Moua e Tau Monuina Puhala he Patuiki ne Takitaki he Agaaga he Atua!
“To haele mau ia ia e [a]gaga a Iehova.”—ISAIA 11:2.
1. Ko e heigoa e tau tupetupe kua fakailoa he falu hagaao ke he tau lekua he lalolagi?
“I LOTO he lalolagi miha fakapolitika, kaufakalatahaaga mo e he takatakaiaga, maeke fēfē he lanu tagata ke momoui atu foki ke he 100 tau?” Ko e hūhū haia he pulotu kumikumi ke he tau mena he lagi likoliko (astrophysicist) ko Stephen Hawking he 2006. Ko e vala tala he senolo he New Statesman ne fakakite: “Nakaila utakehe katoatoa e mautolu e mativa po kua atihake e mafola he lalolagi. Ke he taha faahi, tuga kua taute pihia ni e mautolu e mena kua mua atu e kehe. Nakai pehē ha kua nakai lali a mautolu. Kua lali a mautolu ke he tau mena oti mai he tau mena fakakominisi ke he puhala fakatupe he motu; mai he Kautaha he Tau Motu ke he taofiaga fakaniukilia. Kua tau latau a mautolu ke he loga e ‘tau felakutaki ke fakaoti aki e felakutaki’ ke talitonu kua iloa e mautolu e puhala ke fakaoti aki e felakutaki.”
2. Puhala fe ka nakai leva to fakakite e Iehova e pule katoatoa tonuhia haana ke he lalolagi?
2 Ko e tau talahauaga pihia kua nakai fakaofo aki e tau fekafekau ha Iehova. Ne talamai he Tohi Tapu ki a tautolu kua nakai tufuga e tau tagata ke pule ni ki a lautolu. (Iere. 10:23) Ko Iehova tokotaha ha tautolu a Pule Katoatoa tonuhia. Tuga ia, kua tūtonuhia a ia ke fakatoka e tau poakiaga ma tautolu, ke fakamaama e kakano kua lata ke ha ha he tau momoui ha tautolu, mo e takitaki a tautolu ke moua ai. Mua atu, to nakai leva ti fakagahua e ia e pule haana ke fakaotioti e tau laliaga kaumahala ke he pule tūtokotaha he tagata. He magaaho ia foki, to moumou e ia a lautolu oti ne fakaheu e pule katoatoa tonuhia haana ka fakatupa tumau e tau tagata ke he agahala, nakai mitaki katoatoa, mo e ke he “atua he lalolagi nai,” ko Satani ko e Tiapolo.—2 Kori. 4:4.
3. Ko e heigoa ne talahau tuai e Isaia hagaao ke he Mesia?
3 He lalolagi foou he Parataiso, ko e pule katoatoa fakaalofa ha Iehova to fakakite ke he tau tagata puhala he Kautu faka-Mesia. (Tani. 7:13, 14) Hagaao ke he Patuiki i ai, ne perofeta e Isaia: ‘Ka to tupu ai e hoe he tagutugutu akau ko Iese, to fua foki e huli ke tupu hake ai he hana tau vaka. To haele mau ia ia e agaga a Iehova; ko e agaga he iloilo mo e pulotu; ko e agaga he fifiliaga mo e malolo; ko e agaga he maama mo e matakutaku kia Iehova.’ (Isaia 11:1, 2) He tau puhala tonu fe ne kotofa he agaaga tapu he Atua “e hoe he tagutugutu akau [ha] Iese”—ko Iesu Keriso—ke pule ke he tau tagata? Ko e heigoa e tau monuina ka fua mai he pule haana? Ti ko e heigoa ha tautolu kua lata ke taute ke helehele e tau monuina ia?
Kotofa Faka-Atua ke Pule
4-6. Ko e heigoa e iloilo aoga lahi ka fakamalolō a Iesu ke eke mo Patuiki, Ekepoa ne Mua, mo e Fakafili ne pulotu mo e fakaalofa hofihofi?
