Tuku Fakamua Tumau e Kautu
1 Ke tuku fakamua tumau e Kautu he Atua he moui mo e toka mau ki ai kua nakai mukamuka kaeke fehagai a tautolu mo e tau pehiaaga fakatupe po ke falu lekua. Maeke fefe a tautolu ke tuku fakamua tumau e Kautu ka tutupu e tau mena uka? Ka e kua ka foaki mai kia tautolu e gahua ke fakato e tau feleveiaaga po ke fakaalaia aki e fekafekauaga ha tautolu he fonua? Kua lata kia e Kautu mo mena ke uaaki he moui?
2 Lata mo e Tua Malolo: Ka kamatamata e tua ha tautolu ke he tau tutuaga kehekehe, kia nakai galo e tautolu e maveheaga ha Iehova mo e fakamafanaaga ha Iesu he lalagoaga faka-Atua kaeke ke tuku fakamua e tautolu e Kautu. (Sala. 37:25; Mata. 6:31-34) Kua fakamaluia he tau fakaohoohoaga fakalalolagi mo e tau pehiaaga e onoonoaga ha tautolu mo e puipui a tautolu mai he tuku mua e Kautu. Kua fakaata he falu e tau amaamanakiaga he tuaga tokoluga he gahua po ke ma e mouaaga he tau tupe loga ke eke mo matapatu mena he moui. Pete ia, ke tuga a Paulo, kua lata ke fuafua fakatonu e mena kua aoga moli he moui.—Filipi 3:7, 8.
3 Lata Kia e Hikihikiaga? Ne talahau he tagata fakailoa: “Ko e loto haku he pisinisi—ko e fakaalofa ue atu haku haia. Ne logona e au ko e Fakamoli agaia au ka e magaaho taha foaki fakalahi e magaaho haku ke he tau mena pisinisi.” Ka e ha ha ia ia e logonaaga fakalagalaga ke lata ke fakalahi atu hana fekafekauaga ki a Iehova. Nakai leva, ti tiaki e ia e pisinisi ne fakalavelave aki hana tolomaki ki mua fakaagaga. He foaki katoatoa agataha e ia a ia ke he gahua he Kautu, ne maeke a ia ke talahau: “Kua logona e au mogonei kua kautu e moui haku ke he fofoga ha Iehova, ko e mena haia kua aoga moli.”
4 Nava lahi ai, tokologa kua tiaki e tau gahua fakatupe mo e tau amaamanakiaga ke lahi e totogi, he fakamukamuka e tau momoui ha lautolu, mo e taute e fekafekauaga mau. Kua taute e lautolu ne ikiiki, tau fekafekau mo e tau motua nonofo takitokotaha ne o atu ke he Aoga Fakaako Fekafekau e mena nei mo e ha ne fa e olioli ai e tau kotofaaga mitaki he fekafekauaga. Muitua ke he fakafifitakiaga omoomoi ha Paulo, kua fakalatalata moli a lautolu mo e tau mena moua fakatino.—1 Kori. 11:1; 1 Timo. 6:6-8; Hepe. 13:5.
5 Pete kua va mai he lalolagi e onoonoaga ha tautolu he moui, ha ha ia tautolu e fakamonuinaaga ha Iehova. (1 Kori. 1:26-31) Nakai kia mafanatia ke iloa na to fakaaoga katoatoa e ia a tautolu mo e to lagomatai a tautolu ke fakamoli hana gahua? Ko e magaaho nei ha tautolu ke fakapuloa e Kautu fakatu he Atua ka nakai liu fatiaki foki. Ti ko e magaaho ni anei ke tuku fakamua tumau e Kautu he tau momoui ha tautolu.