Ke Fakalagalaga ai e Fakaalofa mo e Tau Gahua Mitaki—Maeke Fefe?

“Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; . . . ka kia fefakamafanaaki; kia au atu ai foki he pihia ha kua kitia e mutolu kua tata taui e aho.”​—HEPERU 10:24, 25.

1, 2. (a) Aoga lahi he ha ke he tau Kerisiano fakamua ke moua e fakamafanatiaaga mo e fakamaloloaga mai he ha lautolu a feleveiaaga auloa? (e) Ko e fakatonuaga fe ha Paulo ne kua fakakite kua lata ke feleveia auloa?

KUA feleveia fakamumuli a lautolu, he fakakulikuli auloa he poko ne kua fakamau e tau gutuhala. Ke he tau mena oti i fafo, kua takalo ai e hagahaga kelea. Ko e Takitaki ha lautolu, ko Iesu, ko e mole laia he tamate ki mua he tau tagata, mo e kua fita he hataki a ia ke he hana tau tutaki ko e to nakai laukauka mai e tau mena ka taute ki a lautolu, mai he tau mena ne taute ki a ia. (Ioane 15:20; 20:19) Ka e he tutala fanafana a lautolu hagaao ke he ha lautolu a fakahele ko Iesu, he fakalataha auloa liga logona ni e lautolu e haohao mitaki.

² He mole e tau tau, ne fehagai e tau Kerisiano mo e tau mena uka mo e tau favaleaga kehekehe oti kana. Kua tuga e tau tutaki fakamua ia, ne moua e lautolu e mafanatia mo e fakamaloloaga he feleveia auloa. Ko e mena tohia pehenai he aposetolo ko Paulo ia Heperu 10:24, 25: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.”

3. Ko e ha kua maeke ia koe ke pehe ko e mena lahi atu nakai koenaia ko e poakiaga noa ni ia Heperu 10:24, 25 ke feleveia auloa e tau Kerisiano?

³ Kua lahi mua atu mai e kakano he tau kupu ia, he poakiaga ni hokoia ke feleveia auloa tumau. Ko e mena fakatoka e lautolu e matapatu fakaakoaga faka-Atua mai he agaga tapu, ma e tau feleveiaaga Kerisiano oti kana​—mo e moli, ma e tau magaaho oti ka feoaki auloa e tau Kerisiano. Kua mua atu he vaha nei, he kitia maaliali e tautolu kua tata lahi mai e aho a Iehova, ti taute ai he tau fakapehiaaga mo e tau mena hagahaga kelea he fakatokaga mahani kelea nei, ke lata muatua e tau feleveiaaga ha tautolu ke tuga e tau fakamumuliaga nakai haofia, ko e punaaga he malolo mo e fakamaloloaga ma e tau tagata oti. Maeke a tautolu ke taute e heigoa ke pehenai moli? Hanai, kia kumikumi fakamitaki la tautolu mogoia ke he tau kupu a Paulo, he tolu e tau matapatu huhu ka huhu: Ko e heigoa e kakano he “manatu foki a tautolu ko e taha ke he taha”? Ko e heigoa e kakano ke “fakalagalaga ai e fakaalofa mo e tau gahua mitaki”? Ke fakamui aki, maeke fefe ia tautolu ke ‘fefakamafanaaki e taha ke he taha’ he tau vaha uka lahi nei?

“Kia Manatu Foki a Tautolu ko e Taha ke he Taha”

4. Ko e heigoa e kakano ke ‘manamanatu e taha ke he taha’?

⁴ He magaaho ne ole fakamakamaka a Paulo ke he tau Kerisiano “kia manatu foki a tautolu ko e taha ke he taha,” ne fakaaoga e ia e kupu Heleni fakagahuahua ko e ka·ta·no·eʹo, ko e vahega kupu ne kua mua atu e malolo mai he talahauaga mau “ke iloa.” Kua pehe e Theo­log­i­cal Dic­tio­nary of the New Tes­ta­ment ko e hana kakano “ke takitaki e manamanatuaga katoa he tagata ke he taha mena.” Hagaao ki a W. E. Vine, kua maeke foki ke kakano “ke maama katoatoa, ko e manamanatu lahi ki ai.” Ti ko e magaaho ka “manatu foki [e tau Kerisiano] ko e taha ke he taha,” nakai koenaia ko e tau mena noa i luga ka kitia e lautolu ka e tuku katoatoa e lautolu ha lautolu a manamanatuaga iloilo ki ai mo e lali ke moua e maamaaga hokulo lahi.​—Fakatatai Heperu 3:1.

