Veveheaga 11

Ko e Tau Aho Fakamui he Fakatokaaga Mahani Kelea Nei

1. Kamata i ne fe e “tau aho fakamui,” ti ko e heigoa e mena ka tupu ti hoko e fakaotiaga?

KUA vagahau mai e Tohi Tapu ko e vaha nei kua nonofo ai a tautolu, ko e “tau aho fakamui” po ke “vaha ke fakahiku.” (2 Timoteo 3:1; Tanielu 11:40) Ko e tonu kua fakakite mai ai ko e vaha fai katofiaaga kua fai kamataaga mo e fai fakahikuaga. Ne kamata ai he tau 1914 ke he fakaukuaga a Iesu Keriso ke eke mo patuiki ke he lagi. To fakaoti ai he magaaho ka moumou ai he Atua e fakatokaaga kelea nei. Ko e mitaki hā a ia ka mole atu e fakaotiaga he tau fakapotopotoaga he tau tagata fatipiko mo e fakapehia, mo lautolu oti kua fakamatakutaku e mafola he ha lautolu a tau matakainaga!

2. Ko e heigoa e talahauaga a Iesu he Mataio 24:34 po ke hoko mai a fe e fakaotiaga he “vaha ke fakahiku”?

² To hoko mai a fe? Ko e Tama he Atua ko Iesu Keriso, kua tali mai e ia. Mole atu he fakakite mai e ia e tau mena ke tutupu, kamata mai he tau 1914 he “vaha ke fakahiku,” ne pehe mai a Iesu: “Nakai mole atu e hau nai, ato hohoko mai e tau mena oti ia.” (Mataio 24:34) Ko e atuhau fe ne hagaao ki ai e tau kupu ia haana?

3. (a) Ko e atuhau fe ne talahau e Iesu ke nakai mole atu ti hoko e fakaotiaga? (e) Ti iloa fefe e tautolu kua tata lahi a tautolu ke he fakotiaga he fakatokaaga kelea nei?

³ Ne hagaao e talahauaga a Iesu ki a lautolu ka “kitia e tau mena ia.” Ko e ‘tau mena ia’ ne kua tutupu ai kamata mai he tau 1914 mo e falu a mena loga foki ke tutupu fakahaga mai a to hoko ni ke he fakaotiaga he fakatokaaga kelea nei. (Mataio 24:33) Ko lautolu ne fanau ai he limahogofulu e tau tau kua mole to nakai kitia oti e lautolu e “tau mena oti ia.” Ne fanau a lautolu ka kua fita he kamata e tau mena oti ia ke tutupu. Tokologa e tau tagata kua momoui agaia ne kitia e loga he tau mena tutupu he tau 1914 pihia ni mo lautolu kua momotua ne manatu agaia ni e lautolu e tau mena ia. Kua tolomaki atu ki mua e atuhau nei mo e haana a tau tau. Tokologa foki a lautolu ne kua mamate. Ka e tuga ne fakakite tonu mai e Iesu: “Nakai mole atu e hau nai, ato hohoko mai e tau mena oti ia.” Ko e falu ia lautolu nei to momoui ai ke kitia e fakaotiaga he lalolagi mahani kelea nei! Ko e haana a kakano kua kukū e tau magaaho ti hoko mai e fakaotiaga! (Salamo 90:10) Ti ko e magaaho hanai ke gahua fakaave ai kaeke ke nakai manako ke tafia kehe a koe fakalataha mo e fakatokaaga mahani kelea nei.

KO E HA E “VAHA KE FAKAHIKU”

4. (a) Po ke ha kua nakai fiafia ai a tautolu ke he Atua ha kua nakai fakaoti fakatepetepe e ia a lautolu ne nakai fekafekau ki a ia he magaaho ne hoko mai ai e malōlo he kautu ke he 1914? (e) Fefe he fakakite mai he Tohi Tapu, he 2 Peteru 3:9, ke lagomatai aki a tautolu ke kitia maaliali ai e mena nei?

