Tau Mena Tutupu Mai he 2011 Yearbook
Fakafoou e Matutakiaga mo e “Matua Fifine”
Pete he mau nivaniva e Puipui Lapatoa, ka e nakai maeke ai ke taofi katoatoa e maama he kupu mooli he Tohi Tapu he kikila atu. Ke he loga he tau tau ne fakaaoga he tau matakainaga e tau tohi mai he tau tau fakamua. Ka e he fakapaea ki Siperia, ne maeke e Tau Fakamoli Esetonia ke feleveia mo e tau matakainaga mai he falu faahi he Kautaha Soviete. He liliu a lautolu ki Esetonia, ne loto malolō a lautolu he fakatumau e tau matutakiaga nei mo e tau matakainaga he Kautaha Soviete ti maeke ke moua e tau mena kai fakaagaaga foou mai he taha magaaho ke he taha magaaho. Ma e fakatai, kamata he 1956, ne matutaki a lautolu mo Ivan Dziabko mo e falu mai i Ukaraine ti maeke ke moua e tau tohi mai ia lautolu. Ka kua gahoa e tau matutakiaga pihia, mo e fakakaupā foki e loga he tau tohi. Kua fai mena atu foki ne manako ki ai, ti nakai leva kua fakamonuina e Iehova e tau laliaga loto malolō he tau matakainaga ha tautolu.
I lalo hifo he takitakiaga he Kau Fakatufono, ko e la ha Finilani ne taute e tau fakatokatokaaga ke lagomatai tumau atu e tau matakainaga i Esetonia. Ko Vilho Eloranta, ne paionia i Esetonia he tau atu tau 1930, ne kotofa ke matutaki mo lautolu. He kamataaga he tau atu tau 1960, he fenoga fakamua haana ki Esetonia, ne maeke a ia ke feleveia mo Fanny Hietala. He mole ai, tokologa e matakainaga Finilani ne o atu tuga e tau tagata o fenoga evaeva, ti eke mo tau tagata uta fekau mo e lagomatai ke fakatumau e matutakiaga. Fakahiku ai, ne matutaki e tau matakainaga i Esetonia mo e “Matua Fifine,” ko e higoa ne ui aki he tau matakainaga e fakatokatokaaga ha Iehova. Ne maeke ia lautolu ke fakafano atu e tau hokotaki he gahua he fonua mo e tau tohi ti moua foki e tau tohi ke he tau ata poki fakaikiiki (microfilm). Ka e ha kua lata ni ke taute fufū katoatoa mo e fakalotomatala lahi mahaki e fakatokaaga ia, ne kua fakakaupā ni e matutakiaga ke he lagaua po ke lagatolu he tau.
Ahiahi Mafanatia he Paaka
Ne fakatoka he Kau Fakatufono ma e taha he matakau, ko Lloyd Barry, fakalataha mo Viv Mouritz, mai he la i Finilani, ke feleveia mo Adolf Kose, hane fakatokatoka e gahua i Esetonia. Ne feleveia a lautolu he paaka i Leningrad (mogonei ko St. Petersburg).
“He magaaho fakamua ne tehatehaua e Matakainaga ko Kose ke vagahau,” he ui he Matakainaga ko Mouritz hagaao ke he feleveia fakagalogalo ha lautolu, “ti fakaeneene a ia he fakamumuli tumau i tua he nusipepa haana. Ka e he matutaki atu e fakatutalaaga, ne tuku hifo e nusipepa, ti kamata a Adolf ke vagahau.”
“Ne nakai talia e ia e uiina ke kai fakalataha mo maua,” he liu manatu he Matakainaga ko Barry. “Pehē a ia kua mitaki ni ke taute e tau matagahua kua aoga lahi ti oti he naia.”
Magaaho ne talahau he Matakainaga ko Kose e tupetupe hagaao ke he mamafa gugune he favaleaga mo e tau fakakaupāaga he Tau Fakamoli he Kautaha Soviete, ne tala age he tau matakainaga ko Mouritz mo Barry e tau manatu atihake ki a ia. “He falu motu, kua fai kamatamata foki a mautolu,” he ui e laua. “Tuga na mukamuka lahi e tau kamatamata ia, ka e mua atu e hagahaga kelea! Loga e tau kamatamata ha mautolu ne nakai lauia a mutolu, ti kua tokologa atu e tau tagata ha mautolu he faahi Lalo kua o kehe ka fakatatai mo mutolu hinei.”
Ne magaaho tonu mo e atihake fakaagaaga lahi e ahiahi nei ma e Matakainaga ko Kose. Ko e iloa laia e ia he magaaho fakamui kua tutala a ia ke he matakainaga he Kau Fakatufono, ti fiafia lahi a ia ke fakahoko age e tau fakamaloloaga mai he fakatokatokaaga ha Iehova ki a lautolu kua fakamooli tumau i lalo hifo he favaleaga pule kelea.
“Kua momoko a maua he tau matakainaga ha tautolu he Kautaha Soviete,” he tohi he Matakainaga ko Barry he mogo fakamui. “Ko e fiafia ha ia ke feleveia mo e Matakainaga ko Kose, ti talofa lima mo e peka mafanatia mai a ia ki a maua he mavehe a mautolu ko e fakahikuaga uho ke he feleveiaaga olioli lahi ia.”