Hane Tali Atu a Lautolu “ne Kotofa”
“Kua tua foki a lautolu oti ne kotofa ke he moui tukulagi.”—GAHUA 13:48.
1, 2. Tali atu fēfē e tau Kerisiano fakamua ke he perofetaaga a Iesu to fakamatala e tala mitaki ke he lalolagi oti?
KO E tohi a Gahua he Tohi Tapu ne toka ai e tala fiafia ke he puhala ne tali atu e tau Kerisiano fakamua ke he perofetaaga a Iesu ke he tala mitaki he Kautu ka fakamatala ke he lalolagi oti. (Mata. 24:14) Ne fakatoka he tau tagata fakamatala fakamakutu e fakafifitakiaga ma lautolu oti ka mumui mai. Ti ko e fua he fakamatala fakamakutu he tau tutaki a Iesu i Ierusalema, ne totou afe e tagata ne putoia e “tokologa he tau ekepoa” ne fakalataha atu ke he fakapotopotoaga he senetenari fakamua.—Gahua 2:41; 4:4; 6:7.
2 Ne lagomatai he tau misionare tokologa foki ke talia e faka-Kerisiano. Ko Filipo e taha ne fano ki Samaria, ne fanogonogo e moto tagata ke he tau kupu haana. (Gahua 8:5-8) Ne fenoga mamao a Paulo mo e tau hoa kehekehe, he fakamatala e ogo Kerisiano i Kuperu, ko e tau matakavi i Asia Tote, Maketonia, Heleni, mo Italia. He tau taone ne fakamatala a ia ki ai, ne tokologa e tau Iutaia mo e tau Heleni ne eke mo tau tagata talitonu. (Gahua 14:1; 16:5; 17:4) Ne matutaki e fekafekauaga a Tito i Kereta. (Tito 1:5) Ne lavelave a Peteru i Papelonia, ti ko e magaaho ne tohi e ia e tohi fakamua haana, kavi ke he 62-64 V.N., ko e matagahua he tau Kerisiano ne iloa lahi i Pono, mo Kalatia, mo Kapatokia, mo Asia, mo Pitunia. (1 Pete. 1:1; 5:13) Ko e tau magaaho fiafia mooli a ia! He fakamakai lahi e tau Kerisiano fakamatala he senetenari fakamua ati talahau he tau fī ko lautolu ia kua “fakatupu e fakaagitau ni ke he lalolagi oti.”—Gahua 17:6; 28:22.
3. Ko e heigoa e tau fua ne moua he vahā nei he tau tagata fakapuloa he Kautu he gahua fakamatala ha lautolu, ti fēfē e logonaaga haau ke he mena ia?
3 He tau vahā foou nei foki, hane fakamonuina e fakapotopotoaga Kerisiano ke he tupuaga mua ue atu. Nakai kia fakamalolō a koe ka totou e hokotaki he tau he Tau Fakamoli a Iehova mo e kitia e tau fua hane moua mai he lalolagi oti? Nakai kia mafanatia e loto haau ke iloa kua taute he tau tagata fakapuloa he Kautu ne molea e ono e miliona e tau fakaako Tohi Tapu he tau he fekafekauaga 2007? Lafi ki ai, ne fakakite he fakalatahaaga ke he Fakamanatuaga he mate a Iesu Keriso he tau kua mole ne kavi ke hogofulu e miliona tagata ne nakaila ko e Tau Fakamoli a Iehova ka kua lahi e fiafia ke he tala mitaki ke hohoko atu ke he fakamanatuaga aoga nei. Kua fakakite he mena nei kua lahi mahaki agaia e gahua ke taute.
4. Ko hai hane talia e ogo he Kautu?
4 He vahā nei, tuga he senetenari fakamua, ko “lautolu oti ne kotofa ke he moui tukulagi” hane talia e ogo he kupu mooli. (Gahua 13:48) Hane fakapotopoto e Iehova e tau tagata ia ke he fakatokatokaaga haana. (Totou Hakai 2:7.) Ko e heigoa e aga ke he fekafekauaga faka-Kerisiano kua lata ia tautolu ke fakatumau ke maeke ke fakalataha katoatoa ke he gahua fakapotopoto?
