Kua Moui e Kupu ha Iehova

Tau Fakamaamaaga Mai he Tohi Fakakiteaga—II

KO E heigoa ne fakatoka mai i mua ma lautolu ne tapuaki mo lautolu ne nakai tapuaki ki a Iehova ko e Atua? Ko e heigoa ka tupu anoiha ki a Satani mo e haana tau temoni? Ko e heigoa e tau monuina ka moua he tau tagata ne omaoma he Pule Afe Tau he Keriso? Ko e tali ke he tau hūhū aoga nei mo e falu kua fakakite mai ia Fakakiteaga 13:1–22:21.a Kua ha ha i ai e hiva fakahiku he tau fakakiteaga ne 16 ne moua he aposetolo ko Ioane he tata ke he matahiku he senetenari fakamua V.N.

“Uhoaki a ia kua totou, katoa mo lautolu kua fanogonogo ke he tau kupu he perofetaaga nai,” he tohi e Ioane, “mo e omaoma ke he tau mena kua tohi ai.” (Fakakite. 1:3; 22:7) He totou mo e fakagahua e tau mena ne fakaako e tautolu mai he tohi a Fakakiteaga ka lauia e tau loto ha tautolu, fakamalolō e tua ke he Atua mo e haana Tama, ko Iesu Keriso, ti foaki mai ki a tautolu e amaamanakiaga homo ue atu ma e vahā anoiha.b—Hepe. 4:12.

LILIGI E TAU KAPINIU NE FITU HE ITA HE ATUA

(Fakakite. 13:1–16:21)

“Ne ita foki e tau motu,” he talahau he Fakakiteaga 11:18, “kua hoko mai tuai hau [Atua] a ita, mo e vaha ke fakafili ai . . . ke moumou ai foki a lautolu kua moumou e lalolagi.” He talahau e falu vala tala ke he mena nei, ko e fakakiteaga ke valuaki ne fakakite mai e “manu favale . . . ne fitu la e tau ulu hana mo e tau hoe ne hogofulu.”—Fakakite. 13:1.

He fakakiteaga ke hivaaki, ne kitia e Ioane e “Punua mamoe ke he mouga ko Siona” kua fakalataha mo ia e tau tagata ne “teau e afe ti fagofulu ma fa e afe.” Ko “lautolu ia ne fakafua mai he tau tagata.” (Fakakite. 14:1, 4) Mui mai e tau fakapuloaaga he tau agelu. He taha fakamailoga foki, ne kitia e Ioane e “tau agelu tokofitu ha ha i ai e tau malaia ne fitu.” Maaliali ai, ne poaki e Iehova ke he tau agelu nei ke liligi e “tau kapiniu he ita he Atua” ke he tau faahi kehekehe he lalolagi ha Satani. Ne ha ha he tau kapiniu e tau poakiaga mo e tau hatakiaga ke he tau fakafiliaga ka fakahoko he Atua. (Fakakite. 15:1; 16:1) Ko e tau fakamailoga ua nei kua foaki foki e falu vala tala matafeiga ke he tau fakafiliaga he Kautu ne matutaki mo e oi ke toluaki he fakatagi e pu ke fituaki.—Fakakite. 11:14, 15.

Tali he Tau Hūhū Faka-Tohiaga Tapu:

13:8—Ko e heigoa e “tohi he moui he Punua mamoe”? Ko e tohi fakatai anei ne toka ai e tau higoa ni ha lautolu ka pule mo Iesu Keriso he haana a Kautu he lagi. Kua putoia ai e tau higoa he tau Kerisiano fakauku ne ha ha agaia he lalolagi, ne amaamanaki ke moua e moui he lagi.

13:11-13—Gahua fēfē e manu favale ne ua e hoe tuga e tarako ti fakatō hifo e afi mai he lagi? Ko e manu favale ne ua e hoe—ko e Pule Malolō ha Igilani-Amerika—ne vagahau tuga e tarako he fakakite kua fakaaoga ai e fakamatakutaku, peehiaga, mo e favale ke peehi e tau tagata ke talia e pule haana. Ne fakatō hifo ai e afi mai he lagi ti taute e matagahua tuga he perofeta he totoku kua kautū ke he tau agaaga kelea he tau felakutaki ne ua he senetenari ke 20 aki mo e moua e kautūaga faka-Komunisi.

16:17—Ko e heigoa e “pulagi likoliko” ne liligi ki ai e kapiniu ke fituaki? Ko e “pulagi likoliko [po ke, matagi]” ne fakatino e puhala manamanatu fakasatani, “ko e agaga [puhala manamanatu] haia kua gahua ai ni ainei kia lautolu kua faliuliu.” Ko e pulagi likoliko nei po ke matagi kona ne fafagu he fakatokaaga kelea katoa ha Satani.—Efeso 2:2.

