Fefakamafanaaki ha kua Tata Tuai e Aho
“Ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.”—HEPERU 10:25.
1, 2. Ko e heigoa e aho kua tata, mo e ko e heigoa e tau mahani he tau tagata a Iehova kua lata?
KO LAUTOLU ne kau fakalataha he vaha nei ke pehe, ‘Ati hau ā mo e inu e vai he moui,’ aua neke vevehe kehe a lautolu. Hane hoko mai e kautu he aho lahi a Iehova, ne fakaaoga e lautolu e fakatonuaga faka-Tohi Tapu: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.”—Heperu 10:24, 25.
2 Ko e perofetaaga he tau Tohiaga tapu hagaao ke he “aho” ia ko e “aho a Iehova.” (2 Peteru 3:10, NW) Ha ko Iehova ni ko e Tokoluga Mua ue atu, ko e Atua ha i ai e malolo oti kana, nakai fai aho ke fakatatai ai ke he hana a aho. (Gahua 2:20) Ko e hana kakano ko e fakatokolugaaga he pule a Iehova ke he lagi mo e lalolagi oti. Kua tata tuai e aho nakai fai fakatataiaga ki ai.
3. Tata fefe e aho a Iehova ke he tau Kerisiano he senetenari fakamua, mo e, ka e kua ki a tautolu he vaha nei?
3 Ne tala age he aposetolo ko Paulo ke he tau Kerisiano he senetenari fakamua he Vaha Nei ha tautolu kua tata mai tuai e aho a Iehova. Ne talifaki oti a lautolu ke he aho ia, ka e, ke he magahala fakamua ia ko e aho ia kua molea agaia e 1,900 e tau he mamao. (2 Tesalonia 2:1-3) Ha kua pihia e kitiaaga, kua lata ni ke fakamafana a lautolu ha ko e mena to hoko mai ni e aho ia, ti ka omoi atu fakamalolo e tau Kerisiano ke he tua ia, to huhu atu a lautolu ke he aho monuina ia. (2 Timoteo 4:8) Ke he magahala fakamua ia, kua tuga e tata lahi e aho ia. Ka e ki a tautolu he vaha nei, kua tata mai moli e aho a Iehova. Ko e tau fakamoliaga fulufuluola oti he perofetaaga he Tohi Tapu kua omoi mai e talahauaga olioli nei. To fakatokoluga vave e higoa he Atua ha tautolu ko Iehova tukulagi.—Luka 11:2.
Fakamafana mai he Higoa Fakaatua
4. Hagaao ke he Fakakiteaga 19:6, ko hai ka eke mo Patuiki, mo e maaliali fefe hana higoa?
4 Ko e higoa fakaatua ia kua lata ke eke mo mena mahuiga ke he magafaoa katoa he tagata. Kua talahau he Today’s English Version: “Fakaheke ke he Atua! Ha ko e Iki, ko e ha tautolu a Atua Mua ue atu, kua Patuiki.” (Fakakiteaga 19:6) Hagaao ke he fakaliliuaga he Tohi Tapu he senetenari ke 20 aki ia, ko ia ko e Iki, ko e Atua ha i ai e malolo oti kana. Ko e tohi ia kua tatai ni mo e loga he tau tohi fou, kua nakai moua ai e higoa fakaatua ia ke pehe, ko e patuiki ko e kamata la ia ke pule. Kae pete ia ne lafi ai e higoa fakaatua ia ke he fakamamafaaga pehe “Haleluia!” (“Fakaheke ki a Ioha” po ke, “Fakaheke ki a Iehova”) ne kitia ai he Revised Standard Version, ko e New International Version, mo e fakaliliuaga he Moffatt he tohi Fakakiteaga 19:6. Ko e lahi he Vaha Nei ha tautolu, kua nakai mahino mitaki e higoa fakaatua ia he tau fakaliliuaga he Tohi Tapu. Ka e kitia e tautolu, ko e mena haia, ati eke ai e higoa ia mo fakamafanaaga lahi ke he tau tagata he Atua, he vaha fakamua mo e vaha nei.
