke fai magaaho he kiokio ti felele ke kumi mena kai. He mogo afiafi, ne liliu a lautolu ke he tau ofaga ha lautolu, liu kiokio foki, ato momohe. He tau vaha pauaki ne laka, fanau e tau fufua, mo e feaki e tau punua ha lautolu. Ko e puhala taha ia ni ne taute he falu manu.
Kua kehe a tautolu ko e tau tagata. Moli, kua kai, momohe, mo e fanafanau a tautolu, ka e tokologa ia tautolu kua nakai ni fiafia ke he tau mena ia. Kua manako a tautolu ke iloa e kakano ne momoui a tautolu. Kua kumi e tautolu e kakano he tau momoui ha tautolu. Kua manako foki a tautolu ke amaamanaki ma e vaha anoiha. Ko e tau manako aoga nei ne fakakite e uho ne mua ue atu ke he tau tagata—ko e tuaga fakaagaga, po ke manako mo e maama e tau mena fakaagaga.
Taute ke he Fakatai he Atua
Kua fakamaama he Tohi Tapu e kakano ma e tuaga fakaagaga pauaki he tagata, he pehe: “Ti eke ai he Atua e tagata ke he hana fakatai, ko e fakatai he Atua ne eke ai e ia; ne eke e ia a laua ko e tane mo e fifine.” (Kenese 1:27) Ha ko e taute ha tautolu ke he “fakatai he Atua” kua kakano pete ni he ilaila a tautolu he agahala mo e nakai mitaki katoatoa, kua ha ha ia tautolu e lotomatala ke kitia falu mahani he Atua. (Roma 5:12) Ma e fakatai, kua maeke ia tautolu ke tufuga. Ha ha foki ia tautolu e pulotu, fakafili tonu, mo e lotomatala ke fakakite e fakaalofa foaki noa ma e falu. Lafi ki ai, maeke ia tautolu ke manamanatu ke he vaha kua mole mo e fakatokatoka ma e vaha anoiha.—Tau Fakatai 4:7; Fakamatalaaga 3:1, 11; Mika 6:8; Ioane 13:34; 1 Ioane 4:8.
Ko e lotomatala fakaagaga ha tautolu kua fakatata moli he manako pauaki ha tautolu ke tapuaki e Atua. Ka nakai moua e tautolu e fakafetuiaga mitaki mo e Tufuga, to nakai moua e tautolu e fiafia moli mo e tumau. “Fiafia a lautolu ne manamanatu ke he tau mena fakaagaga kua lata ma lautolu,” he talahau e Iesu. (Mataio 5:3, NW) Ka e lata ia tautolu ke fakaeneene, ke fakamakona e manako ia aki e kupu moli fakaagaga—ke he tau mena moli hagaao ke he Atua, tau tutuaga hana, mo e finagalo hana ma e tau tagata. Moua e tautolu i fe e kupu moli fakaagaga? I loto he Tohi Tapu.
“Ko e Hau a Kupu ko e Kupu Moli Haia”
Ne tohi he aposetolo ko Paulo: ‘Ko e tau Tohiaga Tapu oti kana mai he agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.’ (2 Timoteo 3:16) Kua tatai e tau kupu ha Paulo mo e tau kupu ha Iesu, ne liogi ke he Atua: “Ko e hau a kupu ko e kupu moli haia.” He vaha nei, kua iloa e tautolu e Kupu ia ko e Tohi Tapu, ti kua pulotu a tautolu ke kumikumi kua lagotatai e tau tutuaga mo e tau taofiaga ha tautolu ki ai.—Ioane 17:17.
He fakatatai e tau taofiaga ha tautolu ke he Kupu he Atua, kua fifitaki e tautolu e tau tagata Perea i tuai, ne kumi ke iloa tonu kua lautatai e tau fakaakoaga ha Paulo ke he tau Tohiaga Tapu. He nakai tuhituhi e tau Perea, ne nava e Luka a lautolu ha ko e aga ha lautolu. “Kua talia e lautolu e kupu mo e loto makutu” he tohia e ia, “kua kumikumi ke he tau [Tohiaga Tapu] ke he taha aho mo e taha aho, po ke moli e tau mena ia.” (Gahua 17:11) He kehekehe e onoonoaga fakalotu mo e tau fakaakoaga he tau mahani ne tupu lahi he vaha nei, kua aoga ke muitua e tautolu e fakafifitakiaga he tau Perea mahani mitaki.
Ko e taha puhala ke mailoga e kupu moli fakaagaga ke kitia e puhala kua fakalagalaga ai e tau momoui he tau tagata. (Mataio 7:17) Ma e fakatai, ke moui fakalautatai ke he kupu moli he Tohi Tapu kua lata ke taute e tagata ke eke mo tane mitaki, matua tane mitaki, hoana mitaki, po ke matua fifine mitaki, ti lafi ke he fiafia he magafaoa mo e fakaholo ki mua e makona hana. “Fiafia a lautolu ne logona e kupu he Atua mo e omaoma ki ai,” he talahau e Iesu.—Luka 11:28, NW.
