“Kia Mataala”—Ko e Ha ne Aoga Lahi?

“PO KE heigoa foki e fakamailoga he hāu a haele mai, mo e fakaotiaga he lalolagi?” (Mata. 24:3) He tali ke he hūhū ia, ne age e Iesu ke he tau tutaki haana e fakamailoga maaliali, matafeiga, kitia mitaki, mo e nakai hepe, ne fakamau ia Mataio veveheaga 24, Mareko veveheaga 13, mo e Luka veveheaga 21. Ne lafi e ia: “Kia mataala.”​—Mata. 24:42.

Kaeke ke kitia mitaki mooli e fakamailoga, ko e ha kua lata foki e tomatomaaga nei? Manamanatu ke he tau tuaga ua nei. Fakamua, ko e tau fakatauhele ne liga takitaki e falu ke fakaheu e fakamailoga, ti fua mai e galo he tuaga fakaagaaga mo e mataala. Uaaki, liga mailoga he Kerisiano e falu vala pauaki he fakamailoga ka ko e tau takatakaiaga haana mogonei ne nakai logona ai e lauiaaga mooli. Liga manamanatu mogoia a ia ko e ‘matematekelea lahi,’ ko e fakamooliaga he perofetaaga ha Iesu, kua mamao lahi agaia ti ko e mena ia nakaila lata ia ke “kia mataala.”​—Mata. 24:21.

Nakai Manako a Lautolu ke Iloa

Ne fakamanatu e Iesu ke he tau tutaki haana hagaao ke he tau tagata he vahā a Noa. Ko e fakamatala ha Noa, ko e talaga he vaka makimaki, mo e mahani favale he magahala ia kua mailoga lahi. Pete ia, laulahi ne nakai manako ke iloa. (Mata. 24:37-39) Pihia foki e aga kua holofa hagaao ke he tau hatakiaga he vahā nei. Ma e fakatai, ko e tau fakamailoga ne fakakaupā e holo mafiti kua maaliali e tau hatakiaga, ka e tokologa ne fakaheu ai. Ne fa fakaohooho e tau pule ke tuku e tau paipai ke fakakaupā e mafiti he tau puhalatū he taone ke peehi e tau tagata fakaholo ke holo fakatekiteki. Pihia foki, kua liga mataala e Kerisiano ke he fakamailoga he tau aho fakamui ka e fakalataha agaia ke he tau matagahua kua nakai felauaki mo e fakagahuaaga ia. Ko e fuata mui ko Arielle he Faahi Lalo i Aferika ne lauia ke he mena nei.

Kua fiafia a Arielle he kitekite e pele liti polo (handball) he tau fifine he televisoni. He mogo ne fakatoka he aoga haana e matakau, ko e amaamanakiaga ke pelē ne fakapulefu e mataala haana ke he tau hagahaga kelea mooli ke he tuaga fakaagaaga haana. Ne fakamau a ia ke eke mo tagata leveki he kolu. Ko e heigoa ne mui mai he mena ia? Ne fakamaama e ia: “Falu he haaku a tau kapitiga he matakau ne fai kapitiga taane ne fakaaoga e tau tulaki mo e ula. Ne vaiga e lautolu au ha kua kehe, ka e manatu au na maeke ia au ke fehagai ki ai. Ofo noa ni, ne kamata e pelē ke fakalolelole fakahaga e tuaga fakaagaaga haaku. Ko e manamanatuaga mo e loto haaku kua pukeina he pele liti polo. He tau feleveiaaga Kerisiano, ne fa neva fano e tau manatu haaku mai he Fale he Kautu ke he pā pelē liti polo. Ne matematekelea foki e aga faka-Kerisiano haaku. Ko e fiafia lahi ke pelē kua hiki tuai ke he fia mua. Ne eketaha au he fakamahani ke fakamakona e aga fetoko foou haaku. Ne lafilafi hake e tupetupe. Tiaki foki e au e tau tuaga kapitiga ke pele liti polo.

“Kua hoko ke he tapunu he magaaho ne moua noa ai he taha kau e polo ha kua fakahala a mautolu. Kua mautali au ke palepale e kolu. Ato mailoga e au, ne liogi au ki a Iehova ke lagomatai au ke taofi e polo neke hū! Taute he mena nei au ke mailoga e matematekelea lahi mahaki he tuaga fakaagaaga haaku. Liu au moua fēfē ai?

“Ko e ha tautolu a DVD Young People Ask—What Will I Do With My Life?a kua fitā he kitia e au. Ne fifili au ke liu kitekite ai ti ko e mogonei kua lata ke manamanatu fakahokulo ki ai. Ko e mena ia, kua ha ha a au he tuaga tuga a André, ko e fuata taane i loto he tala. Ne mataala pauaki au ke he mena ne talahau he motua ki a André ke taute​—totou mo e manamanatu ke he Filipi 3:8. Kua latatonu e mena ia. Ti tiaki e au e matakau.

“Fai keheaga lahi e mena ia! Ko e aga fetoko haaku fakalataha mo e tupetupe kua galo. Ne logona e au e fiafia lahi mo e tata lahi ke he tau kapitiga Kerisiano haaku. Kua kakano lahi e tau matagahua fakaagaaga. Ne hagaaki mau au ke he tau feleveiaaga ti liu fiafia lahi ki ai. Holo ki mua foki e haaku a gahua ke he fonua. Mogonei, kua fekafekau tumau au ko e paionia fakakū.”