5, 6. (a) Ko e ha ne kua lata ai a Mose ke iloa e higoa he Atua ne hukui e ia? (e) Ko e heigoa la e tau manamanatuaga he fanau Isaraela he magaaho ne fakailoa e Mose e higoa fakaatua nei?
5 Manatu e tautolu e magaaho ne fakafano atu he Atua Tokoluga Mua ue atu a Mose ke he tau Isaraela ne fakatupa he motu ko Aikupito, ko e huhu, ko hai ne fakafano mai a ia, kua tupu hake ni e ia a ia ke he tau loto he tau tagata ne fakafano ki ai a Mose. Ne amaamanaki a Mose, ha ko e matematekelea he tau tagata Iutaia to manako a lautolu ke iloa e higoa he Atua ne hukui e ia. Ko e tau kupu nei ne totou e tautolu he Esoto 3:15: “Kua liu foki pehe mai e Atua kia Mose: Kia pehe atu a koe ke he fanau a Isaraela, Ko Iehova, ko e Atua he tau matua ha mutolu, ko e Atua a Aperahamo, ko e Atua a Isaako, mo e Atua a Iakopo, ko ia ni ne fakafano mai au kia mutolu, ko e haku higoa haia tukulagi, mo e haku a fakamanatuaga haia ke he taha hau mo e taha hau.”
6 Ko e magaaho ia ne fakamamafa e fakailoaaga nei ki a lautolu, liga logona he fanau Isaraela e mafanatia lahi. Ko e fakahaoaga ha lautolu kua fakamoli mai ni he Atua moli ko Iehova. Ko e mafanatia ha a ia ke moua e monuina ke iloa ke fakamahani mo e Atua he magaaho ne fakakite e ia e kakano he higoa fakatagata hana—nakai fakatokoluga a ia ke vevehe kehe!—Esoto 3:13; 4:29-31.
7. (a) Iloa fefe e tautolu kua mahani lahi e tau tutaki a Iesu mo e higoa fakaatua ia? (e) Poka fefe e higoa a Iehova ki tua?
7 Ko e tau tutaki he Iki ko Iesu Keriso kua fakamafana lahi foki he higoa fakaatua ha Iehova mo e kakano he hana tuaga. (Ioane 17:6, 26) Ko e magaaho ne fekafekau ai a Iesu he lalolagi, nakai popoka e ia ki tua e higoa fakaatua ia, mo e nakai ko e hana finagalo foki ke tuku hana higoa, ko Iesu ke hukui aki. Ko e magaaho la ne kamata ai ke talahau e tau tagata fakahehe mai he tua he Kerisiano moli ne poka ai e higoa fakaatua nei ki tua, e, holoholo kehe mai he tau fakafelauaga tutala Kerisiano. (Gahua 20:29, 30) Ko e magaaho ne kamata ai e higoa he Tama he Atua ke talahaua lahi, mo e uufitia e higoa he Matua, ko e magaaho haia he tapuakiaga he tau Kerisiano moli ke he Matua, ne tupu lahi e fakahanoa, lolelole e fetataiaki fakamagafaoa, mo e nakai fai fakamafanaaga.
8. Ko e heigoa e matutakiaga mitaki he tau tagata he Atua ha ko e hikiaga he higoa he tau Fakamoli a Iehova?
8 Ko e mena haia, ati pehe ai ko e kakano he olioli ai vagahau, ha kua kau fakalataha e Tau Tagata Fakaako Tohi Tapu he Atu Motu mo e Kaufakalatahaaga Kolo Toko ke hiki e higoa he tau Fakamoli a Iehova he tau 1931. Ti nakai ni ko e agaga olioli ni hokoia, ka kua lahi foki e mafanatia. Mai he mena nei, kua maeke he tau tagata fakaako Tohi Tapu fou ke fefakamafanaaki e taha ke he taha.—Fakatatai mo e Isaia 43:12.
9. Fefe e logona hifo he tau Kerisiano moli hagaao ke he Taha ne Fakamoli a lautolu ki ai?
9 Ko e mena ia, kua kitia he tau Kerisiano he vaha nei e tonuhia ke mailoga e Taha ko ia ne talahau a lautolu ko e tau Fakamoli, tuga ni he taute he Takitaki ha lautolu ko Iesu Keriso he nofo he lalolagi nei. (Fakakiteaga 1:1, 2) E, mailoga mitaki e lautolu a ia tokotaha, ko e taha ne higoa ko Iehova.—Salamo 83:18.
