Fifitaki ke he Mahani Fakamooli ha Itai
“KO E Iki [Iehova] na e, ko e Atua mana, kua lalahi hau a tau gahua ke ofomate ai, kua tonu mo e fakamoli hau a tau puhala, ko e Patuiki [“tukulagi tukumuitea,” NW]. Ko hai kia taha, ma Iki [Iehova] na e, kua nakai matakutaku kia koe, mo e nakai fakaheke atu ke he hau a higoa? ha ko koe hoko koe ni kua mitaki [po ke, mahani fakamooli].” Ko e lologo nei ne uhu he lagi e “lautolu foki kua kautu ke he manu favale, mo e fakatino hana,” ne hagaao ke he mahani fakamooli he Atua. (Fakakite. 15:2-4) Manako a Iehova ke he tau tagata tapuaki haana ke fifitaki a ia he fakatātā e mahani mitaki lahi mahaki nei.—Efeso 4:24.
Ke he taha faahi, ko Satani ko e Tiapolo hane taute e tau mena oti he malolō haana ke vevehe kehe e tau fekafekau he Atua he lalolagi mai he fakaalofa he Atua ne tapuaki ki ai a lautolu. Ka e tokologa agaia ne fakatumau e mahani fakamooli ke he Atua, pete ne tau tuaga vale lahi mahaki. Kua loto fakaaue ha ia ha tautolu he tuku fakatokoluga e Iehova e mahani fakamooli pihia! Mooli, kua fakamafana ki a tautolu: “Kua fiafia a Iehova ke he fakafiliaga; nakai tiaki foki e ia hana tau tagata tapu [po ke, mahani fakamooli].” (Sala. 37:28) Ke lagomatai a tautolu ke tumau e mahani fakamooli, ne fakamau e ia he Kupu haana e tau gahua he tau tagata mahani fakamooli tokologa. Taha he tau tala ia ko Itai ko e tagata Kata.
‘Ko e Tagata Kehe mo e Tagata Paea’
Ko Itai ne liga ko e tagata mai he maaga talahaua ko Kata, i Filisitia, ko e kaina he tupua ko Koliato mo e falu fī matakutakuina ha Isaraela. Ko e magaaho fakamua laia he iloa e tala i loto he Tohi Tapu ki a Itai ko e toa he magaaho kū, he totoko a Apisaloma ke he Patuiki ko Tavita. Ko Itai mo e tau tagata taane Filisitia ne toko 600 ne mumui ki a ia, he magaaho ne nonofo paea ai he takatakai i Ierusalema.
Ko e tuaga ha Itai mo e tau tagata ne mumui ki a ia ne liga fakatupu a Tavita ke liu manatu e magaaho ne paea fano a ia he hiki e matakavi haana mo e tau kautau Isaraela ne toko 600 ke he matakavi a Filisitia mo e huhū atu ke he motu he patuiki ko Akisa i Kata. (1 Samu. 27:2, 3) Ko e heigoa ha Itai mo e tau tagata haana ka taute he fehagai a Tavita mo e totokoaga he tama taane haana ko Apisaloma? To kau kia a lautolu mo Apisaloma, fakatumau ke tutū uho, po ke kau a lautolu mo Tavita mo e tau tagata haana?
Manamanatu la ke he mena ne tupu ki a Tavita, ne hola mai i Ierusalema, ti fakamaoki he matakavi ne higoa ko e Fale he Mena Mamao. Liga ko e fale fakahiku i Ierusalema he faahi ke he Mouga ko Olive ato o ke he taha faahi he Vailele ko Ketarono. (2 Samu. 15:17) He matakavi nei, ne liu a Tavita kitekite ke he kau haana he o i mua haana. Kitiala! Kua nakai ni ko e tau Isaraela mahani fakamooli ne haia mo ia ka kua haia foki e tau Kereti oti mo e tau Peleti oti. Lafi ki ai, kua ha ha ai e tau Kata oti—ko Itai mo e tau kautau toko 600 haana.—2 Samu. 15:18.
Mo e loto manamanatu, ne pehē a Tavita ki a Itai: “Ko e o a koe fakalataha mo mautolu he ha? Liu ā, mo e nofo a koe fakalataha mo e patuiki [ko Apisaloma a ia]; ha ko e tagata kehe a koe, mo e tagata paea a koe mai he mena hau ne nofo ai. Ne hau ai a koe neafi, ti eke kia e au ke he aho nai ke o fano a [koe] mo mautolu? Ka ko au kua fano fakahanoa ni au; liu a a koe, kia liliu a mutolu mo e hau a tau matakainaga, kia ha ha ia koe e fakaalofa mo e fakamoli.”—2 Samu. 15:19, 20.
