Tau Mena Tutupu Mai he 2011 Yearbook
Fakauka Pete e Tau Paleko
Ko e puhala ne gahuahua ai e tau lotu kehekehe i Papua Niu Kini ne ha ha ai e taliaaga he tagata taane ke he mena ka taute e tau gahua takitaha. Igatia e matakau lotu mo e matakavi ni ha lautolu ti amanaki ke he falu lotu ke fakamamao mai i ai. Ka ko e Tau Fakamoli a Iehova kua folafola e tala mitaki ke he tau tagata oti kua manako ke fanogonogo ai, pete ne matakavi kua nonofo ai a lautolu. Ko e tuaga nei, mo e talia mitaki he tokologa ne fanogonogo ke he kupu mooli ne fakaita e tau akoako.
“Mole e hiki atu au ke he aelani tote ko Kurmalak, i West New Britain, taha he tau tagata ne aahi atu fakamua au ki ai ko e akoako Anglican,” he manatu e Norm Sharein. “‘Nakai fai tonuhia a koe ke fakamatala ke he matakavi he lotu haaku,’ he ui he akoako. ‘Kua fitā e tau tagata he eke mo tau Kerisiano!’
“Fakamui, ne kitia e au e taha he tau tagata fakaako Tohi Tapu haaku ne aalo fakatepetepe atu e vaka paopao haana ke he pokoahu he tō lipilipi e uha mo e loka e tahi. Kua fakahagahaga kelea e ia e moui haana he fina atu he matagi pihia. Ne toho hake e ia e vaka paopao haana ke he mataafaga, he otioti e manava, ne pehē ki a au ko e poti ne puke he tau Katolika ne takitaki he faiaoga Katolika, hane gutu mai ke keli ia au. Nakai fai mena au ke hola ki ai, ti haga au ki a Iehova ma e pulotu mo e loto malolō.
“Mogo ne hoko mai e poti, kavi ke he 15 e tagata taane ne hohopo mai, kua vali kula e tau mata ha lautolu—ko e fakamailoga mooli he fakahagahaga kelea. Ti nakai fakatali ke o mai a lautolu ki a au, kua hifo atu au ke feleveia mo lautolu. He kamataaga, ne logona hifo e au e matakutaku, ka ko e mogonei kua galo tuai e matakutaku. Hifo atu au mogoia, ne vagahau kelea a lautolu ki a au, he amanaki to taute e au taha mena ke piu a lautolu ki ai ke latau mai, ka e fakatotoka tumau ni au.
“He matakavi ia kua ha ha i ai e taha he tau tagata fakaako Tohi Tapu haaku, ko e tagata taane motua ne pule ke he aelani. He manamanatu mitaki haana, ne pehē a ia ke he tau tagata taane: ‘Nakai latau e Tau Fakamoli a Iehova. Ō ke keli a ia! To kitia e mutolu!’
“‘Ko e kau a ia ke he faahi fe?’ he manatu hifo e au, mo e amanaki ke fakanono a ia.
“Loga e minuti he fakamaama ke he tau tagata taane, ne tala age au ki a lautolu ke ō kehe, ti ko e aga mitaki ne fakaolo atu e au e lima matau haaku ke he takitaki ha lautolu. Ofomate ai, ne onoono atu a ia ke he falu, pihia foki a lautolu ki a ia. Ti fakaalofa e ia e lima haaku ne fakaolo atu. Ne utakehe he mena nei e totokoaga, ti fakaalofa lima oti a mautolu. He mole e mena ia ne o ai a lautolu, ko e totokaaga ki a au! Liu au manatu e tau kupu ha Paulo ki a Timoteo: “Kua nakai lata ke taufetoko e fekafekau he Iki, ka kia mahani molu a ia ke he tau tagata oti, . . . kia fakauka a ia [ke he tau puhala kelea lahi].’”—2 Timo. 2:24.