Tau Fakaakoaga ma Tautolu:

13:1-4, 18. Ko e “manu favale” ne fakatino he tau fakatufono he tagata ne hake “mai he tahi,” kakano, kua mai he tau tagata tokologa ne miha. (Isaia 17:12, 13; Tani. 7:2-8, 17) Ko e manu nei, ne fakatū mo e fakamalolō e Satani, ne ha ha e numera 666, ne peehi e lahi he nakai mitaki katoatoa. He maama ko hai e manu kua lagomatai a tautolu ke iloa ko hai ha tautolu ka mumui ki ai mo e fakalilifu po ke tapuaki ki ai tuga e tokologa he tau tagata.—Ioane 12:31; 15:19.

13:16, 17. Pete e tau mena vihi ne liga feleveia mo tautolu he taute e tau matagahua he tau aho takitaha, tuga e “fakafua mai po ke fakafua atu,” kua nakai lata ia tautolu ke fakaatā a tautolu ke peehi ke toka e manu favale ke pule ke he tau momoui ha tautolu. Ko e talia e ‘fakamailoga he manu favale ke he tau lima ha tautolu, po ke tau matale ha tautolu’ to uta ni ke he lahi e fakaatā he manu favale ke omoi e tau gahua ha tautolu po ke lauia e tau manamanatuaga ha tautolu.

14:6, 7. Ko e fakapuloaaga fakaagelu kua fakaako ki a tautolu kua lata ia tautolu ke fakapuloa e tala mitaki he Kautu he Atua ne kua fakatū mo e fakamafiti. Kua lata ia tautolu ke lagomatai e tau tagata fakaako Tohi Tapu ha tautolu ke feaki e matakutaku mitaki he Atua mo e fakaheke a Iehova.

14:14-20. Ka hoko e vahā ke ‘helehele e tau saito he lalolagi,’ kakano, kua fakakatoatoa tuai e heleheleaga ha lautolu ka fakamomoui, to eke ai mo magaaho ma e agelu ke tolo “ki loto he holiaga vine lahi he ita he Atua” ko e fakapotopoto mai he “tau vine he lalolagi.” Ko e vine ia—ko e fakatokaaga matahavala kitia ha Satani he tau fakatufono ne pule ke he tau tagata mo e “tau fuhi” he tau mahani kelea muitui—to moumou tukulagi ai. Kua lata ia tautolu ke eketaha ke nakai fakaohooho he vine he lalolagi.

16:13-16. Kua fakatino he tau “[talahauaga] agaga kelea” e fakaakoaga fakatemoni ne taute e tau patuiki he lalolagi ke nakai hiki he liligi mai he tau kapiniu ne fitu he ita he Atua ka kua huhui ke totoko ki a Iehova.—Mata. 24:42, 44.

16:21. He tata mai e fakaotiaga he lalolagi nei, ko e fakapuloaaga he tau fakafiliaga ha Iehova ke he fakatokaaga kelea muitui ha Satani ka putoia e tau talahauaga mamafa ne hokulo he tau fakafiliaga he Atua, liga fakatai ke he uha tuli. Ka e to tumau agaia ni e laulahi he tau tagata ke vagahau kelea ke he Atua.

PULE E PATUIKI NE KAUTŪ

(Fakakite. 17:1–22:21)

Ko ‘Papelonia Lahi,’ ko e lotu fakavai he lalolagi ko e vala fakalialia he lalolagi kelea muitui ha Satani. Kua fakakite he fakamailoga ke 11 aki a ia ko e “fifine fakataka lahi”—ko e fifine feuaki—“kua nofo ki luga he manu favale kula.” To moumou katoatoa he manu favale ne “hogofulu e hoe” ne heke a ia ko e fifine. (Fakakite. 17:1, 3, 5, 16) He fakatatai e fifine fakataka ke he “māga lahi,” ko e fakamailoga ne mui mai kua fakapuloa e veliaga haana mo e talahau fakamafiti ke he tau tagata he Atua ke ‘o kehe ia ia.’ Ko e veliaga he māga lahi kua fakatutuku e tokologa ki ai. Ka kua olioli e lagi, ha ko e “taonaga he Punua mamoe.” (Fakakite. 18:4, 9, 10, 15-19; 19:7) He fakamailoga ke 13 aki, ko ia ne heke he “solofanua hina” kua fina atu ke tau ke he tau motu. Kua fakaotioti e ia e lalolagi kelea ha Satani.—Fakakite. 19:11-16.

Ka e kua e “gata tuai, ko e tiapolo ia mo Satani”? Magaaho fe ka “liti a ia ke he loloto he afi”? Ko e taha ia he tau matakupu he fakamailoga ne 14 aki. (Fakakite. 20:2, 10) Ko e tau fakamailoga ua fakahiku kua fakakite fakakū mai he puhala moui ke he Meleniamu. He teitei oti e “fakakiteaga,” ne kitia e Ioane e ‘vailele ko e vai he moui, kua lele ke he vaha loto he hana hala tu,’ ti fakalaulahi atu e uiina mua ue atu ke he ‘ha tagata kua fia inu.’—Fakakite. 1:1; 22:1, 2, 17.

