Fakaukaaga Kua Moua e Kautu
“Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua.”—HEPERU 10:36.
1. Ko e ha kua aoga lahi e fakaukaaga ke he tau tagata oti kua fekafekau ke he Atua ko Iehova he vaha nei?
KUA nofo ai e lalolagi katoa nei i loto he pule he atua fakaohooho totoko. Ko e pule nakai maeke ke kitia hana, ko Satani ko e Tiapolo, kua tuku fakatonu katoatoa hana tau laliaga ke totoko atu ki a Iehova mo e latau atu ke he fakamatalahiaga he pule katoatoa he lagi mo e lalolagi katoatoa a Iehova mai he Kautu faka-Mesia. Ti kua taute ai he mena nei ke nakai maeke ke kalo mai e taha kua tukulele e ia a ia ke he Atua mo e uta Hana fahi he matakupu ke he pule katoatoa he lagi mo e lalolagi ke tumau e totoko he lalolagi nei. (Ioane 15:18-20; 1 Ioane 5:19) Ha ko e mena ia, kua lata a tautolu takitokotaha ke fakamalolo e ia a ia ke fakauka ato to hifo e lalolagi nei ke he kaumahala katoatoa i Amaketo. Ke ha ha ia lautolu kua fakakautu he Atua ke fakakaumahala e lalolagi ha ko e ha lautolu a tua mo e fakamoli, kua lata a tautolu ke toafi nivaniva ki ai ato hoko mai e fakaotiaga. (1 Ioane 5:4) Kua maeke fefe a tautolu ke taute e mena ia?
2, 3. Ko e ha e Atua ko Iehova mo Iesu Keriso ko e tau fakafifitakiaga lahi mahaki he fakaukaaga?
2 Ke he taha mena, kua maeke a tautolu ke kumi fakamaloloaga ke he tau fakafifitakiaga ua ne mua atu e mitaki ke he fakaukaaga. Ko hai a lautolu ia? Taha mai ko Iesu Keriso, “ko e uluaki he tau mena oti kana kua eke,” ko ia ne fakamalolo fakamoli ke he fekafekauaga he Atua tali mai he taute a ia ke moui he taha magaaho nakai iloa i tuai. Ko e hana tumauaga ke fekafekau fakamoli ke he Atua, ti taute ai a Iesu mo fakafifitakiaga ke he tau mena moui iloilo oti kana kua taute he magaaho fakamui ke moui i luga he lagi mo e ke he lalolagi. (Kolose 1:15, 16) Ka e pete ni, ko e fakafifitakiaga ne mua ue atu ke he fakaukaaga e Atua ko Iehova, ha kua leva e fakauka hana ke he totokoaga ke he hana pule katoatoa ke he lagi mo e lalolagi katoatoa mo e tumau ke taute pihia ato taute fakahikuhiku a ia ke fakamitaki e matakupu he pule katoatoa.
3 Kua mitaki ue atu e puhala ne fakauka a Iehova ke he tau mena kua hagaao ke he hana lilifu mo e hana tau manako lahi ne logona hifo a ia ki ai. Ne taofi fakamaumau e ia a ia ni ka fakafehagaiaki mo e fakaohoohoaga lahi mahaki mo e kua fakaeneene ne ia a ia mai he tauteaga gahua ke totoko ki a lautolu ne fa tauamuamu ki a ia—fakalataha foki a Satani ko e Tiapolo. Kua loto fakaaue lahi a tautolu ke he fakaukaaga he Atua mo e ke he fakaalofa hofihofi noa hana. Kaeke kua noa mo e tau mena nei, kua nakai maeke a tautolu ke moua e loto olioli, ti pihia foki ke he moui ku temotemoai. E moli, kua fakakite lahi he Atua ko Iehova a ia ni ko e kehe ti nakai maeke ke ha ha i ai ha fakatataiaga ke he hana fakaukaaga.
4, 5. (a) Kua fakakite mai fefe he fakataiaga ha Paulo ke he tagata taute kapiniu kelekele e fakaukaaga he Atua mo e ke he hana fakaalofa hofihofi noa? (e) To fakamoli mai fefe e fakaalofa hofihofi noa he Atua ko e nakai fakaaoga hehe?
