Ofania e Ia e Tau Fanau Ikiiki

ONOONO la ki a Iesu he mena nei kua lopoti mai e ia e tama taane tote. Mukamuka ia koe ke kitia e leveki mooli ha Iesu ke he tau fanau ikiiki. Ko e tau tagata ne kitekite atu ko e tau aposetolo haana. Ko e heigoa ha Iesu kua tala age ki a lautolu? O mai la ke kumikumi ki ai.

Ko e liliu mai laia a Iesu mo e tau aposetolo haana he fenoga loa. He o atu he fenoga, ne taufetoko e tau aposetolo. He mole e fenoga ne hūhū a Iesu ki a lautolu: ‘Ko e heigoa ha mutolu ne taufetoko ki ai he puhalatū?’ Ne iloa mooli e Iesu e mena kua taufetoko a lautolu ki ai. Ka kua hūhū a ia ke kitia to tala age nakai he tau aposetolo ki a ia.

Ne nakai tali atu he tau aposetolo, ha kua taufetoko a lautolu he puhalatū ko hai ia lautolu kua mua hake. Falu aposetolo ne fia loto ke mua e talahaua ke he falu. To tala age fēfē e Iesu ki a lautolu kua nakai hako ke fia mua hake?

Ne ui e ia e tama taane tote ke hau, ti fakatū a ia i mua ha lautolu oti. Ti pehē a ia ke he tau tutaki haana: ‘Manako au ki a mutolu ke iloa mooli e mena nei, kaeke nakai hiki a mutolu ke tuga e tama tote nei, to nakai huhū atu a mutolu ke he kautu he Atua. Ko e tagata ne mua hake he kautu ko e taha ne eke ke tuga e tama nei.’ Iloa nakai e koe e kakano ne talahau e Iesu e mena nei?

Ko e tau fanau ikiiki kua nakai tupetupe ko hai ne mua hake po ke mua atu e talahaua ke he falu. Ti kua lata e tau aposetolo ke fakaako ke tuga e tau fanau he mena nei ti nakai taufetoko ko hai kua mua po ke talahaua.

Falu magaaho foki ne fakakite e Iesu e lahi he levekiaga haana ke he tau fanau ikiiki. Fai mahina he mole ne tamai he falu e tau fanau ha lautolu ke kitia a Iesu. Ne lali e tau aposetolo ke taofi a lautolu. Ka e tala age a Iesu ke he tau aposetolo haana: ‘Toka e tau fanau ikiiki ke o mai ki a au, ti ua taofi a lautolu, ha ko e mena tuga a lautolu nei e tau tagata ka moua e kautu he Atua.’ Ti totō e Iesu e tau fanau mo e fakamonuina a lautolu. Mitaki nakai ke iloa na ofania e Iesu e tau fanau ikiiki?