5. Ko e heigoa e falu mahani he tagata kua liga nakai mukamuka ke kitia, mo e kua lata he ha a tautolu ke manamanatu ke he tau mena nei?

⁵ Kua lata ia tautolu ke manatu ko e loga lahi e tau aga he tagata nakai ni hokoia ko e tau mena ne kitia ke he hana fofoga mo e tauteuteaga, tau gahua, po ke aga fakatagata. (1 Samuela 16:7) Kua fa mahani ke ufiufi he aga fakanono e tau manamanatuaga moli po ke aga taufeki fulufuluola. Ko e mena kehekehe lahi mahaki foki e tau tupumaiaga. Kua o mai falu he tau mena tutupu kelea lahi he tau momoui ha lautolu; ka ko e falu he magaaho nei kua fakauka ke he tau tutuaga, ko e tau mena kua uka lahi ia tautolu ke maama. Ti fa oti noa e hogohogomanava ha tautolu ke he falu aga fakatagata he taha matakainaga tane po ke matakainaga fifine ka iloa lahi e tautolu e tau mena he tupumaiaga po ke tutuaga he tagata ia.​—Tau Fakatai 19:11.

6. Ko e heigoa falu puhala kua maeke ia tautolu ke iloa mitaki e taha mo e taha, mo e heigoa e mena mitaki ka moua mai?

⁶ Kua moli, nakai kakano e mena nei ko e fia iloa tala a tautolu ke he tau mena fakatagata he taha tagata. (1 Tesalonia 4:11) Ka e maeke agaia ia tautolu ke fakakite e fia kapitiga. Kua lahi mai e mena ne putoia he mena nei, nakai ko e fakaalofa atu noa ni hokoia he Fale he Kautu. Ka e kua he fifili e taha tagata ne manako a koe ke iloa lahi ti foli ke tutala ki ai he taha magaaho gahoa ato kamata po ke he mole e feleveiaaga? Kua mua atu, ke “fakamalolo ke he fakaalofa ke he tau tagata kehe” he uiina e taha po ke ua e kapitiga ke he kaina hau ma e tau kai mama. (Roma 12:13) Fakakite ko e fia iloa. Fanogonogo. Huhu ko e hau fefe e tagata ia ke iloa ti fakaalofa ki a Iehova, ko e mena liga to lahi ne mena ka kitia mai. Liga to lahi agaia foki e mena ka iloa e koe, he gahua auloa ke he fekafekauaga he fonua. He manamanatu pihia e taha ke he taha to lagomatai aki a tautolu ke fakatupu hake e manamanatuaga fakaalofa moli ke he taha, po ke loto hofihofi noa.​—Filipi 2:4; 1 Peteru 3:8.

‘Ke Fefakalagalaga aki e Taha ke he Taha’

7. (a) Lauia fefe e tau tagata he fakaakoaga a Iesu? (e) Ko e heigoa ne taute aki hana fakaakoaga ke malolo lahi?