⁴ Pete ni ne kamata pule e Kautu he Atua he tau 1914, ka e nakai moumou e Iehova a lautolu he mogoia ne nakai hufeilo ki a ia. Kua lata ke fiafia lahi a tautolu ha kua pihia! Ha ko e fakauka he Atua ati moua ai e tautolu e magaaho ke taute ai e tuaga mauokafua ma e haana a Kautu, ke hao mai ai he malaia. Kua maeke ai he Tohi Tapu ke lagomatai a tautolu ke maama ke he puhala tonu, kua pehe mai: “Kua nakai mule mai e Iki [Iehova, NW] ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.”—2 Peteru 3:9; kikite foki Mataio 24:21, 22.

5. (a) Fakakite fefe e Iesu e gahua vevehe kehekehe ka taute ai e ia he vaha nei? (e) Ko e heigoa e mena ka tupu ki a lautolu ka fakafehagai mo e fakafiliaga ke fakahiku ai he magaho ka hoko mai e fakaotiaga he “tau aho fakamui”?

⁵ Ko e mena haia, kua fakaatā mai ai he Atua ko Iehova e magaaho ke taute ai e gahua vevehe kehekehe he “tau aho fakamui.” Ko e fakakitemaiaga haana ke he “fakaotiaga he fakatokaaga,” (NW) kua pehe mai ai a Iesu: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe ke he hana faahi matau, ka ko e tau koti ke he fahi hema. Ati tala age ai e Patuiki kia lautolu ha he faahi matau hana, ‘Omai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu ka e nakaila fakave e lalolagi.’ . . . Ti talaage ai a ia kia lautolu foki ha he fahi hema, ‘Ko mutolu kua ulaafia, o kehe a a mutolu ia au ke he afi tukulagi kua taute tuai mo e tiapolo mo e hana tau agelu.’ . . . Ati o atu ai a lautolu ke he fakahala tukulagi; ka ko e tau tagata tututonu ke he moui tukulagi.” (Mataio 25:31-46) Ko e fakafiliaga ke fakaotioti ai he “tau aho fakamui,” ko lautolu ka fakaotioti ai “to mahaikava tukulagi.” To nakai moua e lautolu e moui he liu tutūmai. (2 Tesalonia 1:7-9) Kua foaki, noa mai he Atua ke he “tau aho fakamui,” haana fakaalofa noa ke he tau tagata oti kana e puhala ke fifili ai e lautolu haana kautu ke moua ai e moui.

6. (a) To fakaoti fefe e gahua vevehe kehekehe? (e) Ti ko e, heigoa kua lata ia tautolu ke taute he magaaho nei kaeke kua manako a tautolu ke momoui ki lalo hifo he kautu he Atua?

⁶ To eke fefe he Atua e mena ia? To fakaoti fefe e gahua he veheveheaga? I lalo hifo he takitakiaga he tau agelu ko e tau fekafekau fakamooli he Atua hā hā i ai ke he takitakiaga he tau agelu ko e tau fekafekau fakamooli he Atua hā hā i ai ke he lalolagi oti kua fakapuloa ai e tala mitaki ke he Kautu he Atua ti ko lautolu oti kua loto mea to fanogonogo a lautolu mo e gahua ai. Ko e gahua hanai ne talahaua mai e Iesu ke eke mo “fakamailoga” ke kitia ai kua tata mai tuai e fakaotiaga, kua pehe mai: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10; kikite foki Mataio 24:14 mo e Fakakiteaga 14:6, 7.) Ko e fakaveaga he ha lautolu a fanogonogo ke he ogo nai, mo e mahani ha lautolu ki a lautolu kua kotofa e Iehova ke fakapuloa ai e tala mitaki, ko e tau tagata to fakafili ai a lautolu ko e moua e moui po ke nakai. (Mataio 25:40, 45) Ka fia moua e koe e moui i lalo hifo he Kautu he Atua, kua uhoaki ni ke fakakite ai e koe haau a fanogonogo mo e fiafia ke he tala mitaki he Kautu he Atua mo e fakamafana atu ai foki ke he falu ke taute ai pihia. Kua teitei hoko mai tuai e fakaotiaga he fakamatalaaga he tala mitaki ke he tau aho kua tata mai. Ko e gutuhala he fakamouiaga to pa ai. Ko e mogoia kua to mui tuai!—Esekielu 33:8, 9.

KO HAI A LAUTOLU KA MAHAIKAVA?

7. Fefe e fakamaamaaga a Ieremia 25:33 ke he fakaotiaga he fakatokaaga kelea nei, ti fefe e lagomataiaga mai he Tohi Tapu ki a tautolu ke hao mai neke mamate fakalataha mo lautolu ka tamate ai?

