Vagahau ke he Tau Vagahau Kehekehe—Mai Kia he Atua?
“NAKAI maama e au,” he talahau e Devon. “He tau faahi tapu takitaha he lotu haaku, tokologa ne tuga kua moua e agaaga tapu ti vagahau ke he puhala fakamana he tau vagahau kehekehe. Falu ia lautolu kua momoui ke he tau puhala mahani kelea. He magaaho taha, kua lali au ke moui ke he tau puhala he mahani hakohako. Ka e lahi e liogi haaku ke moua ai, ne nakai moua e au e mena fakaalofa nei he agaaga. Maeke fēfē e mena ia?”
Ne fano foki a Gabriel he lotu ne tuga na moua he tau tagata e agaaga tapu mo e vagahau ke he tau vagahau kehekehe. “Mena ne fakalavelave ki a au,” he fakamaama e ia, “ka liogi au, ne tauhele he falu au he vagahau fakaleolahi ne nakai maama e au po ko lautolu ni. Nakai fai tagata ne lagomatai mooli he tau vagahau nei. Nakai kia lata e mena fakaalofa he agaaga he Atua ke fai kakano aoga?”
Ko e mena ne tupu ki a Devon mo Gabriel kua lagā mai e hūhū fakalagalaga, Ko e vagahau ke he tau vagahau kehekehe tuga ne taute he falu lotu he vahā nei kua mai mooli kia he Atua? Ke tali e hūhū ia, kua lagomatai lahi ke kumikumi ke he mena fakaalofa he vagahau fakamana ke he tau Kerisiano he senetenari fakamua.
Ko Lautolu ne “Kamata Ai he Vagahau ke he Tau Vagahau Kehekehe”
He Tohi Tapu, kua totou e tautolu hagaao ke he falu tagata taane mo e fifine ne moua e malolō mana ke vagahau e tau vagahau ne nakaila iloa e lautolu. Ne tupu mua e mena nei he aho he Penetekoso 33V.N., ko e tau faahi tapu gahoa he mole e mate ha Iesu Keriso. He aho ia i Ierusalema, ne kavi ke he 120 e tutaki ha Iesu ne ‘fakapuke a lautolu oti ke he agaga tapu, kua kamata ai he vagahau ke he tau vagahau kehekehe.’ Ko e tau tagata ahiahi mai he tau motu kehe ne “fakahakuhaku a lautolu ha ko e mena takitaha mo e fanogonogo atu kia lautolu kua vagahau mai ke he hana ni a vagahau.”—Gahua 1:15; 2:1-6.
Ne totoku he Tohi Tapu falu tutaki fakamua ha Iesu ne moua e iloilo ofoofogia nei. Ma e fakatai, he fakamalolō he agaaga tapu, ne maeke he aposetolo ko Paulo ke vagahau fakamana ke he tau vagahau loga. (Gahua 19:6; 1 Korinito 12:10, 28; 14:18) Ka ko e tau mena fakaalofa pihia he agaaga tapu he Atua kua latatonu ke moua e kakano aoga lahi. Ti, ko e heigoa e kakano he vagahau ke he tau vagahau kehekehe he vahā Tohi Tapu?
Ko e Fakamailoga he Lalagoaga he Atua
He tohi ke he tau Kerisiano he maaga ha Korinito, ne maeke falu ke vagahau ke he tau vagahau kehekehe, ne fakamaama e Paulo ko e “vagahau kehekehe ko e fakamailoga ia [ki a] lautolu kua nakai tua.” (1 Korinito 14:22) Ti fakalataha mo e falu iloilo fakamana, ko e mana ke vagahau ke he tau vagahau kehekehe ne fakakite ke he tau tagata onoono kua talia mo e lalago he Atua e fakapotopotoaga Kerisiano ne fakatū foou. Ko e tau mena fakaalofa fakamana kua tuga e fakamailoga he puhalatū ne fakakite ke he tau tagata hane kumi ke he kupu mooli e puhala kua lata ke ō i ai mogonei ke moua e tau tagata kua fifili he Atua.
Mua atu, ne nakai totoku he Tohi Tapu kua vagahau fakamana a Iesu mo e tau perofeta ato hoko e vahā Kerisiano, ke he tau vagahau kehekehe ne nakaila iloa e lautolu. Ko e mena fakaalofa mogoia he tau vagahau kehekehe ne foaki ke he tau tutaki ha Iesu, nukua fai kakano mooli.
