Ko e Heigoa Haau a “Mena ke Hula ki Ai”?
1. Ko e heigoa e kakano ne hula a tautolu he matahiku he tau mahina takitaha?
1 Ka hoko ke he matahiku he tau mahina takitaha ti ole ke he tau tagata oti ke tuku e tau hokotaki ha lautolu ke he gahua he fonua, ko e heigoa haau a “mena ke hula ki ai”? (Kala. 6:4) Ko e tau paionia pauaki a tautolu ne hokotaki 130 e tulā he gahua he fonua po ke tau tagata fakailoa ne fakaatā ke hokotaki 15 e minuti, kua lata ia tautolu oti ke fiafia ke he ha tautolu a gahua katoatoa ki a Iehova.—Sala. 100:2.
2. Ko e ha kua lata ia tautolu ke eketaha ke he fekafekauaga ha Iehova?
2 Ko e Iki Pule Katoatoa he lagi mo e lalolagi katoa, kua latatonu a Iehova mo e foakiaga katoatoa ha tautolu. (Mala. 1:6) He fakaalofa ki a ia, kua tukulele e tautolu e tau momoui ha tautolu ke taute e finagalo haana. Ti, he matahiku he aho po ke matahiku he mahina, ka mauokafua a tautolu kua foaki e tautolu e “tau fua uluaki” he ha tautolu a tau magaaho, tau taleni, mo e malolō ke he fekafekauaga ha Iehova, ti kua moua e tautolu e mena ke hula ai. (Fakatai 3:9) Ti kaeke ke fakalaga mai e loto manamanatu ha tautolu, kua lata ia tautolu ke manamanatu ke he mena ke taute e tautolu ke fakaholo ki mua.—Roma 2:15.
3. Ko e ha kua nakai pulotu ke fakatatai a tautolu mo e falu?
3 ‘Nakai Fakatatai mo e Taha’: Kua nakai pulotu ke fakatatai a tautolu mo e falu po ke ka lahi e malolō ha tautolu. Hikihiki e tau tuaga. Kehekehe e tau lotomatala. Ko e fakatatai kua fa takitaki ke he fetokoaki po ke tau logonaaga fakateaga. (Kala. 5:26; 6:4) Nakai taute e Iesu e tau fakatataiaga. Ka e nava a ia ke he mena ne maeke he tagata ke taute.—Mare. 14:6-9.
4. Ko e heigoa e tau fakaakoaga uho ka fakaako e tautolu mai he fakatai ha Iesu ke he tau taleni?
4 He fakatai ha Iesu ke he tau taleni, igatia e tagata gahua mo e moua e tau taleni “fakalata ke he malolo ha lautolu takitokotaha.” (Mata. 25:15) Ka liu mai e iki mo e ole ke he hokotaki ke he gahua ha lautolu, ko lautolu ne gahua fakamalolō fakalata ke he lotomatala mo e tau tuaga ha lautolu kua nava ki ai mo e hu atu ke he fiafia he ha lautolu a iki. (Mata. 25:21, 23) He fakatumau foki a tautolu ke lavelave ke he gahua fakamatala he Kautu, maeke ia tautolu ke mauokafua ke he taliaaga faka-Atua mo e mena ke hula ki ai!