Veveheaga 16

Fakamakutu ma e Tapuakiaga a Iehova

KO E tau matakainaga ha Iesu​—ko e falu fanau tane ha Maria​—ko Iakopo, Iosefa, Simona mo Iuta. Fakamua to fenoga a lautolu mo Iesu mo e hana tau tutaki ki Kapanaumi, ko e maga tata atu ke he Tahi i Kalilaia, liga o atu a lautolu ke he kaina ha lautolu i Nasareta ke maeke he magafaoa ke uta e tau koloa ne manako ki ai.

Ka ko e ha ne fano ai a Iesu ki Kapanaumi, ka e nakai matutaki mo e feua hana i Kana, i Nasareta, po ke falu matakavi foki he atu matiketike i Kalilaia? Ko e taha kakano, ko Kapanaumi ko e maga lahi. Ko e taha mena foki, ko e tokologa he tau tutaki fou ha Iesu ko e mena nonofo po ke tata ki Kapanaumi, ti nakai mitaki ke toka ha lautolu a tau kaina ke moua e tau fakaakoaga mai ia ia.

Ko e hana a nofo i Kapanaumi, ne taute e Iesu e tau gahua mitaki, he fakamoli ni e ia ke he tau mahina fakamui. Ne nakai leva, ko Iesu mo e hana tau kapitiga ne liu tuku fenoga foki. Ko e vaha tau tupu, ne fenoga a lautolu ki Ierusalema ke he Paseka he tau 30 V.N. I ai, ne kitia he tau tutaki e falu mena ki a Iesu ne liga nakai la kitia e lautolu fakamua.

Ke lata mo e Fakatufono he Atua, kua lata e tau Isaraela ke taute e tau poa manu. Ti ko e mena ia, ke fakamukamuka aki a lautolu, ko e tau fakafua koloa i Ierusalema ne fakafua e tau manu huifa po ke tau manu lele ke lata mo e gahua ia. Ka kua fakafua a lautolu i loto he faituga, mo e kaiha e lautolu e tau tagata he fakatau uka e tau manu ki a lautolu.

Ha kua puke ke he vihiatia ne taute e Iesu e fahi toua mo e vega e tau fakafua koloa ki fafo. Ne liligi e ia e tau tupe he tau tagata fakafua mo e fulufuluhi e tau laulau ha lautolu. “Uta kehe a e tau mena nei,” he hea e ia ki a lautolu ne fakafua e tau lupe. “Ua eke e fale he haku a Matua mo fale fakafua koloa.”

Ko e magaaho ne kitia he tau tutaki ha Iesu e tau mena nei, ne manatu e lautolu e perofetaaga hagaao ke he Tama he Atua: “Kua kai ni au he manako lahi ke he hau a fale.” Ka e huhu e tau Iutaia: “Ko [e] heigoa e fakamailoga ke fakakite mai ai e koe kia mautolu, he eke e koe e tau mena nai?” Ne tali e Iesu: “Ati ulu a e faituga nei, ti eke foki e au ke he tolu e aho.”

Ne manatu e tau Iutaia ko e tala a Iesu ke he faituga moli, ati huhu ai e lautolu: “Ne fagofulu ma ono e tau tau he ta e faituga nai, po ke maeke kia ia koe he eke ke he tolu e aho?” Ka e taha e mena, ko e tala a Iesu ke he faituga, ko e hana tino ni. Ka e tolu e tau he mole, ti manatu he hana tau tutaki e talahauaga nei hana he magaaho ne liu tu mai a ia he mate. Ioane 2:12-22; Mataio 13:55; Luka 4:23.

▪ He mole e fakamauaga i Kana, ko e tau matakavi fe ne fano fenoga ki ai a Iesu?

▪ Ko e ha ne ita lahi a Iesu, mo e ko e heigoa ne taute e ia?

▪ Ko e heigoa ne manatu he tau tutaki ha Iesu he kitia e tau mena hana ne taute?

▪ Ko e heigoa ha Iesu ne talahau hagaao ke he “faituga nai,” mo e ko e heigoa e kakano hana?