Tau Mena Tutupu Mai he 2011 Yearbook

Fakamooli Ua e Tau Manako Haana

Ko Nelena ne 19 e tau he moui ne nofo i Bulgaria, ne ua e manako​—ke papatiso mo e paionia fakakū. Ka kua matematekelea a ia he gagao magafaoa ko e motor and sensory neuropathy, ne nakaila fai tuluiaga ia. Ne lagomatai he matini a ia ke fafagu, ti fakakaupa he mena nei a ia ke fanofano. Ke fakamooli e manako fakamua haana ke papatiso, ne fai lekua ha kua nakai maeke a ia ke fano kehe he kaina haana ke fina atu ke he toloaga. Ti ko e magaaho ne 18 e tau moui haana, ne taute e lauga faka-Tohi Tapu he kaina haana, ne oti ti papatiso a ia he pa koukou.

Ka e kua e manako haana ke paionia fakakū? Ka hoko ke he magahala mafana, kua maeke a ia he falu magaaho ke fafagu noa kavi ke taha e tulā ka e nakai lagomatai he matini. Ne tohi e higoa haana ke paionia fakakū, ti omoi ai he taha tagata fakailoa a ia mai he taha fale ke he taha fale he nofoa fakataveli. Taute foki e Nelena e fakaako Tohi Tapu he fakaaoga e voice call he Inter­net. Falu magaaho, ne taute he tau matakainaga fifine e tau fakaako Tohi Tapu ha lautolu he kaina ha Nelena, ti fakaatā a ia ke fai vala i ai. Ko e fua, ne maeke a Nelena ke lagatolu e paionia fakakū he tau kua mole. Pehē a ia: “Fiafia au ha kua fakamooli e au ua e manako haaku. He taute pihia kua fakatata lahi au ki a Iehova, ko e Tufuga fakaalofa haaku.”

Kua Tau Fitiua a Ia Mogonei

Ko e matakainaga fifine i Armenia ne vaiga ki ai he gahuaaga ha ko ia taha he Tau Fakamoli a Iehova. Ne taha e tagata taane ne fakatau gahua mo ia ne fa vaiga a ia, he pehē “ko e tau tagata tau fitiua” ne fakaohooho e matakainaga fifine ke talia e lotu ha lautolu. He lagaloga e lali ke fakamaama ki a ia ka kua nakai fai aoga, ne fifili e matakainaga ke fakaheu e tau talahauaga haana, he fifitaki ki a Iesu Keriso ne “nakai lea.” (Mata. 27:12) He mogo fakamui, ne fakaoti mai a ia he gahua he kelea e mahani mo e fakatupu lekua ke he matakainaga fifine ha tautolu. Fai mahina he mole, ne hau e tagata taane ke he gahuaaga ke kumi he matakainaga fifine. Ko e tagata ne fakatau gahua mo ia fakamua ne fakamamahi lahi e loto he matakainaga. Ne ofo lahi e matakainaga ha ko e puhala tauteute haana. Pete he vaiga e ia e Tau Fakamoli he tau fitiua, kua tau fitiua foki a ia he mogonei ti totō e kato pepa. Pehē a ia ke he matakainaga fifine ha tautolu: “Fakamolemole atu au ke he tau kupu hukia haaku ne tala atu ki a koe. Iloa e au mogonei kua moua tuai e au e kupu mooli.” Ne fakaako Tohi Tapu a ia mo e Tau Fakamoli a Iehova, ti pete e totoko he magafaoa haana, ne papatiso a ia ti kua eke mo paionia mau.

“Iloa Nakai e Koe a Mrs. Nadia?”

