Puhala ke Kitia e Tau Kerisiano Mooli

Totou piliona e tau tagata ne totoku ko e tau Kerisiano. Ka e nakai tatai e tau taofiaga, po ke tau tuaga ne momoui a lautolu ki ai. Ti kitia fēfē e tautolu e tau Kerisiano mooli?

1. Ko hai e Kerisiano mooli?

Ko e tau Kerisiano ko e tau tutaki, po ko lautolu ne mumuitua ki a Iesu Keriso. (Totou Gahua 11:26.) Fakakite fēfē e lautolu ko e tau tutaki ha Iesu a lautolu? Pehē a ia: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu.” (Ioane 8:31) Kakano he mena nei kua lata e tau Kerisiano mooli ke omaoma ke he tau fakaakoaga ha Iesu. Ti tuga a Iesu ne falanaki ke he tau Tohiaga Tapu ke lalago e tau fakaakoaga haana, ko e tau Kerisiano mooli kua fakavē e tau taofiaga ha lautolu ke he Tohi Tapu.​​—Totou Luka 24:27.

2. Fakakite fēfē he tau Kerisiano mooli e fakaalofa?

Tala age a Iesu ke he tau tutaki haana: “Kia feofanaki a mutolu, tuga e fakaalofa au kia mutolu.” (Ioane 15:12) Fakakite fēfē e Iesu kua fakaalofa a ia ke he tau tutaki haana? Fai magaaho a ia mo lautolu, fakamalolō a lautolu, mo e lagomatai a lautolu. Foaki foki e ia e moui haana ma lautolu. (1 Ioane 3:16) Pihia foki, nakai tutala hokoia ni e tau Kerisiano mooli hagaao ke he fakaalofa. Fakakite e lautolu ke he tau kupu mo e tau gahua e fakaalofa ke he taha mo e taha.

3. Ko e heigoa e gahua he tau Kerisiano mooli?

Age e Iesu e gahua ke he tau tutaki haana. “Fakafano atu e ia a lautolu, ke fakamatala atu e kautu he Atua.” (Luka 9:2) Ko e tau Kerisiano fakamua ne nakai fakamatala hokoia ke he tau matakavi tapuaki ha lautolu ka e fakamatala foki he falu toloaga mo e tau kaina he tau tagata. (Totou Gahua 5:42; 17:17.) Ko e tau Kerisiano mooli mogonei kua fakamatala foki e kupu mooli he Tohi Tapu he tau matakavi ne ha ha i ai e tau tagata. Fakaalofa a lautolu ke he tau katofia ti fiafia ke fakaaoga e magaaho mo e malolō ke tala age e fekau he Tohi Tapu ke moua e amaamanaki mo e mafanatia.​—Mareko 12:31.

KUMIKUMI FAKAHOKULO

4. Kumikumi a lautolu ke he kupu mooli he Tohi Tapu

Nakai uho e kupu mooli he Tohi Tapu ki a lautolu oti ne totoku ko e tau Kerisiano. Tā e VITIŌ, ti tutala ke he hūhū nā.

VITIŌ: Puhala ne Fakakelea e Lotu Kerisiano (5:11)

• Puhala fe he falu lotu ne totoku ko e tau Kerisiano kua kaumahala ke fakaako e tau mena ne talahau e Iesu?

Fakaako e Iesu e kupu mooli mai he Kupu he Atua. Totou Ioane 18:37, ti tutala ke he hūhū nei:

• Tuga ne talahau e Iesu, kitia fēfē e tautolu e tau Kerisiano kua “ha ha he kupu moli”?

5. Fakamatala e lautolu e kupu mooli he Tohi Tapu

Ato hake a Iesu ke he lagi, age e ia ke he tau tutaki haana e gahua ke taute ti kua matutaki ke hoko mai ke he vahā nei. Totou Mataio 28:19, 20 mo e Gahua 1:8, ti tutala ke he hūhū nei:

• Lahi fēfē e gahua fakamatala ke taute?

6. Fakagahua e lautolu e tau mena ne fakamatala e lautolu

Ko e heigoa ati talitonu a Tom kua moua e ia e lotu Kerisiano mooli? Tā e VITIŌ, ti tutala ke he tau hūhū nā.

VITIŌ: Nakai Fiafia Au ke he Lotu (5:20)

• He vitiō, ko e heigoa ne tupu ti nakai fiafia a Tom ke he lotu?

• Ko e heigoa ati mauokafua kua moua e ia e kupu mooli?

Mua atu e tau gahua ke he tau kupu ne talahau. Totou Mataio 7:21, ti tutala ke he hūhū nei:

• Ko e heigoa ne mua atu e aoga ki a Iesu​—tau mena ne totoku e tautolu kua talitonu ki ai po ke tau mena ne fakakite he tau gahua ha tautolu?

7. Fakaalofa a lautolu ko e taha ke he taha

Tuku atu mooli kia he tau Kerisiano e tau momoui ha lautolu ma e tau matakainaga Kerisiano? Tā e VITIŌ, ti tutala ke he tau hūhū nā.

VITIŌ: Foaki e Ia Haana Moui (2:55)

• He vitiō, ko e heigoa ne omoomoi a Lloyd ke foaki haana moui ma e Matakainaga ko Johansson?

• He manatu haau, taute nakai e ia e mena kua lata e Kerisiano mooli ke taute?

• Fehagai fēfē e tau tutaki (tau Kerisiano mooli) ha Iesu ke he tau tagata he taha lanu po ke motu?

• Taute pihia fēfē e lautolu he magaaho felakutaki?

MANATU KATOA

Ko e tau Kerisiano mooli kua omaoma ke he tau fakaakoaga he Tohi Tapu, fakakite e fakaalofa foaki noa, mo e fakamatala e kupu mooli he Tohi Tapu.

Liu Fakamanatu

• Fakavē ke he heigoa e tau taofiaga he tau Kerisiano mooli?

• Ko e heigoa e mahani kua fakamailoga aki e tau Kerisiano mooli?

• Ko e heigoa e gahua ne taute he tau Kerisiano mooli?

KUMI FOKI

Fakaako foki hagaao ke he matakau kua eketaha ke muitua e fakafifitakiaga mo e tau fakaakoaga ha Iesu Keriso.

Tau Fakamoli a Iehova​—Ko Hai a Mautolu? (1:13)

Kitia e puhala ati moua he taopou pope he mogo fakamua e “magafaoa fakaagaaga mooli.”

“Fakaaoga e Laua e Tohi Tapu ke Tali e Tau Hūhū Oti!” (Ko e Kolo Toko, Me-Iuni 2014)

Fakaako e puhala ne fakakite he tau Kerisiano mooli e fakaalofa ma e tau matakainaga ne manako lagomatai.

Lagomatai e Tau Matakainaga ha Tautolu ka Tutupu e Tau Matematekelea​—Vitiō Kū (3:57)

Kumikumi e puhala he tau Kerisiano fakamua mo e tau Kerisiano mooli mogonei kua tatai mo e manatu ha Iesu ke kitia e tau tutaki haana.

“Ko e Heigoa e Tau Fakamailoga he Tau Kerisiano Mooli?” (Vala tala he Kolo Toko)