Ko e Heigoa Haku ka Talahau?

He feleveia ai a tautolu mo e tau tagata ne talia fiafia he fekafekauaga, kua manako lahi a tautolu ke liliu atu ke fakalaulahi e fakatutala mo lautolu. Ka e, liga fa uaua a tautolu he mena ke vagahau ki ai ka liliu atu. Liga mitaki ia koe ke kamata pehe: Talahau taha huhu fiafia, ti kumi ke he tohi Reasoning ke fakakite e tali he Tohi Tapu. Kua lagomatai lahi ke taute taha tohi he tau huhu kua maeke ia koe ke fifili ki ai kua lau pauaki mo e tagata. Ko e tohi na i lalo, ne fakatoka mai he tohi Reasoning, kua fakakite e numera he lau ke maeke ke kumi ki ai:

◼ Ko e ha ne fuakau a tautolu mo e mamate? (98)

◼ Ha ha i ai nakai ha kakano mitaki ke tua ke he Atua? (145)

◼ Kua fakaalofa moli nakai e Atua ke he tau mena ne tutupu ki a tautolu? (147)

◼ Kua lata kia e tagata ke finatu ke he lagi ke moua moli e fiafia anoiha? (163)

◼ Ko e ha kua aoga ke iloa mo e fakaaoga e higoa fakaperesona he Atua? (196)

◼ Ko e heigoa ka fakakatoatoa mai he Kautu he Atua? (227)

◼ Ko e heigoa e kakano he moui he tagata? (243)

◼ Ko e ha ne loga e tau lotu? (322)

◼ Maeke fefe e tagata ke iloa e lotu kua tonu? (328)

◼ Kua malolo lahi fefe e pule a Satani ke he lalolagi nei? (364)

◼ Ko e ha ne fakaata he Atua e matematekelea? (393)

◼ Ko e ha ne tupufetui e mahani kelea? (427)

Maeke ia koe ke tuku e tohi mo e tau huhu pehena i loto he hau a Tohi Tapu po ke tohi Reasoning ke moua vave ka kumi. Ka iloa tuai e manatu pauaki he loto ke matutaki ka liliu aahi atu, to fakamalolo a koe ke liu fakamoli atu ke he tau tagata oti kua feleveia.