⁷ Ka manamanatu a tautolu ko e taha ke he taha, kua mautauteute lahi a tautolu ke fefakalagalaga aki, ke ole fakamakamaka e taha ke he taha ke gahuahua. Mua atu ke he tau motua Kerisiano e matagahua lahi nei. Ke he magaaho ne vagahau a Iesu ke he tau tagata, kua totou e tautolu: “Ati ofomate ai e lanu tagata ke he hana tau kupu.” (Mataio 7:28) He taha magaaho ne eke foki e falu kautau ne kua fakafano atu ke tapaki a ia ke o mai kehe ia Iesu mo e talahau: “Kua nakai fai tagata taha ke vagahau ke tuga e tagata na.” (Ioane 7:46) Ko e heigoa ne taute aki e fakaakoaga a Iesu mo mena malolo lahi? Ko e fakatataaga ka he loto hukia? Nakai; ne vagahau a Iesu mo e lilifu. Ka e, foli tumau a ia ke hokotia ke he tau loto he hana a tau tagata fanogonogo. Kakano he manamanatu a ia ke he tau tagata, iloa tonu e ia e mena ke omoi aki a lautolu. Ne fakaaoga e ia e tau fakataiaga mukamuka kua atagia mai e tau mena moli he moui he tau aho oti. (Mataio 13:34) Ke tuga e mena ia, ko lautolu ne fakamoli e tau kotofaaga he tau feleveiaaga ha tautolu, kua lata ke fifitaki ki a Iesu, he taute e tau lauga ke mafana mo e alaala kua omoomoi lahi. Ke tuga a Iesu, kua maeke ia tautolu ke kumi fakalahi a tautolu ke moua e tau fakataiaga kua lata tonu mo e ha tautolu a faoa fanogonogo mo e hokotia ke he tau loto ha lautolu.

8. Fakalagalaga fefe e Iesu mai he hana fakafifitakiaga, mo e ke he mena nei maeke fefe ia tautolu ke fifitaki ki a ia?

⁸ He fekafekau ke he ha tautolu a Atua, liga maeke ia tautolu oti ke fakalagalaga e taha ke he taha he fakatoka e fakafifitakiaga. Ne fakalagalaga lahi moli e Iesu a lautolu ne fanogonogo ki a ia. Ne ofania e ia e gahua he fekafekauaga Kerisiano mo e fakatokoluga e fekafekauaga. Pehe a ia kua tuga e tau mena kai ki a ia. (Ioane 4:34; Roma 11:13) Maeke ke pikitia lahi e aga alaala pihia. Maeke nakai ia koe ke fakakite pihia hau olioli ke he fekafekauaga? He fakaeneene lahi foki ke nakai hagahaga palau, tala age e tau mena tutupu mitaki ne moua e koe ke he falu he fakapotopotoaga. He magaaho ka uiina e koe e falu ke gahua mo koe, mataala ke kitia ko e maeke fefe ia koe ke lagomatai a lautolu ke moua e fiafia moli ka tutala mo e falu hagaao ke he ha tautolu a Tufuga Homo Ue Atu, ko Iehova.​—Tau Fakatai 25:25.

9. (a) Ko e heigoa e falu puhala ka fakalagalaga aki e falu ne kua lata ia tautolu ke kalo kehe mai, mo e ko e ha? (e) Ko e heigoa kua lata ke omoi aki a tautolu ke tuku atu a tautolu ni ke he fekafekau a Iehova?

⁹ Ka e fakaeneene lahi, ke aua fakalagalaga e falu ke he puhala hehe. Tuga a nai, liga fakahanoa a tautolu ti fakahukia a lautolu ke loto agahala he nakai lahi e mena ne taute. Liga nakai ko e taute pauaki ka e fakama ne tautolu a lautolu he fakatatai a lautolu mo e falu ne kitia moli ko e gahua lahi, po ke liga fakatoka foki e tautolu e tau puhala mao kikiha mo e ekefakakelea a lautolu ne nakai tatai mo e mena ia. Liga maeke he taha he tau lagatau nei ke fakalagalaga e falu ke gahua ke he magaaho ku, ka e nakai tohia e Paulo, ‘Ke fakalagalaga ai e loto agahala mo e tau gahua mitaki.’ Nakai, kua lata ia tautolu ke fakalagalaga ke fakaalofa, ti eke mogoia e tau gahua ke mui mai ha ko e omoiaga mitaki he loto. Nakai lata ia taha ke omoomoi lahi ni he manamanatu ko e manamanatu fefe e falu he fakapotopotoaga ki a ia ka nakai fetataiaki mo e tau amaamanakiaga ia.​—Fakatatai 2 Korinito 9:6, 7.