Fakapuke aki e Olioli mo e Agaga Tapu
10-12. (a) Ko e heigoa e mena ka tupu ka liligi hifo e malolo gahuahua ke he tau tutaki a Iesu? (e) Fefe e tau Fakamoli agaga olioli a Iehova ne manako ke fetauteaki e taha ke he taha?
10 Ne pehe a Iesu Keriso he hana tau kupu fakamavehe ke he hana tau aposetolo: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”—Mataio 28:19, 20.
11 Mailoga, ko e tau Kerisiano fakaako fou to papatiso ni ke he higoa he agaga tapu. Nakai ko e tagata e agaga tapu nei, ka ko e malolo gahuahua he Atua ko Iehova, ne fakagahua e Ia kakano ha ko Iesu Keriso. Ko e aho Penetekoso, ne liligi hifo he Atua ko Iehova mai ia Iesu e malolo gahuahua nei ke he tau tutaki tukulele ha Iesu Keriso. (Gahua 2:33) Kua puke a lautolu ke he agaga tapu nei, e ko e taha he tau talahauaga, po ke tau fua, he agaga tapu ko e olioli. (Kalatia 5:22, 23; Efeso 5:18-20) Ko e olioli ko e fua he fakalagalagaaga. Ko e tau tutaki to fakapuke ke he olioli he agaga tapu. Kua felauaki lahi mo e tau kupu liogi he aposetolo ko Paulo: “Ko e Atua foki hana e amaamanaki, kia fakapuke e ia a mutolu ke he olioli oti, katoa mo e mafola, ha ko e tua; kia ha ha ia mutolu e amaamanaki kua lahi ue atu ke he mana he Agaga Tapu.”—Roma 15:13.
12 Ha kua puke ke he agaga olioli nei, ko e tau Fakamoli a Iehova he vaha nei fakalataha mo e “moto tagata tokologa,” to holo, ki mua e manako ke fefakamafanaaki e taha ke he taha he vaha loto he lalolagi nakai kapitiga nei. Vagahau foki ni he aposetolo ko Paulo ke “fefakamafanaaki.”—Fakakiteaga 7:9, 10; Roma 1:12; 14:17.
Kua Lata Tonu ke Fefakamafanaaki
13. Ko e heigoa e tau kakano ha tautolu ke fefakamafanaaki mo e fakamafana e taha ke he taha?
13 Ha kua nonofo a lautolu he vaha loto he lalolagi ne pule ai a ia ko e totoko ke he tututonu oti kana ti hoko foki ke atua, kua manako e tau Kerisiano ke fefakamafanaaki e fakapotopotoaga Kerisiano he lalolagi katoa, ha kua gahua fakalataha mo e agaga tapu he Atua ko Iehova. (Heperu 10:24, 25; Gahua 20:28) Kua lata tonu a tautolu ke fefakamafanaaki. E, ko e fakaaue ha ia ha tautolu he moua e iloilo moli a Iehova mo e Hana Tama mo e he malolo gahuahua ne fakaaoga e lautolu, ne fakahigoa ai ko e agaga tapu! Ko e fakaaue ha ia ha mautolu ma e amaamanakiaga ne foaki e lautolu! Ko e mena ia ne puke ai ha mautolu a tapuakiaga ke he olioli. Ne tala age a Paulo ke he tau Kerisiano ko lautolu ne tohi hana tau tohi ki ai, ke fefakamafanaaki a lautolu ko e taha ke he taha mo e featihake e taha ke he taha mai he ha lautolu a tua tapu. Kia taute e lautolu e mena nei ‘kia au atu ai foki he pihia ha kua kitia e mutolu kua tata tuai e aho.’ Au atu foki, ka eke ke holoholo kehe he malolo fakapolitika he lalolagi e tau lotu Kerisiano, fakalataha mo e falu he tau lotu pikopiko, ko e mena ia ne manako lahi ai e tuaga nei ke une ki mua e fefakamafanaaki ha tautolu.