Tali he Tau Hūhū Faka-Tohiaga Tapu:

17:16; 18:9, 10—Ko e ha e ‘tau patuiki he lalolagi’ ne tagi tatuki ha ko e maaga lahi ne moumou e lautolu? Ne tagi tatuki a lautolu ha ko e lotokai. He mole e moumou a Papelonia Lahi, kua kitia mogoia he tau patuiki he lalolagi e puhala nukua aoga e fifine ki a lautolu. Ne foaki e ia e taliaaga fakalotu ke he tau gahua totoko ha lautolu. Ne lagomatai foki e Papelonia Lahi a lautolu ke moua e tau fuata ke gahua he tau malē tau. Lafi ki ai, ne lahi e vala he fifine ne taute ke omaoma e tau tagata.

19:12—Puhala fe ne nakai fai tagata ka ko Iesu hokoia ne iloa e higoa kua nakai iloa e taha? Ko e higoa nei kua liga lata mo e tuaga mo e tau kotofaaga, tuga e tau mataulu ne totoku he Isaia 9:6, ne olioli e Iesu ke he aho he Iki. Ne nakai iloa e taha e higoa nei ka ko ia ni kua moua e tau kotofaaga kehe lahi ia, ko ia ni ne maeke ke maama e kakano ke moua e tuaga tokoluga ia. Pete ia, ne age e Iesu e falu he tau kotofaaga nei ki a lautolu he vahega kitofaihoana haana, kakano kua ‘tohi foki e ia ki a lautolu e higoa fou haana.’—Fakakite. 3:12.

19:14—Ko hai ka heke fakalataha mo Iesu i Amaketo? Putoia ke he “tau kau ha ha he lagi” ne fakalataha mo Iesu ke he tauaga he Atua ko e tau agelu pihia mo lautolu ne fakauku kua kautū ne fitā e moua e palepale ha lautolu he lagi.—Mata. 25:31, 32; Fakakite. 2:26, 27.

20:11-15—Ha hai e tau higoa ne tohia ke he ‘tohi he moui’? Ko e tohi anei ne toka ai e tau higoa oti ha lautolu kua amanaki ke moua e moui tukulagi—ko e tau Kerisiano fakauku, lautolu he moto tagata tokologa, mo e tau fekafekau tua fakamooli he Atua ka moua e ‘liu tu mai ne tututonu.’ (Gahua 24:15; Fakakite. 2:10; 7:9) Ko lautolu ka momoui he ‘liu tutu mai ne hepehepe’ to tohi e tau higoa he ‘tohi he moui’ ka gahua fakatatai ni a lautolu ke he “tau mena kua tohi ke he tau tohi” he tau fakatonuaga ka veveu ke he Meleniamu. Pete ia, kua nakai tohi e tau higoa ke he vai tohi mau tukulagi. Ko e tau higoa ha lautolu ne fakauku kua mau tukulagi ai ka fakamooli a lautolu ti hoko ke he mate. (Fakakite. 3:5) Ko e tau higoa ha lautolu kua moua e moui ke he lalolagi kua maeke ke mau tukulagi ka kautū a lautolu he kamatamata fakahiku he fakaotiaga he tau tau ne taha e afe.—Fakakite. 20:7, 8.

Tau Fakaakoaga ma Tautolu:

17:3, 5, 7, 16. “Ko e iloilo mai luga” kua lagomatai a tautolu ke maama e “alito galo he fifine, mo e manu favale [kula] kua heke e ia.” (Iako. 3:17) Ko e manu favale fakatai nei ne kamata ko e Kautaha he Tau Motu ti liu moui mai he magaaho fakamui ko e Tau Motu Kaufakalataha. Nakai kia omoomoi a tautolu he maama e mena galo ia ke fakamakutu he fakamatala e tala mitaki he Kautu he Atua mo e fakapuloa e aho he fakafiliaga ha Iehova?

21:1-6. Maeke ia tautolu ke mauokafua moolioli ko e tau monuina ne talahau tuai i lalo hifo ka pule e Kautu to tutupu ai. Ko e ha? Ha kua hagaao ai ke he tau mena ia, he pehē: “Kua oti tuai he eke.”

22:1, 17. Ko e ‘vailele he vai he moui’ nukua hukui e tau foakiaga ha Iehova ma e tau tagata omaoma kua malolō mai he agahala mo e mate. Kua fai vala e vai nei ne kua moua mogonei. Liga nakai ni talia loto fakaaue e tautolu e uiina ke o mai mo e ‘uta noa e vai he moui’ ka kua makai a tautolu ke age foki ke he falu!

[Tau Matahui Tala]

[Fakatino he lau 5]

Moua mooli he tau tagata ne omaoma e tau monuina mua ue atu i lalo he pule he Kautu!