‘Ko Iehova ko e Haku a Lagomatai Haia’
1 Magaaho ne poaki e Iesu hana tau tutaki fakamua, ne tala age a ia ki a lautolu: “Kitiala, kua fakafano atu e au a mutolu tuga e tau mamoe ke he vaha loto he tau luko.” (Mata. 10:16) Ne fakahopoate kia he mena nei a lautolu mo e mataofi e fakamatala? Nakai. Ne moua e lautolu e aga ne tala age he aposetolo ko Paulo he magaaho fakamui ke he tau matakainaga Kerisiano: “Ko e mena ia kua talahau atu e tautolu mo e fakamalolo, Ko [Iehova], ko e haku a lagomatai haia, nakai matakutaku au ke he tau mena ke eke he tau tagata kia au.” (Hepe. 13:6) Ne fiafia a lautolu ke ekefakakelea ha ko e higoa ha Iesu, ne matutaki nakai oki foki a lautolu he fakaako mo e tukuogo atu e tala mitaki.—Gahua 5:41, 42.
2 Ko e gahua fakamatala he lalolagi katoa he vaha nei kua ha ha he tau tuaga fakahikuhiku. Tuga ni ne fuafua e Iesu, kua eke a tautolu mo tau tagata ne ekefakakelea he tau motu oti. (Mata. 24:9) Ko e gahua fakamatala ha tautolu kua totoko mo e vaiga ki ai, ti ke he falu vala he lalolagi, ne hokotia ke pa malu. Kaeke nakai tua a tautolu, to liga logona e tautolu e matakutaku. Pete ia, he iloa ko Iehova ko e ha tautolu a Lagomatai kua fakahauhau a tautolu mo e fakamalolo ke fakauka.
3 Ko e fakamalolo ko e aga mao, mauokafua, toa. Ko e taha fahi he matakutaku, maimaina, loto lolelole. Ko e tau tutaki ha Iesu kua lata tumau ke fakamalolo ke fakauka. Kua aoga ai kaeke ke kalo mai a tautolu he fakalolelole ha ko e tau mahani mo e tau aga he lalolagi ne faitaua ke he Atua. Kua mafanatia ha ia ma tautolu ke manamanatu ke he fakafifitakiaga tokoluganea ha Iesu, ko ia ne kautu ke he lalolagi! (Ioane 16:33) Manatu foki, ko e aposetolo ne fehagai mo e tau kamatamata kaka ne talahau mauokafua: “Kua lata ni ke mua e omaoma ke he Atua ke he omaoma ke he tau tagata.”—Gahua 5:29.
4 Nakai Tukumuli a Tautolu: Kua lata ia tautolu ke eketaha ke fakatumau e aga mitaki ke he gahua ha tautolu. (Hepe. 10:39) Tokaloto tumau nukua fakafano atu e Iehova a tautolu ko e fakakiteaga he hana fakaalofa mo e fakaalofa noa ke he tau tagata. Ne nakai ole a ia ke he tau fekafekau ke taute ha mena ne nakai aoga. Ko e tau mena oti kana ne kotofa a tautolu ke taute to eke mo mena kua mua atu e mitaki ha lautolu ne fakaalofa ke he Atua.—Roma 8:28.
5 Ko e onoonoaga mitaki ka lagomatai a tautolu ke fakatumau ke kumi a lautolu ne tuga e tau mamoe he matakavi ha tautolu. To liga onoono a tautolu ke he fekehekeheaki ne fakatata he tau tagata ko e fakakiteaga he hogohogomanava mo e nakai fai amaamanakiaga. Kia toka e fakaalofa ha tautolu ke omoomoi a tautolu ke mafanatia mo e fakauka. He tau magaaho oti ka foaki e tautolu e tohi po ke mailoga kua fai fiafia, ko e foliaga ha tautolu ke liu ahi atu fakamafiti mo e fakalagalaga ke au atu e fiafia. Kua nakai lata ia tautolu ke nakai fakauaua ke he iloilo ha tautolu ke kamata e fakaakoaga Tohi Tapu po ke taute lauia mitaki ai. Ka e, kua lata ia tautolu ke fakatumau mo e liogi ke he lagomataiaga mo e takitakiaga ha Iehova, mauokafua ai to lagomatai e ia a tautolu.
6 Kua talitonu mauokafua a tautolu to leveki e Iehova e gahua hana ke hoko ke he fakaotiaga. (Fakatatai Filipi 1:6.) Ko e falanaki katoatoa ha tautolu ki a ia ko e ha tautolu a Lagomatai kua fakamalolo a tautolu, ke “aua neke fakalolelole.”—Kala. 6:9.