14. Ko hai ka fakamafana e taha ke he taha, mo e fakamafana fefe?
14 Ha ko e tau momotua ka takitaki e fakamafanaaga he fuifui mamoe he tau fakapotopotoaga takitaha, kua lata he tau Kerisiano oti ke fefakamafanaaki ko e taha ke he taha, tuga he tala mai he Heperu 10:25. Ka e moli ko e poakiaga Kerisiano a nei. Kaeke ko e tagata he fakapotopotoaga a koe, foaki nakai e koe e fakamafanaaga nei? Liga to manamanatu a koe, ‘Ke maeke fefe ia au? Ko e heigoa haku ka taute?’ Fakamua, ko e fano a koe ke he tau fakafeleveiaaga mo e hau a lagomatai ke he fakatokatokaaga Kerisiano, nakai kia fefakamafanaaki oti pihia e falu he tau matakainaga tane mo e fifine, tuga foki a koe, ne mafanatia ka kitia e falu ne o he tau fakafeleveiaaga he fakapotopotoaga? To fakamafana pihia foki a lautolu he tau fakafifitakiaga hau ha ko e fakauka he tua. Ko e hau a tumau ke he tau fakaakoaga Kerisiano ha kua kitia e tau mena vihi mo e tau mena uka he moui, aua neke tiaki noa, ka kia fakakite e koe e agaga he fakafifitakiaga.
Taofi he Fakaloleloleaga Mai he Tiapolo
15. Ko e ha ne “ita lahi” ai e Tiapolo, mo e hagaao atu ki a hai?
15 Nakai ko tautolu ni ne iloa kua tata tuai e aho a Iehova. Iloa foki he Tiapolo ko Satani. Kua tala mai he Fakakiteaga 12:12 ki a tautolu, ha ha he lalolagi mogonei e oi “ha kua hifo kia mutolu e tiapolo kua ita lahi, ha kua iloa e ia kua tote hana vaha.” Ka e tuga he Fakakiteaga 12:17, kua fakakite ai kua hagaao atu hana ita lahi ki a lautolu ne “omaoma ke he tau poaki he Atua, mo e taofi e talahauaga kia Iesu Keriso.” Nakai fai fakauaua ke he mena ia—kua manako e Tiapolo ke fakalolelole a tautolu! Iloa maali foki e ia e puhala ke lali ke taute aki. Iloa e ia e tau lolelole mo e tau mena vihi ha tautolu, ti gahua mai a ia he tau mena nei.
16. Ko e ha ne fakaaoga ai e Satani e fakalolelole mo kanavaakau?
16 Ko e ha ne fakaaoga ai he Tiapolo e fakalolelole mo kanavaakau? Kakano ha kua fa gahua tumau. Pete ni ko e tagata ne kautu e fakauka ke he tau totoko mo e tau favale mai ka e to ni ke he matahele ko e fakalolelole. Kua manako a Satani ke fakafiu e Atua ko Iehova mo e lali ke fakamoli na maeke ia ia ke liliu kehe e tau tagata mai he fekafekau ki a Ia. (Fakatai 27:11; Fakatatai mo e Iopu 2:4, 5; Fakakiteaga 12:10) Kaeke ke fakalolelole e ia a koe, to fakatupu e ia ki a koe e fakatuai he fekafekauaga hau ke he Atua; po ke taofi e ia a koe, ke lolelole he fakamatala e tala mitaki he Kautu.—2 Korinito 2:10, 11; Efeso 6:11; 1 Peteru 5:8.
17. Ko e heigoa e hufiaaga kelea he fakalolelole ne kitia maali he vaha ia Mose?
17 Ko e hufiaaga kelea he fakalolelole kua mailoga ai ke he mena ne tupu ke he fanau Isaraela i Aikupito he vaha fakamua. Mole atu e tutala a Mose ki a Farao, ne fakalahi ki luga he pule favale na, e kavega mamafa ki a lautolu mo e totoko hana ki a lautolu. Ne tala age e Atua ki a Mose ke fakamoli age ke he tau Isaraela to laveaki e Ia a lautolu, mo e eke a lautolu mo tau tagata Hana, mo e fakahao a lautolu, mo e tamai a lautolu ke he motu he maveheaga. Ne vagahau age pihia a Mose ke he fanau a Isaraela. Ka ko e hokotaki mai he Esoto 6:9: “Ka e nakai fanogonogo a lautolu kia Mose ha ko e loto mamahi mo e gahua uka.” Ka e nakai la poaki malolo atu a Iehova ki a Mose mo e fakamafana ki a ia, kua maeke he mena nei ke fakalolelole a Mose mai he hana manako ke vagahau ki a Farao tuga he poaki age ki a ia.—Esoto 6:10-13.