4 Kua tuhi ua atu e aposetolo ko Paulo ke he fakaukaaga mo e ke he fakaalofa hofihofi noa he Atua he magaaho ne pehe a ia: “Ko e tagata eke kapiniu kelekele kua nakai kia pule a ia ke he kelekele, ke eke ai ke he lakuaga taha e taha kapiniu ko e mena mitaki, ka ko e taha ko e mena fakateaga; Po ke fefe kia kaeke kua fakauka e Atua, mo e fakamanavalahi ke he tau kapiniu he ita kua fakalataha ke malaia ai he finagalo a ia ke fakakite mai ai hana ita, mo e fakailoa ai hana mana, Ke fakailoa mai foki e lahi ue atu he hana lilifu ke he tau kapiniu he fakaalofa, ne taute tuai e ia ke hoko ke he monuina? Ko tautolu foki ia kua ui mai ai a ia, nakai kuenaia ko e tau tagata Iutaia, ka e katoa foki mo e tau motu kehe.”—Roma 9:21-24.
5 Tuga he fakakite mai he tau kupu nei, ko e magaaho he vaha he fakaukaaga nei hana, kua fakaholo atu a Iehova mo e hana finagalo lilifu mo e fakakite e fakaalofa hofihofi noa ke he falu tagata ko e tau kapiniu pauaki. Ne tauteute e ia e tau kapiniu nei ma e lilifu tukulagi mo e kua fakakaumahala e finagalo kelea he patu ne totoko lahi mahaki ki a ia, ko Satani ko e Tiapolo, mo e tau matakau kau auloa oti kana ha Satani. Nakai kua eke e tau tagata oti kana mo tau kapiniu he ita, kua lata tonu ke fakaotioti. Kua mitaki e talahauaga ia ke he fakamanavalahi he fakaukaaga he Atua Malolo Lahi ue Atu. To nakai taute teao hana fakaalofa hofihofi noa. To tupu mai ni (1) e magafaoa Kautu lilifu lahi i luga he lagi kua ha ha i lalo he Tama fakahelehele a Iehova, ko Iesu Keriso, mo e (2) tau lanu tagata moui mitaki katoatoa ne liuaki mai ke he lalolagi parataiso, ko lautolu oti kana ne moua e tufaaga he moui tukulagi tukumuitea.
Fakauka ke Hoko ke he Fakahikuaga
6. (a) Ko e ha kua nakai maeke e tau Kerisiano ke kalo mai he kamatamata he fakaukaaga? (e) Ko e heigoa ne fa mahani e kupu Heleni ma e “fakauka” ke hagaao ki ai?
6 Fakalataha mo e amaamanakiaga homo lahi pihia i mua, kua lata e tau kupu fakamalolo a Iesu ke taogoogo mau i loto he tau teliga ha tautolu, kua pehe ni: “Ka ko ia ke tumau ato hoko ke he fakaotiaga, to fakamoui na ia.” (Mataio 24:13) Kua aoga lahi ke kamata fakamitaki ke he puhala he feua tutaki Kerisiano. Ka ko e mena mahuiga lahi ue atu e aoga ko e fakauka fefe a tautolu, mo e fakaoti fakamitaki fefe e tautolu e puhala. Ne pehi lahi he aposetolo ko Paulo e mena nei he magaaho ne pehe a ia: “Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua.” (Heperu 10:36) Ko e kupu Heleni ne fakaliliu “fakauka” he mena nei ko e hy·po·mo·neʹ. Kua fa mahani e mena nei ke kakano ko e loto toa, tumauokafua, po ke manavalahi e fakauka kua nakai galo e amaamanakiaga ka fakafehaga aki mo e tau mena fakalavelave, tau favale, tau mena uka, mo e tau kamatamata. Kaeke kua amaamanaki a tautolu ke kautu ke hoko atu ke he fakamouiaga, kua lata a tautolu ke fakatokolalo ke he kamatamata he fakaukaaga ha ko e vala aoga lahi ke he tauteuteaga ma e fakamouiaga ia.
