Falanaki a Iehosafata ki a Iehova

ILOA nakai e koe ko hai e tau tagata nei mo e ko e heigoa ha lautolu ne fa e taute? Ko e o atu a lautolu he tau, ti ko e uhu lologo e tau tagata i mua. Ka e liga hūhū a koe: ‘Ko e ha e tau tagata lologo kua nakai fai pelu mo e tao ke lata mo e tau?’ O mai la a tautolu ke kitia.

Ko Iehosafata ko e patuiki he kautu he tau magafaoa tokoua ha Isaraela. Ne moui a ia he magahala he Patuiki ko Ahapo mo Iesepela he kautu he magafaoa toko 10 he faahi tokelau. Ka ko e patuiki mitaki a Iehosafata, ti ko e matua taane haana ko Asa ko e patuiki mitaki foki. Ti loga e tau tau ne nonofo fiafia e tau tagata he kautu he magafaoa tokoua he faahi toga.

Ka kua fai mena he magaaho nei ne tupu ati matakutaku ai e tau tagata. Ne tala age e tau tagata uta fekau ki a Iehosafata: ‘Ko e kautau lahi mai he tau motu ha Moapi, Amoni mo e Mouga ko Seira hane o mai ke keli a koe.’ Tokologa e tau Isaraela ne fakapotopoto i Ierusalema ke kumi e lagomataiaga ha Iehova. Ne ō a lautolu ke he faituga, ti liogi a Iehosafata i ai: ‘Ma Iehova na e ha mautolu a Atua, kua nakai iloa e mautolu e mena ke taute. Kua lolelole lahi a mautolu ke fakafehagai mo e kautau lahi nei. Kua kumi lagomatai atu a mautolu ki a koe.’

Ne fanogonogo a Iehova, ti poaki e ia e taha he tau fekafekau haana ke tala age ke he tau tagata: ‘Nakai ko e mena ha mutolu e tau, ka ko e mena he Atua. To nakai tau a mutolu. Onoono la, mo e kitia e puhala ka fakahao e Iehova a mutolu.’

Ti ko e pogipogi hake ne tala age a Iehosafata ke he tau tagata: ‘Kia falanaki ki a Iehova!’ Ti tuku e ia e tau tagata uhu lologo i mua he tau kautau haana, ti ko e magaaho ne foleni ai a lautolu, ne lologo fakaheke a lautolu ki a Iehova. Iloa nakai e koe e mena ne tupu he magaaho ne tata atu a lautolu ke he tauaga? Ne fakalagalaga e Iehova e tau kautau ke felatauaki ni a lautolu. Ti ko e magaaho ne hohoko mai ai e tau Isaraela, kua mamate oti e tau kautau he fī!

Nakai kia kua pulotu a Iehosafata ke falanaki ki a Iehova? To pulotu foki a tautolu ka falanaki ki a Ia.