Fifitaki e Misionare Mua Ue Atu
“Kia fifitaki mai a mutolu kia au, tuga na au kia Keriso.”—1 KORI. 11:1.
1. Ko e ha kua lata ke fifitaki a tautolu ki a Iesu Keriso?
KO E aposetolo ko Paulo ne fifitaki e Misionare mua ue atu, ko Iesu Keriso. Ne fakamafana foki e Paulo e tau matakainaga Kerisiano haana: “Kia fifitaki mai a mutolu kia au, tuga na au kia Keriso.” (1 Kori. 11:1) He mole e fakakite e Iesu e fakafifitakiaga ke he tau aposetolo haana hagaao ke he mahani fakatokolalo he holoholo fakatokolalo e ia e tau hui ha lautolu, ne pehē a ia: “Kua ta atu e au e fakafifitaki kia mutolu, kia tuga he eke e au kia mutolu, kia eke pihia ni e mutolu.” (Ioane 13:12-15) Ha ko e tau Kerisiano he magaaho nei, kua ha ha ia tautolu e kotofaaga ke fifitaki a Iesu Keriso ke he ha tautolu a tau kupu mo e tau gahua mo e ke he tau mahani ne fakakite e tautolu.—1 Pete. 2:21.
2. Pete kua nakai kotofa he Kau Fakatufono a koe ke eke mo misionare, ko e heigoa e aga ne kua lata ke moua e koe?
2 He vala tala fakamua, ne ako e tautolu ko e misionare ko ia ne fakafano ke eke mo tagata fakamatala he vagahau mitaki, ko ia ke tamai e tala mitaki ke he falu. Ke he mena nei, ne talahau e Paulo e tau hūhū aoga. (Totou Roma 10:11-15.) Mailoga ne hūhū he aposetolo: “Ka e fanogonogo atu fefe a lautolu, ka nakai fai tagata ke fakamatala atu?” Ti fatiaki mai e ia e tau kupu he perofetaaga a Isaia: “Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.” (Isaia 52:7) Pete kua nakai kotofa mo e fakafano a koe ke fekafekau ko e misionare ke he kotofaaga he matakavi kehe, kua maeke agaia a koe ke moua e aga fakamatala he vagahau mitaki, he fifitaki a Iesu ko e tagata fakapuloa makutu he tala mitaki. He tau kua mole, ne 6,957,852 e tagata fakapuloa he Kautu ne ‘eke e gahua he tau tagata fakamatala vagahau mitaki’ ke he 236 e motu.—2 Timo. 4:5.
“Kua Toka e Mautolu e Tau Mena Oti, ka e Mumui Atu kia Koe”
3, 4. Ko e heigoa ne toka hifo e Iesu he lagi, mo e ko e heigoa kua lata ia tautolu ke taute ke eke mo tau tutaki haana?
3 Ke fakakatoatoa e matagahua kotofa haana he lalolagi, ne “fakatokolalo e ia a ia [Iesu], ne mahani a ia fakalataha mo e tupa,” he toka hifo e moui mo e lilifu haana he lagi. (Filipi 2:7) Ko e ha mena ni ne taute e tautolu he fifitaki ki a Keriso kua nakai fakaai ke fakatatai ke he tau mena ne taute e Iesu he magaaho ne hifo mai ke he lalolagi. Ka e maeke ia tautolu ke mauokafua tumau ha ko e tau tutaki haana, he nakai liliu onoono ki tua he manako lahi ke he tau mena ne moua fakamua e tautolu he lalolagi ha Satani.—1 Ioa. 5:19.
4 He taha magaaho, ne pehē e aposetolo ko Peteru ki a Iesu: “Kitiala, kua toka e mautolu e tau mena oti, ka e mumui atu kia koe.” (Mata. 19:27) Ko Peteru, Aneterea, Iakopo, mo Ioane ne tiaki agataha e tau kupega ha lautolu he magaaho ne uiina ke mumui ki a Iesu. Ne toka hifo e feua takafaga ika mo e eke e fekafekauaga mo matapatu gahua ha lautolu. Hagaao ke he Evagelia ha Luka, ne pehē a Peteru: “Kitiala, Kua toka e mautolu e tau mena oti, ka e mumui atu ia koe.” (Luka 18:28) Kua nakai lata he laulahi ia tautolu ke toka hifo oti ‘e tau mena ha tautolu’ ke maeke ke mumui ki a Iesu. Ka e, lata a tautolu ke ‘nakai omaoma a tautolu ki a tautolu’ ke eke mo tau tutaki he Keriso mo e tau fekafekau loto katoa ha Iehova. (Mata. 16:24) Ko e puhala pihia kua fua mai e tau monuina loga. (Totou Mataio 19:29.) He moua e aga fakamatala he vagahau mitaki he fifitaki ke he Keriso ka tamai e fiafia ke he tau loto ha tautolu, mua atu kaeke kua fai vala tote a tautolu ke lagomatai e taha tagata ke fakatata atu ke he Atua mo e Tama fakahele haana.