Fakamatala Nakai Fakamailoga Tagata
5. Ko e vahega tagata fe ne ha ha ai e taliaaga a Iehova?
5 Ne maama he tau Kerisiano he senetenari fakamua kua “nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) He fai po ke nakai fai fakafetuiaga mitaki e tagata mo Iehova kua fakavē ni ke he fakagahuaaga haana he tua ke he poa lukutoto ha Iesu. (Ioane 3:16, 36) Ti ko e finagalo a Iehova ke “fakamomoui e tau tagata oti kana, mo e hokotia a lautolu he maama ke he kupu moli.”—1 Timo. 2:3, 4.
6. Ko e heigoa kua nakai lata he tau tagata fakamatala he Kautu ke taute, ti ko e ha?
6 To nakai hako ma e tau tagata fakapuloa he tala mitaki ke fakafili tuai e tau tagata ha ko e tuaga he motu, tau tuaga, foliga, feakiaga fakalotu, po ke ha aga foki. Manamanatu la mogonei: Nakai kia fakaaue a koe ke he tagata ne tutala fakamua ki a koe hagaao ke he tau kupu mooli faka-Tohi Tapu he nakai onoono hifo kia koe? Ti ko e ha ne tautaofi a koe mai he talahau e ogo fakamoui ke he ha tagata ne liga ke fanogonogo ki ai?—Totou Mataio 7:12.
7. Ko e ha kua lata ke fakamamao a tautolu mai he fakafili a lautolu kua fakamatala a tautolu ki ai?
7 Ne kotofa e Iehova a Iesu mo Fakafili; ti nakai ha ha ia tautolu e tonuhia ke fakafili ha tagata. Kua latatonu e mena ia, ha kua—nakai tuga a Iesu—kua fakafili ni a tautolu he ‘kitia atu he ha tautolu a tau fofoga,’ po ke, ‘lata mo e logona he ha tautolu a tau teliga,’ ka e maeke ia Iesu ke kitia e tau manatu he fatuakiloto mo e tau kakano he loto.—Isaia 11:1-5; 2 Timo. 4:1.
8, 9. (a) Ko e vahega tagata fēfē a Saulo ato eke a ia mo Kerisiano? (e) Ko e heigoa kua lata ke fakaako a tautolu ke he mena ne tupu ke he aposetolo ko Paulo?
8 Ko e tau tagata mai he tau feakiaga kehekehe ne eke mo tau fekafekau a Iehova. Taha e fakafifitakiaga ue atu ko Saulo i Tasesa, ne iloa ko e aposetolo ko Paulo. Ko Saulo, ko e Farasaio, ko e tagata totoko vale ke he tau Kerisiano. Ko e fifiliaga mooli haana kua hepe a lautolu ati takitaki atu a ia ke favale ke he fakapotopotoaga Kerisiano. (Kala. 1:13) Mai he tuaga fakatagata, kua liga kitia ai ne nakai amanaki ki a ia ke eke mo Kerisiano. Ka e, kitia e Iesu e mena mitaki he loto a Saulo ti fifili a ia ke fakamooli e matafekau pauaki. Ti ko e fua, ne eke a Saulo ko e taha he tau tagata malolō mo e makutu he fakapotopotoaga Kerisiano he senetenari fakamua.
9 Ko e heigoa e mena ne tupu ke he aposetolo ko Paulo kua fakaako ki a tautolu? He matakavi ha tautolu, liga ha ha i ai e tau matakau he tau tagata ne liga favale ke he ogo ne uta e tautolu. Liga ko e mena fakauaua taha ia lautolu ia ke eke mo tau Kerisiano mooli, kua nakai lata ia tautolu ke oti e lali ke fakakakano ki a lautolu. Falu magaaho kua eke e tau tagata ne nakai tuahā ki ai to talia. Ko e poakiaga ha tautolu ke fakatumau e fakamatala ke he tau tagata oti kana ka e “nakai oki.”—Totou Gahua 5:42.
