Manako Nakai a Koe ke Iloa e Kupu Mooli?

KO E kupu mooli hagaao ke he heigoa? Hagaao ke he falu hūhū aoga lahi ne hūhū he tau tagata. Liga kua manamanatu a koe hagaao ke he tau hūhū tuga anei:

• Kua leveki mooli kia he Atua a tautolu?

• To fai fakaotiaga nakai e felakutaki mo e matematekelea?

• Ko e heigoa ka tupu ki a tautolu ka mamate?

• Fai amaamanakiaga nakai ma lautolu ne mamate?

• Maeke fēfē au ke liogi ti logona he Atua?

• Maeke fēfē au ke moua e fiafia ke he moui?

To moua e koe i fe e tau tali ke he tau hūhū nei? Ka finatu a koe ke he tau fale toka tohi po ke tau fale fakafua tohi, liga to moua e koe kua totou afe e tau tohi ne talahau ke foaki e tau tali. Pete ia, ne nakai fetataiaki e tau tohi. Ko e falu tohi kua liga aoga he magaaho ia ni ka e nakai leva ti tuai mo e fakafoou po ke hukui foki.

Ka kua taha e tohi ne ha ha ai e tau tali tonutika. Ko e tohi he kupu mooli. Ne pehē a Iesu Keriso he liogi ke he Atua: “Ko e hau a kupu ko e kupu moli haia.” (Ioane 17:17) He vahā nei, kua iloa e tautolu ko e Kupu ia ko e Tohi Tapu. He tau lau ne mumui mai, to kitia e koe e tau tali maaliali mooli he Tohi Tapu ke he tau hūhū i luga.

Kua Leveki Mooli Kia he Atua a Tautolu?

KAKANO NE LAGĀ MAI E HŪHŪ: Kua nonofo a tautolu he lalolagi ne puke he favale mo e nakai fakafili tonu. Ne fakaako he tau lotu loga ko e matematekelea ne tutupu ki a tautolu ko e finagalo he Atua.

TAU MENA NE FAKAAKO HE TOHI TAPU: Ne nakai fakatupu he Atua e mena kelea. “Kia mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia,” he talahau he Iopu 34:10. Kua ha ha he Atua e finagalo fakaalofa ma e tau tagata. Kakano haia ne fakaako e Iesu a tautolu ke liogi: “Ha mautolu a Matua na e, ha ha he lagi, kia . . . hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Kua hokulo lahi e fakaalofa he Atua ma tautolu ati taute e ia e tau mena ke fakamooli aki e finagalo haana.​—Ioane 3:16.

Kikite foki e Kenese 1:26-28; Iakopo 1:13; mo e 1 Peteru 5:6, 7.

To Fai Fakaotiaga Nakai e Felakutaki mo e Matematekelea?

KAKANO NE LAGĀ MAI E HŪHŪ: Kua matutaki e felakutaki ke tamate e tau tagata ne mua atu e tokologa. Kua lauia a tautolu oti he matematekelea he tagata.

TAU MENA NE FAKAAKO HE TOHI TAPU: Ne talahau tuai he Atua e magaaho ka fakatū e ia e mafola, po ke monuina, ke he lalolagi katoa. I lalo he haana Kautu, ko e fakatufono he lagi, “to nakai liu ako tau foki” e tau tagata. Ka e to “tukituki e lautolu ha lautolu a tau pelu ke eke mo tau koho.” (Isaia 2:4) To tamai he Atua e fakaotiaga ke he nakai fakafili tonu mo e tau matematekelea oti kana. Ne mavehe e Tohi Tapu: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua [putoia e nakai fakafili tonu mo e matematekelea he vahā nei].”​—Fakakiteaga 21:3, 4.

Kikite foki e Salamo 37:10, 11; 46:9; mo e Mika 4:1-4.

Ko e Heigoa ka Tupu ki a Tautolu ka Mamate?