5. Talahau taha mena tupu ne fakatātā e mena ka fifili he tagata motu kehe ke taute he iloa e kupu mooli he Tohi Tapu.
5 Ko Valmir, ko e tagata taane Parasili ne nofo he lotouho i Suriname, ko e tagata keli auro fakamua. Ko ia ko e tagata konahia ti putoia ke he moui feuaki. He taha magaaho ne nofo a ia he taone, ne kamata e Tau Fakamoli a Iehova ke fakaako e Tohi Tapu mo ia. Ne fakaako a ia he tau aho oti, taute e tau hikihikiaga loga, nakai leva ti papatiso. He mailoga kua paleko e gahua haana ke moui fakatatai ke he tua moua foou haana, ne fakafua e ia e pisinisi haana ne kautū ti liu ki Parasili ke lagomatai e magafaoa haana ke moua e tau koloa uho fakaagaaga. He iloa e kupu mooli he Tohi Tapu, ne tokologa foki e tau tagata motu kehe ne fakamakai ke tiaki e tau gahua ha lautolu he tau motu monuina ke liliu atu ke he motu ni ha lautolu mo e foliaga ke lagomatai fakaagaaga e tau magafaoa mo e falu foki. Ko e tau tagata fakailoa pihia he Kautu kua fakatātā mooli e aga fakamatala.
6. Ko e heigoa ka taute e tautolu kaeke kua nakai maeke ke hiki ke he matakavi ne lahi mahaki e manako ma e tau tagata fakapuloa he Kautu?
6 Ha ha ai e tokologa he Tau Fakamoli ne kua hiki ke he tau matakavi ne lahi mahaki e manako ma e tau tagata fakamatala he Kautu. Ko e falu kua fekafekau he falu motu. Kia tautolu fakatagata, liga kua nakai ha ha a tautolu he tuaga ke taute e hikiaga pihia, ka e maeke ia tautolu ke fifitaki a Iesu he taute tumau e tau mena kua fahia a tautolu ki ai he fekafekauaga.
Foaki e Iehova e Fakamahani kua Lata
7. Ko e heigoa e tau aoga ne ha ha ai ke fakamahani a lautolu ne manako ke fakalaulahi ki mua e iloilo ko e tau tagata fakapuloa he Kautu?
7 Tuga ni ne moua e Iesu e fakamahani mai he Matua haana, lata ia tautolu ke fakaaoga fakamitaki e fakaakoaga hane foaki mai e Iehova mogonei. Ne talahau mai ni e Iesu: “Kua tohi he tau perofeta, To fakaako he Atua a lautolu oti kana.” (Ioane 6:45; Isaia 54:13) He vahā nei, kua fakatū ai e tau aoga ne talaga pauaki ke tauteute a tautolu mo tau tagata fakapuloa he Kautu. Nakai fakauaua, kua moua e tautolu oti e lagomatai mai he Aoga Fekafekau Fakateokarasi he tau fakapotopotoaga he matakavi ha tautolu. Kua moua he tau paionia e lilifu ke ō ke he Aoga Fekafekau Paionia. Ne tokologa ia lautolu ne kua leva e paionia ne moua e kotofaaga ke liliu lagaua ke he aoga. Ko e tau motua mo e tau fekafekau lagomatai ne ō ke he Aoga Fekafekau he Kautu ke fakalaulahi ki mua e puhala fakaako mo e fekafekauaga ha lautolu ke he tau matakainaga talitonu. Tokologa e tau motua mo e tau fekafekau lagomatai nonofo tokotaha ne kua ō ke he Aoga Fakaako Fekafekau, ne tauteute a lautolu ke lagomatai falu ke he gahua fakamatala. Ti kua tokologa e tau matakainaga ne moua e tau kotofaaga misionare nukua fakamahani he Aoga Tohi Tapu a Kiliata he Kolo Toko.
