‘Ka e Fanogonogo Atu Fefe a Lautolu?’
1 Ne talahau fakamahino mai e Iesu: “To fakamatala fakamua . . . e vagahau mitaki ke he tau motu oti kana ke lata ai.” (Mare. 13:10) Pete ni e tau laliaga fakamakamaka ha tautolu, ka e ha ha agaia e tau teau he tau miliona tagata ne nakai la hokotia e fakamatala ki ai. Kua pa malu he falu fakatufono e gahua ha tautolu. Lahi e puke tagata he falu motu nukua mafiti lahi e tupu. Ka e, ‘fanogonogo atu fefe a lautolu?’—Roma 10:14.
2 Kia Mauokafua ia Iehova: Kia manatu e tautolu kua iloa e Iehova e tuaga he tau loto he tau tagata oti. Pete ni ko e heigoa e tuaga he tagata, ka kumi fakamoli a ia ma e kupu moli hagaao ke he Atua, to moua e ia.—1 Nofo. 28:9.
3 Kua kapaletu a Aperahamo ha ko e tau tagata ne nonofo i Sotoma mo Komora. Ka e fakamafana age e Atua ki a ia to moumou a Sotoma pete ne toko hogofulu e tagata tututonu ne nonofo ai. (Kene. 18:20, 23, 25, 32) Ne nakai la moumou e Iehova e tau tagata tututonu fakalataha mo lautolu ne mahani kelea, tuga ne fakakite mai he fakahaoaga ha Lota mo e hana tau tama fifine.—2 Pete. 2:6-9.
4 Ne manamanatu a Elia he taha magaaho na tokotaha maka na ia ha ne fekafekau ke he Atua moli. Pete ia, ne fakamalolo e Iehova a ia kua nakai tokotaha maka a ia mo e to fakakatoatoa ai e gahua ne fita he kamata e ia. (1 Patu. 19:14-18) Ka e kua e tuaga he vaha ha tautolu?
5 Kia ke he Fekafekauaga he Atua: Nakai iloa e tautolu, ko e lahi atu agaia fefe e gahua fakamatala ka taute e tautolu. Ko Iehova e pule he gahua nei ti fakaaoga e ia hana tau agelu ke leveki ai. (Fakakite. 14:6, 7) Ko ia ka fifili e kaputiaaga he fakamatala ke he tau motu oti kana. Ka fifili e Iehova, maeke ia ia ke kitia kua holofa e fekau he Kautu ke he tau puhala kua nakai la kitia e tautolu ke maeke he tau tagata tokologa ke ‘logona e kupu he tala mitaki ke he gutu haku, mo e talia.’ (Gahua 15:7) Ko e mena ka taute e Iehova ka lagotatai katoatoa mo ia e peresona—ko e Atua fakaalofa, pulotu mo e tututonu.
6 Ko e kotofaaga ha tautolu ke gahua fakalagotatai mo e finagalo ha Iehova, ke foaki e malolo katoa ha tautolu ke fakailoa ke he tau tagata oti e tala mitaki.—1 Kori. 9:16.