Tumau Au ke Lavelave ke he Fakatokatokaaga ha Iehova

Ne talahau e Vernon Zubko

KUA feaki au he faama ne tata ki Stenen, ko e maaga he faahimotu ha Saskatchewan, i Kanatā. Ko e tau matua haaku, ko Fred mo Adella, ne gahua malolō ke foaki fakaagaaga mo e fakatino ke he mahakitaga lahi haaku, ko Aurellia, mo e ki a au pihia foki mo e lafu ikiiki haaku ko Alvin, Allegra, mo Daryl. Ke hoko mai ke he aho nei, kua fiafia tumau a mautolu ke he tau matua ha mautolu he fakaako ki a mautolu e kupu mooli.

Ko e matua taane ko e Kerisiano fakauku, ti ko e tagata fakamatala nakai matakutaku. Ne gahua malolō a ia ma e levekiaga he moui, ka e mataala lahi a ia ke iloa he tau tagata oti ko e Fakamoli a ia. Ne tutala tumau a ia hagaao ke he kupu mooli. Ko e makutu mo e malolō haana ko e fakafifitakiaga mitaki ki a au. Fa pehē a ia ki a au, “Tumau a koe ke lavelave ke he fakatokatokaaga ha Iehova, mo e to mamao a koe he tau lekua loga.”

Ne fakamatala tumau a mautolu he puhalatū i Stenen mo e tau maaga ne tata mai. Nakai mukamuka tumau e gahua ia ki a au. Igatia ni e taone mo e tau tagata hemu, ne fa o mai ki a mautolu ne ikiiki ti vaiga a mautolu. He valu e tau tau moui haaku, ne tū au he matapotu he kauhala puhalatū mo e The Watchtower mo e Awake! ne agaagai e matakau he tau fuata ia au. Ne hamu mai e lautolu e pulou foou haaku he ulu ti tau he pou he faahi haaku. Fakaaue ni ke he matakainaga taane ne motua hake hane tokamata mai ki a au ti kitia e mena ne tupu. Ne hau a ia ti hūhū, “Vern, fai lekua kia?” Ne fehola agataha e tau tama taane. Pete ne fakatupetupe e mena ne tupu, ne fakaako ki a au ka taute e fakamatala he puhalatū, lata ke fanofano ka e nakai tū he taha ni e mena ke tuga e pou. Ko e fakamahaniaga pihia he lahi hake au ne foaki foki ki a au e malolō kua lata ke fano he taha gutuhala ke he taha gutuhala.

Ne papatiso au mo Alvin ia Me 1951. Kua 13 e tau tau moui haaku he mogoia. Manatu agaia e au e Matakainaga ko Jack Nathan ne taute e lauga papatiso, ne fakamafana ki a mautolu ke ua toka ke taha e mahina he nakai tutala hagaao ki a Iehova.a Ne fakatutala tumau e magafaoa ha mautolu ke he gahua paionia ko e feua kua mitaki lahi mahaki ke tutuli. Ti ko e 1958, he mole e oti e aoga haaku, ne hiki au ki Winnipeg i Manitoba ke paionia. Pete he fiafia e Matua Taane ke gahua au mo ia he olo lapa akau, ne fakamalolō fakalahi e ia mo e Matua Fifine e fekafekauaga mau ti lalago e hiki atu haaku.

Ko e Kaina Foou mo e Hoa Foou

He 1959, ne uiina he la ofisa e ha tagata kua maeke ke hiki ki Quebec, ne ha ha i ai e manako lagomatai lahi ma e tau tagata fakamatala. Ti fano au ke paionia i Montreal. Ko e kehe ha ia! Ko e veveheaga foou he moui haaku ke fakaako au ke vagahau Falani mo e hiki ke he aga he motu kehe. Ne pehē e leveki takaiaga ha mautolu ki a au, “Ua talahau, ‘Pehē e puhala ha mautolu he motu ne hau ai au.’” Ko e tomatoma mitaki a ia.—1 Kori. 9:22, 23.

Ne nakai fai hoa paionia au he mogo ne hiki au ki Quebec. Pete ia, ko e matakainaga fifine fuata ne higoa ko Shirley Turcotte, ne feleveia e au fakamua atu i Winnipeg, ne eke mo hoa tumau haaku he magaaho ne mau a maua ia Fepuari 1961. Na tupu mai foki a ia he magafaoa ne fiafia ki a Iehova. Pete he nakai loto fakaaue katoatoa au ki a Shirley he magaaho ia, to eke a ia mo punaaga aoga mooli he malolō mo e atihake ki a au he tau tau loga.

