Veveheaga 121

I Mua he Saneheturini, Ti ki a Pilato

KUA tata e po ke oti. Kua fakatikai e Peteru a Iesu ke lagatolu aki, mo lautolu he Saneheturini kua oti e fakafiliaga fakavai ti kua mavehevehe. Ka e taha e mena, ko e mahegihegi he pogipogi he Aho Faraile, ne liliu a lautolu fakapotopoto, ka ko e magaaho nei ke he fale Saneheturini. Ko e kakano ha lautolu he fakalata ke fai matafakatufono ma e fakafiliaga he po. Ko e magaaho ne ta mai a Iesu ki mua ha lautolu, ne pehe a lautolu, tuga ni ke he po: “Kaeke ko e Keriso a koe, tala mai a kia mautolu.”

“Kaeke ke tala atu e au kia mutolu, ti nakai talia mai ni e mutolu,” he tali e Iesu. “Kaeke foki ke hūhu atu e au kia mutolu, ti nakai tali mai e mutolu kia au.” Ka e taha e mena, ne malolo a Iesu he fakakite ko hai a ia, he pehe: “Ke kamata ainei ke nofo e Tama he tagata ke he fahi matau he Atua malolo.”

“Ti ko e Tama he Atua kia a koe?” kua manako oti a lautolu ke iloa.

“Ko au haia, kua talahau mai ai e mutolu,” he tali e Iesu.

Ha kua fakamakamaka ni e tau tagata nei ke kelipopo, kua makona ni ke he tali nei. Ne fifili e lautolu ko e vagahau kelea. “To aoga ha ha kia lautolu e tau talahau?” he huhu e lautolu. “Ha kua logona e tautolu ke he hana gutu ni.” Ti ko e mena ia ne lili e lautolu a Iesu, takitaki atu a ia, mo e ta age a ia ke he kavana Roma ko Ponotio Pilato.

Ko Iuta, ko e tagata ne afo a Iesu, ne onoono ke he tau mena kua taute. Ko e magaaho ne kitia e ia a Iesu kua fakahala, ne tokihala a ia. Ne fano a ia ke he tau ekepoa ne mua mo e tau patu ke liuaki e tau tupe ario ne 30, mo e fakamaama: “Kua hala tuai au he afo e au e tagata nakai hala.”

“Mo ha ia kia mautolu? Pule na koe,” he tali vale e lautolu. Ti tolo e Iuta e tau tupe ke he faituga mo e fano kehe mo e lali ke taupega e ia a ia. Ka e taha e mena, ko e la akau ne pipi e Iuta e toua ki ai kua mapaki, mo e to hifo e tino hana ke he tau patuo i kelekele mo e pa ti mavehevehe.

Ne nakai iloa mitaki he tau ekepoa ne mua ko e heigoa ka taute aki e tau tupe ario. “Kua nakai lata ke tuku e tau mena nai ke he tokaaga,” he talahau fakahiku e lautolu, “ha ko e totogi toto.” Ne mole e pulega auloa, ti fakaaoga lautolu e tupe ke fakatau aki e fonua he tagata eke kapiniu kelekele ke tanu aki e tau tagata kehe. Ko e mena haia ne fakahigoa e fonua ia ko e “Fonua he Toto.”

Ko e magaaho pogipogi agaia ne takitaki atu a Iesu ke he kaina he kavana. Ka ko e tau Iutaia ne o fakalataha mo ia ne nakai huhu ki fale ha kua talitonu a lautolu ko e lafi tata pihia mo e tau Tagata Motu Kehe to fakakelea ai a lautolu. Ke lagomatai aki a lautolu, ne hau a Pilato ki fafo. “Ko [e] heigoa e mena kua hokotaki ai e mutolu e tagata na?” he huhu e ia.

“Ane mai nakai fai mahani kelea a ia, po kua nakai tuku atu e mautolu a ia kia koe,” he tali e lautolu.

Ha ko e manako ke nakai putoia, ne tali a Pilato: “Ati uta kehe a e mutolu a ia, ti fakafili e mutolu a ia ke he fakatufono ha mutolu.”

Kua fakakite ha lautolu a tau manatu kelipopo, ne talahau e tau Iutaia: “Kua tapu ia mautolu ke kelipopo ha tagata.” Ko e moli, kaeke ke kelipopo e lautolu a Iesu ke he Galue he Paseka, to fakalagalaga e moto tagata ke faguna, ha kua tokologa ne tokoluga e onoonoaga ki a Iesu. Ka e kaeke ke toka e lautolu e tau Roma ke kelipopo a ia ke he hokotaki fakapolitika to uta kehe he mena nei a lautolu mai he tau kotofaaga gahua i mua he tau tagata.

Ti ko e tau takitaki lotu, ne nakai talahau e fakafiliaga fakamua ne kua fita he fakahala e lautolu a Iesu ha ko e vagahau kelea, ti ko e magaaho nei kua hokotaki e tau fakavai kehekehe. Ne taute e lautolu tolu la e vala he hokotaki: “Ne moua e mautolu e tagata nai, [1] kua uhu kehe e ia e motu, [2] kua hataki foki e ia, ua uta e telu kia Kaisara, [3] kua pehe age, ko ia ko e patuiki ko Keriso.”

Ko e hokotaki ko Iesu e patuiki ne tupetupe ai a Pilato. Ti ko e mogoia, ne liu hu atu ki fale, hea a Iesu ki a ia, mo e huhu: “Ko koe kia e patuiki he tau tagata Iutaia?” Ko e kakano, kua moumou kia e koe e fakatufono he talahau ko e patuiki a koe he totoko ki a Kaisara?

Ne manako a Iesu ke iloa ko e lahi fefe e mena ha Pilato ne logona hagaao ki a ia, ti huhu a ia: “Mai ia koe kia e kupu ia, po ke tala atu ai he falu kia koe e kupu na kia au?”

Ne fakavai a Pilato ko e nakai iloa a ia mo e manako ke iloa e tau mena moli. “Ko au kia ko e tagata Iutaia?” he tali e ia. “Kua tuku mai kia au a koe he motu hau mo e tau ekepoa ne mua; ko e heigoa ne eke e koe?”

Ne nakai lali a Iesu ke kalo kehe he mena vihi, ko e pule fakapatuiki. Ko e tali ne foaki e Iesu he magaaho nei ne ofo ai a Pilato. Luka 22:​66–​23:3; Mataio 27:​1-11; Mareko 15:1; Ioane 18:​28-35; Gahua 1:​16-20.

▪ Ko e heigoa e kakano ne liu fakapotopoto e Saneheturini he magaaho pogipogi?

▪ Mate fefe a Iuta, mo e ko e heigoa ne taute aki e tau tupe ario ne 30?

▪ He nakai kelipopo ne lautolu a ia, ko e ha ne manako e tau Iutaia ke kelipopo he tau Roma a Iesu?

▪ Ko e heigoa e tau hokotaki he tau Iutaia ne taute ke totoko ki a Iesu?