Ko e talahauaga he mahani fakamooli mauokafua ha Itai kua kitia maali ai. Tali e ia: “Kua moui a Iehova, kua moui foki haku iki ko e patuiki, ko e mena ke ha ha i ai haku iki ko e patuiki, po ke mate po ke moui, to ha i ai ni hāu a fekafekau.” (2 Samu. 15:21) Liga fakamanatu he mena nei ki a Tavita e tau kupu pihia ne vagahau he tupuna fifine haana ko Ruta. (Ruta 1:16, 17) Ne aamotia e loto ha Tavita he talahauaga ha Itai, ti pehē ki a ia: “Atu a, ke o” ke he Vailele ko Ketarono. He mena ia, ne “o atu ai a Itai ko e tagata Kata, mo e hana tau tagata oti, mo e tau tama ikiiki oti ha ha ia ia.”—2 Samu. 15:22.
“Fakaako Ai a Tautolu”
“Ko e tau mena oti ne tohi mai i tuai, ne tohi ia, ke fakaako ai a tautolu,” he talahau he Roma 15:4. Ti mitaki ke hūhū hifo a tautolu, Ko e heigoa e tau fakaakoaga ne ako e tautolu mai he fakafifitakiaga ha Itai? Manamanatu ke he mena ne liga fakaohooho a ia ke mahani fakamooli ki a Tavita. Pete ko e tagata kehe mo e tagata paea a Itai mai i Filisitia, ne mailoga e ia a Iehova ko e Atua moui mo Tavita ko ia ne fakauku e Iehova. Ne maeke ia Itai ke onoono muatua atu mai he fakafualoto ne tupu he vahāloto he tau Isaraela mo e tau Filisitia. Ne nakai ni onoono a ia ki a Tavita ko e tagata ne keli e toa Filisitia ko Koliato mo e tokologa foki he tau tagata he motu ha Itai. (1 Samu. 18:6, 7) Ne kitia e Itai a Tavita ko e tagata ne fakaalofa ki a Iehova ti nakai fakauaua he mailoga e tau mahani mitaki lahi mahaki ha Tavita. Fakahiku ai, ne fakalilifu lahi e Tavita a Itai. Ati kotofa foki e Tavita e veveheaga ne toluaki he tau kau haana ki lalo he “pule . . . a Itai” ke totoko ke he tauaga lahi ke he kau a Apisaloma!—2 Samu. 18:2.
Kua lata ke eketaha foki a tautolu ke onoono muatua atu ke he fekehekeheaki he aga fakamotu, lanu, po ke fakamatakau—ko e ha fili tagata mo e tau fakafualoto ne tutupu agaia—mo e mailoga e tau mahani mitaki he falu. Ko e fakafetuiaga he vahāloto ha Tavita mo Itai ne fakakite kua iloa mo e fakaalofa a tautolu ki a Iehova ka lagomatai a tautolu ke kautū he tau kaupāaga pihia.
He manamanatu a tautolu ke he fakafifitakiaga ha Itai, maeke ia tautolu ke hūhū hifo: ‘Fakakite nakai e au e pipiaga mahani fakamooli pihia ki a Tavita ne Mua Atu, ko Keriso Iesu? Fakakite nakai e au e mahani fakamooli haaku he fakalataha fakamakutu ke he gahua fakamatala he Kautu mo e taute tutaki?’ (Mata. 24:14; 28:19, 20) ‘Lahi fēfē e fakamakai haaku ke fakakite e mahani fakamooli haaku?’
To aoga foki e tau ulu he magafaoa he manamanatu fakahokulo ke he fakafifitakiaga he mahani fakamooli ha Itai. Ko e kaufakalataha katoatoa haana ki a Tavita mo e fifiliaga haana ke o mo e patuiki ne fakauku he Atua ne lauia e tau tagata ha Itai. Pihia foki, ko e fifiliaga ne taute he tau ulu he magafaoa he lalago e tapuakiaga mooli kua lauia e tau magafaoa ha lautolu, ti liga tamai foki e tau mena vihi ne nakai tumau. Ka kua fakamafana ki a tautolu: “Mo ia ne fakamooli to taute e [Iehova] e mahani fakamooli.”—Sala. 18:25, NW.
He oti e tau ha Tavita mo Apisaloma, ne nakai fai mena foki he Tohi Tapu ne talahau hagaao ki a Itai. Ko e tala kū ki a Itai he Kupu he Atua kua fakakite e maama lahi mahaki ke he aga haana he magaaho uka he moui a Tavita. Ko e fakamauaga he tala omoomoi ha Itai ne fakakite kua mailoga mo e palepale e Iehova e mahani fakamooli pihia.—Hepe. 6:10.