Ko e Fenoga Fakamatala ke he Gaspé

Ua e tau he mole e mau ha maua, ne kotofa a maua ko e tau paionia pauaki ki Rimouski, i Quebec. He vahā tau tupu he tau hake, ne ole e la ofisa ki a maua ke o he fenoga fakamatala ke he Gaspé Peninsula katoa, he kautahi he faahi uta ha Kanatā. Ko e kotofaaga ha maua ke tō fakaloga e tau tega he kupu mooli ke he mena kua maeke. (Fakama. 11:6) Ne fafao e maua e motokā ha maua ke molea e 1,000 mekasini mo e teitei 400 tohi, pihia mo e tau mena kai mo e tau mena tui, ti o atu he fenoga fakamatala ke he taha e mahina. Ne gahua fakapapahi e maua e tau maaga ikiiki oti he Gaspé. Kua hataki he letiō he matakavi ko e Tau Fakamoli hane o mai ti tala age ke he tau tagata ke ua talia e tau tohi ha maua. Pete ia, ne nakai maama he laulahi he tau tagata e fakailoaaga ti piko ni a lautolu ko e fakatātā a maua he tau tohi, ati talia e lautolu e tau tohi.

He tau tau ia, ne foou lahi e atāina ke fakamatala he falu matakavi ha Quebec, ti fa mahani ke taofi he tau leoleo. Kua tupu e mena nei he taha taone ne teitei talia e tau tohi ne foaki e maua he tau gutuhala oti. Ti ole e leoleo ki a maua ke o mo ia ke he fale leoleo, ati o a maua. Ne iloa e au ko e loea ma e taone ne taute e poakiaga ke fakaoti e fakamatala ha maua. Ha kua nakai gahua e takitaki leoleo he aho ia, ne age e au ke he loea e tohi matafeiga mai he la ofisa i Toronto ne fakamaama e tonuhia ha maua ke fakamatala. He oti e totou he tohi, ne ui fakamafiti e loea: “Kitiala, ai manako au ke he ha lekua. Ko e patele ne tala mai ki a au ke taofi e gahua ha mua.” Ha kua manako a maua ke iloa he tau tagata he matakavi na fakaatā he fakatufono e gahua ha maua, ne liliu agataha a maua ke he matakavi ne fakatū he leoleo ti matutaki e gahua he fonua.

He pogipogi hake ne liliu a maua ke kitia e takitaki leoleo, ne nakai fiafia a ia he logona kua fakatū a maua. Mena lata ke logona e koe e tala haana he telefoni ke he loea! Ne pehē e takitaki leoleo ki a maua ka fai lekua a maua, lata ia maua ke vilo fakahako age ki a ia mo e to fakakia e ia e matalekua. Pete ni ko e tau tagata kehe a maua ti temotemoai e vagahau Falani, ne mailoga e maua e totonu mo e fakamokoi he tau tagata. Ka e manamanatu a maua, ‘To iloa la nakai e lautolu e kupu mooli?’ Ne moua e maua e tali he tau tau fakamui he magaaho ne liliu atu a maua ke talaga e tau Fale he Kautu he Gaspé katoa. Mailoga e maua ko e tokologa ia lautolu ne fakamatala fakamua a maua ki ai kua eke mogonei mo tau matakainaga ha maua. Mooli, ko Iehova ne fakatutupu ai.—1 Kori. 3:6, 7.

Moua e Maua e Koloa Uho

Ne fanau e tama fifine ha maua ko Lisa he 1970. Ko e koloa uho nei mai ia Iehova ne lafi e fiafia ke he tau momoui ha maua. Ne gahua a Shirley mo Lisa fakalataha mo au ke he loga e tau matagahua talaga he tau Fale he Kautu. He mole e oti e aoga ha Lisa, ne pehē a ia: “Mami mo Tete, ha ko au ati fai magaaho ne fakaoti e fekafekauaga mau ha mua, to lali au ke paionia ke lata mo e magaaho ia.” Molea e 20 e tau he mole, ne gahua paionia agaia a Lisa, ka e gahua fakalataha mogonei mo e taane haana ko Sylvain. Kua moua tokoua ai e laua e kotofa ke gahua ke he loga e tau matagahua talaga he lalolagi katoa. Ko e foliaga ha mautolu ko e magafaoa ke fakamukamuka tumau e tau momoui mo e fakaatā e mautolu a mautolu ma e fekafekauaga ha Iehova. Nakaila nimo e au e tau kupu ha Lisa he magaaho ne kamata a ia ke paionia. Ti fakaohooho e ia au ke liu ke he fekafekauaga mau he 2001, ti paionia agaia au tali mai he magaaho ia. Ne fakatumau e gahua paionia ke fakaako au ke falanaki ki a Iehova ke he tau mena oti haaku ne taute mo e ke moui mukamuka, makona mo e fiafia.