4 Manako a Iehova ma e tau tagata haana ke tutupu ke he moui mitaki katoatoa i lalo he takitaki haana ko e Patuiki, Ekepoa ne Mua, mo e Fakafili ne pulotu mo e fakaalofa hofihofi mooli. Kakano haia ne fifili he Atua a Iesu Keriso, kua puhala he agaaga tapu a ia ke taute e tau matagahua aoga lahi mahaki ia. Fakatutala ke he falu kakano ka fakamooli katoatoa e Iesu e tau matagahua haana ne kotofa he Atua.
5 Moua e Iesu e iloilo hokulo ke he Atua. Ko e Tama fuataha hokoia kua leva lahi e iloa he Matua ke he ha tagata foki, liga ke he loga e piliona he tau tau. He magahala ia, ne moua e Iesu e iloilo katoatoa hagaao ki a Iehova ati fakamaama ai ki a ia “ko e fakatai he Atua nakai kitia.” (Kolo. 1:15) Ne talahau ni e Iesu: “Ko ia kua kitia au, kua kitia foki e ia e Matua.”—Ioane 14:9.
6 He tapa ki a Iehova, ne maaliali lahi e iloilo ha Iesu mai he tau tufugatia oti, putoia ai e tau tagata. Ne totou ke he Kolose 1:16, 17: “Ko e mena ne eke e ia [Tama he Atua] e tau mena oti kana, ko e tau mena ha he lagi, mo e tau mena ha he lalolagi, ko e tau mena kua kitia mo e tau mena nakai kitia . . . Ko ia foki kua fakamua ke he tau mena oti; kua tumau foki e tau mena oti kana ia ia.” Manamanatu la ke he mena ia! Ko Iesu, ko e [“iki gahua,” NW] he Atua ne fakalataha ke he tau vala oti ne toe he tufugatia. Ti kua maama e ia e tau mena oti kana he lagi mo e lalolagi katoatoa, mai he tau valavala ikiiki lalahi ke he uhoniu ofoofogia he tagata. E, ko e Keriso ko e fakatai mooli he pulotu!—Fakatai 8:12, 22, 30, 31.
7, 8. Lagomatai fēfē he agaaga he Atua a Iesu ke he fekafekauaga haana?
7 Ne fakauku a Iesu ke he agaaga tapu he Atua. “Ha ha i luga ia au e [agaga ha Iehova],” he talahau e Iesu, “ha kua fakauku e ia a au ke fakamatala e vagahau mitaki kia lautolu kua nonofogati; kua fakafano mai e ia au ke fakamalolo e tau loto ne malipilipi, ke fakamatala ai e tokanoaaga ke he kaumahala, kia ala ai foki e tau matapouli, ke toka noa ai a lautolu ne matematekelea. Ke ogoogo e tau kua mafola ai e finagalo [ha Iehova].” (Luka 4:18, 19) He papatiso a Iesu, ne fakamanatu mooli he agaaga tapu ki a ia e tau mena ne fakaako fakamua e ia ato tino tagata, putoia e tau mena ne manako e Atua ki a ia ke taute he fekafekau haana he lalolagi ko e Mesia.—Totou Isaia 42:1; Luka 3:21, 22; Ioane 12:50.
8 Ha kua fakamalolō he agaaga tapu a ia ti kua mitaki katoatoa e tino mo e manamanatuaga, nakai ni ko Iesu e tagata mua ue atu ne moui he lalolagi ka ko e Faiaoga mua ue atu foki. Ko e tau tagata fanogonogo haana ne “ofomate . . . ke he hana tau kupu.” (Mata. 7:28) Taha mena foki, maeke ia Iesu ke iloa e tau tupumaiaga he tau lekua he tagata—ko e agahala, nakai mitaki katoatoa, mo e nakai maama fakaagaaga. Maeke foki ia ia ke kitia mooli e tau loto he tau tagata mo e fehagai fakatatau ki ai.—Mata. 9:4; Ioane 1:47.
9. Fakatolomaki atu fēfē e mauokafua haau ki a Iesu ko e Pule, he manamanatu a koe ke he tau mena ne tupu ki a ia he lalolagi?
