Kua Galo Lahi a Koe!

¹ Liga nakai o atu a tautolu he falu magaaho ke he falu he tau feleveiaaga he fakapotopotoaga, mo e manatu ‘nakai tokaga ha tagata ki a au; to nakai iloa e lautolu kua galo au.’ Kua nakai moli e naia! Ke tuga e taha vala he ha tautolu a tino, kua igatia a tautolu mo e matagahua ke lafi ke he fakapotopotoaga. (1 Kori. 12:12) Kua maeke he ha tautolu a galo kehe he tau feleveiaaga he tau fahi tapu ke lauia e tuaga fakaagaga he falu i ai. Ka nakai ha i ai a koe, kia iloa​—kua galo lahi a koe!

² Ko e Hau a Matagahua Aoga: Ne manako lahi a Paulo ke fakalataha mo e hana tau matakainaga. Ne fakamaama he Roma 1:11, 12 e kakano: “Kia ta atu ai e au kia mutolu taha mena fakaalofa ke lata mo e Agaga . . . kia fefakamafanaaki a tautolu ke he tua ha tautolu, ko mutolu katoa mo au.” Pihia foki, to lahi e feaki hake e tautolu e taha mo e taha ke tumau ke he puhala fakamoli, ha ko e tau tali ha tautolu, ha tautolu a tau kotofaaga he feleveiaaga, mo e ha tautolu a ha ha ai.​—1 Tesa. 5:11.

³ Nakai kia fiafia lahi a koe ke kitia e falu he tau feleveiaaga he fakapotopotoaga? Kua fakateliga atu a koe ke he tau tali ha lautolu mo e nava ke he tau fakatataaga he tua ha lautolu. Kua lagomatai atu e tau taleni fakaagaga ha lautolu ke he hau a fakamaloloaga. Ka nakai ha ha a lautolu he feleveiaaga, to logona e koe kua fai mena aoga ne galo. Nukua pihia ni e tau matakainaga kaeke kua galo a koe.

⁴ Ko e Matagahua Aoga he Tau Feleveiaaga: Kua lagataha e talahau he The Watchtower ke he aoga lahi he tau feleveiaaga ma e ha tautolu a fakamouiaga fakaagaga, kua pehe: “He lalolagi faguna mo e mahani kelea nei, kua eke e fakapotopotoaga Kerisiano mo fakamaluaga fakaagaga . . . , ko e huaga mafola mo e fakaalofa. Ti, kia tumau ke o atu ke he tau feleveiaaga oti i ai.” (w93 8/15 11) Kua fehagai a tautolu he tau aho takitaha mo e tau tutuaga ne fakalolelole fakaagaga a tautolu. Kaeke ke nakai fakaeneene a tautolu, to tanumia a tautolu ke he tau tupetupeaga ha tautolu ti liga nimo e tautolu e tau mena fakaagaga ne mua. Kua fefalanakiaki a tautolu oti ke he fakamafanaaga ne lata ke fakatumau a tautolu ke kaufakalataha mo e fakamakutu ke he fekafekauaga he Atua.​—Hepe. 10:24, 25.

⁵ Kua aoga lahi ke o atu a tautolu ke he tau feleveiaaga. Liga nakai o a tautolu he falu mogo ha ko e tau gagao mo e tau mena tutupu fakalutukia. Ka kia fakamalolo tumau a tautolu ke totou mo e fakapotopotoaga ne fakaheke auloa ki a Iehova!​—Sala. 26:12.