Kua fakamanatu he tau kupu ha Iesu ki a tautolu e tau kupu he Matua he lagi, ne pehe ke he tau Isaraela i tuai: “Kua vagahau mai pehe a Iehova, ko e hau a Laveaki, ko ia ne Tapu i Isaraela, ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe. Ane hagao mai a koe ke he haku tau poaki, po kua tuga ne vailele hāu e monuina; mo e tuga ne tau peau he tahi hau a tututonu.” (Isaia 48:17, 18) Ko lautolu oti ne fiafia ke he mahani mitaki mo e tututonu ka fakalagalaga moli he fakaalofa mafanatia pihia!
Manako ne Falu ke ‘Fakamagiho e Tau Teliga’ ha Lautolu
Ne taute he Atua e futiaaga mai he loto ke he tau Isaraela ha kua fakahehe he tau pikopiko fakalotu a lautolu. (Salamo 106:35-40) Kua lata foki a tautolu ke puipui mai he tau fakavai. Hagaao ki a lautolu ne totoku ko e tau Kerisiano, ne tohi e Paulo: “Ko e mena to hoko mai e vaha nakai maeke ai ia lautolu ke talia e kupu tonu ka e lata ni mo e tau manako lahi ha lautolu, ke fakapotopoto ai e tau akoako ma lautolu, ha kua magiho a tau teliga ha lautolu; to mafoki kehe foki ha lautolu a tau teliga mai he kupu moli.”—2 Timoteo 4:3, 4.
Kua fakamagiho he tau takitaki lotu e tau teliga he tau tagata ha ko e talia e tau mahani ne futia ke he tau manako kelea, tuga e mahani fakatane mo e fifine i fafo he fakamauaga, fakasotoma, mo e konahia. Kua talahau fakamaali he Tohi Tapu ko lautolu ne talia e tau mena pehena mo e ko lautolu ne taute ai ‘to nakai moua e kautu he Atua.’—1 Korinito 6:9, 10; Roma 1:24-32.
Nakai fakauaua ai, kua lata ke fakamalolo ke moui lagotatai mo e tau tuaga he Tohi Tapu, mua atu he fehagai mo e vaiga, ka e maeke ke fahia. Ke he Tau Fakamoli a Iehova ne ha ha ai a lautolu ne aga fakamua ke hufia he tau tulaki, konahia, feuaki, fakatupu latau, kaiha, mo e pikopiko. Ka e, omaoma a lautolu ke he Kupu he Atua mo e lagomatai he agaga tapu ne hiki e tau momoui ha lautolu ati maeke ke ‘mahani ke lata mo Iehova.’ (Kolose 1:9, 10; 1 Korinito 6:11) He taute e mafola mo e Atua, ne moua foki e lautolu e mafola he loto mo e, to kitia e tautolu e amaamanakiaga moli ma e vaha anoiha.
Ko e Amaamanakiaga he Kautu
Ko e amaamanakiaga he Tohi Tapu he mafola tukulagi ma e tau tagata omaoma to fakamoli he puhala he Kautu he Atua. “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi,” he talahau e Iesu he liogi fakatai hana. (Mataio 6:10) E, ko e Kautu he Atua ni ka fakamoli to taute e finagalo he Atua he lalolagi. Ko e ha? Ha ko e Kautu he lagi—e fakatufono ne takitaki e Iesu Keriso—ko e puhala he Atua he fakakite e pule tonu katoatoa hana ke he lalolagi oti.—Salamo 2:7-12; Tanielu 7:13, 14.
Ko e Patuiki he Kautu ia he lagi, ko Iesu Keriso to fakahao e tau tagata omaoma mai he tau pehiaaga kehekehe pihia, putoia e pipiaga tuga e agahala faka-Atamu mo e tupaaga ke he gagao mo e mate. Pehe e Fakakiteaga 21:3, 4: “Kitiala, kua fakalataha mo e tau tagata e fale uta fano he Atua . . . To holoholo kehe he Atua [ko Iehova] e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”
To ufia e lalolagi oti he mafola tukulagi. Ko e ha ne moli a tautolu ke he mena ia? Kua fakakite mai e kakano he Isaia 11:9, ne pehe: “Nakai mahani kelea a lautolu [tau tagata he Kautu], to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.” E, ko e tau tagata oti he lalolagi to moua e iloilo tonu he Atua mo e omaoma ki a ia. Nakai kia mafanatia e loto hau he amaamanakiaga ia? Ka pihia, ko e magaaho anei ke kamata fakaaoga e “maama kia Iehova.”