9 Ne moui a Iesu ko e tagata. Ko e mena ne tupu ki a ia ko e tagata mo e fakafetui tata haana mo e tau tagata nakai mitaki katoatoa ti lagomatai lahi a Iesu ke eke mo Patuiki. Ne tohi he aposetolo ko Paulo: “Kua lata ai ke eke a ia [Iesu] tuga hana tau matakainaga ke he tau mena oti ni, kia eke ai a ia mo ekepoa ne mua kua fakaalofa, mo e fakamoli ke he tau mena he Atua, kia eke a ia mo lukutoto ha ko e tau hala he tau tagata. Ha kua kamatamata a ia ke he tau mena ne mamahi ai, ti maeke ai ia ia ke lagomatai mai kia lautolu kua kamatamata.” (Hepe. 2:17, 18) Ha ko e mena “kua kamatamata” a Iesu, ti maeke a ia ke fakaalofa ki a lautolu hane lauia he kamatamata. Ko e fakaalofa hofihofi ha Iesu kua kitia maaliali he fekafekauaga haana ke he lalolagi. Ko e tau tagata gagao, mafatifati, mo e matematekelea—pihia mo e tau fanau—kua atāina ke o atu ki a ia. (Mare. 5:22-24, 38-42; 10:14-16) Ko lautolu ne loto molū mo e hoge fakaagaaga kua tata atu foki ki a ia. He taha faahi, ko lautolu ne fakatokoluga, hemu, mo lautolu ne ‘nakai ha i loto e fakaalofa he Atua,’ kua tiaki, vihiatia, mo e totoko ki a ia.—Ioane 5:40-42; 11:47-53.
10. Ko e puhala lahi fe ne fakakite e Iesu e fakaalofa haana ma tautolu?
10 Foaki e Iesu e moui haana ma tautolu. Liga ko e fakamooliaga lahi ue atu he tonuhia ha Iesu ke eke mo Pule ko e makai haana ke mate ma tautolu. (Totou Salamo 40:6-10.) “Nakai mua ni e fakaalofa he taha ke he fakaalofa nai,” he talahau he Keriso, “kia tuku atu e taha hana moui ke hukui aki hana tau kapitiga.” (Ioane 15:13) E, nakai tuga e tau tui ne mua ne nakai mitaki katoatoa, kua fa tū monuina ha kua moua mena mai he tau tagata i lalo ha lautolu, ka e foaki e Iesu haana moui ma e tau tagata oti.—Mata. 20:28.
Fakamalolō ke Fakagahua e Lukutoto
11. Ko e ha kua maeke ia tautolu ke mauokafua katoatoa ki a Iesu ko e Lukutoto ha tautolu?
11 Kua latatonu mooli, ko Iesu ko e Ekepoa ne Mua ko ia ke takitaki he fakagahua ki a tautolu e tau aoga he poa lukutoto haana! He fekafekauaga haana he lalolagi, ne foaki e Iesu ki a tautolu e fakamaamaaga ke he mena ka taute e ia ko e ha tautolu a Lukutoto he haana Pule Afe Tau, to olioli e tautolu kaeke ke fakamooli a tautolu. Ne fakamalolō e ia e tau gagao mo e tau mafatifati, liu fakatūtū mai e tau tagata mamate, fagai e moto tagata, ti tautaofi foki e tau mena kua tufuga aki. (Mata. 8:26; 14:14-21; Luka 7:14, 15) Mua atu, ne taute e ia e tau mena nei, nakai ke fakaaliali e pule mo e malolō haana, ka e fakatātā e fakaalofa hofihofi noa mo e ofania haana. “Mena loto au ki ai,” he tala age e ia ke he tagata lepela ne ole ki a ia ke fakamaulu. (Mare. 1:40, 41) To fakatātā e Iesu e fakaalofa hofihofi noa pihia he Pule Meleniamu haana ke he lalolagi katoa.
12. To fakamooli fēfē e Isaia 11:9?
12 Ko Keriso mo lautolu ka pule fakalataha mo ia to matutaki foki e fakaholoaga fakaako fakaagaaga ne kamata e Iesu kavi ke he 2,000 tau kua mole. To fakamooli ai e tau kupu ia Isaia 11:9: “To puke e lalolagi ke he maama kia Iehova, tuga ne toka kua ūfia ke he puke tahi.” Ko e fakaakoaga faka-Atua ia to putoia mooli ai e fakatonuaga ke he puhala ke leveki e lalolagi mo e tau mena momoui loga i ai, tuga ne poaki he kamataaga ke taute e Atamu. Ke he fakahikuaga he 1,000 tau, ko e finagalo fakamua he Atua ia Kenese 1:28 ka fakamooli, ti ko e poa lukutoto to fakagahua katoatoa ai.