8. Uho fēfē ke he falu matakainaga e fakamahani ne foaki e Iehova?
8 Kua tokologa e Tau Fakamoli a Iehova ne taute e tau hikiaga ke ō atu ke he tau aoga nei. Ke finatu ke he Aoga Fakaako Fekafekau i Kanata, ko Yugu ne fakaoti e ia e gahua tupe haana ha kua nakai talia he takitaki gahua e ole haana ke fakaatā a ia ke fano. “Ai tokihala au,” he talahau e Yugu. “Ha ko e mena ka fiafia a lautolu ke fakaatā au ke fano, liga to amanaki mai a lautolu to gahua tukulagi au ma e kamupani he loto fakaaue ki a lautolu. Ka e mogonei kua atāina au ma e ha kotofaaga ne liga nakaila moua e au mai ia Iehova.” Ke fakaaoga fakamitaki e fakamahani ne foaki he Atua, kua tokologa ne poa fakamakai e tau mena ne uho ki a lautolu fakamua.—Luka 5:28.
9. Talahau e fakataiaga ne fakakite e lauia mitaki he fakaakoaga faka-Tohiaga Tapu mo e he laliaga fakamakutu.
9 Ko e tau fakaakoaga faka-Tohiaga Tapu mo e laliaga mooli kua mua atu e lauia mitaki. (2 Timo. 3:16, 17) Mailoga e mena ne tupu ki a Saulo i Kuatemala. Kua fanau a ia mo e nakai katoatoa e manamanatuaga, ne tala age taha faiaoga haana ke he matua fifine haana kua nakai lata a ia ke fakaohooho e tama taane ke iloa ke totou, neke fakaokaoka e ulu he tama. Ne oti mai a Saulo he aoga ka e nakai iloa ke totou. Pete ia, ne fakaako he Fakamoli a Saulo ke totou, he fakaaoga e porosua Apply Yourself to Reading and Writing. Fakahiku ne holo atu a Saulo ke lauga he Aoga Fekafekau Fakateokarasi. Ne feleveia fakamui e matua fifine ha Saulo mo e faiaoga haana he fekafekauaga he taha fale ke he taha fale. He logona kua iloa a Saulo ke totou, ne ole e faiaoga ki a ia ke tamai a Saulo he faahi tapu hake. He faahi tapu hake, ne hūhū e faiaoga ki a Saulo, “Ko e heigoa haau ka fakaako mai ki a au?” Ne kamata a Saulo ke totou e paratafa mai he tohi Ko e Heigoa ne Fakaako Moli he Tohi Tapu? “Ko e ofo ha ia haaku kua fakaako e koe au mogonei,” he talahau he faiaoga. Kua nakai maeke ke taofi e tau hihina mata, ne kukukuku e ia a Saulo.
Fakaakoaga ne Fakaohooho e Loto
10. Ko e heigoa e kavanaakau mitaki lahi hane fakaaoga e tautolu ke fakaako e kupu mooli he Tohi Tapu?
10 Ne fakavē e Iesu e fakaakoaga haana ke he tau mena ne fakaako fakahako age e Iehova ki a ia mo e ke he tau hatakiaga ne moua i loto he Kupu tohia he Atua. (Luka 4:16-21; Ioane 8:28) Kua fifitaki a tautolu ki a Iesu he fakagahua e fakatonuaga haana mo e pipiki mau ke he tau Tohiaga Tapu. Ko tautolu oti mogoia kua loto taha mo e manatu taha, ne lafi ke he kaufakalataha ha tautolu. (1 Kori. 1:10) Ko e oue tulou ha ia ha tautolu ha kua foaki mai he “fekafekau fakamoli mo e loto matala” e tau tohi fakavē ke he Tohi Tapu ke lagomatai a tautolu ke fakatumau e kaufakalataha ke he fakaako atu ha tautolu mo e taute e gahua ha tautolu ko e tau tagata fakamatala! (Mata. 24:45; 28:19, 20) Taha he tau tohi nei ko e tohi Fakaako he Tohi Tapu, kua moua mogonei ke he 179 e vagahau.
