Fakaaue ke he Mena kua Moua e Koe
1 Kua fakamafana mai he tau Tohiaga Tapu ki a tautolu ke leveki fakatino e magafaoa ha tautolu, ka e nakai eke e tau mena nei mo matapatu hagaaki he tau momoui ha tautolu. Kia hau mua e tau mena fakaagaga. (Mata. 6:33; 1 Timo. 5:8) Ke kumi e lagotatai mitaki ko e paleko ke he “tau aho uka” nei. (2 Timo. 3:1) Ko e heigoa ka lagomatai a tautolu ke taute pihia?
2 Moua e Manatu he Tohi Tapu: Kua hataki he Kupu he Atua a tautolu nukua maeke he tau koloa ke fakatupu e moumouaga fakaagaga. (Fakama. 5:10; Mata. 13:22; 1 Timo. 6:9, 10) He magaaho aoga nei, to hagahaga kelea ma tautolu takitokotaha ke fakalavelave lahi ke he gahua he lalolagi po ke tau kapaletu fakatupe ati omoi e tautolu ki tua e tau gahua fakaagaga—ko e tau feleveiaaga, fakaakoaga, mo e fekafekau—ke he mena ke uaaki he tau momoui ha tautolu. (Luka 21:34-36) Kehe ai, kua tomatoma mai he Tohi Tapu: “Kua moua e tautolu e tau mena kai, mo e tau mena ke fakatapulu ai, to lata ia kia tautolu.”—1 Timo. 6:7, 8.
3 Nakai kakano e mena ia kua manako ke he tau Kerisiano ke nonofo mativa. Ka kua lagomatai he mena ia a tautolu ke mailoga ko e heigoa moli e tau manako fakatino ha tautolu—tau mena kai, tau mena tui, mo e fale mitaki ke nonofo ai a tautolu. Ka moua e tautolu e tau koloa kua lata ma e moui, kia nakai ukufakina a tautolu ke tutuli e tuaga muhu koloa he moui. Ka manamanatu a tautolu ke fakatau po ke fai gahua foki, kua lata ke huhu a tautolu ki a tautolu ni, ‘Lata moli kia e mena nei?’ Ko e taute pihia ka lagomatai a tautolu ke logona e tomatomaaga mai he agaga: “Kia noa ha mutolu a mahani mo e velevelekoloa; kia fakamamate a mutolu ke he tau mena ha ia mutolu.”—Hepe. 13:5.
4 Ka falanaki a tautolu ki a Iehova, to fakamonuina e ia a tautolu. (Fakatai 3:5, 6) Pete ni e gahua fakamalolo a tautolu ke moua e tau koloa ke lata mo e tau aho takitaha, kia nakai hagaaki mau a tautolu ke he tau mena ia. Pete ni e tote po ke lahi e mena ne moua e tautolu, falanaki a tautolu ki a Iehova ke fakamakona e tau manako ha tautolu. (Filipi 4:11-13) Ti ko e fua, kua olioli e tautolu e makona mahani Atua fakalataha mo e falu monuina foki.
5 Fifitaki e Tua he Falu: Ne feaki he matua tokotaha e tama fifine hana ke he puhala he kupu moli ti kua fakamukamuka fakahaga ai hana moui. Pete ni e olioli e ia e tau tuaga mitaki he kaina hana, ne hiki atu a ia ke he fale totetote hifo ti nakai leva ti hiki atu ke he fale poko taha. Kua maeke he mena nei ke fakatote hifo hana a tau magaaho gahua ke maeke ia ia ke foaki fakalahi e magaaho ke he fekafekauaga. He lahi hake e tama fifine hana ti fai tane, ne okioki tuai e matua fifine mai he gahua, pete ni kua kakano ke to hifo taha e totogi hana. Ko e matakainaga fifine ha tautolu mogonei he tau ke fituaki he paionia tumau mo e nakai tokihala hagaao ke he tau poa fakatino ne taute e ia ke maeke ke tuku fakamua e tau mena he Kautu he hana moui.
6 Ne paionia e motua mo e hana hoana ke loga e tau tau ka e he magaaho taha ne feaki ai tolu e tama. Ko e magafaoa, ne ako e lautolu ke mahani fakaaue he fakamakona e tau manako pauaki ha lautolu ka e nakai ke ukufakina he ha lautolu a tau manako noa. Kua talahau he matakainaga tane: “Ne momoui fakamukamuka lahi a mautolu. Pete ni uka ai ke he falu magaaho, ne foaki tumau e Iehova e tau mena ne lata mo mautolu. . . . Ka kitia e au e magafaoa haku kua tuku fakamua e tau mena fakaagaga tuga nei, ti logona hifo e au kua hako e tau mena oti, ti logona e au e logonaaga he katoatoaaga.” Kua lafi he hoana hana: “Ka kitia e au e [tane haku] kua lavelave ke he tau mena fakaagaga, ne logona hifo e au e makona hokulo i loto ia au.” Kua fiafia foki e fanau ha kua fifili e tau mamatua ha lautolu ke fekafekau tumau ki a Iehova.
7 Ma lautolu oti kua fifili e puhala he mahani Atua fakamoli ka e nakai tutuli he tau koloa, kua mavehe mai he Tohi Tapu e tau monuina loga ke lata mogonei mo e moui ne tatali.—1 Timo. 4:8.