Fakamalolō ke Fakafili
13. Fakakite fēfē e Iesu haana fiafia ke he tututonu?
13 “Ko ia [Keriso] kua kotofa he Atua ke eke mo fakafili ke he tau tagata momoui mo e tau tagata mamate.” (Gahua 10:42) Ko e mafanatia ha ia mogoia ke iloa kua nakai mahani kolokolovao a Iesu, ti ko e tututonu mo e fakamooli kua tuga e pipi mauokafua he tokupu haana! (Isaia 11:5) Ne vihiatia e ia e lotokai, fakatupua, mo e falu kelea muitui, ti akonaki e ia a lautolu ne nakai fai logonaaga ke he matematekelea he falu. (Mata. 23:1-8, 25-28; Mare. 3:5) Mua atu, kua nakai fakavaia a Iesu he tau mena kitia mata, “ha kua fioia e ia ni e tau mena ha i loto he tau tagata.”—Ioane 2:25.
14. Ke he puhala fe kua fakatātā e Iesu haana fakaalofa he tututonu mo e fakafili tonu he mogonei, mo e ko e heigoa kua lata ke hūhū hifo ki a tautolu ni?
14 Ne fakatumau a Iesu ke fakakite haana fiafia ke he tututonu mo e fakafili tonu he leveki e matagahua fakamatala mo e fakaakoaga mua ue atu he fakamauaga tala he lalolagi. Nakai fai tagata, nakai fai fakatufono, mo e nakai fai agaaga kelea ka taofi e fakamooliaga he gahua nei ke he taliaaga katoatoa he Atua. Ka pihia, kua maeke ia tautolu ke mauokafua katoatoa ka mole a Amaketo, to kautū ai e fakafili tonu faka-Atua. (Totou Isaia 11:4; Mataio 16:27.) Hūhū hifo: ‘Fakaata nakai e au e aga ha Iesu ke he tau tagata he fekafekauaga haaku? Foaki nakai e au ki a Iehova e mitaki lahi mahaki haaku, pete ni kua fakakaupā he malolō tino mo e tuaga fakatagata au ke he tau mena ka taute?’
15. Ko e heigoa ka tokaloto e tautolu ke lagomatai a tautolu ke foaki e mitaki lahi mahaki ha tautolu ke he Atua?
15 To lagomatai a tautolu ke fekafekau mo e loto katoa ke he Atua ka tokaloto e tautolu ko e gahua fakamatala ko e gahua haana. Ne poaki ai e ia; puhala he Tama haana ne takitaki ai e ia; mo e omoomoiaga he agaaga tapu kua fakamalolō e ia a lautolu ne fakalataha ki ai. Takiofa nakai e koe e kotofaaga haau he fekafekau ko e ekegahua mo e Atua fakalataha mo e Tama haana ne takitaki he agaaga? Ko hai foki ka ko Iehova ni kua maeke ke omoomoi e molea e fitu miliona tagata, laulahi ne mailoga ke ‘nakai ako mo e goagoa,’ ke fakamatala e fekau he Kautu ke he tau tagata he 236 e motu?—Gahua 4:13.
Puhala he Keriso, Kia Monuina Ai a Koe!
16. Ko e heigoa e kakano he Kenese 22:18 hagaao ke he fakamonuina he Atua?
16 Ne tala age e Iehova ki a Aperahamo: “Ko e hau a [“tega,” NW] foki ke monuina ai e tau motu oti kana he lalolagi; ha kua fanogonogo a koe ke he haku tau kupu.” (Kene. 22:18) Kua kakano e mena nei ko lautolu ne loto fakaaue kua maeke ke amaamanaki mo e mauokafua ke he tau monuina ka tamai he Tega faka-Mesia. Ti hane fekafekau hakahakau a lautolu he vahā nei mo e tokaloto e tau monuina ia.
17, 18. Ko e heigoa e maveheaga ha Iehova kua totou e tautolu he Teutaronome 28:2, ti ko e heigoa e kakano ma tautolu?