Tau Monuina ne Tatali ma Lautolu ne Fakamatala ‘Nakai Oki’
10. Ko e ha ne nakai lata ia tautolu ke tautaofi mai he fakamatala ke he tau tagata ne liga fakamatakutaku mai? Talahau e tau mena tutupu he matakavi.
10 Maeke e tau foliga ke fakahehē. Ma e fakatai, ko Ignacio,a ne kamata fakaako e Tohi Tapu mo e Tau Fakamoli a Iehova he nofo a ia ke he fale puipui he motu ha Amerika Toga. Ne matakutaku ki a ia ha ko e aga vale pauaki haana. Fakahiku ai, ko e tau tagata ne nonofo foki he fale puipui ne taute mo e sela e tau koloa ke he tau kapitiga he fale puipui he fakaaoga a Ignacio ke oko e tau kaitalofa mai ia lautolu ne fakatuai ke totogi. Pete ia, he tupu fakaagaaga a Ignacio mo e fakagahua e mena ne ako e ia, ko e tagata nei ne vale lahi he taha vahā kua eke mo tagata totonu. Nakai fai tagata ne fakaaoga a ia ke liu oko e tau kaitalofa, ka kua fiafia a ia ke he tau kupu mooli he Tohi Tapu mo e agaaga he Atua ne hiki e aga haana. Ne fakaaue foki a ia ke he nakai fakamailoga tagata he tau tagata fakailoa he Kautu ne lali ke fakaako mo ia.
11. Ko e ha kua fakatumau a tautolu ke liu aahi atu ke he tau tagata?
11 Taha he tau kakano ne lata ia tautolu ke liliu tumau ke aahi e tau tagata ne fitā he tutala a tautolu ki ai hagaao ke he tala mitaki ha kua maeke mo e fa hiki e tau tutūaga mo e tau aga ha lautolu. He aahi atu fakahiku ha tautolu, liga lauia e falu ha ko e gagao kelea lahi, oti mo e gahua, po ke mate e fakahele. (Totou Fakamatalaaga 9:11.) Ko e tau mena tutupu he lalolagi kua liga fakalagalaga e tau tagata ke manamanatu fakahokulo hagaao ke he vahā anoiha ha lautolu. Ko e tau tupuaga pihia kua maeke ke fakatupu e tagata he magaaho fakamua ne vale—po ke totoko foki—ke talia fiafia. Ti, kua nakai lata ke taofi a tautolu mai he talahau e tala mitaki ke he falu ke he tau magaaho oti ne kua latatonu.
12. Kua lata ke onoono fēfē a tautolu ke he tau tagata ne fakamatala a tautolu ki ai, ti ko e ha?
12 He fakavahega mo e fakafili e falu tagata kua liga ko e hihiga fakatagata. Ka e, kitia e Iehova e tau tagata takitokotaha. Kua kitia e ia e tau aga mitaki he tau tagata takitaha. (Totou 1 Samuela 16:7.) He fekafekauaga ha tautolu, kua lata ia tautolu ke lali ke taute e mena taha ia. Loga e tau mena tutupu ne fakakite e mitaki ne fua mai he onoonoaga atihake he tau tagata oti ki a lautolu ne fakamatala a tautolu ki ai.
13, 14. (a) Ko e ha e paionia ne manamanatu hepe ke he fifine ne feleveia mo ia he fekafekauaga? (e) Ko e heigoa kua ako e tautolu mai he mena nei ne tupu?
13 Ko Sandra, ko e paionia fifine, ne fakalataha ke he fekafekauaga he taha fale ke he taha fale he aelani ko Caribbean he magaaho ne feleveia a ia mo Ruth, ne putoia lahi ke he tau fakamanatuaga fakatātāaga (carnival). Ne lagaua e fakafoufou a Ruth mo patuiki fifine he fakatātāaga he motu. Ne fakakite e ia e fiafia lahi mahaki ke he mena ne talahau e Sandra, ti fakatoka ai ke fakaako Tohi Tapu. Ne manatu e Sandra: “He fina atu au ke he loto fale haana, ne kitia e au e ata lahi ha Ruth ne tui he tapulu katoa he fakatātāaga (carnival regalia), pihia mo e tau fakamailoga ne moua e ia he mua. Ne tuahā hehē au ko e taha tagata ne talahaua lahi mo e kua putoia ke he tau fakamanatuaga fakamotu nukua liga ke nakai fiafia ke he kupu mooli. Ti nakai liu au aahi atu ki a ia.”