7. Ko e heigoa e fakaheheaga kua lata a tautolu ke kalo mai, mo e ko e fakafifitakiaga ha hai ka lagomatai a tautolu ke fakauka?
7 Kua nakai lata a tautolu ke fakahehe ni e tautolu a tautolu ke he manatu fiafia ne loto a koe ki ai to maeke a tautolu ke fakaoti fakaave e kamatamata. Ke maeke e matakupu ke he pule katoatoa ke he lagi mo e lalolagi katoatoa mo e fakamoliaga he tagata ke moua tonu e tali, ne nakai manamanatu a Iehova ke he hana tokotoko mitaki. Ne fakauka a ia ke he tau mena nakai kua mitaki pete ni foki kua maeke a ia ke uta kehe agataha a lautolu. Ko e fakafifitakiaga foki he fakaukaaga a Iesu Keriso. (1 Peteru 2:21; fakatatai Roma 15:3-5.) Fakalataha mai e tau fakafifitakiaga kikila nei i mua ia tautolu, kua moli kua manako lahi a tautolu ke fakauka ke hoko atu ke he fakahikuaga.—Heperu 12:2, 3.
Ko e Latamaiaga ne Manako ki Ai
8. Ko e heigoa e fuafuaaga kua lata lahi mo tautolu oti kana ne fakakite mai he aposetolo ko Paulo?
8 Kua nakai ha ha i tuai e taha fekafekau he Atua, pihia foki mai he tau magaaho fakamua atu, ne nakai lauia kua lata ke fakakite moli hana fakamoliaga he fakauka. Ko e tau tagata talahaua takitokotaha i loto he fakamuaga tuai he Tohi Tapu ne fakatumau e fakamoli ti hoko ke he mate mo e kua lata ai ma e moui tukulagi i luga he lagi ne lata ke fakakite moli ha lautolu a tumauokafua. Tuga a nei, ko e Farasaio he vaha fakamua, ko Saulo ha Taso, ne pehe ke he tau Korinito: “Ha ko e mena pete ni ko e mena fakateaga au, kua nakai muikau au ke he taha mena ke he tau aposetolo kua mumua. Ne eke ni ki mua ha mutolu e tau fakamailoga he aposetolo ke he fakauka oti kana, ke he tau fakamailoga, mo e tau mena ke ofo ai, mo e tau mana.” (2 Korinito 12:11, 12) Pete ni kua mamafa e kavega he gahua, ne tokiofa lahi mahaki e Paulo hana fekafekau ne loga lahi e tau mena ne fakauka a ia ki ai mo e lali fakamakamaka moli a ia ke nakai tamai ha mena kelea ki ai.—2 Korinito 6:3, 4, 9.
9. (a) Ne fakakite fefe e lautolu ne fakauku ne toe e fakaukaaga, mo e ko e heigoa e taui? (e) Ko e heigoa kua fakaaoga mo fakalagalagaaga ki a tautolu ke taute tumau e fakamoliaga ke he fekafekauaga mai he lagi?