KAKANO NE LAGĀ MAI E HŪHŪ: Ne fakaako he laulahi he tau lotu he lalolagi kua fai mena i loto he tagata ne matutaki ke moui ka mole atu e mate. Ne talitonu falu na maeke e tagata mate ke fakamamahi e tagata moui po ke kua fakahala he Atua e tau tagata kelea he fakakikiveka tukulagi a lautolu he afi i helo.

TAU MENA NE FAKAAKO HE TOHI TAPU: Ka mamate e tau tagata, to nakai momoui a lautolu. “Ko lautolu ne mamate nakai iloa e lautolu ha mena,” he tohi he Fakamatalaaga 9:5. Ha kua nakai iloa, fai logonaaga, po ke mailoga he tau tagata mamate ha mena, kua nakai maeke ia lautolu ke fakamamahi​—po ke lagomatai​—a lautolu ne momoui.​—Salamo 146:3, 4.

Kikite foki e Kenese 3:19 mo e Fakamatalaaga 9:6, 10.

Fai Amaamanakiaga Nakai ma Lautolu ne Mamate?

KAKANO NE LAGĀ MAI E HŪHŪ: Kua manako a tautolu ke momoui, ti manako foki a tautolu ke fiafia auloa e moui mo lautolu ne ofania e tautolu. Ko e manako pauaki ha tautolu ke liu kitia e tau fakahele ha tautolu ne mamate.

TAU MENA NE FAKAAKO HE TOHI TAPU: Ko e laulahi he tau tagata ne mamate to fakaliu tu mai. Ne mavehe a Iesu to “o mai ai” ki fafo a “lautolu katoa ha he tau tukuaga [po ke, tuagamau fakamanatu].” (Ioane 5:28, 29) Ke fakatatai mo e finagalo fakamua he Atua, ko lautolu ia ka liliu tu mai, to nonofo ke he lalolagi parataiso. (Isaia 65:21-25) Ko e maveheaga nei ma e vahā anoiha kua putoia e malolō tino katoatoa mo e moui tukulagi ma e tau tagata omaoma. Ne pehē e Tohi Tapu: “To eke ni e motu ma e tau tagata tututonu, to nonofo muatua ai a lautolu.”​—Salamo 37:29.

Kikite foki e Iopu 14:14, 15; Luka 7:11-17; mo e Gahua 24:15.

Maeke Fēfē Au ke Liogi ti Logona he Atua?

KAKANO NE LAGĀ MAI E HŪHŪ: Ko e tau tagata he tau lotu loga kua liga liogi oti a lautolu. Ka e tokologa ne logona hifo kua nakai tali e tau liogi ha lautolu.

TAU MENA NE FAKAAKO HE TOHI TAPU: Ne fakaako e Iesu a tautolu ke kalo mai he liu fatiaki e tau kupu liogi ha tautolu. “Ka liogi,” he talahau e ia, “aua neke pola mau ha mutolu a tau kupu.” (Mataio 6:7) Kaeke kua manako a tautolu ke logona he Atua e tau liogi ha tautolu, lata ni ke liogi ke he puhala ne talia e ia. Ke taute pihia, lata ia tautolu ke ako hagaao ke he finagalo he Atua ti liogi fakatatau ki ai. Ne fakamaama he 1 Ioane 5:14: “Kaeke ke ole atu ai e tautolu ha mena ke lata mo e hana [Atua] finagalo, ti fanogonogo mai ai a ia kia tautolu.”

Kikite foki e Salamo 65:2; Ioane 14:6, 14; mo e 1 Ioane 3:22.

Maeke Fēfē Au ke Moua e Fiafia ke he Moui?

KAKANO NE LAGĀ MAI E HŪHŪ: Kua talitonu e tokologa he tau tagata to fakafiafia he tupe, mahuiga, mo e fulufuluola a lautolu. Ne tutuli e lautolu e tau mena ia​—ka e fakahiku ke nakai moua e lautolu e fiafia.