11. Kautū fēfē e paionia fifine i Aitiope ke he totokoaga he fakaaoga e tohi Fakaako he Tohi Tapu?
11 He fakaako e tau Tohiaga Tapu he fakaaoga e tohi Fakaako he Tohi Tapu ka maeke ke hiki e tau loto he tau tagata totoko. He taha magaaho ko Lula, ko e paionia fifine i Aitiope, ne takitaki e fakaakoaga Tohi Tapu he magaaho ne amanaki ti hū mai e taha he magafaoa he tagata fakaako ki fale ti talahau kua nakai lata a lautolu ke fai fakaakoaga pihia. Ne fakamaama fakatotoka age a Lula ke he tagata ia he magafaoa, he fakaaoga e fakataiaga hagaao ke he tupe fakavai he veveheaga 15 he tohi Fakaako he Tohi Tapu. Ne fakatotoka hifo e fifine ti toka a laua ke matutaki e fakaakoaga. Ko e fua, ne fakalataha mai e fifine he fakaakoaga he tapu hake mo e ole ke fai fakaakoaga Tohi Tapu a ia, ti manako foki ke totogi e fakaakoaga! Nakai leva ne kamata e fifine ke fakaako lagatolu he faahi tapu ti kua mitaki e holo ki mua fakaagaaga.
12. Talahau e fakafifitakiaga ke fakakite e puhala kua maeke he tau fuata ke fakaako e kupu mooli he Tohi Tapu mo e lauia mitaki.
12 Maeke he tau fuata ke lagomatai falu he fakaaoga e tohi Fakaako he Tohi Tapu. Ko Keanu ne 11 e tau he moui ne mai i Hauai, ne totou e tohi nei he aoga ti hūhū taha kapitiga he vahega haana ki a ia, “Ko e ha ne nakai fakamanatu e koe e tau aho okioki?” Ne totou age e Keanu e tali mai he mataulu he apenetiki “Lata Nakai ia Tautolu ke Fakamanatu e Tau Aho Okioki?” Ti veveu a ia ke he tau mataulu tala he tohi ti hūhū ke he tama taane ko e mataulu fe ne fiafia lahi a ia ki ai. Ati kamata e fakaakoaga Tohi Tapu. He tau he fekafekauaga kua mole, ne taute he Tau Fakamoli a Iehova 6,561,426 he tau fakaakoaga Tohi Tapu, ne tokologa ne fakaaoga fakamitaki e tohi Fakaako he Tohi Tapu. Kua fakaaoga nakai e koe e kanavaakau nei ke he tau fakaakoaga Tohi Tapu?
13. Ko e puhala fe ka maeke he fakaakoaga Tohi Tapu ke fakaohooho malolō ke he tau tagata?
13 He fakaako e tau Tohiaga Tapu he fakaaoga e tohi Fakaako he Tohi Tapu ka omoomoi e fakaohoohoaga malolō ki a lautolu ne manako ke taute e finagalo he Atua. Ko e hoa mau ne paionia pauaki i Noue ne kamata e fakaakoaga Tohi Tapu mo e magafaoa mai i Samipia. Ne tolu e tama fifine he hoa mai i Samipia ti nakai manako ke fai tama foki. Ti, he fatu foki e fifine, ne fifili a laua ke fakatōtama. He fai aho ato tutala ke he toketā, ne fakaako e laua e veveheaga ne mataulu “Onoonoaga Mahani Atua ke he Moui.” Ko e fakatino he tama nakaila fanau he veveheaga ia ne aamotia lahi a laua ti fifili ke nakai fakatōtama. Ne matutaki a laua ke holo ki mua fakaagaaga ti fakahigoa e tama taane fanau foou aki e higoa he faiaoga fakaako Tohi Tapu.
14. Fakakite e fua mitaki he momoui fakatatai atu ke he tau mena ne fakaako e tautolu.
14 Ko e vala aoga lahi he puhala fakaako ha Iesu ko e moui fakatatai a ia ke he tau mena haana ne fakaako. Kua tokologa e tagata ne loto fakaaue ke he mahani mitaki he Tau Fakamoli a Iehova, he fifitaki a Iesu ke he mena nei. Ko e tagata taane pisinisi i Niu Silani ne moumou he faoa e motokā haana ti kaihā e kato i loto. Ne hokotaki ai e ia ke he leoleo, ne pehē ki a ia: “To liu ni a koe ke moua e koloa haau kaeke ke moua he taha he Tau Fakamoli a Iehova.” Ko e Fakamoli ne fa e tufa e tau nusipepa ne moua e kato ia. He iloa ai, ne hau e tagata pisinisi ke he kaina he matakainaga fifine. Ne fiafia lahi a ia ke moua kua haia oti e tau pepa aoga lahi haana. Ne tala age e matakainaga fifine ki a ia, “Ko e mena tonu ni a ia ke taute e au ke liuaki e koloa nei, mua atu ha ko au ko e taha he Tau Fakamoli a Iehova.” Ne ofo e tagata taane pisinisi, he manatu e mena ne tala age he leoleo he pogipogi ia ni. Maaliali ai, kua momoui e tau Kerisiano mooli hagaao ke he tau fakaakoaga ne moua i loto he Tohi Tapu mo e he fifitaki ki a Iesu.—Hepe. 13:18.
