1 Atihake e Mauokafua ke he Tohi Tapu

“Ko e tau Tohi[aga] Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.”—2 Timoteo 3:16.

KO E HEIGOA E PALEKO? Tokologa ne talahau ko e Tohi Tapu ko e tohi ni he pulotu he tagata. Falu ne talitonu kua nakai hakotika e fakamauaga tala tuai he Tohi Tapu. Falu ne talahau ko e fakatonuaga he Tohi Tapu kua nakai aoga po ke tuai.

MAEKE FĒFĒ A KOE KE KAUTŪ KE HE PALEKO? Fa mahani ko lautolu ne fakauaua ke he mooli po ke aoga he Tohi Tapu ne nakai la kumikumi a lautolu ki ai. Ne fatiaki noa e lautolu e tau mena ne talahau he falu. Ka e hataki he Tohi Tapu: “Kua talia he tagata goagoa e tau kupu oti; ka ko e tagata lotomatala, kua manamanatu a ia ke he hana tau puhala.”—Tau Fakatai 14:15.

He nakai talia pouli e tau mena ne talahau he falu, ko e ha he muitua ke he fakafifitakiaga he tau Kerisiano he senetenari fakamua ne nonofo i Perea, ko e matakavi mogonei he faahi tokelau i Heleni? Ne nakai talia noa e lautolu e tau mena ne talahau he falu ki a lautolu. Ka kua talahaua a lautolu ke “kumikumi ke he tau Tohi ke he taha aho mo e taha aho, po ke moli e tau mena ia.” (Gahua 17:11) Kia fakatutala fakakū a tautolu ke he ua e kakano kua maeke ia koe ke mauokafua ke he Tohi Tapu ko e Kupu ne omoomoi he Atua.

Kua hakotika e fakamauaga tala tuai he Tohi Tapu. He loga e tau tau kua mole, ne paleko e tau tagata fakauaua—ti matutaki agaia ke paleko—ke he hakotika he Tohi Tapu hagaao ke he tau higoa he tau tagata mo e tau matakavi ne totoku i loto. Ka e lagaloga e fakakite kua nakai fai fakavēaga e fakauaua, ti fakamooli kua mauokafua lahi e fakamauaga he Tohi Tapu.

Ma e fakatai, ne fai magaaho ne fakauaua e tau tagata pulotu ke he mooli he Patuiki ko Sarekona ha Asuria, ne talahau ia Isaia 20:1. Ka e he tau atu tau 1840, ne kamata e tau tagata keli kelekele ke keli hake e fale he patuiki nei. Mogonei, ko Sarekona ko e taha he tau patuiki Asuria kua talahaua lahi.

Ne tuahā e tau tagata tuhituhi ke he mooli ha Ponotio Pilato, ko e kovana Roma ne poaki ke tamate a Iesu. (Mataio 27:1, 22-24) Ka e he 1961 ko e lapa maka ne tohi ai e higoa mo e matagahua ha Pilato ne moua he matakavi ne tata ke he maaga ko Kaisaria i Isaraela.

Hagaao ke he hakotika he fakamauaga tala tuai he Tohi Tapu, ko e fufuta he U.S.News & World Report ia Oketopa 25, 1999, ne talahau: “Ke he tau puhala kehe lahi mahaki, ne fakamooli he tau keliaga kelekele e uho lahi he Maveheaga Tuai mo e Foou—ne lalago e tau vala tala ne aoga lahi ke he tau tupuna a Isaraela, o kehe mai i Aikupito, pule patuiki a Tavita, mo e moui he magaaho ha Iesu.” Pete kua nakai tua ke he Tohi Tapu he fakavē ke he tau mena ne moua he keliaga kelekele, ko e mena kua lata mooli ia koe ke talia e hakotika he fakamauaga tala tuai pihia ha ko e tohi ne omoomoi he Atua.

Kua aoga e iloilo ne ha ha he Tohi Tapu ke lagomatai e tau tagata he tau feakiaga oti. Fakamua atu ato moua e tau moko ikiiki lalahi mo e tau matagahua ha lautolu he utafano e tau gagao, ne fakakite he Tohi Tapu e tau gahua fakameā ne aoga agaia ke he vahā nei. (Levitika 11:32-40; Teutaronome 23:12, 13) Ko e tau tagata he magafaoa ne fakagahua e fakatonuaga he Tohi Tapu hagaao ke he puhala ke fehagai ai a lautolu nukua fiafia lahi. (Efeso 5:28–6:4) Ko e tagata ne muitua tumau ke he tau matapatu fakaakoaga he Tohi Tapu kua liga eke mo tagata gahua makutu po ke takitaki gahua kua mahani fakalatalata lahi. (Efeso 4:28; 6:5-9) He fakagahua e tau matapatu fakaakoaga he Tohi Tapu kua lagomatai foki ke he malolō mitaki he manamanatuaga. (Tau Fakatai 14:30; Efeso 4:31, 32; Kolose 3:8-10) Ko e fakatonuaga aoga pihia kua amanaki a tautolu ke moua mai he Tufuga ha tautolu.

KO E HEIGOA E PALEPALE? Kua maeke he iloilo ne moua i loto he Tohi Tapu ke fakailoilo foki e tagata kua goagoa. (Salamo 19:7) Lafi ki ai, ka moua agataha e tautolu e mauokafua ke he Tohi Tapu, kua lahi e lagomatai ki a tautolu ke he ha tohi foki he taute a tautolu ke fakamalolō fakalahi atu e tua.

Ma e falu vala tala foki, kikite e tohi Ko e Heigoa ne Fakaako Moli he Tohi Tapu?a he veveheaga 2, “Ko e Tohi Tapu—Tohi Mai he Atua.”

[Matahui Tala]