10. Ko e ha ai kua lata a tautolu ke manatu, nakai ko tautolu e tau iki ke he tua he falu?

¹⁰ Ke fakalagalaga e taha ke he taha kua nakai kakano ke pule e taha ke he taha. Pete ni kua lahi hana pule malolo ne age he Atua, kua holoilalo e fakamanatuaga he aposetolo ko Paulo ke he fakapotopotoaga Korinito: “Nakai ko e mena fia pule a mautolu ke he ha mutolu a tua.” (2 Korinito 1:24) Kaeke kua tuga a ia, to fakatokolalo foki a tautolu ke mailoga, nakai ko e gahua ha tautolu ke fifili kua lata ke lahi fefe e tau mena ka taute he falu he fekafekauaga ki a Iehova, po ke takitaki ha lautolu a loto logona hifo ma lautolu ke he falu fifiliaga fakatagata, to maeke ai a tautolu ke kalo kehe mai ke aua ‘tututonu ke lahi ue atu,’ nakai olioli, mao kikiha, hagahaga manatu kelea, po ke mua ke manamanatu ke he poakiaga. (Fakamatalaaga 7:16) Nakai fakalagalaga fiafia e tau mahani pihia; kua fakapehia na lautolu.

11. Ko e heigoa ne omoi aki e foakiaga he tau mena fakaalofa he tau aho ne talaga e faituga uta fano ha Isaraela, mo e maeke fefe ke moli ai he vaha ha tautolu?

¹¹ Kua manako a tautolu ke taute oti e tau laliaga ke he fekafekauaga a Iehova ke tatai mo e agaga tuga i Isaraela i tuai, he magaaho ne lata ke moua mena fakaalofa ke talaga aki e faituga uta fano. Kua totou ia Esoto 35:21: “Ti o mai ai a lautolu, ko lautolu oti kua omoi ki ai ha lalu tau loto, mo lautolu oti kua makai ki ai ha lalu tau loto, kua ta mai e lautolu e poa kia Iehova mo e gahua.” Nakai mai he mafoa ne fakaohooho aki a lautolu ka kua o hake mai ni he tau loto. Ko e moli, pehenai e totouaga fakamahao tonu he vagahau Heperu “ko lautolu oti kua lagaki hake ai ha lalu tau loto” ke taute e tau mena fakaalofa pihia. (Fakalilifa ha mautolu.) Ke lafi ki ai, kia lali fakalahi a tautolu ke lagaki hake e tau loto he falu he tau magaaho oti ka lafi auloa a tautolu. Kua maeke he agaga a Iehova ke taute e mena ne toe.

‘Kia Fefakamafanaaki’

12. (a) Ko e heigoa e falu kakano he kupu Heleni ne fakaliliu ‘fefakamafanaaki’? (e) Kaumahala fefe e tau faoa faihoani a Iopu ke fakamafanatia a ia? (i) Lata he ha a tautolu ke aua fakafili atu e taha ke he taha?