18. Ko e ha ne manako lahi ai e tau tagata he Atua ke totoko e fakalolelole ne fakatupu he Tiapolo?
18 Kua iloa mitaki he Tiapolo ko Satani e hufiaaga kelea ka moua he fekafekau he Atua ha ko e fakalolelole. Tuga he talahau he Fakatai 24:10: “Kaeke ke fakalolelole a koe ke he aho matematekelea, kua tote ni hāu a malolo.” Ha kua nonofo atu a tautolu ki loto he vaha he fakaotiaga, kua lata ni ia tautolu ke fakamalolo mo e malolo fakaagaga. Ka ko e mena ne mua atu he kelea ha kua tau a tautolu mo e ha tautolu a nakai mitaki katoatoa, tau lolelole, mo e tau hepehepe ne taofi aki a tautolu; ka kua lali a Satani ke fakaaoga lotokai e tau hepehepe nei, kua lata ni a tautolu ke fai lagomatai.
Falanaki Mauokafua ke he Poa a Keriso
19. Ko e heigoa ka lagomatai aki a tautolu ke totoko e fakalolelole, mo e ko e ha?
19 Ko e lagomataiaga lahi ma e mena nei ko e fakatokaaga he lukutoto ne fakaata e Iehova, kakano ha ko Iesu Keriso. To eke a tautolu mo tau tagata kautu ka falanaki mauokafua ke he lukutoto. Kua hagahaga kelea lahi ke fakateaga ke he fakatokaaga nei. E, ko e tau tagata taute mena hehe agaia a tautolu, poke hala, ha ko e tau tagata nakai la mitaki katoatoa. Ka kua nakai lata a tautolu ke fakalolelole mo e tiaki noa, mo e manatu pehe to nakai fai amaamanakiaga, ka mole ia ti mokulu ke he matahele a Satani. Iloa e tautolu kua ha ha ia tautolu e poa katoa ma e hala. Kua maeke he lukutoto ke uta kehe e tau hala. Ti kaeke ko tautolu falu he “moto tagata tokologa,” kua lata ke ha ha ia tautolu e tua katoa mo e falanaki, mena maeke ia tautolu ke unu ha tautolu a tau tapulu mo e fakahina a lautolu he toto he Punua Mamoe.—Fakakiteaga 7:9, 14.
20. Fakakite fefe he Fakakiteaga 12:11 na maeke e patu fakalolelole lahi, ko e Tiapolo, ke fakakaumahala?
20 Kua fakamaama mai he Fakakiteaga 12:10 a Satani ko “ia ne hokotaki e tau matakainaga ha tautolu . . . ne hokotaki a lautolu ki mua he Atua ha tautolu ke he aho mo e po.” To kautu fefe a tautolu he patu hokotaki kelea pihia mo e patu fakalolelole matakutakuina ia? Ko e Fki 12 kupu 11 he veveheaga ia ne moua ai e tali: “Ka e kautu a lautolu kia ia ha ko e toto he Punua mamoe, mo e kupu he tau talahau ha lautolu, kua nakai fakahelehele foki ha lautolu a moui kua hoko ke he mate.” Ti kua lata e tau tagata a Iehova ke tumau e malolo katoa ke he poa lukutoto, ko e toto haia he Punua Mamoe. Kia tumau e fakamalolo, ko e fakamafanaaga haia ne hau he tau fakamoliaga, tutala tumau e tala mitaki he Kautu he Atua mo e tau tagata oti ne maeke ia koe.