Manatu ai e Berndt Andersson he taha he tau maaga he atu mouga, ko e akoako Lutheran mo e matakau toko 70 e tagata taane mai he taha maaga ne lali ke vega kehe e Tau Fakamoli mo e moumou ha lautolu a Fale he Kautu. Ti fakaofo e Berndt e matakau he fina atu a ia ki tua he maaga ke feleveia mo lautolu. Ne fina atu a ia ke he akoako mo e hūhū ko e ha e fakaholoaga Lutheran ne pehē ko e higoa he Atua ko Anutu, ko e higoa ne moua mai he falu misionare ha Kerisitenitome. Pehē e akoako na haia he Tohi Tapu, ti hūhū a Berndt ko e haia he na fe. Ne veveu he akoako e Tohi Tapu haana, ti maaliali ai kua nakai maeke a ia ke moua e kupu Tohi Tapu ia, ne uiina e Berndt a ia ke totou e Salamo 83:18. He mole e lagomatai atu ki a ia ke kumi e tohi he tau Salamo, ne kamata e akoako ke totou fakaleo lahi. Mogo ne hoko a ia ke he higoa Iehova, ne pa e ia e Tohi Tapu ti fakatutū, “Ko e pikopiko a ia!” Tōmui lahi, ne mailoga e ia kua fakatikai ni e ia e Tohi Tapu haana. He mole e mena ia ne tupu, tokologa e tau tutaki haana ne hiki e aga ha lautolu ke he Tau Fakamoli.
Falu mogo, ne tugi mooli he tau tagata totoko fakalotu e tau Fale he Kautu ne ta he vao, tuga he maaga ko Agi, i Milne Bay Province. He mena nei ne tupu, taha mai ia lautolu ia ne tugi, na konakava he mogoia ne tupu e lekua, ti tokihala lahi he mahani haana. Mogo fakamui ne fina atu a ia ke he tau matakainaga taane, talia e fakaako Tohi Tapu, ti eke mo paionia. Lafi ki ai, ne fakaatā ki a ia ke fakaaoga e fale paionia ne tata ke he Fale he Kautu kua liu fakafoou. Ti kua eke a ia mogonei mo tagata leveki he matakavi tonu ia ni ne taute e ia e kolokolovao!
Ko e Aoga Fekafekau Fakateokarasi ne Taute Fakagalogalo
I lalo hifo he pāaga, ne nakai maeke e tau matakainaga ke iloa tonu ko e leva fēfē e nakai fai tohi po ke Tohi Tapu foki a lautolu. Ko e mena ia, ke lafi ke he kehekehe e tau matakavi ne fufū ai e tau tohi, ne lali a lautolu ke ako manatu e loga he tau kupu Tohi Tapu.
Laulahi he tau magaaho fakalatahaaga fiafia ne fakaaoga ai ke fakatutala mo e ako manatu e tau kupu Tohi Tapu. Ke he tau fakalatahaaga ia, ne taute he falu e tau laupepa ikiiki ke lagomatai ke fakamanatu. He taha faahi he laupepa ko e veveheaga mo e kupu he Tohi Tapu, tuga e Mataio 24:14, po ke hūhū po ke higoa faka-Tohi Tapu. Taha faahi, ne tohi e lautolu e kupu Tohi Tapu po ke tali ke he hūhū.
Ne fakaaoga he tau matakainaga taane e tau tohi fakaagaaga ne ha ha i ai ke takitaki aki e tau feleveiaaga. Ma e fakatai, ko e Aoga Fekafekau Fakateokarasi ne taute e tau vahega he tau faahi tapu takitaha, tau gahua fakaako i kaina, tau kamatamata he tutala, pihia foki mo e tau kamatamata. Ha ha i ai e liu fakamanatu he tau mahina tolu oti mo e kamatamata fakahiku he vahā tau tupu.
“Taha he tau gahua fakaako i kaina he faahi tapu,” he liu manatu he taha he tau tagata fakaako i ai, “ko e ako manatu lima e kupu Tohi Tapu, ka talahau e mautolu he taha vahega foki. Manatu e au e kamatamata fakahiku he 1988. Ne taha e laupepa kamatamata ne pehē ai: ‘Talahau manatu 100 e kupu Tohi Tapu.’ Pete he matakehe ai, ne loto lahi e tau tagata oti ke moua e laupepa ia. Ko e tau matagahua ia ne lagomatai lahi a mautolu he gahua fakamatala ha mautolu, ha kua lavea a mautolu ke atāina ke fakaaoga e Tohi Tapu.” He 1990, ne fiafia lahi e tau fakapotopotoaga Esetonia he fakahiku ai kua maeke ia lautolu ke taute e Aoga Fekafekau Fakateokarasi ke he puhala tuga ne taute he tau matakainaga oti he lalolagi katoa.