¹² He magaaho ne tohi e Paulo kua lata a tautolu ‘kia fefakamafanaaki,’ ne fakaaoga e ia e taha faga kupu Heleni pa·ra·ka·leʹo, ko e mena maeke foki ke kakano ‘ke fakamalolo, ke fakamafana atu.’ He liliuaga Sep­tu­a­gint Heleni, ko e kupu taha nei ne fakaaoga ia Iopu 29:25, he mena kua fakamaama mai hagaao ki a Iopu ko ia ko e tagata ne kua fakamafana a lautolu ne tagi tautau. Ka e kehe muikau he magaaho ne eke ni a Iopu ke pehia he tau mena uka lahi mahaki, nakai moua e ia ha fakamafanaaga pihia. Ko e hana kau “fakamafana” tokotolu, lavelave lahi a lautolu he fakafili ki a ia mo e lauga ki a ia kua kaumahala a lautolu ke maama a ia po ke momoko he fakaalofa ki a ia. Ko e moli hanai, ke he tau talahauaga oti ha lautolu nakai taha e mena ne totoku foki e lautolu e higoa a Iopu. (Fakatatai Iopu 33:1, 31.) Kua kitia moli, ko e onoono lahi na lautolu ki a ia ko e lekua nakai ko e tagata. Nakai ofo mogoia, ko e mena haia ne tagi aue ai a Iopu ki a lautolu he hohoha: “Ane mai kua fehikitaki a mutolu mo au”! (Iopu 16:4) Kua pihia foki he vaha nei, kaeke kua manako a koe ke fakamafana ke he taha tagata, kia loto maama ke fakaalofa atu! Aua neke fakafili. Tuga he talahau mai ia Roma 14:4, “ko hai kia a koe kua fakafili atu ke he fekafekau he taha tagata? Kua tumau a ia po ke veli ke he hana ni a iki; ka e tumau ni a ia, ha kua maeke ke he Atua ke fakatumau a ia.”

13, 14. (a) Ko e matapatu kupu moli fe kua lata ia tautolu ke tala age moli ke he ha tautolu a tau matakainaga tane mo e tau matakainaga fifine ke maeke ai ke fakamafana a lautolu? (e) Fakamalolo fefe he agelu a Tanielu?

¹³ Ko e taha faga pa·ra·ka·leʹo mo e kupu fakahigoa ne matutaki ki ai ne kua fakaliliu ai ko e “fakamafana” ia 2 Tesalonia 2:16, 17: “Ka ko e Iki ni ha tautolu ko Iesu Keriso, katoa mo e Atua ko e Matua ha tautolu, ko ia kua fakaalofa mai kia tautolu, mo e foaki mai e fakamafanaaga tukulagi, mo e amaamanaki mitaki ke he Fakaalofa noa, Kia fakamafana e ia ha mutolu a tau loto, mo e fakatumau a mutolu ke he tau kupu mitaki oti mo e tau gahua mitaki oti.” Kia mailoga ne tutaki e Paulo e manatu he fakamafanaaga he tau loto ha tautolu mo e matapatu kupu moli ko e fakaalofa a Iehova ki a tautolu. Kia fakamalolo mo e fakamafana atu ai a tautolu e taha ke he taha he pehi ko e moli e kupu moli aoga lahi ia.

¹⁴ He taha magaaho kua tupetupe lahi e perofeta ko Tanielu he mole he kitia e fakakiteaga matakutakuina kua pehe a ia: “Kua mole atu haku a fulufuluola, ti fakapula ni au, kua nakai tuai fai malolo au.” Kua fakafano atu e Iehova e agelu ne fakamanatu lagaloga atu ki a Tanielu ko ia ko e “tagata ofania lahi” ke he tau mata he Atua. Ko e fua? Ne tala age a Tanielu ke he agelu: “Kua fakamalolo mai e koe au.”​—Tanielu 10:8, 11, 19.

15. Lata fefe e tau motua mo e tau leveki faifano ke lagotatai e navaaga mo e fakahakoaga?

¹⁵ Hanai mogoia, e taha puhala foki ke fakamafana atu ke he falu. Nava atu ki a lautolu! Ha ko e mena mukamuka lahi foki ke tukumuli ke he aga ekefakakelea tagata mo e aga vale. Kua moli, kua ha ha ai e tau magaaho kua liga lata ke fakahako, mua atu mai he tau motua mo e tau leveki faifano. Ka kua mitaki ma lautolu kaeke kua manatu e lautolu ha ko e tau fakamaloloaga fakamafanatia loto ha lautolu ka e nakai ma e aga fakafili tagata.

16. (a) Ka fakamafana atu ki a lautolu ne fakaatukehe, fa mahani he ha ke nakai ni lahi ke ole fakamakamaka ki a lautolu ke fakalahi e tau gahua he fekafekauaga a Iehova? (e) Lagomatai fefe e Iehova a Elia he magaaho ne fakaatukehe a ia?