Ko Nadia ko e paionia he fakapotopotoaga he faahi tokelau i Italia. Ia Sepetema he tau kua mole ne vagahau atu a ia he intercom ke he tagata taane ne hehele e vagahau haana ke tala age na kito mate e hoana haana ti nakai fia tutala a ia ke he matakainaga fifine. He Aho Tapu he faahi tapu hake ne liu atu a Nadia ke tala age e tau manatu momoko haana mo e fakakite e amaamanakiaga he Tohi Tapu ke he liu tu mai, ka kua tatai ni e tali he tagata taane. Ko e Fakaakoaga Kolo Toko ne taute he afiafi ia ne putoia e mena ne tupu ke he taha matakainaga fifine ne tohi atu e tohi ke he tagata ne mate e fakahele. Ne maeke he mena nei ke manamanatu a Nadia ke he tagata taane ne vagahau a ia ki ai he inter­com, ti fifili a ia ke tohi atu e tohi fakaalofa mo e lafi e tau manatu fakamatafeiga ke he amaamanakiaga he liu tu mai. Ua e aho he mole, ne tuku e ia e tohi he puha tohi he tagata taane.

Fai aho he mole, ne gahua fakamatala a Nadia he puhalatū ti fakatū e tagata taane ne kavi 70 tumā e tau moui ke totou age e kupu Tohi Tapu. Ne hūhū e tagata ki ai ko ia ka taha he Tau Fakamoli a Iehova, ti tali a Nadia ē ko ia taha. Ne talahau he tagata ko e taha he Tau Fakamoli a Iehova ne fina age ki a ia, ti toka e tohi fulufuluola ne aamotia lahi a ia. Ti hūhū mogoia a ia, “Iloa nakai e koe a Mrs Nadia?” Ne ofo lahi a laua, ti fakailoa e Nadia a ia mo e taute e tau fakaholoaga ke aahi atu ki a ia mo e taane haana. Ne nakai ni kamata e tagata ke fakaako Tohi Tapu ka kua fina atu tumau foki a ia he tau feleveiaaga mogonei.

Nakai Maeke ke Fakaako a Lautolu Oti

Tokofā e Fakamoli kua papatiso ne nonofo he taone ha Bujanovac he faahi toga ha Serbia. Ne fiafia lahi a lautolu nei ko e tau tagata fakapuloa he Kautu ha kua 460 ne fakalataha atu ke he Fakamanatuaga he 2010! Kua fakatokatoka he tau motua he fakapotopotoaga ne tata mai ke taute tumau e tau feleveiaaga i Bujanovac he fale ne totogi tupe. Ko e evalesi kua molea e toko 50 ne fakalataha atu​—ko e laulahi ko e tau ohi mai i Roma. Ha kua tokologa ne fiafia ke he fekau he Kautu, ko e tau paionia pauaki ne kotofa ke he matakavi nei ne nakai maeke ke taute e tau fakaako Tohi Tapu mo lautolu oti ne fakakite e fiafia. Ti fakaako ni a lautolu mo lautolu ia ne o mai mo e mautauteute ke he tau feleveiaaga oti.

Molea e Taha e Senetenari!

Ko Elin, ko e tagata fakailoa ne motua lahi i Suitene, ne 110 e tau he moui​—ko e tau tau moui ne hoko a Iosua ki ai. (Iosua 24:29) Ne nofo a ia he kaina ma e tau mamatua fuakau ti fakaaoga e tau magaaho oti ke tutala ke he tau tagata ahiahi mo e tau tagata oti ne feleveia mo ia i ai. Loga e tohi ne foaki e ia. Magaaho ne fakamatala e motua mo e tama fifine haana mai he taha fale ke he taha fale he matakavi ia, ne feleveia a laua mo e fifine fuata ne pehē na fakamatala a Elin ki a ia ti taha e tohi ne toka ma haana. Ne mitaki e fakatutalaaga ne moua mai he mena nei.a

