Nakai Mule Lahi ke Fekafekau ke he Atua
I Málaga, he faahi toga i Sepania, ko e matua fifine mo e haana tama fifine, ne fakahigoa tokoua ko Ana, ne papatiso ia Tesemo 19, 2009. Ko laua falu he 2,352 ne taute e lakaaga ia i Sepania he 2009. Ka e fai mena kehe lahi mahaki hagaao ke he matua mo e tama fifine nei—ko e tau tau ha laua. Ko e 107 mo e 83 e tau tau momoui!
Ko e heigoa ne takitaki a laua ke papatiso he fakakite e tukuleleaga ha laua ki a Iehova? He mataulu he atu tau 1970, ne fa uiina he tuutakaina a Ana—ko e tama fifine—ke fano ke he Fakaakoaga Tohi he Fakapotopotoaga ne taute he kaina he Fakamooli. Ne fa fano a Ana he falu magaaho. Ha ko e gahua tupe ha Ana ati nakai holo ki mua a ia.
Kavi ke he hogofulu e tau he mole, ne fakaako Tohi Tapu e falu fanau ha Ana ti nakai leva ti eke mo tau fekafekau ha Iehova. Taha ia lautolu, ko Mari Carmen, ne liu fakamata e fakaalofa he matua fifine haana ma e kupu mooli he Tohi Tapu ti lagomatai a ia ke talia e fakaako Tohi Tapu. Ti ko e tupuna fifine ha Mari Carmen, ko Ana ne motua hake, ne kamata foki ke fakakite e fiafia ke he Tohi Tapu. Fakahiku, ne hogofulu e tagata he magafaoa nei ne taute e lakaaga ke papatiso.
He aho ne papatiso a laua, ko e tau Ana tokoua, ko e matua mo e tama, ne fiafia lahi mahaki. “Kua mitaki lahi a Iehova ki a au, he fakaatā au ke iloa a ia,” he talahau e Ana ne 107 e tau. “To hoko ke he Parataiso,” he lafi he tama fifine haana, “loto au ke fekafekau ki a Iehova, taute e finagalo Haana mo e fakamatala katoatoa e tala mitaki.”
Ko e mena ne tamai e fiafia pauaki ke he tau takape tokoua nei ko e o atu ke he tau feleveiaaga. “Ne nakai fakatonoa e laua ha feleveiaaga,” he talahau he taha motua he fakapotopotoaga ha laua. “Kua mautali tumau a laua ke tali he Fakaakoaga Kolo Toko.”
Ko e fakafifitakiaga fakamooli ha laua kua fakamanatu mai e takape ne higoa ko Ana “ti nakai fano kehe a ia he faituga, ka e fekafekau a ia, ha ne fakakanopogi mo e liogi ke he aho mo e po.” Ne takitaki he mena nei a ia ke moua e lilifu he kitia e tama tote ko Iesu. (Luka 2:36-38) He 84 e tau, kua nakai motua lahi a Ana ke fekafekau ki a Iehova, ti pihia mo laua he vahā nei ne tatai e tau higoa mo e haana.
Fai magafaoa nakai a koe kua makai ke fanogonogo ke he ogo he Tohi Tapu? Po ke feleveia nakai a koe mo e fuakau fiafia ne makai ke fanogonogo ki a koe ka aahi atu a koe ke he kaina haana? Ko lautolu ia ka tuga e tau Ana tokoua he tala nei, kua nakai mule lahi ke kamata ke fekafekau ke he Atua mooli ko Iehova.
[Blurb he lau 25]
“Kua mitaki lahi a Iehova ki a au”
[Blurb he lau 25]
“To hoko ke he Parataiso, loto au ke fekafekau ki a Iehova”