Tau Mena Iloa Mai he 2010 Yearbook
Fai Fua e Tau Fenoga ke he Vao
Pete ni kua gahua tumau ke he Taone ko Belize mo e tau taone lalahi i Belize, ka ko e tau vala fonua i tua kua nakai fa gahua tumau ki ai. Ko e tau misionare fakamua ne fa fenoga atu he toga ke he tau taone he faahi toga, ka e he magaaho fakamui ne talaga e puhalatū ke matutaki ai e tau matakavi he faahi toga ha Stann Creek mo Toledo mo e motu katoa. He mataulu he 1971 mogoia, ne fakatokatoka he la ofisa e tau fenoga fakamatala ne lagataha he tau, ne fakahigoa ko e tau fenoga ke he vao, ke ta atu e fekau he Kautu ke he tau matakavi mamao ha Mopan mo Kekchi Maya he matakavi mamao he vao uhi ha Belize.
He totogi e tau peleoafi ke fakaaoga mo e tau vaka paopao, ne maeke e tau matakainaga ke hohoko ke he tau maaga mo e tau taone i Dangriga ke hoko ki Punta Gorda mo e mamao atu ke he faahi toga ha Barranco, tata ke he katofia mo Kuatemala. Falu fenoga ne o atu e matakau he vene mo e fakalataha ki ai ua ke he fā e pasikala afi. He tau po takitaha ne kehe tumau e maaga ha lautolu ka tūtū ai, he aho, ne gahua e laulahi he maaga ka e takitokoua e pasikala afi ka o atu he hala vao ke he tau faama mamao.
He matakavi i Punta Gorda, ne fafa e tau kato he tau matakainaga mo e o hui ai he taha maaga ke he taha maaga. Ne fa mahani ke tutala a lautolu ke he alcalde (takitaki) i loto he cabildo, ko e fale fono ma e tau tagata taane motua he maaga, ato fakamatala ke he tau tagata he maaga.
“He taha maaga,” he talahau he misionare ko Reiner Thompson, “ne hohoko e tau matakainaga he magaaho ne fa e fono ai e tau tagata taane he cabildo, ko e fakatutalaaga ke he heleheleaga he ulu hana. He oti e fono, ne ole e tau tagata taane ke he tau matakainaga ke uhu taha lologo he Kautu ma lautolu. Ko e tau matakainaga kua mategūgū mo e hoge, ti nakai fai tohi lologo a lautolu.” Ne lafi he matakainaga Thompson, “Ne lologo a lautolu mo e tau loto katoa, ti fiafia lahi e tau tagata taane.” Fai magaaho he mole, ne fakatu e tau fakapotopotoaga i Mango Creek mo e he magaaho fakamui i San Antonio, ko e taha he tau maaga lalahi ha Maya.
“Falu magaaho ne o a mautolu he taha maaga ke he taha maaga he pō ke fakatauo fakatatau mo e fakaholoaga ha mautolu,” he fakamaama e Santiago Sosa. “Ne iloa e mautolu ke o fakalaini he lotouho he puhalatū, nakai o he tau kaukau hala, ha ko e vao he tau faahi puhalatū, ko e nonofoaga a ia he tau gata. Ne fakaako foki a mautolu ke inu e vai mai he vine inu ka maha e vai ha mautolu.”
He falu magaaho ne vevehe e matakau ke takitokoua po ke takitokofā ke fakamatala he tau faahi kehekehe he maaga. Ti liu a lautolu oti feleveia he mogo afiafi. Tokoua ka nonofo ke tunu e kai. “Liga ko e lekua lahi a ia,” he talahau e Santiago ka e kata, “ha kua nakai iloa mitaki e falu ke tunu kai. Manatu e au he onoono ke he taha fua kai ti hūhū, ‘Ko e heigoa a e?’ Ne pehē e tagata tunu kai, ‘Ai iloa au, ka ko e mena kai.’ Ka nakai iloa he tagata tunu kai e mena kai, kua lata ni he manatu e mautolu ke fakatai fakamua ke he kulī pipili fano holo. Ka e ai kai foki he kulī ne hoge!”