9 He tau vaha fou lahi, ko e tau Kerisiano ne fakauku kua fekafekau ke he Atua fakamua ato iloa e tau fakamua he lalolagi ne iloa ko e to fakamailoga he tau 1914 e fakahikuaga he Tau Vaha he Tau Motu Kehe, mo e tokologa mai ia lautolu ne amaamanaki ke moua ha lautolu a taui i luga he lagi he tau nakai nimo ia. Ka e nakai tupu e mena nei. Tuga he fakakite mai he tau mena tupu moli he magaaho nei, kua ha ha ia lautolu e hogofulu e tau tau ne lafi atu ki a lautolu. He vaha fakaloaloa he tau momoui fakalalolagi kua nakai amaamanaki ki ai a lautolu, kua lauia a lautolu he lima hakahakaaga he Atua ko Iehova. (Sakaria 13:9; Malaki 3:2, 3) Ko e fakatumau he fakauka ne fakagahua mai ha lautolu a fakamitakiaga. Ha ko e tau fekafekau a Iehova, kua loto olioli lahi a lautolu ke fakahigoa ko e hana tau tagata. (Isaia 43:10-12; Gahua 15:14) He vaha nei, ha kua fita he fakahao mai he tau tau ua he lalolagi mo e tau felakutaki ikiiki ne loga lahi, kua fiafia lahi mahaki a lautolu he moua e tau lagomatai ke he folafolaaga he tala mitaki mai he moto tagata he falu mamoe ne hane tupu atu, kua mole e fa e tau miliona. Ko e parataiso fakaagaga ne moua e lautolu e loto olioli kua fakalaulahi atu ke he lalolagi katoa, kua pihia foki ke he tau atu motu ne mamao lahi he tahi. Ko e levekiaga fiafia pauaki nei, kua loto fakaaue lahi mo e pihia foki he moui leva a tautolu, ne gahua ke fakaohooho ke fakatumau e fakamoli ke he fekafekau fakaatua ato taute katoatoa e finagalo mo e manako a Iehova.
10. Neke ha ha i ai e fakalolelole ki a tautolu, ko e heigoa kua lata lahi tumau?
10 Ha kua falanaki ha tautolu a taui ke he ha tautolu a tumauokafua, kua lata tumau a tautolu mo e fakatonutonuaga ke he mena aoga lahi nei. (1 Korinito 15:58; Kolose 1:23) Ke maeke ai ke nakai fai mena fakalolelole he vaha loto he tau tagata a Iehova, kua lata ke fakamalolo mai tumau ki a tautolu ke kuku mau e kupu moli mo e monuina uho he folafolaaga he kupu moli, tuga e tau fakapotopotoaga ne fakatu fou he senetenari fakamua mai he tau ahiahi atu ha Paulo mo Panapa. (Gahua 14:21, 22) Kia taute e tautolu e totokaaga mauokafua mo e malolo katoatoa ke tuga, ne talahau he aposetolo ko Ioane, to nofo mau e kupu moli i loto ia tautolu, “to ha ia tautolu foki tukulagi.”—2 Ioane 2.
Fakatalitali mo e Nakai Mahalohalo e Fakaukaaga
11. Ko e heigoa kua tuga kua pule e Atua ke he hana tau fekafekau, mo e ne fakatai mai fefe e mena nei ke he mena ne tupu ki a Iosefa?
11 Kua fakamole magaaho e kakano he kamatamata ki a tautolu ke fakakatoatoa. (Iakopo 1:2-4) Fakatali! Fakatali! Fakatali! kua tuga ko e fakaholoaga mau he Atua ke he hana tau fekafekau i tuai he magaaho ne kamatamata ke he ha lautolu a fifiliaga ke fakatumau ke he tua. Ka ko e fakatali, ke he fakahikuaga, ne fakakite moli tumau ko e mena taui mitaki ke he tau fekafekau fakamoli ia. Ke tuga a Iosefa, ne fakatali ke 13 e tau tau fakatupa mo e pagota, ka e hakahaka he mena tupu ia hana tau mahani fakatagata.—Salamo 105:17-19.
12, 13. (a) Ko e fakafifitakiaga fefe a Aperahamo ke he fakaukaaga fakamoli? (e) Ko e heigoa e puhala ne lagaki hake he tua mo e fakaukaaga a Aperahamo e fakafifitakiaga ma tautolu?
12 Kua fita he 75 e tau tau he moui a Aperahamo he magaaho ne ui he Atua a ia ke fano kehe mai i Uro he tau Kaletaia ke fano ke he Motu he Maveheaga. He magahala he 125 e tau tau he moui hana e magaaho ne moua e fakamoliaga ke he omonua he maveheaga he Atua—kua tupu agataha he mole atu e magaaho ne fakakite e Aperahamo e malolo he tua hana he hoko atu ke he tapunu ke foaki hake hana tama tane fakahelehele, ko Isaako, mo poa ne oti ni he magaaho ne taofi he agelu a Iehova hana lima mo e hataki e tauteaga poa. (Kenese 22:1-18) Ko e 50 e tau tau kua leva lahi ma Aperahamo ke fakatali tuga e tagata fano fenogo i loto he motu kehe, ka e fakamaumau lahi a ia ke 50 foki e tau tau ato mate a ia he 175 e tau tau he moui. He tau magaaho oti kana ia, ko e fakamoli ne tua fakamoli a Aperahamo mo e perofeta he Atua ko Iehova.—Salamo 105:9-15.
