Fakatata Atu ke he Atua

Kumi a Ia ke he Mena Mitaki

1 TAU PATUIKI 14:13

“KUMI e Iehova ke he tau loto oti, kua fioia foki e ia e tau fatuakiloto oti he tau manatu.” (1 Nofoaga he Tau Patuiki 28:9) Ko e tau kupu omoomoi ia ne kakano ke fakapuke a tautolu ke he loto fakaaue ke he hokulo he fiafia ha Iehova ki a tautolu. Kumi a Iehova ke he mena mitaki he tau loto ha tautolu pete ne mamao ligo a tautolu he mitaki katoatoa. Kitia maali e mena nei he tau kupu haana hagaao ki a Avia ne moua ia 1 Tau Patuiki 14:13.

Ne nofo a Avia he kaina ne mahani kelea e magafaoa. Ko e matua taane haana ko Ierepoamo, ko e ulu he tau patuiki tiaki taofiaga.a Ne finagalo a Iehova ke utakehe katoatoa e magafaoa a Ierepoamo, “tuga ne aau he tagata e otaota.” (1 Tau Patuiki 14:10) Ka e poaki e Atua ko e taha ni e tagata he magafaoa a Ierepoamo, ko Avia—ne gagao lahi mahaki—ka foaki ki ai e tanuaga lilifu.b Ko e ha? Fakamaama he Atua: “Ko ia ni he magafaoa a Ierepoamo kua moua ai e mena mitaki kia Iehova ko e Atua a Isaraela.” (1 Tau Patuiki 14:1, 12, 13) Ko e heigoa he tau kupu nei kua talahau ki a tautolu hagaao ki a Avia?

Nakai talahau he Tohi Tapu ko e tagata tapuaki fakamooli he Atua a Avia. Ka e fai mitaki ne moua ia ia. Ko e mitaki nei “kia Iehova,” kua liga putoia e tapuakiaga Haana. Ko e tau tagata tohia fakarapai ne talahau ko Avia ne fina atu ke he faituga i Ierusalema po ke utakehe e ia e tau leoleo ne tuku he matua taane haana ke puipui e tau Isaraela he o hake ki Ierusalema.

Ko e heigoa ni ne hagaao tonu ki ai, kua uho lahi e mitaki ha Avia. Fakamua, kua moolioli ai. Ko e mitaki nei ne ha ia “ia ni”—ke he haana a loto. Uaaki, kua kehe lahi mahaki. Ne fakakite e Avia e mitaki nei pete ko ia “he magafaoa a Ierepoamo.” Pehē taha akoako: “Ko e mena nava lahi ke he tau tagata taane ke fakatumau e mahani mitaki ha lautolu he nonofo a lautolu he tau matakavi mo e tau magafaoa kelea.” Pehē foki taha ko e mahani mitaki a Avia ne “kitia maaliali . . . , tuga ni e tau fetū kua kikila lahi mahaki ka pouli, ti ko e tau akau arasi kua mua atu e fulufuluola ka mokulu e tau lau he tau akau ne takatakai.”

Mua atu e aoga, ko e tau kupu ia 1 Tau Patuiki 14:13 ne fakaako ki a tautolu taha mena fulufuluola hagaao ki a Iehova mo e mena ne kumi a Ia mai ia tautolu. Manatu na fai mena mitaki ne “moua” ia Avia. Tuga kua kumi a Iehova ke he loto a Avia ato moua e Ia e mena mitaki. Fakatatai ke he magafaoa haana, ko Avia, tuga ne talahau he taha pulotu, ko e penina tahamaka “he tumutumu maka.” Ne ofania e Iehova e mitaki nei ti palepale ai, he foaki e fakaalofa noa ke he tagata tokotaha nei he magafaoa kelea.

Nakai kia mafanatia ke iloa kua kumi mo e uho lahi ki a Iehova e mitaki ia tautolu pete ne ha ha ia tautolu e tau kūkū? (Salamo 130:3) He iloa e mena nei kua lata ke omoomoi a tautolu ke fakatata fakalahi ki a Iehova ko e Atua kua hakahaka e tau loto ha tautolu he kumi ke mailoga na fai mitaki pete ne tote lahi mahaki.

[Tau Matahui Tala]