17 Ke he tega ha Aperahamo he tino, ko e motu ko Isaraela, ne lagataha e talahau he Atua: “To moua foki e koe e tau mena oti nai [ne tohi he maveheaga he Fakatufono] ke monuina ai; to hoko ia kia koe, ka fanogonogo [tumau] a koe ke he leo a Iehova hau a Atua.” (Teu. 28:2) Ko e mena taha ia ni ka talahau ke he tau fekafekau he Atua he vahā nei. Ka manako a koe ke moua e monuina ha Iehova, kia ‘fanogonogo tumau’ ke he leo haana. Ti ko e tau monuina haana ‘to moua foki e koe e tau mena oti, to hoko ia kia koe.’ Ko e heigoa mogoia kua putoia ke he “fanogonogo”?
18 Ke fanogonogo kua putoia mooli e manamanatu fakahokulo ke he tau mena ne talahau he Kupu he Atua mo e tau mena kai fakaagaaga ne foaki e ia. (Mata. 24:45) Kakano foki ke omaoma ke he Atua mo e Tama haana. Ne pehē a Iesu: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.” (Mata. 7:21) He fanogonogo ai ke he Atua kua kakano ke muitua fakamakai a koe ke he fakaholoaga ne fakatoka e ia, ko e fakapotopotoaga Kerisiano mo e tau motua kotofa, ko e “tau mena fakaalofa ke he tau tagata.”—Efeso 4:8.
19. Puhala fe ke moua e tautolu e monuina?
19 Ko e “tau mena fakaalofa ke he tau tagata” kua putoia a lautolu he Kau Fakatufono, ne eke mo tau hukui he fakapotopotoaga Kerisiano katoa. (Gahua 15:2, 6) Ko e aga mogoia ha tautolu ke he tau matakainaga fakaagaaga he Keriso ko e vala lahi mahaki ke fakafili aki a tautolu ka hoko e matematekelea lahi. (Mata. 25:34-40) Ti ko e taha puhala ke moua e tautolu e monuina ko e lalago fakamooli e tautolu e tau tagata fakauku he Atua.
20. (a) Ko e heigoa e matapatu gahua he “tau mena fakaalofa ke he tau tagata”? (e) Fakakite fēfē e tautolu e loto fakaaue ha tautolu ke he tau matakainaga nei?
20 Ko e “tau mena fakaalofa ke he tau tagata” kua putoia foki a lautolu he tau La Komiti, tau leveki faifano, mo e tau motua he fakapotopotoaga, ne kotofa oti he agaaga tapu. (Gahua 20:28) Ko e matapatu gahua he tau matakainaga nei ke atihake e tau tagata he Atua “ato hohoko atu . . . oti kana ke he loto fakalataha ke he tua, mo e iloa maliali e Tama he Atua, ato eke mo tau tagata kua katoatoa ai e mahani mitaki, ato hohoko atu foki ke he fafatiaga he loa kua lata mo e puke ha ia Keriso.” (Efeso 4:13) Mooli, kua nakai mitaki katoatoa a lautolu tuga na tautolu oti. Pete ia, kua fakamonuina a tautolu ka tali fakaaue atu ke he levekiaga fakaalofa ha lautolu.—Hepe. 13:7, 17.
21. Ko e mafiti he ha a tautolu ke omaoma ke he Tama he Atua?
21 Nakai leva to moumou he Keriso e fakatokaaga kelea ha Satani. Ka tupu e mena ia, to tuku e tau momoui ha tautolu he tau lima ha Iesu, ha kua fakaatā he Atua a ia ke takitaki e “moto tagata tokologa” ne talahau tuai ke he “tau vaipuna he moui.” (Fakakite. 7:9, 16, 17) Kia eketaha fakalahi a tautolu mogonei ke omaoma fakamakai mo e loto fakaaue ke he Patuiki ne takitaki he agaaga ha Iehova.
Ko e Heigoa ne Fakaako e Koe Mai . . .
• Isaia 11:1-5?
• Gahua 10:42?
• Kenese 22:18?
[Fakatino he lau 17]
Kitia e fakaalofa hofihofi noa ha Iesu he fakaliu tu mai e ia e tama fifine ha Iairo
[Tau Fakatino he lau 18]
Hane leveki e Iesu Keriso e matagahua fakamatala mua ue atu he fakamauaga tala