Fakameā e Iesu e Faituga

KUA ita mooli a Iesu he fakatino nei, pihia nakai? Iloa nakai e koe e kakano ne ita lahi a ia? Ha ko e tau tagata nei he faituga he Atua i Ierusalema kua tō lahi e lotokai. Kua lali a lautolu ke moua e tau tupe loga mai he tau tagata ne o mai ki hinei ke tapuaki ke he Atua.

Kitia nakai e koe e tau punua povi taane nā mo e tau mamoe mo e tau lupe? Ne fakafua he tau tagata taane e tau manu nei i loto ni he faituga. Iloa nakai e koe e kakano? Ha kua lata e tau Isaraela ke fai manu huifā mo e manu lele ke poa ke he Atua.

Ko e fakatufono he Atua ne pehē ka taute he tagata Isaraela e mena hepe, kua lata a ia ke foaki e poa ke he Atua. Fai magaaho foki ne lata e tau Isaraela ke taute e tau poa. Ka e moua mai i fe he tagata Isaraela e tau manu lele mo e tau manu huifā ke poa ke he Atua?

Falu he tau Isaraela ne fai manu lele mo e manu huifā. Ti maeke ia lautolu ke foaki ai. Ka e tokologa he tau Isaraela ne nakai fai manu huifā po ke manu lele. Ti ko e falu kua nonofo mamao lahi mai i Ierusalema ti nakai maeke ai ke tamai e taha he tau manu ha lautolu ke he faituga. Ti kua o mai e tau tagata ki hinei ke fakatau e tau manu huifā po ke tau manu lele ke lata mo lautolu. Ka kua tau uka lahi e tau mena nei ne fakafua he tau tagata. Kua kaiha e lautolu e tau tagata. Lafi ki ai, kua nakai lata ia lautolu ke fakafua mena i loto nei he faituga he Atua.

Ko e mena nei ne fakaita a Iesu. Ti fulufuluhi e ia e tau laulau mo e tau tupe he tau tagata taane ti tafola fano e tau tupe ha lautolu. Taute foki e ia e fahi he tau toua ti vega oti e tau manu ki fafo he faituga. Ne poaki a ia ke he tau tagata ne fakafua e tau lupe: ‘Uta e tau mena ia ki fafo! Fakaoti, ua eke e fale he haaku Matua mo fale ke moua loga e tau tupe.’

Ne haia e falu tutaki ha Iesu mo ia hinei he faituga i Ierusalema. Ne ofo a lautolu he kitia e mena ne kua taute e Iesu. Ti manatu e lautolu e talahauaga i loto he Tohi Tapu hagaao ke he Tama he Atua: ‘Ko e fiafia ke he fale he Atua to vela tuga e afi ki loto ia ia.’

He mogo ne nofo a Iesu i Ierusalema ke fina atu he Paseka, ne loga e mana haana ne taute. He mole ai, ne toka e Iesu a Iutaia mo e kamata ke liu fenoga atu ki Kalilaia. Ka e he fenoga haana, ne fina atu a ia he puhala he magamotu ha Samaria. O mai la ke kitia ko e heigoa ne tupu i ai.