Fifitaki e Aga ha Iesu ke he Tau Tagata
15, 16. Futiaki fēfē e tautolu e tau tagata ke he fekau ne fakamatala e tautolu?
15 Ko e aga ha Iesu ke he tau tagata ne futiaki a lautolu ke he fekau haana. Tuga anei, ko e fakaalofa mo e mahani fakatokolalo haana ne futia e tau nofogati ki a ia. Ne fakakite e ia e fakaalofa hofihofi noa ki a lautolu ne o mai ki a ia mo e fakamafana a lautolu ke he tau kupu totonu, mo e fakamalolō fakatino e tokologa. (Totou Mareko 2:1-5.) Kua nakai maeke a tautolu ke taute e tau mana, ka e maeke a tautolu ke fakakite e fakaalofa, mahani fakatokolalo, mo e fakaalofa hofihofi noa—tau mahani ka lagomatai ke futiaki e tau tagata ke he kupu mooli.
16 Kua kitia ai e fakaalofa hofihofi noa he magaaho ne finatu e paionia pauaki ne higoa ko Tariua ke he kaina he tagata taane fuakau ne higoa ko Beere, ne nofo he taha aelani mamao i Kiripati he Pasifika Toga. Pete he kitia kua nakai manako e tagata ke fanogonogo, ne kitia e Tariua kua mate e taha faahi he tino haana ti logona hifo e ia e fakaalofa hofihofi noa ma e tagata. “Kua logona nakai e koe e tau mena ne mavehe he Atua ma e tau tagata ne gagao mo e momotua?” he hūhū e Tariua. Ti totou e ia e falu kupu mai he perofetaaga ha Isaia. (Totou Isaia 35:5, 6.) Ofo ai, ne pehē e tagata, “Kua totou e au e Tohi Tapu haaku ke he loga e tau ti aahi mai foki e tau misionare he lotu haaku ke he tau tau loga, ka e nakaila kitia e au e kupu nei i loto he Tohi Tapu.” Ne kamata e fakaakoaga Tohi Tapu mo Beere, ti fakatumau a ia ke holo ki mua fakaagaaga. E, ne kulikuli lahi a ia, ka kua papatiso he mogonei, ti leveki e matakau he matakavi mamao, mo e maeke ke fano hui he aelani katoa ke fakamatala e tala mitaki.
Matutaki Atu ke Fifitaki e Keriso
17, 18. (a) Maeke fēfē a koe ke eke mo tagata fakamatala he vagahau mitaki ne kautū? (e) Ko e heigoa ne ha ha i mua ma lautolu ne manamanatu hokulo ke he fekafekauaga ha lautolu?
17 He kitia tumau e tau mena fiafia ne tutupu ke he fekafekauaga, kua maeke a tautolu ke eke mo tau tagata fakamatala he vagahau mitaki ne kautū kaeke ke feaki mo e fakatātā e tautolu e tau mahani ne fakakite e Iesu. Kua latatonu ha mogoia ke fifitaki e tautolu e Keriso ko e tau tagata fakamatala makutu!
18 He eke falu mo tau tutaki ha Iesu he senetenari fakamua, ne hūhū a Peteru: “Ko [e] heigoa e mena ke moua ai e mautolu?” Ne tali age a Iesu: “Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.” (Mata. 19:27-29) Ko e mena ia ni ka moua mooli e tautolu kaeke ke matutaki a tautolu ke fifitaki e Misionare mua ue atu, ko Iesu Keriso.
To Tali Fēfē a Koe?
• Kua fakamahani fēfē e Iehova a tautolu mo tau tagata fakamatala?
• Ko e ha ne lauia mitaki e tohi Fakaako he Tohi Tapu ke he fekafekauaga ha tautolu?
• Fifitaki fēfē e tautolu e aga ha Iesu ke he tau tagata?
[Fakatino he lau 17]
Magaaho ne uiina e Iesu a Peteru, Aneterea, Iakopo, mo Ioane ke mumui ki a ia, ne talia agataha e lautolu
[Fakatino he lau 19]
Ko e tau tohi tuga e “Fakaako he Tohi Tapu” ka lagomatai a tautolu ke fakatumau e kaufakalataha he tau fakaakoaga ha tautolu