¹⁶ Kua lata mua atu e fakamafanaaga mo lautolu ne fakaatukehe, mo e amaamanaki a Iehova ko tautolu ko e tau faoa Kerisiano ke eke mo punaaga he lagomatai​—mua atu kaeke ko e tau motua a tautolu. (Tau Fakatai 21:13) Maeke ia tautolu ke taute e heigoa? Liga nakai mukamuka e tali tuga ke tala age ni ki a lautolu ke gahua lahi ke he fekafekauaga a Iehova. Ko e ha? Kakano ha kua fakahaha e mena ia ko e tupu e fakaatukehe ha lautolu he nakai gahua lahi a lautolu. Ka e nakai fa pihia e tuaga. Ne fakaatukehe lahi mahaki e perofeta ko Elia he taha magaaho, kua manako a ia ke mate; ka e hoko e mena nei he magaaho kua lavelave lahi a ia he fekafekau ki a Iehova. Taute mena fefe mogoia a Iehova ki a ia? Kua fakafano atu e ia e agelu ke foaki e tau lagomatai kua lata. Kua hafagi atu e Elia hana loto kapaletu lahi ki a Iehova, kua fakakite ai ko e logonatia e ia ko e nakai aoga a ia tuga ne tau tupuna mamate hana, ko e taute teao oti hana gahua, mo e tu kikioka tokotaha a ia. Ne fanogonogo a Iehova mo e fakamafanatia a ia mai he tau fakakiteaga ofoofogia ke he Hana malolo mo e tala age fakamoli kua nakai nofo tokotaha a ia mo e ko e gahua ne kamata e ia to fakakatoatoa ni. Mavehe foki a Iehova ke age ki a Elia e hoa ke fakamahani ati eke tuai fakamui ke hukui a ia.​—1 Tau Patuiki 19:1-21.

17. Maeke fefe e motua ke fakamafana atu ke he tagata ne to muatua e kaka lahi ki a ia ni?

¹⁷ Kua fakamafanatia lahi ha! Kia fakamafana atu pihia foki a tautolu ki a lautolu he vahaloto ha tautolu ne hukia e tau loto. Lali ke maama a lautolu he fanogonogo! (Iakopo 1:19) Foaki atu e fakamafanaaga mai he Tohiaga Tapu ne kua lata pauaki mo lautolu takitokotaha. (Tau Fakatai 25:11; 1 Tesalonia 5:14) Ke fakamalolo a lautolu ne to muatua e kaka lahi ha lautolu ki a lautolu ni, kua maeke he tau motua ke foaki e tau fakamoliaga mai he Tohiaga Tapu, ko e fakaalofa a Iehova mo e uho a lautolu ki a ia.a Maeke he tutalaaga ke he lukutoto ke eke mo kanavaakau malolo lahi ke fakamafanatia a lautolu ne logona hifo ko e nakai aoga a lautolu. Liga lata ke fakakite ke he tagata maanu ha ko e falu agahala he vaha kua mole, kua fakamea he lukutoto a ia kaeke kua tokihala moli lahi a ia mo e fuluhi kehe mai he ha mahani pihia.​—Isaia 1:18.

18. Kua lata fefe e fakaakoaga ke he lukutoto ke fakaaoga ke fakamafana aki e timotua ne fakamatematekelea he taha tagata, tuga ke he fakapilo pule noa?