Moua e Ia e Tau Tohi he Fale Tapu

Ko e matakainaga ko Tatyana ne nofo i Belarus, ne ofo he taha aho he hea telefoni atu e fifine fuata ki a ia ne nakai iloa e ia. Ne manako e fifine ke iloa e tau tali faka-Tohi Tapu ke he tau hūhū haana. Ti lahi e fakatutalaaga ne mui mai. Moua fēfē e ia e numera telefoni ha Tatyana? Ne fakamaama he fifine, magaaho ne fina atu a ia ke he fale tapu ne moua e ia he lalo fata e tohi Fakaako he Tohi Tapu mo e New World Translation ne tu e numera telefoni ha Tatyana i loto he tau tohi. Hoko atu fēfē e tau tohi ke he fale tapu? Ne ta atu ai he matua fifine he tama fifine ne fakaako Tohi Tapu mo Tatyana. Maaliali ai, ne manako e matua fifine ke fakatonu ke he akoako kua lata nakai e tama fifine haana ke totou e tau tohi nei. Ka e fai mena ni ne tupu ti toka e tau tohi he lalo fata. Ne kitia he fifine e tau tohi ti fifili ke uta ki kaina. Kua takitaki atu e hea telefoni ke he falu fakatutalaaga Tohi Tapu foki.

Hafagi e Puhala ha ko e Peleue ne Galo

Ko Elena ko e matakainaga fifine paionia pauaki ne kitia e peleue mitaki he puhalatū i Minsk, Belarus. Meā e peleue ti nakai tuga ko e mena kua tiaki. Ne lagaki hake e ia ti moua ko e $1,543 (N.Z.) i loto he kato peleue. He onoono ke he tau tagata ne fa e o fano, ne mafiti a ia ke kitia e tagata taane ne liga galo e peleue. Ha kua poi viko fakatepetepe a ia tuga kua fai mena ne kumi. Ne poi atu a Elena ke moua a ia. Ko e tagata taane gahua pisinisi a ia mai Bangladesh, kua nofo i Moscow. Ne fiafia lahi a ia ke moua e peleue haana mo e tupe. Manako foki a ia ke iloa e kakano ne liuaki age he matakainaga fifine e peleue, ti poi foki ke moua a ia. Ne fakamaama he matakainaga ko ia taha he Tau Fakamoli a Iehova. Ne pehē e tagata taane he falu aho gahoa kua mole, ne ua e Fakamoli ne tutala mo ia. Kavi ke he 30 e minuti he fakafetoko a ia ki a laua mo e lalago e tau taofiaga fakalotu haana. Ti hūhū e tagata taane ki a Elena ko e fakakite fēfē e ia e loto fakaaue haana ha kua liuaki atu e peleue. Ne pehē e matakainaga nakai manako a ia ke fai totogi ha ko e mena ne tupu ka ko e puhala kua mua atu ke fakakite e loto fakaaue haana ke fakaako e Tohi Tapu mo e Tau Fakamoli a Iehova ka liu a ia ki Moscow. Ne talia he tagata taane ke taute pihia.

Leveki e Puhala Vagahau Fakakoekoe

Ko Hamish ko e matakainaga taane ne 23 e tau moui ne nofo i Ausetalia, ne koekoe lahi e puhala vagahau haana ti ko e tau kupu haana kua nakai maama po ke nakai fai kakano po ke nakai pu e lea. Ka e nakai mataofi he matematekelea nei e makutu haana ke tutala ke he tau tagata po ke gahua he fonua. Ma e fakatai, ka taute e Hamish e lauga he Fale he Kautu, ne lomi fakamua e ia e lauga haana ke he matini hila ne hiki e tau matatohi ke he vagahau fakaleo lahi. Ka lauga a ia, ne tuku e ia e matini he fata i mua ti fakaaoga e keyboard ke fifili aki e tau vala he lauga haana ke fakatoka mai. Ti fano e leo he matini ke he maikorofoni ti taogo mai he leo fakatagi. Kaeke ko e vala haana ke fai talahauaga mai he toloaga, ne fakaaue a ia ki ai he lomi ke he matini. He gahua he fonua ne fematutaki pihia foki a ia, he fakaaoga e tau manatu ne tauteute tuai, tau kupu Tohi Tapu, mo e mafiti ke lomi! Ko e fua, ne loga e liu aahi atu mitaki haana. Tali mai he 2007 he mogo ne kotofa a Hamish mo fekafekau leveki, kua lagaloga tuai e gahua paionia fakakū haana he tau tau takitaha.

[Matahui Tala]