Veveheaga 23

Loga Atu e Tau Mana i Kapanaumi

KO E Sapati he mole e ui e Iesu hana a tau tutaki tokofa fakamua​—Peteru, Aneterea, Iakopo, mo Ioane​—ne o oti a lautolu ke he sunako i Kapanaumi. Ne kamata a Iesu ke fakaako i ai, mo e ofoofogia e tau tagata he fakaako e ia a lautolu tuga ne tagata ha i ai e pule ka e nakai tuga e tau tohikupu.

Ke he Sapati nei ne ha ha i ai e tagata ne hu ai e temoni. Ne fai magaaho, ne ui a ia mo e leo lahi: “Oi, Iesu na e, ko e Nasareta! ko heigoa hau kia mautolu? Kua haele mai kia a koe ke mahakava ai a mautolu? Kua iloa e au a koe, ko e Tagata Tapu he Atua a koe.”

Ko e temoni ne fakagahuahua e tagata ko e taha mai he tau agelu ha Satani. He akonaki e temoni, ne pehe a Iesu: “Fakamate a, ti fano a a koe ki fafo ia ia!”

Ne fakafitikia he temoni e tagata mo e ui fakaleo lahi. Ne hu mai ki fafo he tagata mo e nakai fakapakia a ia. Ne ofomate e tau tagata oti! “Ko e heigoa a enei?” he huhu e lautolu. “Ha kua pule a ia ke he tau agaga kelea, mo e fekau ai, ti fanogonogo mai ai a lautolu kia ia.” Ne tuogo e tala nei ke he tau fahi oti he matakavi ia.

He toka e sunako, ne o atu a Iesu mo e hana a tau tutaki ke he kaina ha Simona, po ko Peteru. Ne gagao lahi e matua fifine fugavai ha Peteru ke he kafo vevela. ‘Fakamolemole lagomatai a ia,’ he ole e lautolu. Ne finatu a Iesu ki a ia, kua toto e ia hana lima, mo e fakatu a ia ki luga. Ko e magaaho tonu ia ni ne malolo a ia mo e kamata ke taute e tau mena kai ma lautolu!

Ko e magaaho fakamui he magaaho ne to e laa, ne kamata o mai e tau tagata he tau matakavi ia ke he fale ha Peteru mo e tau tagata gagao ha lautolu. Ne nakai leva ti fakapotopoto e maaga katoa he gutuhala! Ne fakamaulu e Iesu e tau tagata gagao oti ha lautolu mai he tau gagao kehekehe loga. Ne fakamalolo foki e ia a lautolu ne heketia he tau temoni. He huhu mai a lautolu ki fafo, ko e tau temoni ne vega e ia ne ui: “Ko koe ni . . . , ko e Tama he Atua.” Ka e akonaki e Iesu a lautolu mo e nakai fakaata a lautolu ke vagahau ha ko e mena iloa e lautolu ko ia ko e Keriso. Mareko 1:​21-34; Luka 4:​31- 41; Mataio 8:​14-17.

▪ Ko e heigoa ne tupu ke he sunako he Sapati he mole he ui e Iesu hana a tau tutaki tokofa?

▪ Fano a Iesu ki fe he toka e ia e sunako, mo e ko e heigoa e mana ne taute e ia i ai?

▪ Ko e heigoa ne tupu he magaaho fakamui he afiafi taha ia ni?