Fakapuloa e Tala Mitaki he Atu Mouga Andes

KO MAUTOLU haia i ai, toko 18 he katoa ne momohe he foloa malaega. He tutututu i loto he tau potu momohe, ne fanogonogo a mautolu ke he uha ne to lipilipi he tua fale apa i luga ia mautolu. He tuaga he tama fale apa, ne manamanatu a mautolu po ko mautolu kia e tau tagata fakamua ne nonofo i ai.

Ko e ha ne toko 18 e tagata ne o atu ke he matakavi nei? Ne fakavē e tali ke he manako ha mautolu ke taute e poakiaga ha Iesu ke fakamatala e tala mitaki ke “hoko ni ke he fakaotiaga he lalolagi.” (Gahua 1:8; Mata. 24:14) Ne o atu a mautolu he fenoga fakamatala ke he matakavi mamao he atu mouga Andes i Polivia.

Ke Hoko Atu ki Ai

Ko e paleko fakamua, ke hoko atu ki ai. Ne iloa e mautolu ko e tau puhala o fenoga ke he tau matakavi mamao pihia ne nakai fai setulu pauaki ke holo ai. He magaaho ne hoko mai e pasi ha mautolu, ne kitia e mautolu kua tote lahi ke he mena ne manatu ki ai, ti tūtū e falu ha mautolu. Ka e hohoko oti a mautolu ke he matakavi ne o atu ki ai.

Ko e amaamanakiaga ha mautolu ke hoko ke he tau maaga he atu mouga Andes i Polivia. Ti, he mole e fenoga ha mautolu he pasi, ko lautolu he matakau ha mautolu ne loga e koloa, ne o atu fakalaini he tau hala tokoluga he atu mouga.

Pete he tuga kua tote e maaga he kitia, ne femamaoaki lahi e tau fale, ti leva e o atu ke ahiahi e tau maaga takitaha. Pete ni he mamao e tau mena ne o a mautolu ki ai, ne fai fale tumau ne mamao atu. Ne fa galo a mautolu he to lahi e vikoviko e tau hala he o atu he tau fonua.

“Ko e Ha ne Nakai O Mai a Mutolu he Magaaho kua Mole?”

Ne fiafia lahi e taha fifine ha kua mamao pihia e hala ne o hui ai a mautolu ati fakaatā e ia a mautolu ke fakaaoga e peito mo e tau gaafi haana ke tunu aki e kai laā ha mautolu. He iloa e fakaakoaga he Tohi Tapu hagaao ke he tuaga ha lautolu ne mamate, ne hūhū e taha tagata taane, “Ko e ha ne nakai o mai a mutolu he magaaho kua mole?” Ne fiafia lahi a ia ti ko e magaaho ne toka e mautolu e maaga haana, ne hau a ia mo mautolu ke hūhū foki falu hūhū he o he hala. Ko e taha tagata taane ne nakaila logona ia he Tau Fakamoli a Iehova ti fakakite e fiafia lahi ke he tau tohi ha tautolu. Ne fakaaue lahi mahaki a ia ki a mautolu he o age ti mai e kī ke he taha fale ke momohe a mautolu he pō.

He taha pō, ne pōulitagotago ti nakai iloa e mautolu kua fakatū e tau fale ie ha mautolu he lotouho he faga he tau lō toga lalahi. Ne mafiti e tau lō ke fakakite kua tauhele ki a lautolu ti gagau a mautolu. Ne mategūgū lahi a mautolu ke mioi, ti fakaaue ni he ai leva ti tuga kua tiaki he tau lō a mautolu.

He kamataaga ne mamahi e tau tua mo e tau vikiviki ha mautolu he momohe he fuga kelekele, ka e he pō, ne mahani fakahaga ni ki ai. Ka kua nimo ha mena mamahi mo e uhu he magaaho pogipogi he kitekite a mautolu ke he tau pahua fulufuluola mo e tau aolū ne holo fakatekiteki hake he tau kaukau mo e he tau tapunu mouga fulufuluola ne uufitia he kiona he kitia mamao atu. Ne fakatauhele ni e nonoiki he kolokololō he vai tafe mo e lologo he tau manu lele.

He oti e koukou he vaitafe, ne fakatutala auloa e mautolu e kupu Tohi Tapu, ti kai e kai pogipogi, mo e kamata ke o hake fakatekiteki ki luga ke he taha maaga mamao. Ne aoga e laliaga ke toli hake. Ne feleveia a mautolu mo e fifine fuakau ne tagi he magaaho ne iloa e higoa he Atua, ko Iehova, kua haia i loto he Tohi Tapu. Ne fiafia lahi mahaki a ia. Kua maeke a ia mogonei ke totoku e higoa he Atua ke he tau liogi haana!

