Tau Mena Tutupu mai he 2011 Yearbook
Gana e Tau Tega he Kautu ti Fai Fua
He mataulu he atu tau 1970, ko e matakau tote he Tau Fakamoli ne nonofo he Mouga ko Hagen, kavi ke he 130 e kilomita ke he faahi lalo ha Goroka. Talahaua e taone nei he lahi mahaki e makete he tau faahi tapu takitaha, ne futiaki mai e tau tagata tokologa he tau maaga mamao. “Ne foaki e mautolu totou teau e tau tohi he makete nei,” talahau he paionia loto malolō ko Dorothy Wright. He liliu e tau tagata ke he tau maaga ha lautolu ne uta foki e lautolu e fekau he Kautu mo lautolu, ne kaputia e tau matakavi mamao ne nakai hokotia e tau tagata fakailoa ki ai he mogoia.
Fakamui, ko e tama taane ha Dorothy, ko Jim Wright, mo e hoa paionia haana ko Kerry Kay-Smith ne kotofa ki Banz, ko e magamotu ne tō ai e tau tī mo e tau kofe he matakavi fulufuluola he Pahua i Wahgi he faahi uta he Mouga ko Hagen. Ne feleveia a laua hinei mo e totokoaga lahi mai he tau akoako he tapu, ne fakaohooho e tau tama ke tauliti a laua aki e tau patuō mo e vega a laua mai he tau maaga ha lautolu. He hiki atu a Kerry ke he taha kotofaaga, ne nofo hifo a Jim i Banz, ti paionia tokotaha. Manatu e ia: “Fa ala au he pō he takoto he faleau tote haaku ne taute aki e tau motie ti liogi, ‘Iehova, ko e ha ne nofo au hinei?’ Loga e tau he mole ne moua e au e tali ke he hūhū ia.
“He 2007, ne hau au i Ausetalia ki Banz ke fano ke he fonoaga he faahimotu,” he matutaki e Jim. “Tata ke he matakavi he faleau tuai haaku ne taute aki e tau motie, ne tū ai e Fale he Kautu foou ne maeke ke fakalahi fakakū ke moua e Fale he Toloaga ne 1,000 nofoa. He hū atu au ke he fonua, ne hau fakamafiti e matakainaga taane ki a au, ti tōtō mai au, ti kamata ke tagi he fuga tukeua haaku. He oti e tagi haana, ko e matakainaga taane ko Paul Tai ne fakamaama kua fakaako au mo e matua taane haana he 36 e tau fakamua. Totou e Paul he mogo fakamui e tau tohi fakaako he matua taane haana ti talia e kupu mooli. Tala mai a ia ki a au kua fekafekau a ia ko e motua.
“He fonoaga, ne hūhū tala ki a au i mua ti fakamaama e favaleaga ne fakauka a mautolu he vahā fakamua i Banz,” he ui e Jim. “Teitei tagi oti e tau tagata he toloaga. He mole e fakaholoaga, tokologa e matakainaga taane ne o mai ti peka ki a au mo e tagi fakamolemole. Ko e vahā ikiiki he tau tama taane, ne vega e lautolu au he maaga ha lautolu ka e tauliti aki e tau patuō mo e tauhea ekefakakelea. Lafi ki ai ko e taha ia lautolu ko Mange Samgar—ko e motua mogonei—ne eke mo akoako Lutheran fakamua ne fakaohooho ki a lautolu! Eke mooli e fakalatahaaga auloa he fonoaga ia mo mena kua mitaki lahi mahaki!”