Tau Puhala ke Foaki e Kua Leveki Moli Kia he Atua a Tautolu?
He mole e talahau e vala tala matematekelea lahi ne tupu, liga pehe a koe:
“Kua manamanatu nakai a koe ko e ha ne fakaata he Atua e tau tagata ke matematekelea kaeke leveki moli e ia a tautolu? [Fakaata ma e tali.] Kua foaki he porosua nei e tali mauokafua ke he huhu ia mo e fakakite mai e mena ka taute he Atua he vaha ne tata mai i mua. [Fakakite e tau fakataiaga he lau 27, mo e totou e Salamo 145:16 he paratafa 22.] Puhala fe ka vetevete he Atua e tau matematekelea oti kana ne fakafita e tau tagata ki ai? Manako au ke fakatutala ke he huhu ia ka liu mai au.” Foaki e porosua, mo e pulega ke liu atu.
He liu aahi atu, liga pehe a koe:
“He ahi mai haku kua mole, ne totou e taua e kupu tohi nei. [Totou po ke fatiaki e Salamo 145:16.] Ti huhu atu au: Puhala fe ka vetevete he Atua e tau matematekelea oti kana ne fakafita e tau tagata ki ai?” Ole age ke tamai e porosua hana. Ti hafagi ke he lau 27-8, mo e fakatutala ke he paratafa 23-5. Foaki e fakaakoaga Tohi Tapu, po ke pulega ke fakatutala ke he paratafa 26-7 ka liu aahi atu.
Liga pehe e tagata fakapuloa fuata mui:
“Tokologa e tau tagata he atu tau haku kua tupetupe ko e fefe la e lalolagi he 10 po ke 15 e tau tau i mua. Ko e heigoa e manatu hau ke he moui he magaaho ia? [Fakaata ma e tali.] Kua fakakite mai he tau lekua ne kitia e tautolu he vaha nei hane nonofo a tautolu he tau aho fakamui. [Totou 2 Timoteo 3:1-3.] Kua foaki he porosua nei e tau tali ke he tau huhu ne mui mai. [Totou e tau huhu he kili, mo e foaki e porosua.] Ka liu mai au, ti ka fai magaaho a koe, to manako au ke fakakite atu e manatu mafanatia ke he fakaotiaga he gagao mo e fuakau.” Pulega ke liu atu.
Magaaho ka liu, liga pehe a koe:
“He tutala fakahiku ha taua, ne talahau e au kua manako au ke fakakite atu e manatu ke he fakaotiaga he gagao mo e fuakau. Ti moua e manatu ia he vala nei.” Ole age ke tamai e porosua hana. Ti totou mo e fakatutala ke he paratafa 6-7 he lau 23-4. Pulega ke fakatutala ke he paratafa 8-9 ka liu aahi atu.
Ka gahua mo e tama tote, liga fakafeleveia he tagata lahi a laua mo e pehe:
“Ka manako a koe, loto a ________ ke totou e kupu tohi ki a koe. [Totou he tama e Salamo 37:29 mo e foaki e talahauaga ku.] Kua fakatutala e porosua nei ke he puhala ka fakamoli he Atua e finagalo hana ma e tau tagata mo e lalolagi. [Fakakite e tau fakatino he lau 24-7.] Ka liliu mai a maua, to fakakite atu e au e maveheaga homo lahi he Tohi Tapu ke he liu tu mai.” Foaki e porosua, mo e pulega ke liliu atu.
He liu aahi atu, liga pehe e tagata lahi:
“He hau fakamua haku, ne totou e taua e Salamo 37:29 mo e pehe au to fakakite atu e au e mena ne talahau he Tohi Tapu hagaao ke he liu tu mai. Mailoga la e mena ne talahau he vala nei.” Ole age ke tamai e porosua hana. Ti fakatutala ke he paratafa 12-14 he lau 24-5. Foaki e fakaakoaga Tohi Tapu, po ke pulega ke fakatutala ke he paratafa 15-16 ka liu aahi atu.