Tau Fenoga ke he Vao—Fakamatala he Vao Uhi
“Ia Mati 1991, ko e matakau toko 23 he tau matakainaga mai he tau matakavi kehekehe he motu ne fakapotopoto i Punta Gorda ke lata mo e fenoga fakamatala ke he hogofulu e aho ke he lotouho he vao uhi,” he talahau e Martha Simons. “Lafi ke he ha mautolu a tau koloa mena tui, tau mamoe kafu, mo e tau mohega tautau, ko e tau tohi he vagahau Peritania, Sepania, mo e Kekchi. Ne uta foki e mautolu e tau mena kai, putoia ai 200 he tau paka keke, po ke tau paka falaoa.”
“He pogipogi hake ne fenoga atu a mautolu he tahi lukeluke he vaka paopao, ne talaga mai he polokū e akau lahi ko e ceiba (tuga e vavae). He maaga ko Crique Sarco, ne aau mai e tau koloa ha mautolu ti taute e kemuaga. He tau hake he tau matakainaga taane e tau mohega tautau, ne tunu he tau matakainaga fifine e taha he tau mena kai mahuiga ha mautolu—ko e supo hiku puaka—ko e kai ia ne tunu fakalataha ai e kāufi, ufi, fua futi, niu, tau fufua moa tunu, mo e ai nimo ko e hiku puaka. Ne iloa fakahaga kua hohoko mai tuai a mautolu, ti nakai leva ne matutaki mai e tau tagata he maaga ha Kekchi ke feleveia mo mautolu. Ke he puhala nei, ne maeke ia mautolu ke fakamatala ke he maaga katoa ke he ua ni e tulā. He pō ia, ne momohe e tau matakainaga taane he tau mohega tautau i lalo he fale leoleo, ne ta ai i luga he tau akau, ka e momohe e tau matakainaga fifine i loto he cabildo, ko e fale fono ma e tau tagata taane motua he maaga.
“He aho hake ne liliu a mautolu fafao e tau koloa he toga ti o atu taha foki he vailele, ko e falu matakavi kua apiapi lahi he tau hokohoko akau ne tupu vao ti malumalu mo e pouliuli. Kavi ke he hafa e tulā, ne tutū a mautolu ti o hake hui he ulu vao ke he maaga ko Sundaywood ke he taha mo e hafa e tulā. Ko e tau tagata i ai kua tino ikiiki, lanu uli e tau kili mo e ulu lautī uli. Laulahi ia lautolu ne o hui kula, ti tui e tau fifine he tau patutiti fakamotu mo e tui e tau fua kahoa fakamanaia. Ko e tau fale pola ne malaega noa ni a loto, nakai fai kaupa, mo e nakai fai koloa i loto, ko e tau mohega tautau ni. Taha faahi he tau fale ko e gutuafi ke kaitunu auloa ai.
“Kua lahi e aga kapitiga he tau tagata, ti lahi foki e fiafia ne moua e mautolu. Ne fiafia lahi a lautolu he fai tohi Kekchi a mautolu ti maeke ke fakakite age e tau kupu tohi mai he tau Tohi Tapu Kekchi ha mautolu.
“He pogipogi hake ne fafagu he tau moa hui hoe a mautolu, tau manu lele he vao, mo e tagi he tau magikī. He oti e kai pogipogi mitaki, ne liu aahi atu a mautolu ki a lautolu oti ne fakakite e fiafia he aho fakamua. Ne loga e fakaako Tohi Tapu ha mautolu ne kamata ti fakamafana ki a lautolu oti ke fakatumau ke fakaako ne lautolu a lautolu ato liliu mai a mautolu ke fakaako mo lautolu he tau ka hau. He tau aho ne toe, ne pihia foki e mena ne tupu he o atu fakahaga ki loto he vao uhi ke hoko atu ke he tau maaga tutū mamao.
“He mole e hogofulu e aho fiafia he uho vao, ne liliu e tau loto ha mautolu manamanatu ke he puhala loa ne fenoga mai ai, ke he tau maaga loga ne o atu a mautolu ki ai, mo e tau tagata oti ne feleveia mo mautolu. Ne liogi a mautolu ke puipui e Iehova e tau tega he kupu mooli ne kua to ato liliu mai a mautolu he tau ka hau. Ne mamahi e tau hui ha mautolu, ti mategūgū e tau tino; ka e pukeina e tau loto ha mautolu mo e fakaaue ki a Iehova ha ko e olioli he o auloa he fenoga ke he vao he tau nei.”