14 Fai magaaho he mole, ne fina atu a Ruth ke he Fale he Kautu, ti ko e magaaho ne oti e feleveiaaga, ne hūhū a ia ki a Sandra, “Ko e ha ne nakai liu mai a koe ke fakaako mo au?” Ne fakamolemole a Sandra mo e liu fakatoka ke fakaako foki. Ne mafiti e holo ha Ruth ki mua, ti tuku hifo e tau ata fakamanatuaga fakamotu haana, mo e kamata ke fakalataha ke he tau matagahua oti he fakapotopotoaga, ti tukulele e moui haana ki a Iehova. Mooli, ne maeke ia Sandra ke mailoga ko e tali atu fakamua haana kua hepe.
15, 16. (a) Ko e heigoa ne fua mai he fakamatala e taha tagata fakailoa ke he taha he magafaoa? (e) Ko e ha e feakiaga he magafaoa kua nakai lata ke fakalolelole a tautolu ke fakamatala ki a ia?
15 Ko e tau fua mitaki kua moua foki he tokologa ne fakamatala ke he tau tagata he magafaoa ne nakai talitonu, pete ne liga kua nakai talia fiafia a lautolu ia. Tuga ma e fakatai ke he mena ne tupu ki a Joyce, ko e Kerisiano fifine he Faahi Kaufakalataha. Ko e matakainaga he taane haana ne fano mo e hau ki fafo he fale puipui tali mai he magaaho ne fuata mui a ia. “Pehē e tau tagata kua nakai aoga e moui haana,” he talahau e Joyce, “ha kua putoia a ia ke he tau tulaki, kaihā, mo e tau mena kelea loga foki. Pete ni he pihia, ne fakatumau au ke talahau e tau kupu mooli he Tohi Tapu ki a ia ke he 37 e tau.” Ko e tau laliaga fakamanavalahi haana ke lagomatai e magafaoa haana ne palepale lahi he kamata a ia he magaaho fakamui ke fakaako e Tohi Tapu mo e Tau Fakamoli a Iehova ti taute e tau hikiaga lalahi he moui haana. He nakai la leva e 50 e tau tau moui haana, ne papatiso e matakainaga he taane haana he fonoaga he faahimotu i California, U.S.A. Ne pehē a Joyce: “Ne tagi au he olioli. Kua fiafia lahi au he nakai fiu au ia ia!”
16 Kua liga tehatehaua a koe ke tutala ke he tau magafaoa hagaao ke he falu he tau kupu mooli he Tohi Tapu ha ko e feakiaga ha lautolu. Ka e, nakai taofi he tehatehaua pihia a Joyce mai he tutala ke he matakainaga he taane haana. Mo e to iloa fēfē he taha e mena ne toka he loto he taha tagata? Kua liga kumi e tagata ia mo e loto katoa ma e kupu mooli fakalotu. Ti, ua tautaofi mai he tala age ki a ia e magaaho ke kumi ai.—Totou Tau Fakatai 3:27.
Ko e Tohi Lagomatai Fakaako Tohi Tapu ne Lauia Mitaki
17, 18. (a) Ko e heigoa he tau hokotaki he lalolagi katoa ne fakakite hagaao ke he tohi Ko e Heigoa ne Fakaako Moli he Tohi Tapu? (e) Ko e heigoa e tau mena mitaki ne moua e koe he fakaaoga e tohi nei?
17 Ko e tau hokotaki mai he tau motu he lalolagi katoa ne fakakite kua tokologa a lautolu ne loto mooli hane talia fakamitaki e tohi lagomatai fakaako Tohi Tapu Ko e Heigoa ne Fakaako Moli he Tohi Tapu? Ko Penni, ko e paionia fifine he Faahi Kaufakalataha, ne loga e fakaakoaga ne kamata he fakaaoga e tohi nei. Tokoua ia laua ne ha ha ai mo e tau tagata momotua ne malolō lahi he tau lotu ha laua. Nakai iloa mitaki e Penni to fēfē e tali atu ha laua ke he tau kupu mooli faka-Tohi Tapu ne tohia he tohi Fakaako he Tohi Tapu. Ka e, ne tohi e ia, “Ha ko e puhala maama, fakatokatoka, mo e kū he vala tala ne talahau, ne talia fiafia e laua e mena ne ako ko e kupu mooli mo e nakai totoko po ke logonaaga fakaita.”
