Kelea e Mana mo e Lagatau Taulatua

Manako a Satani ke taute mana a koe. Tokologa ne taute e tau poa ke he tau tupuna po ke tau agaga ke puipui a lautolu neke fakamamahi. Kua taute e lautolu e mena nei ha kua matakutaku a lautolu ke he tau malolo he lalolagi agaga. Kua tui e lautolu e tau mama po ke tau tamau lima mana. Ne inu po ke mulu e lautolu ke he tau tino ha lautolu e “vailakau” ne kua tuga ke ha ha i ai e malolo mana. He tau kaina po ke tau maga kelekele ha lautolu, kua fufu he falu tagata e tau koloa ne talitonu kua ha ha i ai e tau malolo puipui. Fakaaoga he falu e “vailakau” mana ha kua talitonu a lautolu to ta mai ai e kautu ke he pisinisi, tau kamatamata he aoga, po ke fakamahani ke mau.

Ko e puipuiaga mua ue atu hau mai ia Satani ke eke a Iehova mo kapitiga hau. Kua mahomo atu e malolo ha Iehova ko e Atua mo e hana tau agelu ki a Satani mo e tau temoni hana. (Iakopo 2:19; Fakakiteaga 12:9) Kua makai a Iehova ke fakakite hana malolo ke lata mo e hana tau kapitiga—ko lautolu kua fakamoli katoatoa ki a ia.—2 Nofoaga he Tau Patuiki 16:9.

Kua pehe e Kupu he Atua: “Ua eke e mutolu e tau lagatau taulātua.” Kua fakahala e Iehova e mana mo e lagatau taulatua ha ko e tau gahua ia ka pao tonu e tagata ki lalo hifo he pule ha Satani ko e Tiapolo.—Levitika 19:26.