Fua Mitaki Mai e Fonua ne Ai Fai Tagata Gahua
He 1995, ne uiina a Frank mo Alice Cardoza ke gahua fakakū ko e tau paionia pauaki ia Aperila mo Me ke lagomatai ke tufatufa e Tau Tala he Kautu Nu. 34, “Ko e Ha ne Puke Ai e Moui he Tau Lekua?,” he faahi motu a Toledo. “Kua fitā au he fano ke he taha he tau fenoga ke he vao ne taute he tau tau takitaha he matakavi nei,” he manatu e Frank, “ti kitia e au ko e puhala mitaki ni ke lagomatai e tau tagata Maya ke iloa e tala mitaki ka fai tagata ka fina atu ke nofo he matakavi ia. Ne fakamafana he la ofisa au ke totogi taha mena ke nofo ai, kamata e matakau fakaako Tohi Tapu, ti taute e lauga pauaki i San Antonio. Ko e gahua ha maua ke tufatufa e Tau Tala he Kautu i ai, fakalataha foki ke he valu e maaga.”
Ne taute he tau Cardoza e matakau fakaako he tau faahi tapu takitaha ke he poko totogi ha laua i lalo he fale, ti gahoa ni e faahi tapu ka kua fitā he tolu ke he fā e magafaoa ne kamata ke fakalataha mai. Ko lautolu nei kua fiafia ne o atu foki mo e tau Cardoza he fenoga taha e tulā, he tulaki tuai he hala pokopoko ki Punta Gorda ke lata mo e Aoga Fekafekau Fakateokarasi mo e Feleveiaaga Fekafekau. He mahina fakamua ia, ne taute e Frank e lauga pauaki i San Antonio. Ko Jesús Ich, ko ia taha ne fina atu fakapā laia, ne to lahi e fanogonogo fakamakutu. Ha ko ia ko e tagata he Lotu Nasarini, ne fiafia lahi a ia he iloa na fakavē e fakaakoaga he hellfire ke he tau aga pouliuli ti ko e hell he Tohi Tapu ko e tukuaga. Ne uta e ia a Frank hoko laua ni he oti e feleveiaaga, ti loga atu foki e hūhū ke he matakupu ia. Ko e fua, ne kamata a ia ke fakaako e Tohi Tapu ti papatiso he taha e tau he mole.
He matahiku he kotofaaga fakakū ha laua ke he ua e mahina ko e tau paionia pauaki, kua lata e tau Cardoza ke taute e fifiliaga aoga lahi. “Loga e fakaako ne kamata e maua,” he manatu e Frank, “mua atu ke he mena kua fahia a maua ki ai. Kua nakai fakaatā he tau loto mo e tau manamanatuaga ha maua a maua ke liliu ke he fale tokotoko mitaki ha maua i Ladyville. Kaeke ke fifili a maua ke nonofo i San Antonio, liga maeke ke mitaki ha maua a nonofoaga ka totogi e poko i luga he fale ke nonofo ai ka e nakai he kelekele. Liga maeke au ke tuku e pa holoholo tote, ko e halavai ke tafe hifo e uha, mo e faletote fakatafe aki e vai mo e hila foki he magaaho fakamui. Ne liogi a maua ki a Iehova hagaao ki ai, ti mauokafua ko e fakamonuinaaga haana to liga fakatū e fakapotopotoaga he matakavi nei. Ti tohi a maua ke he la ofisa, mo e fakamaama ki a lautolu kua makai a maua ke nonofo i San Antonio ko e tau paionia tumau.”
Ne kitia mafiti e fakamonuinaaga ha Iehova ke he fifiliaga he tau Cardoza. Ke he ono ni e mahina, ia Novema, ne taute fakapā e Feleveiaaga ma e Tau Tagata he fale totogi ha laua. Ti hoko ki a Aperila he tau hake, ne kamata a lautolu ke taute e Aoga Fekafekau Fakateokarasi mo e Feleveiaaga Fekafekau i San Antonio. Ko e fiafia ha ia he matakau tote ha kua nakai o viko ai he fenoga 40 maila ki Punta Gorda ke fakalataha ke he tau feleveiaaga.