Taute Tohi Faka-Tohi Tapu ke Fakaheke e Atua
Kua talahaua e Tau Fakamoli a Iehova ha ko e ha lautolu a fakamatalaaga ke he Kautu he Atua mai he tau lau tohi lolomi. Tali mai he tau 1920 ne fakaaoga he Kaufakalatahaaga Kolo Toko e tau tagata gahua ne foaki noa ne lautolu a lautolu mai he Tau Fakamoli, ke taute e tau mekasini mo e tau tohi mo tufatufa. Kua taute e mena nei ke moua e tauteaga mitaki he tau tohi mo e maeke ke falanaki ki ai mo e tote e tau mena ka totogi.
Ke he 70 e tau tau, ne talaga he Kaufakalatahaaga mo e fakalaulahi hana taute tohi faka-Tohi Tapu, ne taute fakamua i Brooklyn mo e fakamui ke he falu motu foki. Ko e tau gahua kua taute oti he tau tagata gahua hane tupu ki mua ne foaki noa ne lautolu a lautolu.
He tau tau fakahikuhiku he vaha he tau 1970 kua tiaki fakahaga e tau puhala tauteute mena tuai mo e lolomiaga tohi he loto pauaki ke he tau puhala tauteute mena komupiuta, fakatutuaga ata fakavahega, mo e lolomiaga fakatukehe. Ka kua ha ha ai e lekua he mena nei ha kua gahoa e tau vagahau kua maeke ke taute he tau lakau fakagahua ne maeke he moua. Ka e pete ni ia, kua fita e Kaufakalatahaaga ke taute e tau tohi ke he 160 e tau vagahau, mo e kua lata foki ke moua e tau mena loga.
Ti kua ui atu ke he tau tagata gahua ne foaki noa ne lautolu a lautolu ke talaga e taha fakatokaaga hila ne fakatutuaga ata fakavahega ke he tau vagahau kehekehe. Kua mitaki lahi e tau fua ne moua. Kua moua mai ai e iloilo talaga lakau, mo e taute ai e mena fakahuaga lomi tohi, e puhala fakahaohao, mo e fakatokaaga fakatutu ata fakavahega, ne ui ko e MEPS. Ti kua molea e 210 he tau vagahau ne maeke ke fakagahua ki ai. Mo e kua loga foki kua maeke ke lafi ki ai.
Kua molea atu e 100 motu he vaha nei, ne fa e taute e tau tohi fakaliliu, kakano he fakaaoga e fakatokaaga MEPS. Ne fakamahani e tau tagata gahua ne foaki noa ne lautolu a lautolu mai he tau motu nei ke fakagahua mo e leveki e tau kanavaakau nei. He magaaho nei kua taute he Kaufakalatahaaga e tau mekasini ke he 112 e tau vagahau ke he 33 e tau motu, mo e ke he 5 e tau motu nei kua taute foki e tau tohi kili mao mo e tau Tohi Tapu.
Ke taute e tau gahua nei kua lata ni ke fai tagata—tau tagata tohia tohi, tau tagata fakaliliu, tau tagata fakatonutonu, tau tagata gahua lolomiaga, tau tagata pili tohi, mo e tau tagata fakahu tohi. Ko e falu kua lata ke taute e tau matutakiaga tohitohi mo e tau fakapotopotoaga. Kua taute he falu e tau mena kai, kaitunu, fakamea fale, unu e tau mena tui, mo e falu mena foki. Ne taute oti he tau tagata gahua noa ne foaki ne lautolu a lautolu he tau motu kehekehe. He vaha he tau 1992 ke he lalolagi katoa, kua teitei ke 13,000 e tau tagata gahua noa ne foaki ne lautolu a lautolu kua fekafekau ke he tau ofisa kehekehe, tau fale gahua, tau kaina nonofo, mo e tau faama.
Ko hai e tau tagata nei? Ko e tau tagata tane mo e tau fifine, ne nonofo tokotaha mo e kua mau, tau fuata mo lautolu kua tino motua, ko e Tau Fakamoli a Iehova kua tukulele. Kua ha ha i ai e falu kua gahua ni ke he 40, 50, mo e eke foki ke 60 e tau tau i ai. Ne 44 e tau tula fakaevalesi ne fakamole e lautolu he fahi tapu ke he tau kotofaaga ne gahua a lautolu i ai fakalataha mo e falu magaaho foki kaeke kua lata ai. Ne tuku atu fakamoli e tau magaaho afiafi mo e tau matahiku fahi tapu ke fakamatala e tala mitaki mai he taha fale ke he taha fale, mo e falu gahua foki he fakapotopotoaga.
Kua viko takai he lalolagi e tau tagata gahua nei kua moua e tau mena ke momohe mo e tau mena kai ke he taha he tau fale nonofo he Kaufakalatahaaga, ne ui ko e tau Kaina Peteli. Ke lafi ki ai ne moua e lautolu e tau tupe lagomatai ikiiki ke totogi aki e tau mena fakamole ke he puhala ke o ai a lautolu ke he fekafekauaga mo e mena tote ma e tau mena kua lata fakatagata.
Tali mai he tau 1920, kua hiva e piliona he tau Tohi Tapu ne taute he tau tagata gahua noa nei ne foaki noa ne lautolu a lautolu, tau tohi kili mao, tau mekasini, mo e tau lau tohi kua molea lahi e 200 he tau vagahau ke tufatufa ke he lalolagi katoa. Kua taute e lautolu ha lautolu a vala ke maeke ai e tala mitaki tukulagi ke tukuogo ti ko e ogo fiafia lahi ke he tau motu oti mo e ke he faoa fakamatakavi mo e tau vagahau mo e tau tagata.—Fakakiteaga 14:6, 7.
• Ne fai fakaholoaga lomi fefe e Kaufakalatahaaga Kolo Toko, mo e ko e ha?
• Ko hai ne taute e tau gahua oti nei, mo e momoui fefe a lautolu?
[Tau Fakatino he lau 24]
Ko lautolu ne foaki noa ne lautolu a lautolu ke taute e tau gahua ne matutaki atu ke taute e tau tohi faka-Tohi Tapu he tau fale gahua, tau loto kaina, tau ofisa, mo e tau faama, i Brooklyn mo Wallkill, i New York, F.K.A.
[Tau Fakatino he lau 25]
Ko lautolu ne foaki noa ne lautolu a lautolu ke taute e tau gahua kehekehe mai he amo lima tonu po ke nakai ke taute he tau Tohi Tapu mo e tau tohi faka-Tohi Tapu
Sepania
Sihamani
Finilani
Kanata
Tenemaka
Suetene
Aferika Toga
Pasili
Netelani
Ausetalia