Ko e Puhala ke Folafola e Tala Mitaki
He kamataaga he fekafekauaga haana, ne fakaako e Iesu e tau tutaki haana ke fakamatala e tala mitaki he Kautu he Atua ke he tau Iutaia hokoia. (Mataio 10:6; 15:24) Ko e fua, ne fa lavea ni e tau tutaki ke ō ke he tau matakavi ne tokologa e tau Iutaia ne nonofo ai. Ka e nakai leva ti hiki ai.
Nakai leva e mate haana he 33 V.N., ne poaki e Iesu ne liu fakatu mai ke he tau tutaki haana “ke eke e tau motu oti kana mo tutaki.” (Mataio 28:19; Gahua 1:8) Ne tala age foki a ia ke he tau tutaki haana to eke a lautolu mo tau talahau haana “ke hoko ni ke he fakaotiaga he lalolagi.” (Mataio 28:19; Gahua 1:8) He folafola e tala mitaki ke he puhala ia ati latatonu ai ke fakaaoga e tau vagahau kehekehe, nakai ni ko e faka-Heperu.
Ka kua tokologa he tau tutaki fakamua atu ia ko e ‘tau tagata nakai ako mo e tau tagata goagoa.’ (Gahua 4:13) To maeke fēfē mogoia a lautolu ke fakamatala ke he tau motu mamao ne vagahau e tau vagahau ne liga nakaila logona e lautolu, ti nakaila iloa foki e lautolu ke vagahau? Ne fakamalolō he agaaga tapu e falu tagata fakamatala makutu ia aki e malolō mana ke fakamatala fakailoilo ke he tau vagahau ne nakaila iloa e lautolu fakamua.
Ti ua e kakano aoga lahi he mena fakaalofa he tau vagahau kehekehe. Fakamua, ne foaki e fakamailoga he lalagoaga mooli he Atua. Uaaki, ko e puhala lauia mitaki ke lagomatai e tau Kerisiano he senetenari fakamua ke fakakatoatoa e matagahua ha lautolu ke fakamatala ke he tau tagata he tau vagahau loga. Kua taute kia he tau lotu loga he vahā nei ne vagahau ke he tau vagahau kehekehe e tau kakano pihia?
Vagahau e Tau Vagahau Kehekehe he Vahā Nei—Ko e Fakamailoga Kia kua Lalago he Atua?
To tuku e koe i fe e lapa fakamailoga ke maeke ke lagomatai e tau tagata tokologa he matakavi haau? I loto kia he fale nakai lahi? Nakai pihia! Tala mai he fakamauaga ke he aho he Penetekoso ki a tautolu ko e “moto tagata” ne kitia he tau tagata ne ō he puhalatū e fakamailoga ne foaki he tau tutaki he vagahau ke he tau vagahau kehekehe. Ko e fua mogoia, “kua lafi ai po ke tolu e afe tagata” ke he fakapotopotoaga Kerisiano he aho ia ni! (Gahua 2:5, 6, 41) Ka talahau e tau tagata he vahā nei ke vagahau ke he tau vagahau kehekehe ka e taute ni ki loto he fale tapu, maeke fēfē e matagahua ia ke eke mo fakamailoga ke he moto tagata ne nakai tua?
Ne totoku he kupu he Atua kua totoko e mahani “feuaki” mo e falu “gahua he tino” ke he gahuahuaaga he agaaga tapu, ti lafi “ko lautolu kua eke e tau mena pihia, nakai eke ma lautolu e kautu he Atua.” (Kalatia 5:17-21) Ka kitia e koe e tau tagata ne kelea e tau mahani hane vagahau ke he tau vagahau kehekehe, liga hako e manatu haau, ‘Nakai kia kua hikihiki mo e fakahehē foki ma e agaaga tapu he Atua ke foaki ke he tau tagata takitokotaha ne taute tumau e tau mahani ne vihiatia he Kupu he Atua? Kua tuga e fakatū ai e fakamailoga he puhalatū ne takitaki e tau peleōafi ke he hala hepe.
Vagahau e Tau Vagahau Kehekehe he Vahā Nei—Ko e Puhala Kia ke Folafola e Tala Mitaki?
