Tamai he Aga Foaki Noa e Tau Monuina
1. Fakatātā fēfē e Tavita mo Nehemia e aga foaki noa?
1 He magaaho ne fakafiufiu e Koliato e tau kau a Isaraela, kua lata he taha he tau kautau ke tau ki a ia. Ka ko e tama taane leveki mamoe, ko ia ne nakai fakaako ke tau, ne foaki noa ke tau mo Koliato. (1 Samu. 17:32) He magaaho ne liliu e tau Iutaia ne paea ki Ierusalema ka e kaumahala ke liu atihake e tau kaupā, ko e tagata taute uaina ke he patuiki ha Peresia ne foaki noa ke toka hifo e tuaga mahuiga haana he fale patuiki ti fenoga atu ki Ierusalema ke fakatokatoka e gahua. (Nehe. 2:5) Ne fakamonuina e Iehova e tau tagata tokoua nei, ko Tavita mo Nehemia, ha ko e aga ne fakakite e laua.—1 Samu. 17:45, 50; Nehe. 6:15, 16.
2. Ko e ha kua lata he tau Kerisiano ke fakatātā e aga foaki noa?
2 He vahā nei, kua nakai ha ha he lalolagi e aga foaki noa. He “tau aho fakamui” nei, kua lavelave lahi e tau momoui he tau tagata, ti tokologa ‘ne ofaofa ne lautolu a lautolu.’ (2 Timo. 3:1, 2) Kua mukamuka e tagata ke hufia lahi he tau fiafia fakatagata ati kaumahala ke mailoga e tau magaaho ke foaki noa e tau gahua haana kaeke kua manako lagomatai e falu. Pete ia, ko e tau Kerisiano kua manako a tautolu ke fifitaki a Iesu ne fakailoilo ke lagomatai e falu. (Ioane 5:5-9; 13:12-15; 1 Pete. 2:21) Maeke fēfē ia tautolu ke fakatātā e aga foaki noa, ti ko e heigoa e tau monuina ka moua e tautolu?
3. Lagomatai fēfē e aga foaki noa ke he tau feleveiaaga he fakapotopotoaga?
3 Ke Lata ma e Tau Matakainaga ha Tautolu: Maeke ia tautolu ke foaki ke he falu e ‘mena fakaalofa fakaagaaga’ he tali e tau vala he feleveiaaga ne lata ke tutala auloa. (Roma 1:11) Kua fakaheke he tau tali ha tautolu a Iehova, peehi fakalahi e kupu mooli ke he manamanatuaga mo e loto ha tautolu, mo e lafi ke he fiafia ha tautolu he tau feleveiaaga. (Sala. 26:12) Maeke foki ia tautolu ke foaki noa ke lauga he Aoga Fekafekau Fakateokarasi ka lata ke tuipū. To lagomatai he mena nei a tautolu ke holo ki mua e lotomatala ke fakaako atu.
4. Ko e heigoa falu puhala ka fakatātā e tautolu e aga foaki noa?
4 Maeke he tau matakainaga taane ke fakatātā e aga foaki noa he foli ke lagomatai e tau matagahua he fakapotopotoaga. (Isaia 32:2; 1 Timo. 3:1) Maeke e tau tagata oti ke lagomatai ke holo mitaki e tau toloaga mo e tau fonoaga he foaki noa ke gahua he tau faahi gahua kehekehe. Ka foaki noa ne tautolu a tautolu ke gahua mo e leveki faifano ke he fekafekauaga po ke fagai a ia, ati fua mai ai e “fefakamafanaaki.” (Roma 1:12) Ka foaki noa a tautolu ke lagomatai e tau tama nakai fai matua, tau takape, ko lautolu ne gagao mo e matulituli e tau tino, tau matua fifine ne fai tama ikiiki, mo e falu he fakapotopotoaga, to iloa mooli e tautolu e olioli pihia foki mo e fiafia ha Iehova.—Fakatai 19:17; Gahua 20:35.
5. Ko e ha kua lata ke foaki fakamakai ke ta e tau Fale he Kautu?
5 Taha puhala ke foaki noa e tautolu e tau magaaho mo e tau malolō ka lagomatai ke fakameā mo e leveki e Fale he Kautu. Lafi ki ai, ha kua tokologa e tagata hane o mai ke he kupu mooli, kua ha ha ai e manako ma e tau Fale he Kautu foou mo e tau tagata ke foaki noa ke ta e tau fale ia. Taha e hoa mau ne foaki ke lagomatai e Komiti Tafale he Matakavi pete kua nakai pulotu a laua ke he tau feua ia. Fai magaaho he mole, ne fakamahani a laua ti mogonei hane lagomatai ke fakatūtū e tau piliki. Ne pehē e hoana: “He gahua auloa mo e falu ati eke a mautolu mo tau kapitiga tata lahi. He fakaotiaga he aho, kua mategūgū lahi a mautolu ka kua atihake fakaagaaga.”
6. Ko e ha kua aoga lahi ki a tautolu ke foaki noa ke gahua he fekafekauaga?
6 He Fakamatala: Ko e gahua foaki noa ne aoga lahi ka taute e tautolu he vahā nei ko e gahua fakamatala he Kautu. He lagomatai e tau tagata ke maama mo e fakagahuahua e fakatonuaga he Tohi Tapu, kua moua e lautolu e kakano he moui mo e malolō ke kautū mai he tau aga mau ne hagahaga kelea. Ne ako a lautolu hagaao ke he amaamanakiaga atihake he Tohi Tapu ma e anoiha. He foaki e fakaakoaga he Tohi Tapu, kua taute e tautolu e fekafekau foaki noa ne fai aoga tukulagi. (Ioane 17:3; 1 Timo. 4:16) To liga fakaatā he tau tutūaga ha tautolu a tautolu ke fakalataha fakalahi atu ke he gahua nei he paionia fakakū po ke tumau, he hiki ke he matakavi ne lahi e manako lagomatai, po ke fakaako taha vagahau kehe.
7. Ko e ha kua mua atu e aoga ke foaki noa he vahā nei?
7 Ne perofeta he Patuiki ko Tavita ko e magaaho ka kamata he Mesia e pule haana, to ‘eke poa mo e loto’ e tau tagata he Atua. (Sala. 110:3) Ha kua fakaave e Iehova e heleheleaga fakaagaaga he magaaho fakahiku nei, ati lahi mahaki e gahua ke taute he foaki noa ne tautolu a tautolu. (Isaia 60:22) Kua talahau nakai e koe: “Ko au hanai, kia fakafano atu e koe au”? (Isaia 6:8) Mooli ni, he fakatātā e tautolu e aga foaki noa kua fakafiafia e tautolu a Iehova ti moua e tau palepale loga.