¹⁸ Kua moli, kua lata e motua ke manamanatu ke he mena tutupu ke maeke ai ke fakaaoga fakamitaki e fakaakoaga ia. Kia manamanatu la ke he fakataiaga: Kua atagia mai e poa lukutoto a Keriso he tau poa manu he Matafakatufono a Mose, ko e tau mena kua lata ma e fakamagaloaga he tau agahala. (Levitika 4:27, 28) Kua nakai ha ha i ai ha poakiaga, ko e lata e timotua ne fakapilo pule noa he taha ke taute e tau poa pihia ma e hala. Kua pehe mai e matafakatufono ke “aua neke eke ai ha mena” ke fakahala e fifine. (Teutaronome 22:25-27) He vaha nei, kaeke kua tapaki mo e fakapilo pule noa he taha e matakainaga fifine mo e taute he mena nei a ia ke logona hifo ko e kiva mo e nakai aoga, kua lata kia ke talahau fakalahi ko e lata lahi a ia mo e lukutoto ke fakamea a ia mai he agahala ia? Nakai pihia. Nakai agahala a ia he ekefakakelea he taha a ia. Ko e tagata ne fakapilo pule noa ne agahala mo e kua lata tonu ke moua e fakameaaga. Ka e pete ni ia, ko e fakaalofa ne fakakite e Iehova mo Keriso he foaki mai e lukutoto, ko e mena maeke ke fakaaoga ke fakakite atu e fakamoliaga ko e nakai kelea a ia ke he tau mata he Atua ha ko e agahala he tagata kehe, ka e uho a ia ki a Iehova mo e ha ha agaia he hana fakaalofa.​—Fakatatai Mareko 7:18-23; 1 Ioane 4:16.

19. Kua lata he ha a tautolu ke nakai amaamanaki ko e toe fakamafanatia oti e tau feoaki fakalataha mo e tau matakainaga tane mo e tau matakainaga fifine ha tautolu, ka ko e heigoa e fifiliaga ha tautolu kua lata?

¹⁹ E, pete ni ko e fefe e tuaga he moui he tagata, pete ni ko e fefe e tau tutuaga fakamamahi lahi ne kua liga fakapouli kikio e vaha kua mole hana, kua lata a ia ke maeke ke moua e fakamafanaaga mai he fakapotopotoaga he tau tagata a Iehova. Mo e to moua foki e ia kaeke kua eketaha a tautolu takitokotaha ke manamanatu e taha ke he taha, ke fakalagalaga e taha ke he taha, mo e fakamafana e taha ke he taha he tau magaaho ka feoaki fakalataha a tautolu. Ha ko e mena nakai mitaki katoatoa, kua fa kaumahala ai a tautolu oti ke taute e tau mena ia he tau magaaho. Ha ko e mena ia, fa fakatolalo ne tautolu e taha ke he taha mo e fakamamahi foki he taha e taha he falu magaaho. Lali ke nakai onoono lahi ke he tau kaumahala he falu ke he tau mahani nei. Kaeke kua onoono a koe ke he tau hehe, kua hagahaga kelea a koe ke eke ke fakafili tagata ke he fakapotopotoaga mo e liga to veli foki ke he matahele ne manako lahi a Paulo ke lagomatai a tautolu ke kalo kehe mai, ko e mena nei, ke tiaki e toloaga fakalataha ha tautolu. Kia nakai tupu e mena ia! He eke e fakatokaaga tuai nei ke hagahaga kelea lahi mo e fakapehia, kia lata a tautolu ke fifili katoatoa ke taute e tau mena oti kua maeke ia tautolu ke taute ke ati hake ha tautolu a feoakiaga fakalataha he tau feleveiaaga​—mo e mua atu foki he kitia e tautolu kua tata lahi mai e aho a Iehova!

[Tau Matahui Tala]

To Tali Fefe e Koe?

◻ Kua lata muatua he ha e tau feleveiaaga mo e tau feoakiaga fakalataha ha tautolu he tau aho nei ke fakamafanatia?

◻ Ko e heigoa e kakano ke manamanatu e taha ke he taha?

◻ Ko e heigoa e kakano ke fakalagalaga e taha ke he taha?

◻ Ko e heigoa ne putoia he fakamafanatiaaga he taha ke he taha?

◻ Maeke fefe ke fakamafanatia a lautolu ne fakaatukehe mo e loto lolelole?

[Fakatino he lau 27]

Lagomatai he mahani fakamokoi a tautolu ke feiloaaki e taha mo e taha

[Fakatino he lau 29]

He magaaho ne fakaatukehe a Elia, ne totonu lahi a Iehova he fakamafana atu ki a ia