13 Ko e tua mo e fakaukaaga a Aperahamo kua tuku mai tuga e fakataiaga ke he tau fekafekau oti kana he Atua kua manako ke moua e tau fakamonuinaaga he maveheaga ka puhala mai ia Iesu Keriso, ko e Tega a Aperahamo. (Heperu 11:8-10, 17-19) Hagaao ki a ia, kua totou e tautolu ia Heperu 6:11-15: “Ka kua manako lahi a mautolu kia takitokotaha a mutolu mo e fakakite mai e fakamakutu ia, kia mauokafua ai e amaamanaki ato hohoko ke he fakahikuaga. Kia nakai eke a mutolu mo tau tagata teva, ka kia fifitaki a mutolu kia lautolu kua moua tuai ke he tua mo e fakauka e tau mena kua talahaua mai. Ha ko e mena ne talahau he Atua kia Aperahamo, kua nakai maeke ia ia ke omonuo ke he taha kua mua kia ia, ti omonuo ai a ia kia ia ni, Kua pehe mai, Ko e moli ni, ke fakamonuina e au kia koe, mo e fakatokologa lahi e au e tau fanau hau. Ne fakauka ni a ia, ti moua ai e ia e mena kua talahaua mai.”
14. Ko e ha kua nakai lata a tautolu ke manamanatu ko e nakai fai fakaotiaga e fakaukaaga ke he kamatamata mo e fakavaia e taui?
14 Kua fita he kitia e lautolu ne toe ne fakauku, 77 e tau tau kua mole tali mai he fakahikuaga he Tau Vaha he Tau Motu Kehe he tau 1914, he magaaho ne amaamanaki e falu ia lautolu ke he fakalilifuaga he fakapotopotoaga he tau Kerisiano moli ki luga he lagi. Kua lata ke leva lahi fefe a lautolu ne toe ke fakatali kua nakai iloa e tautolu. Kua lata kia a tautolu he mogoia ke mahalohalo mo e manamanatu ko e to leva lahi e fakatali mo e fakavaia e taui? Nakai! Ha kua nakai to fakamatalahi he mena ia e pule katoatoa he Atua po ke fakalilifu hana higoa. To nakai fakatonuhia atu ki a ia ki mua he lalolagi he magaaho ka tuku mai ki a tautolu e kautuaga mo e palepale he fakamailoga ko e moui tukulagi. Ko e ha mo e ha e loa he magaaho, ko lautolu ne toe, fakalataha mo e ha lautolu a tau hoa ne fakamoli kua tuga e tau mamoe, ne mauokafua e tau loto ke fakatalitali ki a Iehova ke taute mena he hana magaaho ni. He fakakite e fakaukaaga mitaki ue atu pihia, kua muitua a lautolu ke he puhala a Aperahamo.—Roma 8:23-25.
15. (a) Ko e heigoa e matakupu pauaki, mo e puhala mai he tau mena fe ne fa mahani ki ai kua kautu lahi e fakamaloloaga he Atua ki a tautolu? (e) Ko e heigoa e fakatonutonuaga ha Paulo kua lata agaia ke he ha tautolu a vaha?
