Tutū mo e Veveli he “Tau Pulotu”
KE HE lalolagi he vahā nei kua maeke a lautolu ne fai komopiuta ke kumi tomatomaaga ma e tau matua ke he Internet ti moua mafiti ke molea e 26 e miliona vala tala hagaao ke he puhala feaki he tau fanau. Ka taha ni e minuti ka fakamole e koe ke kumi mo e totou e tau vala tala takitaha, to lahi hake e tama haau ti toka e kaina ka e nakaila oti e tau mena ia he kumi mo e totou e koe.
Ato hoko ke he vahā he tau ekekafo tama mo e tau tagata kumikumi ke he manamanatuaga he tau fanau, mo e Internet, ne moua i fe he tau matua e tau tomatomaaga? Fa mahani ai, ne kumi atu a lautolu ke he magafaoa laulahi. Ne fitā e tau matua fifine, tau matua taane, tau anitī, mo e tau agikolo he mautali ke foaki e takitakiaga, lagomatai fakatupe, mo e tau gahua leveki tama. Ka e ke he loga e motu, ne lahi e puke tagata kua hiki mai he tau maaga tua ke nonofo he taone ti kua teitei galo katoatoa e tau matutakiaga fakamagafaoa. Laulahi he vahā nei, kua fehagai tokoua ni e matua taane mo e matua fifine ke he paleko he feaki he magafaoa.
Nakai taumaleku ai ko e taha kakano anei ati mafiti e tupu he tau fale leveki tama. Taha kakano foki kua tupu lahi e talitonu ke he fakasaiene. He matahiku he tau atu tau 1800, kua fitā e tau tagata Amerika he mauokafua to fakamitaki he fakasaiene e tau tuaga oti he moui he tagata. Ka e kua e feaki tama? Ti magaaho ne momoko e American National Congress of Mothers ha ko e “nakai lotomatala he tau matua” he 1899, ne tokologa e “pulotu fakasaiene” ne tutū hake. Ne mavehe a lautolu ke lagomatai e tau matua taane mo e tau matua fifine ne fa e taufetului, ke fakakite age e puhala ki a lautolu.
Kumi ke he Tau Pepa ke Feaki e Tau Fanau
Ka e, ko e heigoa he tau pulotu nei kua moua? Kua tote kia e tupetupe he tau matua he vahā nei mo e kua mautali ke feaki e tau fanau ha lautolu nakai tuga he vahā kua mole? Nakai pihia he talahau he kumikumiaga foou nei i Peritania. Ne fakakite ko e kavi ke he 35 e pasene he tau matua ne fai fanau ikiiki ne kumi agaia ma e tomatomaaga ke mauokafua a lautolu ki ai. Falu ne logona hifo kua gahoa e tau mena ke fifili mai ai ti lata ni ke muitua ke he tau logonaaga ha lautolu.
He tohi Raising America: Experts, Parents, and a Century of Advice About Children ha Ann Hulbert, ne kumikumi e ia ki tua ke he fakamauaga he tau tohi pulotu ke he feaki he tau fanau. Ko Hulbert, ko ia ko e matua fifine ne ua e tama, ne talahau kua gahoa ni e tau pulotu ne fakavē mooli e tau kumikumiaga ha lautolu ke he fakasaiene mooli. Ka e, ko e tau tomatomaaga ha lautolu kua lahi ni ke tuga na fakaohooho he tau iloaaga ha lautolu he moui ka e nakai mai he ha matapatu mooli. He liu onoono ki ai, ko e laulahi he tau mena ne tohia e lautolu kua hihiga lahi ke felauaki mo e vahā foou, kua fekehekeheaki, mo e falu magaaho kua fakaliga kehe.
Ti ko e heigoa e tuaga he tau matua he vahā nei? Maaliali ai, tokologa kua fakagogoa, kua fakataupā mo e loga atu foki e fakatonuaga, tau manatu, mo e tau fekehekeheaki ne nakaila pihia ia. Pete ia, nakai logona pihia e tau matua oti ke tuga kua nakai fai takitakiaga a lautolu. Ko e tau matua he lalolagi katoa hane aoga mai he punaaga pulotu mai i tuai ne mooli agaia ko e punaaga he tau tomatomaaga aoga, tuga ka fakakite he vala tala ka mui mai.