Ko e fuakau taane ne talahau kua liga manatu mooli he Atua a ia, ti uhu e ia e lologo ne pehē kua fakafano mai he tau agelu a mautolu. Taha e tagata taane ne gagao lahi ti nakai maeke ke fano ki fafo he fale haana, ne tala mai ki a mautolu ne nakai fai tagata he maaga haana ne lali ke aahi atu ki a ia. Ne ofomate a ia ha kua o mai a mautolu he hala loa mai i La Paz. Ka ko e taha tagata taane ne fiafia lahi mahaki foki a ia ha kua aahi atu e Tau Fakamoli a Iehova ke he tau tagata he tau kaina ha lautolu, ha ko e falu lotu ne uiina ni ki a lautolu he tā e tau logo tapu.

Ne nakai taha e fale he matakavi ia ne fai hila, ti o tuai e tau tagata ke momohe ka pouli mo e aala ka hake e laā. Ko e mena ia, ke moua e tau tagata he tau kaina, ne kamata tuai a mautolu ke fakamatala he matahola ono he pogipogi. Neke fitā e o atu e tau tagata ke gahua he tau fonua. He lotoga e aho, ko lautolu ne fitā he gahua ne makai ke fakamaoki e gahua ka e fanogonogo ke he fekau ha mautolu mai he Kupu he Atua, ti liga fakaatā ke he povi e taha okioki mitaki mai he toho he palao. Ne tokologa e tau tagata ne moua he tau kaina ne kua faliki e tau kili mamoe ke nonofo a mautolu ti hea e magafaoa ke o mai ke fanogonogo auloa. Ne foaki mai he falu tagata gahua fonua e tau taga hana lalahi he loto fakaaue ma e tau tohi faka-Tohi Tapu ne toka hifo e mautolu ma lautolu.

“Ne Ai Nimo e Mutolu Au”

Mooli, ke holo ki mua e tau tagata ke he iloilo he Tohi Tapu, ne lata ke aahi lagaloga atu ki a lautolu. Ne tokologa ne olelalo ki a mautolu ke liliu age ke fakaako fakalaulahi atu a lautolu. Ha ko e mena nei, ne kua lagaloga tuai e fenoga atu a mautolu ke he faahi nei ha Polivia.

He taha fenoga fakamui ha mautolu, ne fiafia e fifine fuakau he liliu atu a mautolu ti pehē: “Kua tuga ko e tau fanau haaku a mutolu. Ne nakai nimo e mutolu au.” Ne fakaaue mai e tagata taane ki a mautolu ma e gahua ha mautolu ti uiina ke nonofo he kaina haana ka liliu atu foki a mautolu ki ai. Liga ko e palepale lahi mahaki he tau laliaga ha mautolu he iloa ko e fifine ne moua e mautolu he taha aahi atu fakamua ne hiki ke he taone ti hane fakamatala e tala mitaki.

He hoko ke he aho fakahiku he fenoga fakamua ha mautolu, ne oti e kalasini ha mautolu ma e sitou ne ta atu ti kua teitei oti foki e tau mena kai ha mautolu. Ne oko gaafi a mautolu fakalata ni mo tafu aki e afi, ti tunu e tau mena kai ha mautolu ne toe, ti kamata ke liliu atu hui. Ne kua mamao ligo a mautolu mai he taone ke maeke ia mautolu ke moua e pasi. Fakahiku ai, ne hohoko atu a mautolu he pō.

Liliu ki Kaina

Ko e fenoga he liliu ne fai lekua foki ha kua malona e pasi. Fai magaaho he mole, ne maeke a mautolu ke heke i tua he tulaki ne pukenamo he tau tagata. Ne moua e mautolu e magaaho mitaki ke fakamatala ke he tau tagata ne heke auloa ne fia iloa e kakano ne o atu a mautolu ki ai. Pete he mahani mā pauaki ni, ne laulahi e tau tagata ke mafanatia mo e aga kapitiga.

He mole e hiva e tulā he heke i tua he tulaki ia, ne hohoko a mautolu ki kaina—pala mo e makalili. Ka kua nakai teao e fenoga. He o atu he hala, ne maeke ia mautolu ke fakatoka ma e taha fifine ne nofo he taone ia ke fakaako e Tohi Tapu.

Ko e kotofaaga lilifu mooli ke fakamatala e tala mitaki ke he tau tagata he tau matakavi mamao pihia. Ne fakamatala a mautolu he fā e maaga lalahi mo e loga e tau maaga ikiiki. Ne olioli a mautolu he manamanatu ke he tau kupu: “Kua fulufuluola lahi ni ki luga he tau mouga e tau hui hana kua talahau mai e tala mitaki, ko ia kua ogo mai e monuina, kua talahau mai e tala mitaki; kua fakailoa mai e fakamouiaga.”—Isaia 52:7; Roma 10:15.

[Fakatino he lau 17]

Mau tuai ke folafola e tala mitaki