Lata ke Fakauka he Fakamatala
1 He molea e 30 e tau, ne olioli he aposetolo ko Paulo e feua fiafia ko e tagata fakamatala. Tuga ni ha gahua uho lahi, ne fehagai e gahua fakamatala haana mo e tau paleko. (2 Kori. 11:23-29) Ka e nakai okihia a Paulo. (2 Kori. 4:1) Ne maama e ia ko e malolō ke fakauka he taute e feua haana to moua mai ia Iehova. (Filipi 4:13, NW) He mailoga e fakafifitakiaga haana he fakauka tua fakamooli, maeke ia Paulo ke pehē: “Kia fifitaki mai a mutolu kia au, tuga na au kia Keriso.”—1 Kori. 11:1.
2 Fakauka ke he Tau Kamatamata he Vahā Nei: He tau aho takitaha, tokologa he tau matakainaga ha tautolu ne fehagai mo e vaiga, totokoaga, po ke ekefakakelea mai he tau tagata he magafaoa, tau kapitiga gahua, po ke tau kapitiga aoga. (Mata. 10:35; Ioane 15:20) Liga pihia e mena ne tupu ki a koe. Ke he taha faahi, liga lauia a koe mo e lekua he malolō tino, po ke liga taufetului he tau aho takitaha ke totoko e tau futiakiaga mo e tau kamatamata ne tauhele e tua mo e fakauka haau. Maeke ia tautolu ke moua e fakamalolō he manamanatu ke he fakafifitakiaga he tau fekafekau tua fakamooli i tuai ti pihia mo lautolu e tau matakainaga Kerisiano he vahā nei ne fehagai mo e kautū mai he tau paleko.—1 Pete. 5:9.
3 Maeke ia tautolu ke moua e malolō ke mauokafua tumau ke he fekafekauaga ha tautolu he kitia mooli kua “tapulu a [t]autolu ke he tau tapulu tau katoa he Atua.” (Efeso 6:10-13, 15) Ko e liogi ma e fakauka kua aoga lahi foki. Kua foaki he Atua e agaaga tapu haana ke maeke ia tautolu ke fakauka ke he tau kamatamata. (2 Kori. 6:4-7) Ke kautū he tauaga fakaagaaga ha tautolu, kua latatonu ia tautolu ke omaoma ke he tau fakamanatuaga he Atua ke fakafoou e tau aga ha tautolu. (Sala. 119:24, 85-88) Tuga ne liga totou lagaloga he tama e tohi haana mai he matua taane ofania, kua fakamalolō e pipiaga ha tautolu mo Iehova he totou e Tohi Tapu he tau aho takitaha. Kua moua e tautolu e pulotu ke fahia ke he tau kamatamata he fakaako fakatagata tumau, ti fakaatā e manamanatuaga he Atua ke fakalagalaga e tau fifiliaga ha tautolu mo e fakamalolō e mahani fakamooli ha tautolu.—Fakatai 2:10, 11.
4 Moua e Tau Monuina he Fakauka: Pihia e mena ne tupu ki a Paulo, ko e tua fakamooli ha tautolu ka e taute e fekafekauaga ha tautolu kua fakafiafia e loto a Iehova ti tamai e tau monuina ki a tautolu mo e falu. (Fakatai 27:11) Kia eketaha a tautolu ke fakatumau ke he fekafekauaga, ti fakamooli kua mauokafua e tua ha tautolu ti kua “mua hana mitaki ke he auro ke mole atu, ka e kamatamata ni ke he afi.”—1 Pete. 1:6, 7.