15 Ko e tau kupu pauaki, he mogoia, kua mau agaia ni ko e fakaukaaga nakai mahalohalo ke taute e finagalo he Atua. (Roma 2:6, 7) I tuai ne paletua e ia a tautolu mai he tau matematekelea kelea lahi, kua fakalataha ki ai e tuku fale puipui mo e tau kemu pagota, mo e tamai e ia a tautolu ti kua matalahi he kautu fakalataha ki ai e lilifu ke he hana higoa mo e finagalo.a He vaha he tau magaaho ne toe agaia ke fakakatoatoa ha tautolu a kamatamata, to fakatumau a Iehova ke taute e mena taha ia. Ti kua lata agaia e fakatonutonuaga ha Paulo ke he tau aho ha tautolu: “Kua lata ke ha ha ia koe e loto fakamanavalahi mauokafua mo e fakaukaaga, ke maeke ai a koe ke taute mo e fakakatoatoa oti e finagalo he Atua, mo e ke moua ai mo e uta mo e moua e loto olioli katoatoa ke he tau mena ne mavehe ki ai.”—Heperu 10:36, The Amplified Bible; Roma 8:37.
16. Ko e ha kua nakai lata a lautolu ke fakatemotemoai e puhala ne onoono ke he tukuleleaga ha tautolu ki a Iehova po ke fakauaua?
16 He leva ni kaeke kua fai gahua a Iehova ma tautolu ke taute he vaha loto he lalolagi kelea nei, ka pihia, he muitua ke he fifitakiaga a Iesu, he manako a tautolu ke putoia he gahua ia ato oti ai. (Ioane 17:4) Ne nakai taute ha tautolu a tukuleleaga ki a Iehova ke he maamaaga kua fekafekau ni a tautolu ki a ia ke he magaaho ku mo e ti hoko ai e Amaketo. Ko e mena tukulagi e tukuleleaga ha tautolu. To nakai oti e gahua he Atua ma tautolu he tauaga i Amaketo. Ka e taha e mena, ato pihia ni ka mole atu he taute katoatoa e tautolu e gahua kua lata ke taute fakamua ato hoko mai a Amaketo ato maeke ai a tautolu ke kitia e tau mena homo ue atu ka hoko mai he taha fahi he tau lahi mahaki ia. Ha kua pihia, ke lafi ki luga he monuina fiafia he taute tumau hana gahua, to moua ai e tautolu e taui ko e tau fakamonuinaaga kua leva e amaamanaki ki ai ne mavehe mai e ia.—Roma 8:32.
Ko e Fakaalofa ke he Atua kua Lagomatai a Tautolu ke Fakauka
17, 18. (a) Ke he tau magaaho tupetupe, to lagomatai he heigoa a tautolu ke fakauka ti fakalataha mai e fiafia he Atua? (e) To lagomatai he heigoa a tautolu ke moua e kautuaga, mo e ko e heigoa kua nakai lata ke talahau e tautolu hagaao ke he magaaho ne toe?
17 Kua liga, he tau magaaho ka fakatupetupe lahi mai, to huhu a tautolu: ‘To maeke fefe ia tautolu ke fakauka atu?’ Ko e tali? He fakaalofa ke he Atua fakalataha mo e ha tautolu a loto katoa, loto manamanatu, solu, mo e malolo. “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, Kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti. Nakai tuai oti e fakaalofa.” (1 Korinito 13:4, 7, 8) Ane mai kua fakauka a tautolu ha ko e fakaalofa ke he Atua, kua nakai aoga e fakaukaaga ha tautolu. Kaeke kua fakamalolo a tautolu i lalo he tau kavega mamafa ha ko e ha tautolu a loto fakamoli katoa ki a Iehova, he mogoia ko e fakaukaaga ha tautolu kua fakahokulo he lauiaaga e fakaalofa ha tautolu ki a ia. (Ioane 14:30, 31; Heperu 12:2) Kaeke ko e loto logona hifo moli e fakaalofa ha tautolu ke he Atua, ko e Matua ha tautolu, ko e heigoa kua ha ha i ai kua nakai maeke ia tautolu ke fakauka?
