Tau Mena Tutupu Mai he 2012 Yearbook
NOUE
Lau 117, paratafa 2, ke he lau 118, paratafa 2
Ko Solveig Løvås (he magaaho fakamui ko Stormyr), mai i Oslo, ne kua kumi e kupu mooli mo e fano ke he tau feleveiaaga fakalotu kehekehe. He taha aho ne fano a ia ke he taha feleveiaaga he Tau Fakamoli a Iehova mo e mailoga e ia kua moua tei e ia e kupu mooli he Tohi Tapu. Ne papatiso a ia he 1933, ti ua e tau he mole ne fenoga atu a ia ke he faahi tokelau ha Noue ke fekafekau ko e paionia. Pete ni ne hui tetō a ia ha ko e gagao polio, he ono e tau ne fakamatala e Solveig ke he laulahi he tau maaga lalahi, tau taone, tau maaga futi ika, mo e tau matakavi ikiiki mai he faahi toga ha Bodø ke hoko atu ki Kirkenes. Totou afe e tau tagata ne talia e tau tohi faka-Tohi Tapu. He taha ni e tau, ne moua e Solveig molea 1,100 e tau ole tohi ma e tau mekasini ha tautolu!
Taha e tagata ne fakakite e fiafia lahi ke he ogo ha Solveig ko e tagata ta fale ko Dag Jensen he maaga ko Hennes i Vesterålen. Loga e tau tau ne moua e ia e tau tohi ha tautolu mai he falu tagata ne fiafia ki ai. He mogo ne feleveia a Solveig mo Dag, ne fakatokatoka e Solveig e tohi ole ma Dag ke moua e tau mekasini, ti ne hiki atu a ia ke he falu matakavi. Ko ia ni tokotaha, ne kamata a Dag ke fakamatala, he foaki e tau tohi gahoa haana ke he falu tagata ne fiafia ki ai.
Ke he aelani ha Andøya, ne finatu a Solveig ke he matakau futi ika he tau tagata makimaki he fale ha lautolu. Ne fakamatala e ia mo e loto malolō, ne fakatagi e tau lauga mai he kofe, ti foaki e tohi ole he tau mekasini. Taha e tagata fuata ko Frits Madsen ne fiafia mo e tohi ole ke moua ha tautolu a tau mekasini. He magaaho ne oti e fakamatala haana he matakavi ia, ne fenoga atu a Solveig. Ko e fakatokaaga pihia ne taute tumau—ne fakamatala e tau paionia, moua e tau tagata fiafia, toka e tau tohi mo e taute e tau tohi ole, ti fenoga atu ke he tau matakavi foou. Ko e heigoa la ka taute ke leveki oti e fiafia nei?
Lau 130, paratafa 1, ke he lau 131, paratafa 2
Fakaholo ki Mua e Gahua Paionia
He mole e felakutaki, ne fakamafana ke he tau tagata fakailoa ke eke mo tau paionia ke lagomatai e tau tagata tokologa ne kua fakakite e fiafia ke he fekau he Kautu. Fakahiku ai, tokologa he tau tagata fakailoa ne fakaoti e paionia he mogo ne pā e gahua ha tautolu he 1941 ne liu mogonei kamata e gahua mau. Pete kua uka e tau tuaga fakatupe, toko 47 e matakainaga ne kamata paionia he matahiku he 1946.
Taha he tau paionia ia ko Svanhild Neraal, ko e matakainaga fifine ne fina atu ke he faahi tokelau ke he magamotu ko Finnmark he 1946. Ne paionia a Svanhild i ai he 1941 mo Solveig Løvås ti kitia e pomu ne tō ki Kirkenes mo Vardø. Ne nakai maeke ia Svanhild ke nimo e fiafia he tau tagata ne feleveia e ia mo Solveig ti liu atu a ia ki Kirkenes, ne malona mogonei he felakutaki. Ne manamanatu e tau tagata he matakavi kua goagoa e ulu ha Svanhild, he fina atu ki ai mo e nakai fai mena ke nofo ai.
Pete ia, ne falanaki a Svanhild ki a Iehova, ti ko e vahā makalili fakamua, ne mohe a ia he foloa he peito he fale totetote hifo ne tokolima foki e tagata ne nonofo ai. Kua uka lahi mahaki e tau tuaga he mole e felakutaki, ti fakauka a ia ke he tau mena vihi loga. Fa fakatali a ia he sinō mo e uha tuli ke he tau posi ne nakai hoko mai he magaaho kotofa, po ke nakai o mai ai.
Ne loga e mena fuluola ne tupu ki a Svanhild he fakamatala ke he tau tagata Sami. Ka nakai maeke a ia ke fano he pasi ke he tau maaga mamao ia, ne fina atu a ia he posi he vailele po ke pasikala taholi. Ne fa uiina he tau tagata fakamokoi i Sami a ia ke he tau fale ie ha lautolu ne taute aki e tau kili aila mo e fanogonogo fakamatafeiga he fakamatala a ia mo e lagomatai he tagata fakahokohoko. He tau magaaho kai ne uiina e lautolu a ia ke kai mo lautolu he tau vala aila. Falu ne logona e tala mitaki mai ia Svanhild ne talia e kupu mooli he mogo fakamui.
Ko Kjell Husby, ne gahua he Peteli he magahala ia ne talahau kua iloa tumau he la ofisa e matakavi kua hoko a Svanhild ki ai, ha ko e matahigoa he tau kaina ma e tau ole tohi ka ta atu ai e ia. He tolu e tau ne nofo a ia i Finnmark, ne moua e ia 2,000 he tau tohi ole ma e The Watchtower mo e tufa 2,500 e tohi!