⁷ Kua fakakite fakatonu mai pehe he Tohi Tapu, ko e aho he fakaotiaga he fakatokaaga kelea nei, “a lautolu kua keli e Iehova ke kamata mai he taha potu he lalolagi ke hoko atu ke he taha potu he lalolagi.” (Ieremia 25:33) Kua nakai mitaki ke ha i ai a koe fakalataha mo lautolu ka kelipopo ai. Kua oti tuai he fakakite mai he Atua ke he haana Tohi Tapu, ko e tau tagata fefe, tau fakatokaaga mo e tau fakapotopotoaga ka fakaotioti ai. Ha kua fakamaama atu tuai, ko lautolu kua fia moui, mo e fakamooli ke taute e tau mena kua tonu ki mua he fofoga he Atua, to maeke a lautolu ia ke o kehe mai he tuaga matematekelea.

8. (a) Ko hai ne talahau mai he Atua ke fakaotioti ai? (e) Ko e tau tagata mahani fefe kua talahaua he Atua ko e tau tagata hepehepe? Nakai kia maeke ke liliu e tau puhala ha lautolu?

⁸ Ti, ko hai a lautolu ia ka mahaikava he talahau mai he Atua? Tuga ni kua maama mautali ki ai, ko lautolu ne mahani kelea. “Ka tupu hake e tau tagata mahani kelea tuga ne tau vao ikiiki, ka fiti mai foki a lautolu oti kua eke mena kelea, kua pihia ni kia mahaikava a lautolu tukulagi tukumuitea.” (Salamo 92:7) Aua neke fakahehē ha ko e fifitaki e tautolu e tau mahani mo e tau manatu fakalalolagi ke he tau mena kua tututonu mo e tau mena kua kelea. Kua nakai taumaleku e finagalo he Atua ke he tau mahani fakalalolagi mo e tau manatu kelea, kua kelea ia ki mua haana. Ko e feuaki, faivao mo e fe mahani pilo aki he tau tagata tane kua fakaatā ia he atuhau nei, ko lautolu kua taute e tau mena kelea pihia to nakai fakahao he Atua ke he fakaotiaga he fakatokaaga kelea nei. To pihia foki mo lautolu oti kua pikopiko, fofo mena, konahia mo e keli tagata to pa a lautolu ia mai he kautu he Atua. (1 Korinito 6:9, 10; Fakakiteaga 21:8) Ko e falu kua haofia ke he tau mahani pihia ha ko e lafi mo lautolu kua mahani kelea. Ka kua, iloa tuai e finagalo he Atua, kua uhoaki ni ki a lautolu ke liliu e tau puhala ka fia hao mai he fakaotiaga. Ko e fakatokaaga foou he Atua to nakai nonofo ai a lautolu kua taute e mahani kelea, fapikopiko mo e fakamatakutaku e tau momoui he tau matakainaga ha lautolu.

9. (a) Ko e heigoa e mena ka tupu ke he tau lotu kua fakatu fakahēhē, mo e ko e ha? (e) Kaeke ke nakai manako a tautolu ke totou fakalataha mo lautolu ia ko e tau fi he Atua, ko e heigoa kua lata ke taute e tautolu?

⁹ To nakai ha i ai foki ha fakapotopotoaga ke fakahēhē ai e tau tagata. Kua oti tuai he iloa e tautolu mai he Tohi Tapu, nakai fioia mo e talia he Atua e tau Lotu oti. To nakai ofo foki a tautolu ha ko e tau Lotu ne tutupu mai he tau fakaakoaga pikopiko to eke ia mo tau mena kua mole ki tua. Ko e tau fakapotopotoaga he tau Lotu mo e ha lautolu a tau fale fulufuluola, tau talaga fakamanaia kehekehe, ka e nakai fakaako e kupu mooli he Atua ko lautolu ia kua kau mo e gahua fakalataha mo e fi he Atua, ko e Tiapolo ko Satani. (1 Korinito 10:20; 2 Korinito 11:13-15) To fakaaoga foki e lautolu e Kupu he Atua, ka e kumi agaia a lautolu ke fai talahauaga ke he tau mena he lalolagi mo e fia kapitiga ki ai, kua, tuga ni mo e talahauaga he Tohi Tapu, kua eke a lautolu, “mo fi ke he Atua.” (Iakopo 4:4; Ioane 15:19) Kua fia totou kia a tautolu fakalataha mo e tau fi he Atua? Kaeke kua nakai pihia, ati fakakite a ki mua he Atua kua nakai kau fakalataha a tautolu mo lautolu, kua moua ni e tautolu e fiafia ke he kupu mooli ti kua taute ai e tapuakiaga, “kua mitaki mo e fakamoli ki mua he Atua e Matua.”—Iakopo 1:27.