18 Ko e fakaalofa nakai maueue ha tautolu ke he Atua ko Iehova ne maeke ai a tautolu ke tumau e kautuaga ke he lalolagi he vaha kua mua atu e aoga lahi nei he kamatamata. Mo e to tuku mai tumau e Iehova, he puhala mai ia Iesu Keriso, ki a tautolu e lagomatai kua lata mo tautolu pete ni ko e fefe e leva he fakatokaaga tuai nei ne fakaata ke ha ha ai. (1 Peteru 5:10) E moli, kua nakai taute e tautolu ha talahau tuai ko e lahi fefe e magaaho ne toe agaia, mo e nakai fakamau pauaki e tautolu ha aho. Kua toka e tautolu e mena ia ki ia Ko e Leveki Magaaho, ko e Atua ko Iehova.—Salamo 31:15.
19, 20. (a) Kua lata ke fefe e onoonoaga ha tautolu ke he tau aho takitokotaha kua mole atu ne fakauka a tautolu? (e) Ko e tau mena goagoa fe, kua manako a tautolu ke kalo mai, mo e ko e ha?
19 Ka e taha e mena, ko e atu hau ne talahau tuai mai ka kitia fakamoli mo e fa mahani lahi “mo e fakaotiaga he lalolagi” kua loga lahi e tau tau kua mole he mogonei. (Mataio 24:3, 32-35) Kia nakai nimo e tautolu ko e tau aho takitaha ne mole ne fakauka a tautolu ko e taha e aho a ia, kua mole ma Satani mo e hana tau temoni ke fakakelea e lagi mo e lalolagi ke he ha lautolu a tau momoui mo e taha e aho kua tata atu ke he magaaho ka nakai tuai fakauka a Iehova ke ha ha i ai e “tau kapiniu he ita kua fakalata ke malaia . . . ke fakakite mai ai hana ita.” (Roma 9:22) To nakai leva, ati hoko atu ke he fakahikuaga e fakamanavalahi a Iehova, to fakatoka mai e ia hana ita ki luga he tau tagata tane nakai mahani atua katoa mo e tau fifine. He pihia, to fakakite e ia hana nakai fiafia mai he lagi ke he ha lautolu a puhala taute mena, pete ni foki ne fakaata e ia a lautolu ke fakatumau ke he vaha nei.
20 Kua liga kua mua atu e goagoa ke nakai fakatumau ha tautolu a tau laliaga ke moua e taui lilifu kua fakaolo mai ki a tautolu ia Iesu Keriso. Ka e kehe, kua mauokafua e fifiliaga ha tautolu ke taute fakamoli ko e Tau Fakamoli a Iehova he magaaho uho lahi nei kua teitei ke fakamatalahi e Iehova a ia ni ko e Pule Katoatoa he Lagi mo e Lalolagi Katoatoa.
[Tau Matahui Tala]
a Ke tuga a nei, ne tohia e Christine Elizabeth King: “Ko e totoko ni hokoia ke he Tau Fakamoli ne nakai kautu e fakatufono [Nasi], pete ni kua tamate e lautolu e tau afe, kua holo ki mua agaia e gahua mo e ia Me he tau 1945 moui agaia e fakaholoaga he Tau Fakamoli a Iehova, ka e he magaaho taha nakai pihia e tau Kaufakalatahaaga Faka-Motu. Ne tupu e tau numela he tau Fakamoli mo e nakai taute ha fakahuiaga. Ne moua he fakaholoaga e tau tagata ne mamate he nakai fakatikai e tua mo e kua kautu lahi mai he latau ke he taha tauaga he tau he Atua ko Iehova.”—The Nazi State and the New Religions: Five Case Studies in Non-Conformity, he lau tohi 193.
To Fefe e Tauteaga Hau?
◻ Ko e ha kua nakai maeke a tautolu ke kalo mai he kamatamataaga ke he fakaukaaga ha tautolu?
◻ Ko e heigoa e fakavaia kua manako a tautolu ke kalo mai?
◻ Ke kalo mai he ha mena ne lolelole a tautolu, ko e heigoa kua lata?
◻ Ko e heigoa e matakupu pauaki ha tautolu?
◻ He tau magaaho tupetupe, to lagomatai he heigoa a tautolu ke fakauka?
[Fakatino he lau 25]
Ko e tau tagata he Atua, tuga e Tau Fakamoli nei i Port of Spain, Tirinitata, kua fa manako tumau ke fakatali ki a Iehova