Lata e Tau Matagahua Talaga ke Moua e Fakaalofa, Mahani Fakamooli, mo e Tua Fakamooli

Ne fakaako e Iehova au kaeke ke fakaatā e tautolu a tautolu mo e talia ha kotofaaga ka mai e ia, to loga e monuina ka moua. Ko e fekafekau he Komiti Tafale he Matakavi mo e gahua he tau matagahua talaga fakalataha mo e tau matakainaga haaku i Quebec katoa mo e falu matakavi foki ko e kotofaaga uho.

Pete kua nakai mitaki lahi mahaki e tau lauga ne taute mai i mua he falu matakainaga foaki noa, ka e he tau matagahua talaga he Fale he Kautu ne kikila a lautolu tuga e tau fetū. Ko lautolu e tau fakahelehele nei kua gahua loto katoa, ti kitia maaliali e tau taleni ha lautolu. Ko e fua kua moua tumau e fale fulufuluola ke fakaaoga mo tapuaki ki a Iehova.

Ne hūhū mai ki a au, “Ko e heigoa e tau mahani kua aoga lahi he tagata foaki noa ma e matagahua talaga he Fale he Kautu?” He iloa e au, lata mua he tagata ke fakaalofa ki a Iehova mo e haana Tama ti pihia foki ke he tau matakainaga katoa. (1 Kori. 16:14) Ke uaaki, kua lata ke mahani fakamooli mo e tua fakamooli. Ka nakai tutupu e tau mena tuga he manako a tautolu ki ai—mo e to tutupu pihia ai—ko e tagata mahani fakamooli to matutaki ke lalago e fakaholoaga fakateokarasi. To omoi he tua fakamooli a ia ke foaki noa ma e tau matagahua he vahā i mua.

Loto Fakaaue ki a Iehova

Pete kua mate e matua taane haaku he 1985, ne tokaloto e au e tomatoma haana ke tumau ke lavelave ke he fakatokatokaaga ha Iehova. Tuga e falu ne moua e kotofaaga ha lautolu ke he fakatokatokaaga ha Iehova he lagi, nakai fakauaua kua gahua malolō foki a ia. (Fakakite. 14:13) Kua 97 e tau ha mami mogonei. Ha kua stroke, ne nakai hohoko e vagahau haana tuga fa mahani; ka e iloa agaia e ia e Tohi Tapu haana. Ne fatiaki e ia e tau tohiaga tapu he tau tohi haana mo e fakamalolō a mautolu ke tumau e fekafekau tua fakamooli ki a Iehova. Ko e loto fakaaue ha ia ha mautolu oti e tau fanau he moua e tau matua loto fakaalofa pihia!

Kua loto fakaaue foki au ki a Iehova ha ko Shirley, ko e hoana mo e hoa tua fakamooli haaku. Ne tokaloto fakalahi e ia e tomatoma ne tala age he matua fifine haana, “to lavelave lahi a Vern i loto he kupu mooli, ti lata ia koe ke ako ke toka a ia ke lagomatai foki falu.” He mau a maua he 49 e tau kua mole, ne mavehe a maua to fuakau a maua he fekafekau ki a Iehova, ti ka hao tokoua he fakaotiaga he fakatokaaga nei, to fuata fakahaga tokoua mo e matutaki ke fekafekau ki a ia tukulagi. E, kua “fakamakai nakai noa [a maua] ke he gahua he Iki.” (1 Kori. 15:58) Kua leveki mooli e Iehova a maua ti fakamooli ke nakai tonoa a maua he ha mena mitaki.

[Matahui Tala]

[Fakatino he lau 31]

“Ko e foliaga ha mautolu ko e magafaoa ke fakamukamuka tumau e tau momoui mo e fakaatā e mautolu a mautolu ma e fekafekauaga ha Iehova”