10. (a) To moumou he ha he Atua e fakatokaaga kelea nei, to fakahagaao kia hai e tau manatu he Atua? (e) Fakakite fefe he Fakakiteaga 20:1-3?

¹⁰ Ko lautolu foki ka mahaikava ai, ko e tau kautu he lalolagi ha kua favale mo e eke fakakelea e lautolu e tau tagata. Ka kumikumi ke he tau tala fakamau tuai, kua fakakite mai ai ko e fakatokaaga nei kua mua atu e fakamaligi toto mo e velevele mena he fia pule. Tonuhia, e Kupu he Atua kua fakatai e ia e tau kautu pule he lalolagi tuga, mo e “manu favale,” kua fakamaama mai foki e kakano he tau fakatufono he lalolagi ha ko e tau mahani he manu favale. Kua fakakite mai ai foki ko Satani ko e Tiapolo, ko e “tarako,” kua tuku age e pule ke he tau fakatufono mo e malōlo ke gahua ai ki lalo ia ia. (Fakakiteaga 13:2; Tanielu 8:20, 21; Luka 4:5-8) Kua fakakite mai he Atua e tau mena nai ki a tautolu, ke fifili fakalotomatala ai ko e fai mena nakai a tautolu ma e lalolagi po ke nakai. Ne fakakite mai foki he Atua e tau mena ka taute e ia. Ko e Tohi a Tanielu 2:44 kua fakamatala mai e ia e vaha, kua pehe mai “Ko e vaha he tau patuiki ia to fakatu ai he Atua he lagi e kautu nakai fakaoti tukulagi.” Ne kamata e pule ia he tau 1914 V.N. Ka ko e, tau gahua he kautu he Atua ka hoko mai he tau aho i mua, ko e tau i Amaketo po ko Hamaketo, kua pehe mai foki a ia: “To tuki malipilipi mo e fakaotioti e tau kautu oti ia [kua tūtū ai he vaha ke fakahiku], ka ko ia to tumau tukulagi a ia.”—Kikite foki Fakakiteaga 16:14, 16; 19:17-21.

11. (a) Ka oti he tuki malipilipi he Atua e fakatokaaga kelea nei, to fakahagaao kia hai e tau manatu he Atua? (e) Fakakite fefe he Fakakiteaga 20:1-3?

¹¹ Ka mole atu he tuki malipilipi e Iehova e tau kau oti kana a Satani, ti hagaao atu ai a ia ki a Satani ko e Tiapolo ko e atua he fakatokaaga mahani kelea nei. To tuki malipilipi e ia a Satani, to taute vave ai. (2 Korinito 4:4; Roma 16:20) Ko e magaaho ne vega hifo ai a Satani mai he lagi he magaaho ne fakatu ai e Kautu he Atua he 1914, ne iloa e Satani kua toe “tote hana vaha.” (Fakakiteaga 12:12) Kua ku lahi e tau magaaho ia a e. Kua teitei tuai ke fakamooli e fakakiteaga ne fakamau mai he tohi Fakakiteaga 20:1-3: “Ne kitia foki e au e agelu kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi. Ti tapaki e ia e tarako, ko e gata tuai, ko e tiapolo ia mo Satani, . . . Kua liti foki a ia ke he pahua kua nakai gata mai kua puipui foki a ia, mo e tuku atu e fakamau fakamailoga ki luga hana.” Ko Satani, fakalataha mo e haana a tau temoni, to uta kehe a lautolu mai he puhala. To galo ai haana fakahehē. Ko e fakatokaaga kelea nai mo e tau mena oti kana, to fakaoti ai.

