Fakaholoaga Fou he Toloaga he Takaiaga
1 Ne talahau tuai he ha tautolu a Iki to fakamatematekelea hana tau tutaki. (Mata. 24:9) Fefe ha tautolu a onoonoaga ke he tau kamatamata? Ko e heigoa ka lagomatai a tautolu ke fakauka ke he matematekelea? Ko e fakaholoaga he toloaga he takaiaga ma e tau he fekafekauaga 2004 ka tali e tau huhu nai. Ko e matapatu “Kia Fiafia ke he Amaamanaki, Kia Fakauka ke he Matematekelea.”—Roma 12:12.
2 Ua e Fufuta Lauga: Ko e fufuta lauga fakamua, ne fakamataulu “Fua Mai e Tau Fua ke he Fakauka,” to fakatutala ke he tau puhala ke fua loga mai a tautolu. Tokologa e tau tagata fakailoa ka huhu tala ki ai ke he puhala fakamatala mo e fakaako atu mo e aga fakamafiti. To mua atu e manako he tau mamatua ke fanogonogo fakamitaki ke he vala “Ka Fakaako e Iehova,” ka tutala ke he puhala he tau mamatua ne maeke ke fakakakano ke he tau fanau ha lautolu. Ko e tagata lauga fakahiku ka fakatoto e tau mena kua lata ia tautolu ke taute ke puipui e lalolagi he fakatauhele mo e taute a tautolu ke nakai fai fua.—Mareko 4:19.
3 Ko e matapatu he fufuta ke uaaki ko e “Tafepoi ke he Poitufi mo e Fakauka.” To fakakite fakamaali mai e puhala he tau momoui ha tautolu kua tuga e poitufi. Ko e ha kua lata ia tautolu ke tafepoi fakatatau ke he tau matafakatufono? Maeke fefe ia tautolu ke kautu he tuku kehe katoatoa e tau mena mamafa oti kana mo e ke nakai fakalolelole he poitufi ke he moui? Ko e tau tomatomaaga faka-Tohi Tapu he magaaho tonu ka foaki mai ai ke lagomatai aki a tautolu oti ke matutaki e tafepoi mo e fakauka.
4 Tamai he Fakauka e Taliaaga he Atua: Ko e tau lauga ka taute he tau leveki faifano ka fakamalolo moli e tua ha lautolu ne fanogonogo mo e fakagahua e tomatomaaga. Taha he tau lauga he leveki fahimotu ne fakamataulu “Takitaki he Fakauka ke he Tuaga kua Talia.” To tali he lauga ma e tau tagata e tau huhu: Ha hai e higoa kua lata e tau motu ke amaamanaki ki ai mo e ko e heigoa ne putoia he mena ia? Ko e lauga fakahiku, “Ko e ha Mutolu a Fakauka, To Moua ai ha Mutolu a Moui,” ka fakatutala ke he puhala ne maeke ia Iesu ke fakauka ke he nakai fakafili tonu mo e nakai loto konakona.
5 Manatu ke ta mai e tohi Ministry School mo e Kolo Toko hau ma e fahi tapu ia. Fakamau hifo e tau manatu ke lagomatai aki a koe ke fanogonogo mo e ke hagaao ki ai he tau aho i mua. To liu fakamanatu e fakaholoaga nei ke he fakapotopotoaga he taha magaaho i mua.
6 Ko ia ni ko Iehova kua tauteute e galue he tau mena kai fakaagaga nei. O mai a! Kia kai! To kalaga a tautolu he loto fiafia kaeke o atu a tautolu ke moua e aoga mai he fakaholoaga.—Isaia 65:14.