TAU MENA NE FAKAAKO HE TOHI TAPU: Ne fakakite e Iesu e kei ke he fiafia he pehē a ia: “Mua atu e monuina [po ke, fiafia] he tau tagata ka fanogonogo ke he kupu he Atua mo e omaoma ki ai.” (Luka 11:28) Kua moua ni e fiafia mooli kaeke ke taute e tautolu e tau lakaaga ke fakapuke e tau manako lahi mahaki ha tautolu​—ko e hoge ma e kupu mooli fakaagaaga ne hagaao ke he Atua mo e finagalo haana ma tautolu. Kua moua e kupu mooli ia i loto he Tohi Tapu. He iloa e kupu mooli ka lagomatai a tautolu ke kitia e tau mena kua aoga mo e nakai aoga lahi. He fakaatā e kupu mooli he Tohi Tapu ke takitaki e tau fifiliaga ha tautolu ka takitaki a tautolu ke he moui ne mua atu e kakano.

Kikite foki e Tau Fakatai 3:5, 6, 13-18 mo e 1 Timoteo 6:9, 10.

Ko e falu ni a onoonoaga fakakū anā i luga ke he tau tali he Tohi Tapu ke he ono e hūhū. Manako nakai a koe ke lahi atu foki e mena ka iloa? Kaeke ko koe mo lautolu ne “fanogonogo ke he kupu he Atua mo e omaoma ki ai,” nakai fakauaua kua manako mooli a koe. Liga kua manamanatu a koe hagaao ke he falu hūhū foki, tuga anei: ‘Kaeke kua leveki he Atua a tautolu, ko e ha ne fakaatā e ia e tau kelea muitui mo e tau matematekelea ke tutupu tali mai he fakamauaga tuai? Maeke fēfē ia au ke fakaholo ki mua e aoga he moui he haaku a magafaoa?’ Kua foaki he Tohi Tapu e tau tali katoatoa mo e mauokafua ke he tau hūhū nei mo e loga atu foki.

Pete ia, kua tehatehaua e tokologa he vahā nei ke kitekite ke he Tohi Tapu. Ne kitia ai e lautolu ko e tohi loa ti uka he falu magaaho ke maama. Manako nakai a koe ke moua e tau tali i loto he Tohi Tapu? Kua foaki atu he Tau Fakamoli a Iehova ua e kanavaakau ke lagomatai a koe.

Fakamua, ko e tohi Ko e Heigoa ne Fakaako Moli he Tohi Tapu? ne kua talaga ke lagomatai aki e tau tagata lavelave ke kumi e tau tali maaliali he Tohi Tapu ke he tau hūhū aoga. Ko e kanavaakau ke uaaki ko e polokalama nakai totogi ke fakaako e Tohi Tapu he kaina. He nakai fai totogi, ko e taha he Tau Fakamoli a Iehova ne nofo he katofia haau ne latatonu ke fakaako e Tohi Tapu, ka finatu ke he kaina haau po ke taha matakavi kua hagahaga mitaki ke fakaaoga e magaaho tote he tau faahi tapu takitaha ke fakatutala hagaao ke he Tohi Tapu mo koe. Kua totou miliona e tau tagata he lalolagi katoa ne kua lagomatai he polokalama nei. Ti tokologa ia lautolu kua moua e fiafia lahi ti pehē: “Kua moua tuai e au e kupu mooli!”

Kua nakai fai koloa tokiofa foki ka moua. Ne fakatokanoa he kupu mooli he Tohi Tapu a tautolu mai he matakutaku aitu, tehatehaua, mo e matakutaku teao. Kua foaki ki a tautolu e amaamanakiaga, kakano, mo e fiafia. Ne pehē a Iesu: “To iloa foki e mutolu e mena moli, ko e mena moli foki ke toka noa ai a mutolu.”​—Ioane 8:32.