21. Fakahanoa fefe a tautolu kaeke ke kau fakalataha mo e gahua he Tiapolo ke fakalolelole e tau matakainaga ha tautolu?
21 Ko e falu a magaaho, kua lauia a tautolu ke he mahani fakahanoa, kua kau fakalataha ni mo e gahua he Tiapolo ke fakalolelole e tau matakainaga ha tautolu. Fakalolelole fefe? Ko e to taha e, fa tuhituhi, fia iloilo lahi, poke molea e fia tututonu. (Fakamatalaaga 7:16) Na igatia oti a tautolu mo e fai mena ne kuku, mo e lolelole ai. Ka e ua fefeua a tautolu mo e tau mena ia tuga ne taute he Tiapolo. Ka kua lata ke vagahau fakamafana atu a tautolu hagaao ke he tau matakainaga ha tautolu mo e tau tagata a Iehova tuga e matakau maopoopo. Kua manako a tautolu ke fakafiafia e taha ke he taha ke ua fakamomoko e taha ke he taha.
Fefakamafanaaki ha kua Tata Tuai e Aho
22, 23. (a) Ko e ha ne nakai toka ni ke he tau momotua ke taute e tau fakamafanaaga? (e) Fakamafana fefe e tau leveki he fakapotopotoaga Kerisiano?
22 Kia eke e tautolu e mena ia mo fifiliaga mauokafua tumau ha tautolu ke fefakamafanaaki e taha ke he taha ha kua tata tuai e aho. Fakamafana e falu ha ko e hau a fifitakiaga he tua mo e tau kupu fakamafana. Fifitaki ki a Iehova mo e Iki ko Iesu Keriso he mena nei. Ua toka ni ke he tau momotua he fakapotopotoaga ke taute e tau fakamafanaaga. Ko e ha, ha kua manako foki e tau momotua ke fai fakamafanaaga a lautolu. Ha kua ha ha ia lautolu foki e tau lolelole mo e tau loto tupetupe tuga ni e tau mamoe oti, ti fakafehagai foki a lautolu mo e tau mena vihi taha ia ni ha ko e levekiaga he tau magafaoa ha lautolu he lalolagi popo nei. Lafi atu ke he tau mena ia, kua moua foki a lautolu he tau mena ne fakamaama e Paulo ko e kapaletu ke he tau fakapotopotoaga. (2 Korinito 11:28, 29) Ko e gahua uka e gahua ha lautolu—ti kua lata ke fakamafana a lautolu.
23 Kia fakamafana fakalahi e koe a lautolu ne ha ha i ai e tau kotofaaga ke leveki e fakapotopotoaga Kerisiano, ke kau fakalataha mo lautolu. Ko e mui tua la ia a koe mogoia ke he fakatonuaga ia Heperu 13:17: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.”
24. Ha ko e tau aho fakalolelole a nei, ko e heigoa ha tautolu kua lata ke taute, mo e ko e ha?
24 Kua nonofo a tautolu he tau aho fakalolelole. To mamate foki e tau tagata he matakutaku mo e talifaki ke he tau mena ke hohoko mai ke he lalolagi, tuga he talahau e Iesu. (Luka 21:25, 26) Ha kua loga lahi e tau mena vihi ne liga ke fakatupetupe mo e fakamomoko, “kia fefakamafanaaki; kia au atu ai foki he pihia ha kua kitia e mutolu kua tata tuai e aho.” Kia mumui tua ke he fakatonuaga mitaki he aposetolo ko Paulo he 1 Tesalonia 5:11: “Ko e mena ia kia fetomaaki a mutolu, mo e fefakamafana[a]ki a mutolu, tuga foki he eke e mutolu.”
Tali Fefe e Koe?
◻ Ko e ha kua lata ai ke lahi e fefakamafanaaki he tau Kerisiano he vaha nei, ke he vaha fakamua?
◻ Maeke fefe he iloilo ke he higoa fakaatua, ke fakamafana e tau tagata a Iehova?
◻ Ko e heigoa e tau puhala ha tautolu takitokotaha ke fakamafana e taha ke he taha?
◻ Ko e ha kua lata ai ke tiaki e tautolu e kau mo e Tiapolo ke fakalolelole e tau matakainaga ha tautolu?
[Fakatino he lau 15]
Ko e tau momotua ka takitaki e fakamafanaaga he fuifui mamoe he tau fakapotopotoaga ha lautolu