To Fanogonogo Nakai a Koe ke he Fekau he Kautu?
He puhala he Kautu, to utakehe he Atua e tau gahua oti ha Satani mo e fakaako e tau tagata ke he tau puhala tututonu Hana. Ti, nakai ofo ai ko e Kautu e matapatu he fakaakoaga ha Iesu. “Ko e mena lata ke fakamatala e au e vagahau mitaki he kautu he Atua ke he falu a māga foki,” he talahau e ia, “ha ko e mena ia ne fakafano mai ai au.” (Luka 4:43) Ne poaki he Keriso e tau tutaki hana ke talahau e fekau taha ia ke he falu. (Mataio 28:19, 20) “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga,” he talahau tuai e ia. (Mataio 24:14) Kua tata lahi mai e fakaotiaga ia. Ti aoga ha ia ke fanogonogo e tau tagata loto fakamoli ke he tala mitaki fakahao moui nei!
Ko Albert, ne talahau he vala tala fakamua, ne logona e fekau he Kautu he magaaho ne kamata e hoana mo e tama tane hana ke fakaako e Tohi Tapu mo e Tau Fakamoli a Iehova. He kamataaga, ne fakauaua a Albert. Ne ole foki a ia ke he akoako he maaga ke ahi atu e hoana mo e tama tane hana ke fakakite age ki ai e fakavai he Tau Fakamoli a Iehova. Ka e nakai manako e akoako ke putoia ai. Ti fifili a Albert ke fakateliga atu ke he fakatutalaaga he Tohi Tapu ke mailoga e tau hehe. He mole taha e fakatutalaaga, ne fakalataha a ia ke he fakaakoaga, ne makai ke ako atu foki. Ne fakamaama e ia he magaaho fakamui e kakano ne hiki e aga hana. “Ko e mena hanei ne fa e kumi tumau au ki ai,” he talahau e ia.
Fakahiku, ne kamata a Albert ke fakamakona e manako fakaagaga hana ti nakai tokihala a ia. Kua foaki he kupu moli he Tohi Tapu ki a ia e mena ne fa e kumi a ia ki ai he moui katoa hana—ko e tuluiaga ke he nakai mitaki katoatoa mo e matahavala ne lauia katoa e kaufakalatahaaga mo e amaamanakiaga ma e vaha anoiha. Kua foaki he kupu moli he Tohi Tapu ki a ia e mafola he loto. Kua fakamakona nakai e manako fakaagaga hau? Ko e ha he fai magaaho ke totou e tau huhu ne tohi he puha he lau 6? Ka manako a koe ke iloa falu fakailoaaga, to fiafia e Tau Fakamoli a Iehova ke lagomatai a koe.
[Puha/Tau Fakatino he lau 6]
KUA FAKAMAKONA NAKAI E MANAKO FAKAAGAGA HAU?
Kua makona nakai a koe ke he tau mena kai fakaagaga hane moua e koe? Uiina e mautolu a koe ke totou e tau huhu na mo e fakamailoga a lautolu ne maeke ia koe ke tali fakahako.
□ Ko hai e Atua, ti ko hai e higoa hana?
□ Ko hai a Iesu Keriso? Ko e ha ne mate a ia? Aoga fefe e mate hana ki a koe?
□ Fai Tiapolo kia? Ka fai, tupu mai a ia i fe?
□ Ko e heigoa e mena ka tupu ki a tautolu ka mamate?
□ Ko e heigoa e finagalo he Atua ma e lalolagi mo e tau tagata?
□ Ko e heigoa e Kautu he Atua?
□ Ko e heigoa e tau tutuaga he Atua ke he tau mahani?
□ He magafaoa, ko e heigoa e matagahua ne kotofa he Atua ke he tane mo e hoana? Ko e heigoa falu matapatu fakaakoaga he Tohi Tapu ne fakatolomaki e fiafia he magafaoa?
Ka fakauaua a koe ke he tau tali he tau huhu nei, kia ole e lagaki he porosua Ko e Heigoa e Manako he Atua ma Tautolu? Ne taute fakailoa he Tau Fakamoli a Iehova ke teitei 300 e vagahau, ne fakatutala e porosua nei ke he 16 e matakupu aoga he Tohi Tapu mo e foaki e tali faka-Tohi Tapu ke he tau huhu oti ne tohi i luga.
[Tau Fakatino he lau 4]
Nakai tuga e tau manu, fai manako fakaagaga e tau tagata
[Fakatino he lau 5]
“Ke fakapotopoto ai e tau akoako ma lautolu, ha kua magiho a tau teliga ha lautolu.”—2 Timoteo 4:3
[Fakatino he lau 7]
To puhala mai he Kautu faka-Mesia he Atua e mafola tukulagi