Veveheaga 122

Mai ia Pilato ki a Herota mo e Liuaki Atu Foki

PETE ni he nakai lali a Iesu ke fufu mai ia Pilato ko ia ko e patuiki, ne fakamaama e ia ko e hana a Kautu ne nakai fakamatakutaku ki a Roma. “Nakai ko e kautu he lalolagi nai haku a kautu,” he talahau e Iesu. “Ane mai ko e kautu he lalolagi nai haku a kautu, po kua tau haku a tau fekafekau, neke tuku atu au ke he tau tagata Iutaia; ka ko e ainei nakai mai i hinai haku a kautu.” Ne fakailoa e Iesu lagatolu, na fai Kautu a ia, pete ni he nakai mai he lalolagi nei.

Ka e taha e mena, ne fakalagalaga atu e Pilato a ia: “Ti ko e patuiki kia a koe?” Ko e pehe a ia, ko e patuiki kia a koe pete ni ko e Kautu hau nakai fai vala he lalolagi nei?

Ne taute e Iesu a Pilato ke iloa kua hako hana a talahauaga, he tali: “Haia ni, ko au ko e patuiki. Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli. Ko lautolu oti kana ha ha he kupu moli, kua fanogonogo mai a lautolu ke he haku a leo.”

E, ko e kakano haia he moui ha Iesu ke he lalolagi ke talahau fakamoli ke he “kupu moli,” fakamahino ke he kupu moli hagaao ia ke he hana Kautu. Kua mau tauteute a Iesu ke fakamoli ke he kupu moli ia pete ni kaeke ke totogi aki hana a moui. Pete ni e huhu a Pilato: “Ko [e] heigoa e kupu moli?” ne nakai fakatali a ia ke he falu fakamaamaaga foki. Kua lata tuai hana a mena kua iloa ke taute e fakafiliaga.

Ne liu a Pilato ke he moto tagata ne fakatali i fafo he fale he patuiki. Kua moli ni kua ha ha i ai a Iesu ke he fahi hana, ti tala age a ia ke he tau ekepoa ne mua mo lautolu ne fakalataha ai: “Nakai moua e au ha mena ke fakahala ai e tagata nai.”

Ne ita lahi ha ko e fifiliaga, ti kamata e moto tagata ke fakamakamaka: “Kua fakalagalaga e ia e motu, kua fakaako a ia ki Iutaia oti, kua kamata mai i Kalilaia, kua hoko mai ki hinei.”

Kua ofo a Pilato ke he fakamakutu he tau Iutaia kua molea mo e nakai fai kakano. Ti ko e magaaho ne fakatumau e tau ekepoa ne mua mo e tau patu ke tauhea, ne fuluhi a Pilato ki a Iesu mo e huhu: “Kua logona nakai e koe e tau mena loga kua talahau mai e lautolu kia koe?” Ka e, ne nakai tali e Iesu. Ne ofo lahi a Pilato ke he fakahautoka hana ke he tau tukumale pikopiko.

Ha kua iloa ko Iesu ko e Kalilaia, ne kitia e Pilato e puhala ke fano kehe mai a ia he gahua ma hana. Ko e pule ha Kalilaia, ko Herota Anetipa (ko e tama tane ha Herota ne Mua), kua ha ha i Ierusalema ke he Paseka, ti fakafano e Pilato a Iesu ki a ia. Ko e magaaho fakamua, ne fakaata e Herota Anetipa ke hio kehe e ulu ha Ioane ko e Papatiso, ka kua matakutaku a Herota he magaaho ne logona e ia e tau mana ha Iesu ne taute, matakutaku he tuaha ko Ioane a Iesu kua liu tu mai he mate.

Ko e magaaho nei, kua lahi e fiafia ha Herota he amanaki ke kitia a Iesu. Nakai ha ko e tupetupe a ia ke he moui ha Iesu po ke manako a ia ke lali ke kumikumi ko e moli e tau hokotaki ki a Iesu po ke nakai. Ka, ko e fia kitia noa ni a ia ia Iesu ka taute e falu a mana.

Ka e taha e mena, ne nakai fakamakona e Iesu e fia kitia ha Herota. Ko e moli, he huhu a Herota ki a ia, ne nakai talahau e ia ha kupu taha. Ha kua ita lahi, ko Herota mo e hana a tau kau kua vaiga a Iesu. Ne fakatapulu e lautolu a ia ke he tapulu kikila mo e va a ia. Ti liuaki e lautolu a ia ki a Pilato. Ko e fua, ko Herota mo Pilato, ko e tau fi fakamua, kua eke mo tau kapitiga mitaki.

Ko e magaaho ne liu a Iesu, ne fakapotopoto e Pilato e tau ekepoa ne mua, ko e tau pule faka-Iutaia, mo e tau tagata mo e pehe: “Kua ta mai e mutolu e tagata nai kia au, tuga ne uhu kehe e ia e motu; kitiala, kua fakafili tuai e au a ia ki mua ha mutolu; ka e nakai moua e au ha mena ke fakahala ai e tagata nai ke he tau mena ne hokotaki mai e mutolu kia ia. Pihia foki mo Herota, ne fakafano atu e au a mutolu kia ia; kitiala, nakai eke e ia ha mena ke lata ai ke mate a ia. Ko e hanai foki, to fahi e au a ia, ti vevete atu ai.”

Ko e lagaua ia he fakailoa e Pilato e nakai agahala a Iesu. Ne manako a ia ke vevete a ia, ha kua mailoga e ia ko e mahekeheke he tau ekepoa ati ta mai a ia ki a ia. Ha ne lali a Pilato ke vevete a Iesu, ne moua foki e ia e fakaohooho malolo lahi ke vevete a ia. Ha ha i ai agaia ke he hana nofoa fakafili, ne fakafano mai he hoana hana e fekau, ke fakaohooho a ia: “Neke eke e koe ha mena ke he tagata tututonu ia; ha ko e mena mamahi lahi ai au ninei ke he miti [kua mai moli he agaga faka-Atua] kia ia.”

Ka e, to maeke fefe ia Pilato ke vevete e tagata nakai agahala nei, tuga kua lata, he iloa e ia? Ioane 18:​36-38; Luka 23:​4-16; Mataio 27:​12-14, 18, 19; 14:​1, 2; Mareko 15:​2-5.

▪ Tali fefe e Iesu e huhu hagaao ke he hana tuaga patuiki?

▪ Ko e heigoa “e kupu moli” ne talahau fakamoli a Iesu ke he hana a moui he lalolagi?

▪ Ko e heigoa e fakafiliaga ha Pilato, fefe e tali he tau tagata, mo e ko e heigoa ha Pilato ne taute aki a Iesu?

▪ Ko hai a Herota Anetipa, ko e ha ne lahi e fiafia hana he kitia a Iesu, mo e ko e heigoa ne taute e ia ki a ia?

▪ Ko e ha ne manako a Pilato ke vevete a Iesu?