Tutala Hagaao ki a Iehova he Tau Aho Oti
1 Fiafia e tau tagata he tutala hagaao ke he ha mena ne uho ke he ha lautolu a tau loto, ha ko e puke he loto ke vagahau mai e gutu. (Luka 6:45e) Ko e heigoa kua uho ke he tau loto ha tautolu? Ne tohi he salamo: “To tokutoku atu foki haku alelo hāu a tututonu, mo e fakaheke atu kia koe ke he aho oti.” (Sala. 35:28) Ha ha ia ia e loto fakaaue lahi ma Iehova mo e manatu ai ko e kotofaaga uho ke tutala hagaao ke he Atua mo e ke fakaheke a ia he tau magaaho oti. He feiloaaki lahi mo Iehova, ne loga e tau mena mitaki he salamo ke olioli ki ai. (Sala. 35:9) Fifitaki fefe e tautolu hana a fakafifitakiaga mitaki?
2 Tutala Hagaao ki a Iehova he Kaina Hau: Kua lata a Iehova mo fakatutalaaga he tau aho oti i loto he magafaoa. Ko e tau mamatua kua malolo lahi e fakaalofa ma Iehova to vagahau tumau ai hagaao ki a ia he tau gahua oti ha lautolu. (Teu. 6:5-7) He taute pihia e lautolu, to kitia he fanau kua momoui e matua tane mo e matua fifine ha lautolu lagotatai ke he tua mo e ofania e fakatufono he Atua. Ti onoono mogoia e fanau ko e fakaakoaga Tohi Tapu he magafaoa ko e fakakiteaga moli he mahani Atua fakamoli he tau mamatua ha lautolu.—2 Pete. 3:11.
3 Tutala Hagaao ki a Iehova mo e Tau Matakainaga Hau: Ke he fakaholoaga fakateokarasi fakafahi tapu ha tautolu, loga lahi e tau magaaho ha tautolu ke fagai e tau manamanatuaga mo e tau loto ha tautolu aki e tau mena kai fakaagaga. Kua nakai oti e tau mena mitaki ha tautolu ke talahau. (Luka 6:45a) Kua fai manatu nakai a koe ne moua mai he fakaako fakatagata po ke totouaga he Tohi Tapu kua fiafia lahi a koe ki ai? Tutala age ke he tau matakainaga, lagomatai pihia ki a lautolu ke fakalahi ha lautolu a fakaalofa ki a Iehova.—Sala. 35:18; Hepe. 10:24.
4 Tutala ke he Falu Hagaao ki a Iehova: He tau aho oti kua fehagai a tautolu mo e tau tagata—he gahuaaga, he aoga, mo e tau tagata nakai tua he magafaoa—kua lata ke mautali ko e ha tautolu a onoaga he moui ko e fakamatala he kupu moli hagaao ki a Iehova. He nakai fakailaila ai he tau talahauaga vale mo e fakalialia he lalolagi, kua lata e vagahau ha tautolu ke fakatokoluga e Atua. He tau aho oti, he magaaho oti, kia tutala ke he falu hagaao ke he tala mitaki kua poaki e ia ki a tautolu ke fakamatala.—Gahua 5:42; Kolo. 4:6.
5 Ha ko e tau tagata tapuaki moli a Iehova, kua maeke ia tautolu he tau magaaho oti he aho ke tutala hagaao ke he ha tautolu a Atua nakai fai fakatataiaga, ko Iehova.—Sala. 106:47.