Ka e kua e falu kakano he mena fakaalofa he tau vagahau kehekehe he senetenari fakamua? Ko e vagahau ke he tau vagahau kehekehe ne taute he tau lotu kua eke kia mo puhala ke fakamatala e tala mitaki ke he tau tagata he tau vagahau kehekehe? Mailoga ko e tau tagata fanogonogo ne ha ha i Ierusalema he aho he Penetekoso 33 V.N. kua ō mai he tau motu loga, ti maama mitaki e lautolu e tau vagahau ne vagahau fakamana he tau tutaki. Ka e, ko lautolu he vahā nei ne vagahau ke he tau vagahau kehekehe kua fa mahani ke talahau e tau mena ne nakai maama ke he ha tagata fanogonogo.
Kitia maaliali ai, ko e vagahau ke he tau vagahau kehekehe he vahā nei kua kehe lahi mai he mena fakaalofa he agaaga tapu ne foaki ke he tau tutaki fakamua ha Iesu. Ti nakai fai fakamauaga mooli ke he ha tagata ne moua e malolō mana pihia tali mai he mamate e tau aposetolo. Kua nakai ofo e mena nei ke he tau tagata totou Tohi Tapu. Hagaao ke he tau mena fakaalofa fakamana, putoia e vagahau ke he tau vagahau kehekehe, ne perofeta tuai he aposetolo ko Paulo: “To fakahiku ia.” (1 Korinito 13:8) Ti maeke fēfē mogoia he tagata ke iloa ko hai ne moua e agaaga tapu he vahā nei?
Ko Hai ne Kitia Mooli kua Moua e Agaaga Tapu?
Iloa mooli e Iesu ko e mena fakaalofa he tau vagahau kehekehe to nakai leva ti fakahiku ka mole e fakatū e fakapotopotoaga Kerisiano. Nakai leva ato mate a ia, ne totoku e Iesu e fakamailoga tukulagi ka fakakite e tau tutaki mooli haana. “Ko e mena ia ke iloa ai he tau tagata oti kana, ko e haku a tau tutaki a mutolu,” he talahau e ia, “ka feofanaki a mutolu.” (Ioane 13:35) He kupu taha ia i loto he Kupu he Atua ne talahau tuai to fakahiku e tau mena fakaalofa fakamana, ne pehē: “Nakai tuai oti e fakaalofa.”—1 Korinito 13:8.
Ko e fakaalofa ko e taha vala he “fua,” po ke gahua, he agaaga tapu he Atua. (Kalatia 5:22, 23) Ti ko lautolu ne moua mooli e agaaga he Atua—mo e lalagoaga he Atua—ka fakakite e fefakaalofaaki mooli. Lafi ki ai, ko e vala ke toluaki he fua he agaaga ko e mafola. Ti ko e tau tagata ia he vahā nei ne moua e agaaga tapu kua loto mafola, kua eketaha ke totoko e aga fakatokoluga, fili tagata, mo e favale.
Liu manatu foki e perofetaaga ha Iesu ne fakamau he Gahua 1:8. Ne talahau tuai e ia ko e tau tutaki haana to moua e malolō ke fakamatala hagaao ki a ia “ke hoko ni ke he fakaotiaga he lalolagi.” Fakakite foki e Iesu ko e gahua nei to matutaki atu “ato hoko ni ke he fakaotiaga he lalolagi.” (Mataio 28:20) Ko e gahua fakamatala nei he lalolagi katoa to matutaki ke eke mo fakamailoga ke kitia aki a lautolu ne fakamalolō mooli he agaaga tapu.
Fēfē e manatu haau? Ko e matakau tagata fe he vahā nei kua kitia e koe kua moua e agaaga tapu? Ko hai ne fakakite e fua he agaaga, mua atu ke he fakaalofa mo e mafola, ke hokotia ke matematekelea he tau fakatufono ha kua nakai talia e lautolu ke ō he tau he lalolagi katoa? (Isaia 2:4) Ko hai hane eketaha ke puipui mai he tau gahua he tino tuga e feuaki, mo e tuku ki tua foki a lautolu kua nakai tokihala mai he tau gahua pihia he fakapotopotoaga? (1 Korinito 5:11-13) Ko hai hane fakamatala he lalolagi katoa e tala mitaki he Kautu he Atua ko e amaamanakiaga hokoia ma e tau tagata?—Mataio 24:14.
Ko lautolu ne taute fakailoa e mekasini nei kua nakai fakauaua ke talahau ko e Tau Fakamoli a Iehova ne latatonu mooli mo e talahauaga he Tohi Tapu ko e tau tagata ne moua e agaaga tapu. Ko e ha he lali ke iloa mitaki a lautolu mo e fifili hifo ki a koe ni kua moua mooli e lautolu e lalagoaga he Atua?