18 Ko Pat, ko e tagata fakailoa i Peritania, ne kamata fakaako e Tohi Tapu mo e fifine ne hola mai he motu Asia. Ne fakaohooho e fifine ke hola kehe mai he motu haana he mole e uta he tau kautau e taane mo e tau fanau taane haana, ti nakai liu kitia foki a lautolu. Kua fakamatakutaku ke he moui haana, ne tugi e fale haana ki lalo, ti fakapilo pulenoa he tau kege a ia. Kua taute he tau mena oti nei a ia ke nakai fai kakano he moui, ti loga e magaaho ne manamanatu a ia ke taupega. Ka kua foaki he fakaako Tohi Tapu e amaamanakiaga ki a ia. “Ko e mukamuka he tau fakamaamaaga mo e tau fakataiaga he tohi Fakaako he Tohi Tapu ne lauia malolō ki a ia,” he tohi e Pat. Ne mafiti e holo ki mua he tagata fakaako, ne hokotia ai ke eke mo tagata nakaila papatiso, ti talahau e manako haana ke papatiso he toloaga hake. Ko e olioli ha ia ke lagomatai e tau tagata loto fakamooli ke maama mo e loto fakaaue ke he amaamanakiaga ne foaki he tau Tohiaga Tapu!
“Aua Neke Fakalolelole a Tautolu ke he Mahani Mitaki”
19. Ko e ha e gahua fakamatala kua mafiti lahi?
19 He mole atu e tau aho takitaha, ko e fakamafiti he poakiaga ha tautolu ke fakamatala mo e taute tutaki kua mafiti lahi foki. Totou afe a lautolu ne kotofa kua talia e fakamatala ha tautolu he tau tau takitaha. Ka e, “kua tata mai e aho lahi a Iehova,” kakano ko lautolu ne tumau agaia he pouli fakaagaaga “ko e kelipopo hane fai.”—Sefa. 1:14; Fakatai 24:11.
20. Ko e heigoa kua lata ia tautolu takitokotaha ke fifili ke taute?
20 Maeke agaia a tautolu ke lagomatai e tau tagata pihia. Ma tautolu ke taute pihia, kua aoga ke fifitaki e tautolu e tau Kerisiano he senetenari fakamua, ne “nakai oki foki e tau aho oti he fakaako atu e lautolu, mo e fakamatala atu ke he . . . tala mitaki kia Iesu Keriso.” (Gahua 5:42) He muitua e tau fakafifitakiaga ha lautolu he fakatumau pete he tau matematekelea, kia mataala ke he ‘puhala fakaako atu’ haau, mo e ke fakamatala ke he tau tagata oti ka e nakai fakamailoga tagata! “Aua neke fakalolelole a tautolu ke he mahani mitaki,” ha ko e mena ka taute e tautolu pihia, to helehele e tautolu e tau monuina loga he taliaaga faka-Atua.—2 Timo. 4:2; totou Kalatia 6:9.
[Matahui Tala]
a Hiki tuai falu higoa.
To Tali Fēfē e Koe?
• Ko hai hane tali atu ke he tala mitaki?
• Ko e ha kua lata ke hola kehe mai he fakafili a lautolu ne fakamatala a tautolu ki ai?
• Ko e heigoa e tau fua hane moua he tohi Ko e Heigoa ne Fakaako Moli he Tohi Tapu?
[Tau Fakatino he lau 13]
Totou afe he tau tagata loto fakamooli hane talia
[Tau Fakatino he lau 15]
Ko e heigoa ha tautolu ka ako mai he tau hikihikiaga ne taute he aposetolo ko Paulo?
[Fakatino he lau 16]
Nakai fakafili tagata e tau tagata fakapuloa he tala mitaki