Ka tautoho he fakatauhele a koe ke fakaheu e fakamailoga ne foaki e Iesu ki a tautolu, kia taute e tau lakaaga aoga lahi tuga ne taute e Arielle. Maeke a koe ke lali ke taute e falu mena nā. Fakakia e Watch Tower Publications Index, ne fakahigoa ko e mepe ke he tau koloa galo. Ko e tau fakamooliaga ke he fakatonuaga aoga mo e tau hokotaki ne talahau he tau tagata ke he puhala ne fehagai e falu mo e tau kamatamata kua fakatali ki a koe. Aoga katoatoa mai he tau feleveiaaga Kerisiano he tauteute fakamitaki mo e fakamau hifo e tau manatu. Lagomatai lahi ke he falu he nonofo tata ki mua. Ka fai vala e toloaga, lali ke tali tuai. Lafi ki ai, kia mataala fakaagaaga he matutaki mo e tau vala foou ne ha ha ai e tau vala he fakamailoga mo e falu kitiaaga he “tau aho fakamui.”​—2 Timo. 3:1-5; 2 Pete. 3:3, 4; Fakakite. 6:1-8.

“Kia Nonofo Tauteute Ai a Mutolu”

Ko e fakamailoga he tau aho fakamui kua kaputia e tau motu katoatoa, ko e “lalolagi oti.” (Mata. 24:7, 14) Totou miliona ne nonofo he tau matakavi ne lauia lahi he tau tatalu, tau hoge, tau mafuike, mo e falu mena tutupu ne talahau tuai. Taha faahi, tokologa e falu ne ha ha ai he tau tuaga mafola mo e milino. Ka nakaila mailoga fakatagata e koe e falu vala he fakamailoga, lata kia a koe ke manamanatu ko e matematekelea lahi kua mamao ligo agaia? Nakai pulotu e mena ia.

Ma e fakatai, manamanatu ke he mena ne talahau tuai e Iesu hagaao ke he “tau hoge foki, mo e tau tatalu.” (Luka 21:11) Fakamua, ne nakai pehē a ia to lauia e tau matakavi oti he magaaho taha po ke tatai e tau lauiaaga. Ka e, talahau e ia ko e tau mena nei to tutupu “he taha mena mo e taha mena.” Ti nakai amanaki a tautolu ke tutupu e tau mena taha ia he tau matakavi oti ke he magaaho taha. Uaaki, nakai leva he totoku e tau hoge, ne fakakite e Iesu ko e falu he tau tutaki haana kua lata ke mataala ke nakai molea e kai: “[Kia mataala] a mutolu neke pehia ha mutolu a tau loto, he fakaniniko [he molea e kai].” (Luka 21:34) Ati nakai lata e tau Kerisiano oti ke amanaki ke lauia he tau vala oti he fakamailoga. Ka e, pehē a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.” (Luka 21:31) Fakaatā he tau puhala matutaki he vahā nei a tautolu ke kitia e tau vala oti he fakamailoga, pete he lauia fakatagata e tautolu e tau mena tutupu he matakavi ha tautolu.

Manatu foki, kua fitā he fakatoka e Iehova e ‘aho mo e tulā’ ke kamata ai e matematekelea lahi. (Mata. 24:36) Ko e holoaga he tau mena tutupu he lalolagi to nakai hiki e aho nei.

Ne tomatoma e Iesu e tau Kerisiano he tau matakavi oti: “Kia nonofo tauteute ai a mutolu.” (Mata. 24:44) Lata ia tautolu ke nonofo tauteute tumau. Mooli, nakai maeke ia tautolu ke fakafitā ke he tau matagahua fakateokarasi he aho katoa he tau aho oti. Taha mena foki, nakai fai ia tautolu ka iloa e tau mena ha tautolu ka taute he mogo tonu ka kamata e matematekelea lahi. Falu to liga gahua he fonua po ke taute he tau fekau he kaina. (Mata. 24:40, 41) Ti ko e heigoa ka taute e tautolu ke nonofo tauteute ai?

Ko Emmanuel mo Victorine, mo e ha laua a tau tama fifine tokoono ne nonofo he matakavi i Aferika ne nakai lauia katoatoa a lautolu he tau mena tutupu oti he fakamailoga. Ti fifili a lautolu ke tutala fakaagaaga he tau aho oti ke lagomatai a lautolu ke nonofo tauteute. Ne fakamaama e Emmanuel: “Kua uka ke moua e magaaho kua felauaki mo e tau tagata oti. Fakahiku ne fifili e mautolu ke hafa e tulā, he matahola ono ke he hafa e matahola ono he mogo pogipogi. He mole e fakatutala ke he lauga he aho, ne tauteute e mautolu e tau paratafa gahoa he taha he tau tohi ne fakatoka ma e fakaakoaga he fakapotopotoaga he faahitapu.” Lagomatai nakai he fakaholoaga nei a lautolu ke mataala tumau? Lagomatai! Ko Emmanuel ko e leveki he kau he tau motua he fakapotopotoaga. Ko Victorine ne fa gahua ko e paionia fakakū mo e kua lagomatai e tokologa ke talia e kupu mooli. Ko e tau tama fifine ha laua kua holo oti ki mua fakaagaaga.

Ne tomatoma e Iesu a tautolu: “[Kia matakite], kia mataala.” (Mare. 13:33) Ua fakaatā e fakatauhele ke fakagalo e mataala fakaagaaga haau. Ka e mailoga e fakatonuaga mitaki he tau tohi ha tautolu mo e he tau feleveiaaga he fakapotopotoaga, tuga ne taute e Arielle. Tuga e magafaoa ha Emmanuel, lali ke fai mena ke taute he tau aho takitaha ke nonofo tauteute a mutolu mo e “kia mataala.”

[Matahui Tala]

[Fakatino he lau 4]

Lagomatai he tau fakatutala fakaagaaga a Emmanuel mo e magafaoa haana ke ‘nonofo tauteute ai a lautolu’