12. (a) To fakalataha nakai e tau Kerisiano mooli ke he fakaotiotiaga? Ko hai ka fakaaoga he Atua ke fakahoko e fakafiliaga? (e) Ko e magaaho ka fakahagaao e tau ekefakakelea ki a lautolu, to fakafehagai fefe e tau fekafekau he Atua?

¹² Ko e tau Kerisiano oti ha he lalolagi nei to nakai fai fekau a lautolu ke he aho he fakaotiaga. Ko e tau he Atua hokoia ni. To tuku atu e ia e tau kau oti he tau agelu ke he pule a Iesu ke fakahoko ai e fakaotiaga. To fakatupu foki e ia e taha maaga he fakapotopotoaga ha Satani ke felakutaki ai mo e vihiatia e lautolu a lautolu ni. Ka ko e tau fekafekau a Iehova to nakai kau a lautolu ke he felakutaki ia. (2 Korinito 10:3, 4) To pihia foki ka ekefakakelea mo e vihiatia a lautolu, to nakai taui atu a lautolu ke totoko atu ke he tau pule po ke ulu moumou he fakatufono pule. To tatali ni a lautolu ke he Atua. “Ko e tau fakahelehele na e, aua neke taui atu e mutolu, ka kia fakatokatoka atu ke he ita; ha kua tohi mai, ‘Kua pehe mai e Iki [Iehova], Ha ha ia au ke taui atu, to taui atu e au ni.’”—Roma 12:19.

KO E HEIGOA KA NAKAI FAKAOTI

13. To fakaotioti kia e lalolagi nei ka hoko ke he fakahikuaga he fakatokaaga tuai nei?

¹³ Ko e fakaotiaga he fakatokaaga tuai nai, nakai ko e fakaotiaga he lalolagi nei kua nonofo ai a tautolu. Kua fakamau mo e fakamooli ai he kupu he Atua: “Ka ko e lalolagi kua tumau tukulagi haia.” “Ko ia ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.” (Fakamatalaaga 1:4; Salamo 104:5) Nakai ko e lalolagi nei kua hepehepe, ka ko e fakatokaaga kelea kua hā hā i ai.

14. Ko e tau faga tagata fefe ka galo kehe, ka ko hai ka toe hifo ai?

¹⁴ Ko e taha mena foki hanei, to nakai mahaikava e tau momoui he tau tagata oti kana. Ko e “tau tagata matahavala” ka mahaikava. (2 Peteru 3:7) Ko lautolu kua ati hake e lalolagi nakai tua to galo ai. Ka e mole atu e talahauaga ia, 1 Ioane 2:17 kua pehe mai: “Ka ko e tagata kua eke e finagalo he Atua to tumau a ia tukulagi.” Ko e fakamooliaga ke fakahoko ai e mena nai a ti tuku atu ai e Iesu Keriso haana moui ke hukui aki e tau tagata.—Heperu 5:9.

15. Ke hao mai he fakahikuaga he laolagi kelea nei mo e moui ai ke he fakatokaaga foou he Atua, ko e heigoa kua lata ke taute ai e tautolu mogonei?

¹⁵ Ko e mena mitaki lahi ke he moui tukulagi i lalo he kautu tututonu he Atua ke fakatali ai ki a lautolu ka hao mai he fakatokaaga matahavala nei. Ko koe nakai taha ia lautolu ia? Liga ni ko koe taha. Kaeke kua pihia, “Kia lalilali atu a mutolu,” kia eke foki e Kupu he Atua mo takitakiaga ke he moui haau. (2 Peteru 3:13, 14; Roma 12:1, 2) Kia fakaaue a tautolu mo e nakai noa ki a Iehova, ha ko e haana fakaalofa hofihofi noa, kua foaki mai e ia e puhala he fakamouiaga!

[Fakatino he lau 95]

HE TAHA NI E ATUHAU

1914

FAKAOTIAGA HE FAKATOKAAGA KELEA NEI

Tupu lahi e mahani hepehepe.

Loga e taha motu ke he taha motu.

Tau mafuike

Gahoa e tau mena kai

Ha he lalolagi e matematekelea ke he fakahakuhaku.

Tau aho uka.

Faliuliu ke he tau mamatua.

To nakai fia loto mafola.

Tau tagata nakai loto fakauka.

“TAU AHO FAKAMUI”